लूका 8 - Muria Far Western

येसुना सेवातिगा आसकना मदत

¹ असके पजा, येसु सेहेर-सेहेर नाट-नाटेने हन्जुन, परमेस्वरना राज्यता सबोय सोबाता पोल्लोतुन वळकसोरिन अनि वेहचोरिंग वलियन्दुर, येसुनोरक बारा खास चेलालोरक वने ओनासंग मतोरक।

² अनि दुष्टात्मांगताल अनि बिमारिहताल सुदरेह किस मतोर हुचुक आसक अनि सात दुष्टात्मांग टन्डस मतोर मगदलनिता मरियम,

³ अनि हेरोदेस राजानोर कोटीवाले कुसाना मुत्ते योहन्ना; अनि सुसन्नाह; अनि आपुना संपतिते येसुना अनि ओनोर चेला लोकुरकुन सेवा किन्दुंग दुसरो पकाय आसक वने ओनासंग मन्दु।

विजा वीत्वालना पिटो

⁴ अनि सेहेर-सहेर नाट-नाटेनोरक लोकुरा उन्दि पकाय हजोर भीळ येसुना हेरे वायिला लाकतुरक असके येसु लोकुरकुन उन्दि पिटो वेहतुर:

⁵ “वरोर विजा वीतवाल मानेय विजा वितान साटि हतुर। अनि ओर विजा वितानपा हुचुन विजा हरदा हेरे अरतुंग; अनि लोकुरक हनेक-वानेक ओयकतुरक, अनि आबारतांग पिटेंग वासुन अवेहकुन तितुंग।

⁶ अनि दुसरो हुचुन विजा कल्कनिगा अरतुंग, अनि मोळियतुंग, मति वल हिले आसि इन्जोर वतितुंग।

⁷ अनि दुसरो हुचुन विजा काटा पोदेलानांग नडुम अरतुंग, अनि अव काटा पोदेलाना संगेय बोरसुन काटा पोदेलंग विजातुन नोवचतुंग।

⁸ अनि दुसरो हुचुन विजा सोबाय जागातिगा अरतुंग। अनि अव होळियसुन उन्दि नुर पट इचोन फसल आतुंग।” अनि पजा येसु हजोर लेंगते “निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट” इन्जोर इतुर।

विजा वीत्वालना पिटोता अर्थ

⁹ अनि येसुनोरक चेलालोरक येसु वेहतोर अद पिटोता अर्थ बाताल मन्ता इन्जोर पुच्चेमातुरक।

¹⁰ असके येसु आपुनोर चेलालोरकुन इतुर, “मिकुन परमेस्वरना राज्यता गुप्त पोल्लोतुन समजेमायान साटि समज हितोर। मति दुसरोलोरकुन, ‘ओरक हुळान्तोर मति हुळवाप साटि अनि केन्जुन वने मति समजेमायवाप साटि’ पिटोते करिहला लागतुर।”

¹¹ असके येसु पिटोता अर्थतुन वेहतुर: “विजा परमेस्वरना पोल्लो आन्दु।

¹² हुचुलोर लोकुरक परमेस्वरना पोल्लोतुन केन्जतुरक मति ओरक विस्वास किसुन मुक्तितुन कलियमा इन्जोर सयतान वासुन बदाम आबारतांग पिटेंग विजानुंग तितुंग अदामे ओरा मन्दे परमेस्वरना पोल्लोतुन टन्स हिन्तोर। ओरक हरिता हेरेटांग अरतांग बिजा लेहका मन्तोरक।

¹³ दुसरो हुचुलोर लोकुरक परमेस्वरना पोल्लोतुन केन्जुन गिरदा आसोरिंग विस्वास किन्तोरक, मति हिर हिले मरा लेहका ओरा विस्वास कमि मन्ता इन्जोर हुचुक बेरांग विस्वास किन्तोरक। मति पजा ओरागा परिक्षा वान्ता अद बेरा आपुना विस्वास हरचिंतोरक, ओरक कलदा जागादिगा अरतांग विजा लेहका मन्तोरक।

¹⁴ अनि दुसरो हुचुलोर लोकुरक परमेस्वरना पोल्लो केन्जुन विस्वासते मुने दान्तोरक मति ओरक आपुना धन संपतितुन अनि जिवोतमेन तिन्दान-उन्डानातिगा पसेमास बराबर विस्वासता अनुसार बरोबर मनो आयनुरक। ओरक काटा पोदेलातिगा अरतांग विजांग लेहका मन्तोरक।

