लूका 7 - Muria Far Western

वरोर सयनिक अदिकारिना विस्वास

¹ येसु लोकुरकुन परमेस्वरना पोल्लोतुन वेहच मारिहतुर असके पजा ओर कफरनहुम सेहेरतिगा वातुर।

² ओद सेहेरतिगा रोमि देशतोर नुर सयनिक लोकुरा तुकडितोर वरोर अदिकारि मतोर। अनि ओनोर वरोर मयातोर दास मन्तोर, ओर बिमारिते हायवाल मन्तोर।

³ असके ओर अदिकारि येसुना बारेते केन्जुन ओर वासुन ओनोर दासतुन बेस केविर इन्जोर येसुन विनन्ति कियान साटि यहुदि लोकुरा मुक्याल लोकुरकुन येसुना हेरे लोहतुर।

⁴ अनि ओरक मुक्याल लोकुरक येसुना हेरे हन्जुन पकाय विनन्ति कितुरक, “निमा हन्जुन ओनोर दासतुन सुदरे कियान साटि ओर अदिकारि लायेक मन्तोर,

⁵ बाक्याकि ओर अदिकारि मावा यहुदि जाति लोकुरासंग पकाय मया किन्तोर, अनि ओरेय मावा समाज मन्डलितुन बनेकियान साटि मदत कितोर” इन्जोर पकाय विनन्ति कितुरक।

⁶ असके येसु ओर लोकुरासंग सेय्निक लोकुरा अदिकारिना लोतिके हन्दान साटि पसियतुर। मति अदिकारिना लोतिगा अवाना हेरे अदिकारि आपुनोर गोतियालोरकुन इदाम इन्दान साटि लोहतुर: “हे प्रबु, निमा तकलिब आयमा बाक्याकि निमा नावा लोन वायान साटि नना लायेक हिलेन।

⁷ इन्जोर निया हेरे वायान साटि वने नना लायेक हिलेन इदाम नना विचार कितान। मति अगाडाले उन्दि पोल्लो इंजीन ते नावोर दास बेस आयनुर।

⁸ नना वने सेय्नता हजोर सयबालोरा अदिकारता अधिनते मन्तोना अनि पकाय सयनिक लोकुरा पोरो नना वने अदिकार किन्तोना। अनि नना वरोन ‘हन,’ इन्तोना ते ओर दान्तोर; अनि दुसरोन ‘वाय’, इन्तोना ते ओर वान्तोर। अनि नावोर दासतुन ‘इद बुतो किम’, इन्तोना ते ओर किन्तोर” इन्जोर इतुर।

⁹ अनि इद केन्जुन येसु आश्चरय आतुर, अनि परके मिळिंचुन येसुना परके वायिला आस मन्दुरक लोकुरा भीळतुन इतुर, “नना इस्रायेल लोकुरकनिगा वने इदाम लेहका विस्वास कल्योने इन्जोर नना मिकुन इन्तोना।”

¹⁰ अनि ओर लोहच मतोर ओनोर गोतियाह लोतिगा वासुन सेय्निक लोकुरा अदिकारिना दासतुन बेस आतोर हुळतुर।

रान्डि बायिना पेकान येसु जिवे किन्तोर

¹¹ अनि दुसरो दियाना, येसु नायिन पोरोयदा उन्दि सेहेरतिगा हतुर असके येसुनोर चेलालोरक अनि मानेयक्ना पकाय भीळ येसुनासंग हन्दिला आस मन्दुरक।

¹² अनि अद सेहेरता हेरे अवतुरक असके हुळाट अद सेहेरता वरोर हातोर मानेयतुन मिसिला ओयिला आस मन्दुरक। अनि ओर आपुना अवहारिन वरोरे पेकाल मतोर, अनि अद बायि रान्डि मता। अनि अद सहेरतोरक लोकुरा पकाय भीळ अदेनासंग मतोरक।

¹³ अद रान्डि बायिन हुळसुन प्रबुन दया वास अदेन इतुर, “किलमा।”

¹⁴ अनि येसु हेरे वासुन टाहटोळतुन इटतुर, असके टाहटोळतुन कांजवालोरक पोसतुरक। “हे लयोर, नना निकुन इन्तोना, तेदा!” इदाम येसु हातोर मानेयतुन इतुर।

¹⁵ अनि ओर हातोर मानेय जिवेमास उदितुर, अनि वळकिला लाकतुर। असके येसु पेकान ओना यान सोपेकिसितुर।

¹⁶ अनि सबोय लोकुरिगा वरे आत, अनि “मावा नडुम परमेस्वरना पोल्लो वेहवाल वरोर हजोर मानेय वातोर, अनि परमेस्वर आपुनोरक लोकुरिगा दया कितोर” इन्जोर लोकुरक परमेस्वरना महिमा किसुन इन्दा लाकतुरक।

¹⁷ अनि येसुना बारेते इद पोल्लो यहुदि प्रदेशता सबोय जागातिगा अनि हेरे गुरेटांग प्रदेशतिगा अवतु।

