लूका 6 - Muria Far Western

येसु पवित्र दियाता वने मालकाल मन्तोर

¹ अनि यहुदि लोकुरा उन्दि पवित्र दियाते असा येसु अनि येसुनोर चेलालोरक गोहक पन्डता डन्डकनिगाडाल हन्दिला आस मन्दुरक, अनि येसुना चेलालोरक डन्डतांग गोहकनिकेडाल हुचुक हनक कोयसुन आपुना कयदे तुस्क-तुस्कतुसुन तिजोरिंग हन्दिला आस मन्दुरक।

² असके परीसि लोकुरकनिगाडाल हुचुलोरक, “निमाट इदाम गोहकुन कोयस पवित्र दियाता नियमता विरोद बाक्या बुतो किन्तोरिट?” इन्जोर येसुन इन्दालागतुरक।

³ येसु परीसि लोकुरकुन उत्तर हितुर, “दावुद राजाल अनि ओना गोतियाहकुन करवस मन्द असके बाताल कितुरक?

⁴ अनि ओरक परमेस्वरना लोतिगा हतुरक अनि यहुदि लोकुरा याजक लोकुरकुन हरचुन दुसरो बोरे लोकुरकुन तिन्दा पोलो मता परमेस्वरना मुने तरिहतांग पवित्र रोटिनुंग तितुरक अनि अव रोटिनुंग आपुना गोतियाहकुन वने तिन्दिला हितुर इन्जोर बाताल निमाट पवित्र पुस्तकतिगा वाचे केविट बहे?”

⁵ अनि येसु परीसि लोकुरकुन इतुर, “नना मानेयतोर मरि पवित्र दियाता वने मालकाल आन्दान।”

येसु वतिता कयदोर मानेयतुन सुदरे किन्तोर

⁶ अनि यहुदि लोकुरा दुसरो उन्दि पवित्र दियाते येसु समाज मन्डलितिगा हन्जुन परमेस्वरना सोबाता पोल्लो करिहन्दुर असके तिन्दान कय वच मता वरोर मानेय अगा मतोर।

⁷ अनि मूसाना नियमतुन करिहवालोरक अनि परीसि लोकुरक येसुनिगा दोष लावेकियाला उन्दि सन्दि पुटान साटि येसु पवित्र दिया सुदरे किन्तोर या केवोर इदाम पकाय ध्यानकिस हुळन्दुरक।

⁸ मति येसु ओर लोकुरकना मन्दा पोल्लोतुन पुन्जुन, “तेदचुन नडुम निता” इदाम येसु वतिता कयवाले ओर मानेयतुन इतुर। ओर तेचुन नितितुर।

⁹ असके येसु ओरकुन, “पवित्र दिया सुदरे कियाना या गलति कियाना; अनि जिवातुन पिसहाना या नाश कियाना बोद मूसाना नियमता अनुसार सोबाय मन्ता?” इदाम पुच्चेमातुर।

¹⁰ अनि येसु नालुंगास बासा उदितोरकुन हुळसुन ओर वतिता कयवालेन इन्तोर, “निया कयदुन ताहा।” अनि ओर आपुना कयदुन ताहतुर, असके ओना वतिताल केय सुदरे मातु।

¹¹ मति ओर लोकुरक येसुनांग पोल्लोनुंग केन्जुन पकाय होंग आतुरक अनि लोकुरा भीळतिगाडाल बाहरो पसियसुन येसुन दोष लावे किस माक बदाम होवकिकाट इदाम ओना बारेते वरोन दुसरोना संग वळकिला लाकतुरक।

येसु बारा खासा चेलालोरकुन आचान्तोर

¹² उन्दि दिया येसु मटातिके प्रार्थना कियाला हतुर, अनि परमेस्वरना मुने नरका-पलिंग प्रार्थना किसोरिंग वियिहतुर।

¹³ अनि विय्ता पजा येसु आपुना चेलालोरकुन केयतुर अनि ओरिगाडाल बारा लोकुरकुन आचतुर, अनि ओरकुन येसुना खास चेलालोरक इतुर।