¹⁵ मति इमान्दारिते अनि सहेनकिस पोसोरिंग परमेस्वरना पोल्लो मानेमास ताकान्तोरक ओर लोकुरक सोबाता जागाते अरतांग विजांग लेहका मन्तोरक।”

वेळिचितुन मकिहच इरमाट

¹⁶ अनि येसु असा इतुर, “टिवरितुन पय्टेकिसुन बोरे अळका अडिय मुच इरोरक अनि कटुल अडिय वने इरोरक। मति लोपा हनवालोरकुन वेळिचि आयि इन्जोर कोपेलातिगा इरान्तोरक।

¹⁷ अनि सबोय रहस्य बाहरो दिसार अनि बाताले मकिहतोर अद वने बाहरो दिसार, बाहरटोर सबोयलोरकुन समजेमायार।

¹⁸ इन्जोर निमाट नावा पोल्लो बदाम केन्जान्तोरिट इन्जोर हुशयार मन्ट। सोबाय मन लावेकिसुन केन्जान्तोर ओरकुन सबोय समजेहकियानुर, अनि सोबाय मन लावेकिस केन्जोर ओर लोकुरकनिकेडाल आपुना समजेमान्तोर अदेन वने वापस येतानुर।”

येसुना खरोय अवहरि अनि तमोलोरक

¹⁹ येसुना अवहरि अनि येसुनोर तमोलोरक येसुना हेरे वातुरक, मति लोकुरा भीळता मारे येसुना हेरे हन्दिला परोर आतुरक।

²⁰ असके वरोर मानेय येसुना हेरे हन्जुन, “निया अवहारि अनि निवोर तमोलोरक बाहरो नितितोरक, अनि निकुन मिलेमायान साटि वातोरक” इन्जोर इतुर।

²¹ इद केन्जुन येसु लोकुरकुन, “परमेस्वरना पोल्लोतुन केन्जुन अदेन मानेमान्तोरक ओरक नावोर अवाल अनि तमो आन्दुरक” इदाम उत्तर हितुर।

येसु हुरेमाटियालतुन शान्ति हिन्तोर

²² अनि उन्दि दिया येसु अनि ओनोरक चेलालोरक डोंगातिगा अन्जतुरक अनि येसु चेलालोरकुन इतुर, “वाट, माक इद हजोर नहारता आरपार दाकाट” अनि ओरक डोंगातुन टन्डसितुरक।

²³ अनि डोंगा हन्दिला आस मन्दु, अनि येसु डोंगातिगा हुन्चतुर। असके नहारतिगा हजोर हूरेमाटियाल वात, अनि डोंगा एते निन्दिला लाकतु, अनि ओरक पकाय तकलिपते मन्तोरक।

²⁴ असके चेलालोरक येसुना हेरे वासुन ओन तेहतुरक, “स्वामि! स्वामि! माक ते नहारतिगा मुळंच हायिला आतोरोम!” इन्जोर इतुरक। असके येसु तेचुन हुरेमाटियालतुन अनि एतांग हजोर लाटानुंग रांगतुर; अनि अव कमेक आतुंग, अनि शान्ति आतु।

²⁵ असके येसु चेलालोरकुन, “बाक्या निमाट नावागा इचोन कमि विस्वास किन्तोरिट बहे?” इन्जोर इतुर। मति चेलालोरक वरियस, “येर बोर आन्दुर? ओद हुरेमाटियालतुन अनि एतुन वने आग्या हिन्तोर, अनि अव सबोय येसुनांग केन्जान्तांग” इदाम वरोन दुसरोनसंग दंगे मास वळकिला लाकतुरक।

दुष्टात्मा पयताल मानेयतुन येसु सुदरे किन्तोर

²⁶ असके येसु अनि ओनोर चेलालोरक गिरासोनिया देशतिगा अवतुरक, अनि इद गलील प्रदेशता मुने मन्ता।