बपतिस्मा हेवाल युहन्नाना प्रश्न

¹⁸ अनि युहन्नानोर चेलालोरक येसुनांग कियाना चमत्कारकुन हुळसुन इव सबोय पोल्लोनुंग युहन्नान वेहतुरक।

¹⁹ असके युहन्नाल आपुनोर इवुर चेलालोरकुन केयसुन, “वायवाल मन्तोर मसि निमाय आन्दि बहे? या माक असा दुसरोन हरहूळकोम?” इदाम पुच्चेमायान साटि प्रबु येसुना हेरे लोहतुर।

²⁰ युहन्नानोर चेलालोरक येसुना हेरे वासुन, “वायवाल मन्तोर मसि निमाय आन्दि या माक असा दुसरोन हरहूळकोम बहे? इदाम पुच्चेमायान साटि ओर माकुन निया हेरे लोहतोर” इन्जोर इतुरक।

²¹ अनि येसु अचोन बेरा पकाय बिमारि लोकुरकुन अनि नोमुर वारकुन, अनि दुष्टात्मांग पय्तांग लोकुरकुन सुदरे कितुर, अनि पकाय अन्दरालोरकुन हुळान साटि सुदरे किसुन,

²² येसु युहन्नानोर चेलालोरकुन इतुर, “इदेक बातांग आयि हुळतोरिट अनि केन्जतोरिट, अवेकुन हन्जुन युहन्नान वेहकिट: अन्दळालोरक हुळान्तोरक, अनि लेंगळालोरक ताकान्तोरक वल्यान्तोरक, कोळि बिमारिलोरकुन शुद्धि किन्तोर, बयराह लोकुरक केन्जान्तोरक, हातोर मानेयकुन जिवेहकिन्तोर, अनि गरिब लोकुरकुन परमेस्वरना सोबाता पोल्लो केन्जहान्तोर।

²³ नावा पोल्लोतुन केन्जुन परके हनोर ओर मानेय धन्य मन्तोर।”

²⁴ अनि युहन्नान लोहतोरक चेलालोरक हतुरक असके येसु युहन्नाना बारेते लोकुरा भीळतुन वेहिला लाकतुर: “युहन्नाल वारु पल्लातिगा बपतिस्मा हिन्दुर असके निमाट बाताल हुळान साटि हन्ज मतोरिट? बाताल अगा होलेमायाना रोन्डातुन?

²⁵ ते निमाट बाताल हुळान साटि हन्ज मतोरिट? बाताल सुतिता कपळा करतोर मानेयतुन हुळान साटि हन्ज मतोरिट? केन्जाट, सोबातांग अनि मान्जतांग कपळांग करान्तोरक अनि तिन्ज-उन्जुन गिरदाते मन्तोरक ओरक राजमहाळतिगा मन्तोरक।

²⁶ ते निमाट बाताल हुळान साटि हन्ज मतोरिट? इंगो, परमेस्वरना पोल्लो वेहवालोरकताल वने हजोर मानेयतुन हुळान साटि हन्ज मतोरिट इन्जोर नना मिकुन वेहान्तोना।

²⁷ अनि ‘केन्जा, नना आपुना दूततुन निया मुने-मुने लोहान्तोना, ओर निया मुने हरितुन तयार कियानुर’ इन्जोर युहन्नाना बारेते पवित्र पुस्तकतिगा कोटता मन्ता।

²⁸ अनि येसु इन्तोर, आसकनिगाडाल जनम आतोरक युहन्नालताल हजोर बोरे हिलेरक; मति परमेस्वरना राज्यतिगा सबोयताल हुडलोर युहन्नानताल वने हजोर मन्तोर इन्जोर नना मिकुन वेहान्तोना।”

²⁹ (इद केन्जुम युहन्नानताल बपतिस्मा येतोर इन्जोर सबोय लोकुरक अनि टाक्स येतवालोरक वने परमेस्वरना हरि खरोय मन्ता इदाम मानेमातुरक।

³⁰ मति परीसिलोकुरक अनि मूसाना नियमतुन करिहवालोरक बपतिस्मा येतोरक अनि ओरा बारेता परमेस्वरना योजनातुन मानेमायोरक आतुरक।)

³¹ अनि येसु असा इतुर, “नना इद पिळितोर लोकुरकुन बोद पिटो वेहचुन वर्णनकियाका, येरक लोकुरक बोना लेहका मन्तोरक?