¹⁴ अनि येसुना ओरक बारा खास चेलालोरक येरक आन्दुरक: शिमोन येना पोरोयदुन येसु पतरास इन्जोर इतुर, अनि पतरासना तमो आन्द्रीयास, अनि याकुब, अनि युहन्नाल, अनि फिलिपुस, अनि बरतुल्मे,

¹⁵ अनि मत्ति, अनि थोमास, अनि हल्पायिनोर मरि याकुब, अनि शिमोन, अनि शिमोनिन जेलोतेस वने इन्तोरक,

¹⁶ अनि याकुबना पेकाल यहुदाल अनि प्रबु येसुन पय्पीहचिवाल बनेमातोर यहुदाल इस्करियोति।

येसु करिहन्दुर अनि सुदरे किन्दुर

¹⁷ असके येसु आपुनोर खास चेलालोरासंग अडिय रयतुरक अनि नालुंगास बसांग बरोबर मन्तांग जागातिगा नितितुर। अनि येसुना चेलालोरकला हजोर भीळ अगा मतोरक। अनि सबोय यहुदिया प्रदेशतोरक, अनि येरुसलेम प्रदेशतोरक, अनि सेय्दा समुद्र हेरेटा सूर अनि सेय्दा प्रदेशतोरक पकाय लोकुरक मतोरक।

¹⁸ ओर लोकुरक येसुनांग सोबातांग पोल्लोनुंग केन्जान साटि अनि आपुना बिमारिताल सुदरेमायान साटि येसुना हेरे वातुरक। अनि दुष्टात्माते पकाय तकलिप आस मन्तोरकुन येसु सुदरे किन्दुर,

¹⁹ येसुनिगाडाल परमेस्वरना लाव पसियसुन सबोय लोकुरकुन सुदरे किन्दुर इन्जोर लोकुरा भीळ येसुन इटिला हुळन्दुरक।

²⁰ असके येसु आपुना चेलालोरकुन हुळसुन इतुर: “गरिब मन्तोरिट निमाट धन्य मन्तोरिट, बाक्याकि परमेस्वरना राज्य मियाय मन्ता।

²¹ इदेक करवस्तोरिट निमाट धन्य मन्तोरिट, बाक्याकि मिया करदुन परमेस्वरनिकेडाल संतुष्ट पुटार। इदेक किलान्तोरिट निमाट धन्य मन्तोरिट, बाक्याकि निमाट गिरदा आयकिट।

²² नना मानेयतोर मरिनिगा विस्वास किन्तोरिट इन्जोर लोकुरक मिकुन दुश्मन किस ओराकेडाल पसिहच मिकुन निन्दा किस निमाट पकाय दुष्ट इदाम समजेमास मिकुन इन्कार कियानपा निमाट धन्य मन्तोरिट।

²³ ओव दियांग निमाट गिरदा आसुन येन्दिला लागिकिट, बाक्याकि मिया साटि स्वरगतिगा हजोर प्रतिफळ मन्ता। ओरा बाबो-दादिलोरक वने परमेस्वरना पोल्लो वेहवालोरकुन वने इदामे सतेहकिसुन होवकस मतोरक।

²⁴ मति हे सावकार लोकुरक मिकुन परमेस्वरताल हजोर दन्ड मन्ता, बाक्याकि मिया सुख-शान्ति मिकुन पहले पुटता।

²⁵ अनि इदेक तिन्ज-उन्जुन सोबाय मन्तोरिट मिकुन परमेस्वरताल हजोर दन्ड पुटार, निमाट करहायकिट। अनि निमाट इदेक पकाय गिरदाते मन्तोरिट मति मिकुन हजोर दन्ड मन्ता, निकुन दुःख आयकिट अनि किल्किट।