²⁷ अनि येसु नहारता टकातिगा अवतुर असके अद सहेरतोर वरोर मानेय येसुन मिले मायान साटि वातुर, ओनिगा दुष्टात्मांग मन्दुंग। पकाय दियांग मुनेटाले दुष्टात्मांग ओन पयिस मन्दुंग। अनि ओर पकाय दियांगताल कपळांग करोर आस अनि लोतिगा मनोर आस बिच गुडिनांग नडुम मन्दुर। ओना कय अनि कालकुन साकळिते दोहन्दुरक मति ओर अवेकुन देहचिंदुर अनि दुष्टात्मा ओन सुनसान जागातिगा ओसुन अगा ओन वलिहिन्दुंग।

²⁸ येसु अद दुष्टात्मातुन ओर मानेयनिकेडाल पसियस हन्दाना आग्या हिस मन्दुर।

²⁹ अनि दुष्टात्मांग पयतोर मानेय येसुन हुळसुन किलसोरिन येसुना मुने अरसुन “हे सबोयताल हजोर परमेस्वरनोर मरि, निकुन नावाताल बाताल बुतो मन्ता? नाकुन पकाय तकलिप हेमा इदाम नना निकुन विनन्ति किन्तोना!” इन्जोर हजोर लेंगदे इतुर।

³⁰ अनि येसु दुष्टात्मा पयतोर मानेयतुन, “निया बाताल पोरोय मन्ता?” इन्जोर पुच्चेमातुर ओर इतुर, “सेयना,” बाक्याकि पकाय दुष्टात्मांग ओनिगा उच मन्दुंग।

³¹ माकुन नरकता गुमयाते हन्दाना आग्या हेमा इदाम दुष्टात्मांग येसुन विनन्ति कितुंग।

³² अनि अद मटातिगा पदिना हजोर उन्दि गोहडि मेयिला आस मन्दुंग अवेहकुन हुळस माकुन अव पदिनिगा हन्दिला हिम इन्जोर दुष्टात्मांग येसुन विनन्ति कितुंग। अनि येसु दुष्टात्मातुन हन्दाना आग्या हितुर।

³³ अनि दुष्टात्मांग ओर मानेयतिगाडाल पसियसुन पदिंगनिगा होळियतुंग, अनि अव पदिना गोहडि घाटाडताल विचोरिंग हजोर नहारतिगा हन्जुन अरतुंग अनि मुळिन्चुन हातुंग।

³⁴ असके पदिंग मेहवालोरक इव सबोय पोल्लोतुन हुळसुन अगडाल वितितुरक अनि सेहेरतिगा अनि नाहकनिगा हन्जुन ओरक हुळताल पोल्लोनुंग वेहतुरक।

³⁵ अनि आता पोल्लोनुंग हुळान साटि लोकुरक पसियस येसुना हेरे वातुरक, दुष्टात्मांग पसियिस मता ओन सन्दरांग करसुन सोबाय बुद्धिते येसुना काल्कना हेरे कमेक उदितोर हुळसुन लोकुरक वरियतुरक।

³⁶ दुष्टात्मांग पयताल मानेय बदाम बेस आतुर इन्जोर पदिंग मेहवालोरक ओर लोकुरकुन वेहतुरक।

³⁷ असके गिरासेन देशतोरक हेरे गुरेटोरक सबोय लोकुरक पकाय वरियस मावा हेरेटाल हन इन्जोर येसुन विनन्ति कितुरक। अदाम येसु डोंगातिगा उचुन मलस हन्दिला लाकतुर।

³⁸ असके दुष्टात्मांग पसियस हतोर ओर मानेय येसुनासंग मन्दिला साटि परवांगि तलकतुर,

³⁹ मति येसु ओन इतुर, “निमा आपुना लोतिके मलस हन्जुन परमेस्वर निया साटि कितोर हजोर हजोर बुतोतुन लोकुरकुन वेहा” इदाम वेहचुन येसु ओन लोहतुर। अनि ओर मानेय हन्जुन येसु नावा साटि बदाम हजोर हजोर बुतो कितोर इन्जोर सबोय सेहेर नाहकनिगा वेहन्दुर।

आयिरना पेडि अनि उन्दि बिमार आळ

⁴⁰ अनि येसु गिरासेना देशतिगाडाल मलस हन्जुन गलील प्रदेशतिगा अवतुर असके सबोय लोकुरक गिरदा आसोरिंग येसुन मिलेमातुरक, बाक्याकि ओरक येसुन पोसन्दुरक।

