लूका 21 - Muria Far Western

परमेस्वरना मुने येताना योग्य दान

¹ अनि येसु नालुंगास बासा ध्यानते हुळतुर असके दनवान लोकुरक मन्दिरतिगा दान सन्दुकतिगा दान निहानपा हुळतुर।

² असके उन्दि गरिब रान्डिन वने दान सन्दुकतिगा रन्ड हुडलांग डबुंग निहनपा येसु हुळतुर।

³ असके ओर सबोय लोकुरकुन इतुर, “इद गरिब रान्डि परमेस्वरना हुळानाते सबोयताल वले दान निहता इन्जोर नना मिकुन चेते किसुन वेहान्तोना।

⁴ बाक्याकि ओरक सबोय आपुना धनसंपतिताल हुचुक दान सन्दुकतिगा निहतुरक मति इद रान्डि आपुनतुन जिवोत इरान साटि तानिंग हुडुक्सा मता अद सबोयतुन दान पेटितिगा निहचिता।”

येरुसलेम मन्दिरता नाशता बारेता बविस्यवाणि

⁵ अनि हुचुक लोकुरक प्रार्थना लोता बारेते अद मन्डलितुन बचोन सोबाय कल्कने अनि दान हितांग चिजकने सजेकितोरक इन्जोर वळकिला आस मन्दुर,

⁶ असके येसु इतुर, “अगा इव सबोय निमाट हुळान्तोरिट अवेहनिगाडाल उन्दि कल दुसरो कलदिगा टेकेमास मनोंग आयनुंग। अव सबोयकुन अरहानुरक इदाम उन्दि दिया वायार।”

दुनियाता अन्तता चिन्ह

⁷ अनि चेलालोरक येसुन पुच्चेमातुरक, “हे गुरु, इव सबोय बसके आयार? अनि इव सबोय पुरा आयाना बेरा बदामना चिना-चमत्कार आयार?”

⁸ अनि येसु आपुनोरक चेलालोरकुन इतुर, “बोरे मिकुन दोखा हेमाट इन्जोर निमाट चोव्कोस मन्ट, बाक्याकि पकाय लोकुरक, ‘नना मसि आन्दान’ अनि ‘अन्त आयाना बेरा वाता’ इदाम इन्तोर नावा पोरोयदे वायनुरक मति निमाट ओरांग केन्जमाट।

⁹ अनि निमाट लळायि आयाना अनि होंग कियाना पोल्लोनुंग केन्जुन वरियमाट, बाक्याकि इव सबोयकना मुने आयाना जरुरि मन्ता; मति दुनियाता अन्त अद बेरा सान्डे आयो।”

¹⁰ अनि येसु असा चेलालोरकुन इतुर, “यहुदि आयोर लोकुरक वरोर दुसरोना विरोद अनि राज्य-राज्यता लोकुरक दुसरो राज्यता लोकुरा विरोद लळायिंग कियानुंग।

¹¹ अनि हजो-हजो बुकांप अनि बगा-अगाह हजो-हजो दुष्काळ अनि हजो-हजो बिमारिंग वायनुंग अनि आबारतिगा भयानक पोल्लोंग अनि हजो-हजो चिनांग-चमत्कारिंग आयनुंग।”

मसिना चेला लोकुरा पकाय तकलिप

¹² अनि येसु असा आपुनोरक चेलालोरकुन इतुर, “इव सबोय पोल्लोंग आयानाता मुने, निमाट नावा चेला बनेमायानाता कारणते मिया विरोदिलोरक मिकुन पयसुन समाज मन्डलितिगा ओसुन सत्तेह किस जेहलतिगा इरानुरक। न्याय कियान साटि मुक्या अदिकारि लोकुरा हेरे अनि राजाना हेरे वने ओयनुरक।

¹³ अनि मिकुन विरोदि लोकुरक इदाम होंग कियानुरक, असके निमाट ओरा मुने नावाबारेता गवाहि वेहानाता सन्दि आयार।

¹⁴ इन्जोर निमाट आपुना रक्षा बदाम कियाकिट इदाम मुनेय चिन्ता केमाट।

¹⁵ नना मिकुन वळकान साटि पकाय ग्यान हियाका इन्जोर मिया विरोदि लोकुरक मियांग पोल्लोनुंग जुटा किया परोरक आयनुरक।

¹⁶ अनि मिया अवाल-बाबो, बायिरक अनि परिवारतोरक लोकुरकुन अनि मिवोरक गोतियाह वने निमाट नावागा विस्वास किन्तोरक इन्जोर मिया विरोदि लोकुरा कयदे मिकुन पयपियानुरक; अनि मिया पयकि हुचुक लोकुरकुन हव्काहनुरक।

¹⁷ अनि निमाट नावा चेला आयानाता कारणते सबोय लोकुरक मियासंग दुश्मन कियानुरक।

¹⁸ मति मिया तलाता उन्दि वने कल्क नाश आयो आयार।

¹⁹ अनि निमाट हिमते सहेन किस मनकिट ते मिकुन अनन्ता काळदा जिवा पुटार।”