²⁶ अनि सबोय लोकुरक मिकुन हजोरपण किस इन्तोरक असके मिकुन परमेस्वरताल हजोर दन्ड पुटार, बाक्याकि ओरा बाबो-दादिलोरक वने आपुनास परमेस्वरना पोल्लो वेहवाल आन्तोर इदाम खोटाल इन्वालोरा बारेते वने इदामे कितुरक।”

दुश्मनासंग मया कियाना

²⁷ येसु ओरकुन इतुर, “नावा पोल्लो केन्जवालोरकुन नना इन्तोना: निमा आपुना दुश्मनिन मया किम, अनि निकुन होंग किन्तोरक ओरकुन निमा भला किम,

²⁸ अनि मिकुन सराप हिन्तोरक ओरकुन आशिष हिम्ट, अनि मिया अपमान किन्तोरक ओरा साटि प्रार्थना किम्ट।

²⁹ अनि निया उन्दि कोरवितिगा पिटहानुर ओना मुने दुसरो कोरवितुन वने मुनेह किसिम। अनि निया बिलान्कट ऊन्दनुर अनि ओर असा निया कराना बन्डितुन वने तलकानुर ते अदेन ओयान साटि परवांगि हिम्ट।

³⁰ निकुन बोर आयि तलकानुर ते अवेन हिम अनि निया चिजतुन बोरे ऊन्दनुर ते ओना कयदाल अदेन मलस पुटान साटि तलक्मा।

³¹ दुसरो लोकुरक मियासंग सोबाय कियाला पहाजे इदाम मिया इच्चा मन्ता अदामे निमाट वने ओरासंग सोबाय किम्ट।”

³² येसु ओरकुन असा इतुर, “निमाट आपुनोर मया केवालोरासंग मया किसोरींगे मनकिट ते बाताल फायदा? ‘पापिलोकुरक वने’ आपुनोरक मया केवालोरासंग मया किन्तोरक बहे।

³³ अनि निमाट आपुनोर मदत केवालोरकुन मदत किसोरिंग मन्तोरिट ते बाताल फायदा? बाक्याकि ‘पापिलोकुरक वने’ इदामे किन्तोरक।

³⁴ अनि निमाट दुसरो लोकुरकुन उदारि हिंतोरिट अनि उदारि हितांग मलस पुटानुंग इन्जोर उदारि हिन्तोरक ते बाताल फायदा? बाक्याकि पापि लोकुरक इन्जोर निमाट समजेमान्तोरक वने अचोके असा मलस पुटानुंग इन्जोर दुसरो पापिलोकुरकुन उदारि हिन्तोर बहे।

³⁵ मति निमाट ते आपुनोर दुश्मन लोकुरासंग मया किम्ट, अनि ओरा भलायि किम्ट, उदारि हिता ओद मिकुन मलस पुटार इन्जोर भरोसा इरमा, इद भावते निमा दुसरो लोकुरकुन उदारि हिम्ट। असके मिया साटि स्वरगतिगा हजोर आशिष मन्दार, अनि निमाट सबोयताल हजोर परमेस्वरनोर बालक आयकिट। बाक्याकि परमेस्वरना धन्यवाद केवोरकुन अनि दुष्ट लोकुरकुन वने परमेस्वर दया किन्तोर।

³⁶ अनि स्वरगतोर बाबाल बदाम दया किन्तोर अदामे निमाट वने दया किम्ट।”

बोने दोष लावेह केमाट

³⁷ येसु ओरकुन असा इतुर, “निमाट बोने दोष हेमाट, ते मिकुन वने दोष हेवोर आयनुर। अनि निमाट बोने दन्ड साटि न्याय केमाट ते मिकुन वने न्याय केवोर आयनुर। अनि निमाट दुसरोन मापि कियाकिट ते मिकुन परमेस्वर वने मापि कियानुर।

³⁸ अनि निमाट हियाकिट, ते मिकुन परमेस्वर वने हियानुर। मिकुन काहचुन हियानपा पुरा निहचुन नोवच-नोवचुन अनि हालेह किस-किसुन तुरनाहकिन मिकुन हियानुर, बाक्याकि निमाट बदाम काहचुन हिंतोरिट, अदे काहचते परमेस्वर मिकुन हियानुर।”