⁴¹ अनि अचोन बेरा आयिर पोरोयतोर वरोर मानेय वातुर, ओर यहुदि समाज मन्डलिता मुक्याल मन्तोर, अनि ओर येसुना काल्कनिगा अरस ओना लोतिगा देय इदाम विनन्ति कियाला लाकतुर,

⁴² बाक्याकि बारा वरसाना ओना उन्दिय मियाळ हायिल आस मन्द। अनि येसु आयिरना लोतिके हन्दिला लाकतुर असके मानेयकना पकाय भीळ एका-मेका लोकुरक दुरस-दुरसुन येसुना परके हन्दिला लाकतुरक।

⁴³ असके उन्दि आळ मता अदेन बारा वरसाताल नतुर हन्दाना बिमारि मता, अनि अद आपुना बिमारितिगाडाल सुदरेमायान साटि डाक्टेरनिके हन्जुन आपुना सबोय धनसंपतितुन मारिहतु ते वने बोरे तान सुदरे कियापरोरक आतुरक।

⁴⁴ अनि अद बिमार आळ येसुना परकेडाल कमेक हन्जुन येसुना सन्दराता कोडितुन इटतु, अचोन सान्डे ताना नतुर हन्दाना बन्द आत।

⁴⁵ “नाकुन बोर इटतुर?” इन्जोर येसु पुच्चेमातुर। असके सबोय लोकुरक नना आयो नना आयो इदाम इतुरक, असके पतरास अनि ओनोर संगे मन्तोरक, “हे गुरु, निया ते परके सबोयतिकेडाल लोकुरा भीळ वायिला आता अनि निकुन हुळान साटि लोकुरक दुरस-दुरस निया हेरे वान्तोरक” इदाम इतुरक।

⁴⁶ मति येसु इतुर, “बोरे नाकुन इटतोर; नावागडाल लाव पसियता इन्जोर नना पुतान।”

⁴⁷ अनि नना ते इदेक मकिला परोन इन्जोर अद आळ हुळस कसिंगसोरिंग वासुन येसुनांग काल्कनिगा अरतु। अनि अद बाक्या येसुन इटत अनि बदाम सान्डे सुदरे मात इन्जोर सबोय पोल्लोंग लोकुरा मुने वेहिला लाकत।

⁴⁸ अनि येसु आळदुन, “नोनि, निया विस्वास निकुन सुदरेकिता, निमा शान्ति आसुन हन” इन्जोर इतुर।

⁴⁹ अनि येसु तान इदाम हन्दिला आस मन्दुर असकेय यहुदि समाज मन्डलितोर मुक्याल मानेयना लोतिगाडाल बोरे वासुन, “निया मियाळ हातु, इन्जोर निमा गुरुन असा तकलिब हेमा” इदाम इतुर।

⁵⁰ असके येसु केन्जुन, “निमा वरियमा; केवल विस्वास इरा, अनि निया मियाळ बेस आयार” इन्जोर ओन इतुर।

⁵¹ अनि येसु समाज मन्डलितोर मुक्याना लोतिगा वातुर असके येसु अनि पतरासिन अनि युहन्ना अनि याकुबिन अनि पेडिना अवाल-बाबोन तासि दुसरो बोने आपुनासंग लोन लोपा वायिला हेवोर आतुर।

⁵² सबोय लोकुरक अद पेडिन साटि किलिला आस मन्दुरक असके येसु ओरकुन इतुर, “किलमाट, अद हायो मति हुन्जिला आता।”

⁵³ अनि अद पेडि हाता इन्जोर सबोय लोकुरक पुन्ज मन्दुर इन्जोर येसुन कविला लाकतुर।

⁵⁴ अनि येसु पेडिना कयदुन पयतुर, “हे पेडि, तेदा!” इदाम केयसुन इतुर।

⁵⁵ अनि अद पेडिना जिवा मल्स वातु, अनि अद सान्डे तेच उदित। अनि अद पेडिन बाताले तिन्दिला हिसिम्ट इन्जोर येसु आग्या हितुर।

⁵⁶ अनि अद पेडिना अवाल-बाबो दंगे मातुरक, मति इगा बाताल आत अद पोल्लोतुन बोने वेहमाट इन्जोर येसु ओरकुन चेतेकितुर।