लूका 3 - Muria Far Western

युहन्ना बपतिस्मा हेवालना सेवा

¹ अनि रोमि देशतिगा तिबिरियुस पोरोयतोर वरोर हजोर राजाल मतोर। ओना राजतुन पन्दरा वरसांग पुरा आतपा पुन्तियुस पिलातुस यहुदि येरियातिगा रोम देशतोर वरोर राज्यपाल मतोर। अनि हेरोदेस गलील प्रदेशतिगा राजाल मतोर। इतुरिया अनि त्रकोनितिस प्रदेशतिगा हेरोदेसनोर तमो फिलिपुस राजाल मतोर। अनि अबिलेने प्रदेशते लिसानियास राजाल मतोर।

² अन्ना अनि केय्पा प्रार्थना लोतिगा हजोह याजक मतोरक अद बेरा जकरयाना मरि युहन्नाल वारु पल्लातिगा मन्दुर असके परमेस्वर ओनासंग वळकतुर।

³ निमाट पस्तेमास बपतिसमा येताट असके परमेस्वर मिया पापतुन मापि हियानुर ओद पोल्लोतुन यरदन नदिता हेरेटा प्रदेशतिगा ओर वेहन्दुर।

⁴ “वारु पल्लातिगा पकाय जोरदे केयस वेहवालना वरोना पोल्लो इदाम आन्ता, ‘प्रबुना हरि तयारिकिम्ट, ओनांग सळाकिंग सुदरे किम्ट।

⁵ सबोय गुमयानुंग निहाट, अनि सबोय मटाकुन अनि टका जागातुन सवान किम्ट; अनि वकळे मन्तांग ओव हरितुन सिदो किम्ट, अनि अडिय पोरो मन्तांग अवेकुन बराबर किम्ट।

⁶ असके सबोय लोकुरक परमेस्वर हिन्तोर ओद पिसानातुन हुळानुरक’ ” इदाम परमेस्वरना पोल्लो वेहवाल यशायाहना पवित्र पुस्तकतिगा युहन्नाना बारेते कोटतोर।

⁷ लोकुरक डगिना-डगि पसियसुन युहन्नाना हेरे बपतिस्मा येतिला वायिला लाकतुरक, अनि युहन्नाल लोकुरकुन इतुर: “हे नांग तरास्तोरक पिलांग!, परमेस्वरना वायवाल पकाय होंगताल विताट इन्जोर मिकुन बोर चेतेह कितुर?

⁸ अनि निमाट पाप कियाना खरोय बन्द कितोरिट इन्जोर आपुना जिवाते लोकुरा मुने तोहाट। अनि ‘मावोर बाबाल अब्रहाम आन्दुर’ इन्जोर आप-आपुना मन्दिगा विचार किस घमन्ड केमाट। बाक्याकि परमेस्वर अब्रहामिन साटि इव कल्कनिगाडाल वने बालक उपजे किया परान्तोर इन्जोर नना मिकुन वेहान्तोना।

⁹ इदेकेय मरस मराकनांग बुडुमतिगा इरतोर, अनि सोबाय कायांग हादोंग अव सबोय मराकुन कदियस किसतिगा अदानुर।”

¹⁰ असके “माक बाताल कियाकोम?” इन्जोर लोकुरक युहन्नानिन पुच्चेमायिला लाकतुरक।

¹¹ अनि युहन्नाल लोकुरकुन इदाम उत्तर हितुर, “बोनिगा रन्ड बन्डिंग मन्तांग ओर बोनिगा हिले ओनासंग तुसीर अनि बोनासंग जेवन मन्ता ओन बोनिगा हिले ओन हेविर।”

¹² टाक्स येतवालोर वने बपतिस्मा येतिला वासुन युहन्नानिन इदाम पुच्चेमातोरक, “हे गुरु माक बातांग कियाकोम?”

¹³ अनि युहन्नाल ओरकुन इतुर, “मिकुन बोचोक डबुंग येतिला वेहतोर अदेनताल वलेंग येतमाट।”

¹⁴ असा सयनिक लोकुरक वने बपतिस्मा येतिला वासुन युहन्नानिन इदाम पुच्चेमातुरक, “माक बातांग कियाकोम?” युहन्नाल ओरकुन इतुर, “निमाट बोने जबरदस्ति धन डबुंग तलक्माट अनि बोनिगाय जुटा दोष लावेकेमाट, अनि मिकुन बचोन पगार पुटान्ता ओचोडेय समादान मन्ट।”

¹⁵ अनि सबोय लोकुरक मसिहा माकुन पिसहान साटि वायनुर इदाम आशा किस मन्दुरक इन्जोर येरे ते मसिहाय आन्दुर बहे? इदाम सबोय लोकुरक आप-आपुना मन्दे युहन्नाना बारेते विचार किन्दुर।

¹⁶ अनि युहन्नाल सबोय लोकुरकुन उत्तर हितुर, “नना ते मिकुन एते बपतिस्मा हिंतोना, मति नावाताल वने पकाय लाववाले वरोर वायवाल मन्तोर; ओनांग करतांग हरपुहनांग डोरिनुंग टन्डाना वने नना लायिक हिलेन; ओर ते मिकुन पवित्र आत्माते अनि किसते बपतिस्मा हियानुर।

¹⁷ ओना हेति ओना कयदे मन्ता; अनि ओर आपुनांग गोहकुन सोबाय तुळहानुर; अनि सोबातांग गोहकुन आपुना डोलिंगते इरानुर; मति भुसातुन बस्केन पियो आयार इदाम किस्तिगा पयटेमायनुर।”

¹⁸ दुसरो पकाय पोल्लो वेहच-वेहच युहन्नाल लोकुरकुन करहितुर अनि सोबाता पोल्लो वेहचोरिंग मन्दुर।