³² ‘माक मिया साटि हुलुळ नेकितोम, अनि निमा येन्दवि आति, माक मिया साटि हामुर पाटांग ओतोम मति निमा हिलवि आति’ इदाम हाटुमतिगा उचुन वरवरोन केयसुन इन्तांग ओरक बालक लेहका मन्तोरक।

³³ बाक्याकि बपतिस्मा हेवाल युहन्नाल रोटिंग तिनोर आस अंगुरता जोमा वने उन्नोर आस वातुर मति ‘ओना लोपा दुष्टात्मा मन्ता’ इदाम निमाट इन्तोरीट।

³⁴ मति नना मानेयतोर मरि तिन्जोर-उन्जोर वातोर, मति ‘ओर पकाय हळकु अनि लेहळाल मानेय मन्तोर, अनि टाक्स येतवालोरकला अनि पापि लोकुरा गोतियाल मन्तोर इदाम निमाट इन्तोरीट।’

³⁵ अनि परमेस्वरनिगा विस्वास केवालोरक स्वरगता ग्यानतुन आपुना ताकाना-वळकानाते तोहानुरक।”

येसु पापि आळदुन मापि किन्तोर

³⁶ अनि वरोर परीसि मानेय येसु आपुनासंग जेवेकियान साटि प्रबु येसुन विनन्ति कितुर, अनि ओर परीसिना लोतिगा हन्जुन जेवेकियान साटि उदितुर।

³⁷ अनि अद सेहेरतिगा उन्दि पापि आळ मता अनि येसु परीसिना लोतिगा जेवेकियान साटि उदितोर इन्जोर पुन्जुन अद आळ उन्दि पकाय किमतिवाला सोबाय कलदा बरणितिगा पकाय किमतिता दयमुर निय ततु,

³⁸ अनि अद पापि आळ येसुनांग काल्क हेरे परके निचुन किल्सोरिंग येसुनांग कालकुन कनेळदे नाहचुन, अनि आपुनांग तलातांग कल्कने उमसिला लाकतु। अनि प्रबु येसुना आदर कियान साटि ओनांग काल्कनिगा चुमा किस ओनांग काल्कनिगा सुगंद निय लावेकिन्दु।

³⁹ अनि येसुन आपुना लोतिगा जेवेकियान साटि केयस मतोर ओर परीसि मानेय इदेन हुळसुन, “येर मानेय भविष्य वेहवाल मतेक नाकुन इटता आळ बोद आन्द अनि बदाम मन्ता इन्जोर पुन्ज मनेर बाक्याकि इद आळ पापि मन्ता” इन्जोर आपुना मन्दे आलहिला लाकतुर।

⁴⁰ असके येसुन ओन इन्तोर, “हे शिमोन, नाकुन नियासंग उन्दि पोल्लो इन्दाना मन्ता।” अनि ओर “हे गुरु इन” इन्जोर इतुर।

⁴¹ असके येसु इतुर, “वरोर सावकार मानेयतुन इवुरक करजदारक मतोरक। वरोर मानेयनिगा सेयुंग नुर दियाता रोजिता बराबर डबुंग अनि दुसरो मानेयनिगा पन्नास दियाता रोजिना डबुंग करजदार मतोरक।

⁴² अनि सावकारिन डबुंग मलस हियान साटि ओरिगा बाराय हिलेंग आसि इन्जोर ओर सावकार मानेय ओरक इवुर लोकुरकुन मापि किसितुर। असके येरक इवुर जनलोरक करजदारतिगाडाल बोर वले ओरा सावकारिन मया कियानुर?”

⁴³ अनि शिमोन येसुन इतुर, “नावा मन्दे ओर बोना वले करजातुन मापि किसितुर ओर सावकारिन वले मया कियानुर।” असके येसु शिमोनिन इतुर, “निमा बरोबर उत्तर हितोन।”

⁴⁴ अनि येसु अद आळदिके हुळसुन शिमोनिन इतुर, “बांग निमा इद आळदुन हुळान्तोन? नना निया लोतिगा वातान। मति निमा नाकुन काल नोरान साटि एर हेवि आति, मति इद आळ नावांग कालकुन कनेळदे नाहचुन अनि आपुना तलातांग कल्कने उमस्तु।

⁴⁵ अनि निमा नाकुन आदरा कियान साटि चुमा हेवि, मति नना इगा लोन लोपा वातोना अचोन बेराताल इद आळ नावांग काल्कनिगा नाकुन आदर कियान साटि चुमा किसोर मता।

⁴⁶ अनि निमा नावा तलातिगा निय लावे केवि आति, मति इद नावांग काल्कनिगा सुगंद निय लावेकिता।

⁴⁷ इन्जोर इद आळदा पकाय पाप मापि आत इन्जोर नना निकुन इन्तोना, बाक्याकि इद पकाय मया किता। मति बोना कमि मापि आता ओर कमि मया किन्तोर।”

⁴⁸ असके येसु अद आळदुन इतुर, “हे बायि निया पाप मापि आतु।”

⁴⁹ असके येसुनसंग जेवेकियान साटि उचमन्तोरक ओर लोकुरक, “येर बोर आन्दुर ओर पापतुन वने मापि किन्तोर?” इन्जोर आप-आपुना मन्दे आल्हिला लाकतुरक।

⁵⁰ मति येसु अद आळदुन, “निया विस्वास निकुन पिसितु, शान्ति आसुन हन” इन्जोर इतुर।