³⁹ असके पजा येसु ओरकुन उन्दि पिटो वेहतुर: “वरोर अन्दडाल मानेयतुन दुसरो अन्दडाल मानेय हरि तोह परकि बहे? बसकेय आयो बाक्याकि ओरक इवुरास आन्दळाह मन्तोरक इन्जोर इवुरास गुमियातिगा अरानुरक।

⁴⁰ अनि चेलाल आपुना गुरुनताल हजोर आयोर, मति गुरुना शिक्षण बोर पुरा कियानुर ओरे आपुना गुरुना लेहका आयनुर।

⁴¹ अनि निमा आपुना तमोनांग कोन्डानिगाळांग डुन्डोतुन हुळान्तोन, मति आपुना कोन्डानिगा मन्ता किळातुन बाक्या ध्यान केवि?

⁴² अनि निमा आपुना कोन्डानांग किळातुन हूळ परवि ते आपुना तमोन, ‘हे तमो, पोसा निया कोन्डातांग डुन्डोतुन टन्डसीका’, इन्जोर बदाम इन्दापरकि। मति हे कपटि मानेय, मुने नियांग कोन्डानांग किळा टन्डा असके निवोर तमोनांग कोन्डानिगाळांग डुन्डोतुन बेस हुळसुन टन्डान साटि सोबाय हूळ परकि।”

मराता अनुसार अदेना कायांग

⁴³ येसु असा इतुर, “खराब मरातिगा सोबातांग कायांग हाद परोंग, अनि सोबाता मरातिगा खराब कायांग हादिला परोंग।

⁴⁴ सबोय मराकतांग कायाते मराकुन पुन्तोर; बाक्याकि लोकुरक मरका मराताल अन्जीरतांग कायांग कोयोरक, अनि गोटि मराताल अंगुरतांग कायांग कोयोरक।

⁴⁵ समजदार मानेय आपुना मन्दा मतांग सोबाय भण्डारतिगाडाल सोबातांग पोल्लोंग वेहान्तोर अनि किन्तोर, अनि खराब मानेय आपुना खराब मन्दिगडाल खराब पोल्लोंग वेहान्तोर अनि किन्तोर; बाक्याकि मन्दिगा बोद निन्ज मन्ता अदे ओना टोडिताल पसियान्ता।”

इवुर लोन तेहवालोर मानेयकना पिटो

⁴⁶ अनि येसु ओरकुन असा इन्तोर, “निमाट नाकुन ‘हे प्रबु, प्रबु,’ इदाम केयान्तोरिट मति नावांग पोल्लोनुंग बाक्या केन्जविट?

⁴⁷ मति बोर आयि नावा हेरे वान्तोर अनि नावांग पोल्लोनुंग केन्जुन मानेमान्तोर ओर मानेय बदाम मन्तोर इन्जोर नना इदेक मिकुन वेहान्तोना।

⁴⁸ आपुना लोन बनेहकियांपा जागातुन पकाय खोल कातितुर अनि कल्कने पायवातुन बनेकितुर ओर मानेयना लेहका येर मन्तोर। अनि उन्दि दिया पकाय हजोर उसा वात, अनि अद पकाय हजोर उसाता पान्ता लोतिगा अदळेमात मति अद लोतुन हालेकियाला परो आत, बाक्याकि अद लोता पायवा कल्कने दोहताल मता।

⁴⁹ मति बोर मानेय नावांग वेहतांग पोल्लोनुंग केन्जुन मानेमायोर ओर येर मानेयना लेहका मन्तोर। ओर आपुना लोतुन तोळिय जागातिगा बोदे पायवा कातवा बनेकितुर। अनि उन्दि दिया पकाय हजोर उसा वास अद लोतिगा अदळेमात, अद सान्डे अरतु अनि सबोय नाश आत।”