^19-20 हेरोदेस राजाल आपुना तमोना मुत्तेन आपुना मुत्ते बनेकिसि इन्जोर युहन्नाल ओन पकाय रांगतुर इन्जोर ओर युहन्नान टाणातिगा केहचितुर। ओर इदाम किस ओना दुसरो पकाय पापतासंग असा दुसरो उन्दि पाप वने जोळेकितुर।

येसुना बपतिस्मा

²¹ सबोय लोकुरक बपतिस्मा येतितुरक असके येसु वने बपतिस्मा येतितुर। अनि प्रार्थना किन्दुर ते पोरोडाल आबार खुलेमात।

²² अनि पवित्र आत्मा परेवाता मेन्दुल लेहका येसुना पोरो रेयतु, अनि “निमा नावोर मयातोर मरि आन्दि, नना नियाताल पकाय गिरदा मन्तोना” इदाम उन्दि लेंग वात।

येसुना वारसान

²³ अनि येसु आपुना सेवा सुरु कियाना बेरा ओन लगभग तिसा वरसानोर मतोर। येसु यूसुफनोर मरि मतोर इदाम लोकुरक समजेमान्दुरक, अनि यूसुफ एलिनोर मरि मतोर,

²⁴ अनि एलि मत्तातना मरि मतोर, अनि मत्तात लेविनोर मरि मतोर अनि लेवि मलकिनोर मरि मतोर, अनि मलकि यनाना मरि मतोर, अनि यनान यूसुफनोर मरि मतोर,

²⁵ अनि यूसुफ मतित्याना मरि मतोर, अनि मतित्याल आमोसनोर मरि मतोर, अनि आमोस नहुमना मरि मतोर, अनि नहुम असल्यानोर मरि मतोर, अनि असल्या नोगयिनोर मरि मतोर,

²⁶ अनि नोगयि मातनोर मरि मतोर, अनि मात मतित्याहनोर मरि मतोर, अनि मतित्याह सिमिनोर मरि मतोर, अनि सिमि योसेकनोर मरि मतोर, अनि योसेक योदाहनोर मरि मतोर,

²⁷ अनि योदाह युहन्नानोर मरि मतोर, अनि युहन्ना रेसानोर मरि मतोर, अनि रेसा जरुबाबेलनोर मरि मतोर, अनि जरुबाबेल सालतियेलनोर मरि मतोर, अनि सालतियेल नेरीनोर मरि मतोर,

²⁸ अनि नेरी मलकिनोर मरि मतोर, अनि मलकि अद्दीनोर मरि मतोर, अनि अद्दी कोसामनोर मरि मतोर, अनि कोसाम इलमोदामनोर मरि मतोर, अनि इलमोदाम एरनोर मरि मतोर,

²⁹ अनि एर योसुनोर मरि मतोर, अनि योसु इलाजारनोर मरि मतोर, अनि इलाजार योरीमनोर मरि मतोर, अनि योरीम मत्तातनोर मरि मतोर, अनि मत्तात लेविनोर मरि मतोर,

³⁰ अनि लेवि शिमोन्नोर मरि मतोर, अनि शिमोन यहुदाहनोर मरि मतोर, अनि यहुदाह यूसुफनोर मरि मतोर, अनि यूसुफ योनामनोर मरि मतोर, अनि योनाम इलयाकीमनोर मरि मतोर,

³¹ अनि इलयाकीम मलेयाहनोर मरि मतोर, अनि मलेयाह मिन्नाहनोर मरि मतोर, अनि मिन्नाह मत्ततानोर मरि मतोर, अनि मत्तता नाथानोर मरि मतोर, अनि नाथान दावुदनोर मरि मतोर,

³² अनि दावुद यिसेयनोर मरि मतोर, अनि यिसेय ओबेदनोर मरि मतोर, अनि ओबेद बोवाजनोर मरि मतोर, अनि बोवाज सलमोनोर मरि मतोर, अनि सलमोन नहसोननोर मरि मतोर,

³³ अनि नहसोन अम्मीनादाबनोर मरि मतोर, अनि अम्मीनादाब अरनीनोर मरि मतोर, अनि अरनी हिस्त्रोन्नोर मरि मतोर, अनि हिस्त्रोन पिरिसनोर मरि मतोर, अनि पिरिस यहुदाहनोर मरि मतोर,

³⁴ अनि यहुदाह याकुबनोर मरि मतोर, अनि याकुब इसहाकनोर मरि मतोर, अनि इसहाक अब्रहामनोर मरि मतोर, अनि अब्रहाम तेरहनोर मरि मतोर, अनि तेरह नाहोरनोर मरि मतोर,

³⁵ अनि नाहोर सरुंगनोर मरि मतोर, अनि सरुंग रुनोर मरि मतोर, अनि रु फिलिगनोर मरि मतोर, अनि फिलिग एबिरनोर मरि मतोर, अनि एबिर सिलाहनोर मरि मतोर,

³⁶ अनि सिलाह केनाननोर मरि मतोर, अनि केनान अरपचदनोर मरि मतोर, अनि अरपचद सेमनोर मरि मतोर, अनि सेम नुहनोर मरि मतोर, अनि नुह लिमिकनोर मरि मतोर,

³⁷ अनि लिमिक मतुसिलहनोर मरि मतोर, अनि मतुसीलह हनोकनोर मरि मतोर, अनि हनोक यिरिदनोर मरि मतोर, अनि यिरिद महललेल्नोर मरि मतोर, अनि महललेल केनाननोर मरि मतोर,

³⁸ अनि केनान एनोसनोर मरि मतोर, अनि एनोस सेतनोर मरि मतोर, अनि सेत आदमनोर मरि मतोर, अनि आदामिन परमेस्वर बनेहकितुर।