येरुसलेमता नाशता बारेते येसु वेहान्तोर

²⁰ अनि येसु आपुनोरक चेला लोकुरकुन असा इतुर, “सेय्निक लोकुरकुन येरुसलेम सहेरतुन हिरमुटा आतोरक हुळकिट असके येरुसलेम सहेरता नाश आयाना बेरा हेरे मन्ता इन्जोर समजेमायकिट।

²¹ असके यहुदि येरयाते मनवालोर लोकुरक मटातिगा वितिरक, अनि बोरक लोकुरक येरुसलेम सेहेरता लोपा मन्तोरक ओरक बाहरो पसयिरक, अनि बोरक लोकुरक सेहेरता बाहरो मन्तोरक ओरक बाताले ततिला लोपा हनमाकिरक।

²² बाक्याकि पवित्र पुस्तकतिगा कोटताल पोल्लोता अनुसार, येरुसलेम सेहेरता सबोय लोकुरकुन परमेस्वर दन्ड हियाना अद दिया आयार।

²³ अनि अद दियांग मेन्दुतक मन्तांग अनि पाल उहातांग अव आसकुन पकाय तकलिब मन्तानुंग, बाक्याकि देशतिगा पकाय तकलिप अनि येर लोकुरा पोरो परमेस्वरना हजोर कोप भळके मायार।

²⁴ अनि हुचुलोरकुन तलवारते हव्कानुरक अनि दुसरो हुचुलोरक लोकुरकुन पयस यहुदि आयोर लोकुरा देशकनिगा दोहचुन ओयनुरक। येरुसलेमतिगा राज्यकियना साटि परमेस्वर दुसरो जातितोरक लोकुरकुन हिता बेरा पुरा आयानवनाह ओर लोकुरक येरुसलेम सहेरतोरक लोकुरकनिगा पकाय कटोरते अदिकार अनि राज्य कियानुरक।”

मानेयतोर मरिना असा मलस वायाना

²⁵ अनि येसु ओरकुन असा इतुर, “पोळद अनि नलेन्ज अनि हुकोंगनिगा चिना-चमत्कारिंग दिसानुंग। अनि दरतितिगा सबोय देशतोरक लोकुरकनिगा सन्कट वायार। समुद्रता लेंग अनि लाटाना गरजे मायानाते सबोय लोकुरक पकाय वरयानुरक।

²⁶ अनि आबारता लाव हाले मायार असके आबारतिगा मन्तांग पोळद, नलेन्ज अनि हुकोंग हिकेडांग होके आयनुंग इन्जोर वरेता कारणते अनि दरतितिगा वायानांग गटनानुंग पोसनेक-पोसनेक लोकुरक बेहोस आताप आयनुरक।

²⁷ असके नना मानेयतोर मरिन हजोर लावदे अनि आदार महिमातासंग ढगितिगा वायाना ओरक हुळानुरक।

²⁸ अनि मिया सबोय दुःख अनि तकलिबताल लेहचियाना बेरा हेरे वाता इन्जोर इव सबोय पोल्लोंग आयानपा निमाट निचुन हिमते तयारकिस मन्ट।”

अन्जीर पोरोयदा मराता पिटो

²⁹ अनि येसु ओरकुन उन्दि पिटो वेहतुर: “अन्जीरता मरा अनि दुसरो सबोय मराकुन हुळाट।

³⁰ अनि अव मरातांग पुनाह आकिंग कोडसातांग, असके इदेक डोकाल हेरे वाता इन्जोर माक समजेमान्तोरक।

³¹ अनि अदामे लेहकाय इव पोल्लोनुंग आयानपा हुळकिट असके परमेस्वरना राज्य हेरे वाता इन्जोर निमाट पुन्दाकिट।

³² अनि इव सबोय पोल्लोंग बचोवनाह आयो-आयार अदवनाह इद पिळितोरक लोकुरा बसकेन अन्त आयो-आयार इन्जोर नना मिकुन चेतेकिसुन वेहान्तोना।

³³ अनि इद आबार अनि दरति नाश आयार, मति नावा वेहता पोल्लो बसकेय नाश आयो।”

तयार मन्ट

³⁴ येसु चेलालोरकुन असा इतुर, “इन्जोर मिया मन दरोज तिन्दाना अनि दाळंगो उन्डाना अनि इद दुनियाता जिवनता पोल्लोंगना बारेते चिन्ता किसुन प्रबुना वायाना दिया मिया पोरो पसा लेहका हुरहाय वायमा इन्जोर निमाट सावदान मन्ट।

³⁵ बाक्याकि अव दियांग दरतितिंगा मनवालोरक सबोय लोकुरकनिगा उन्दि पसा लेहका हुरहायने वायार।

³⁶ इन्जोर निमाट इव सबोय पोल्लोताल पिसियस मन्दान साटि अनि नना मानेयतोर मरिना मुने निताना लायेक बनेमायान साटि दरोज प्रार्थना किसोरिंग निमाट सावदान मन्ट।”

³⁷ अनि येसु मेयदेना येरुसलेम मन्दिरता डुवारतिगा परमेस्वरना पोल्लोनुंग वेहन्दुर अनि नरका बाहरो हन्जुन जयतुन पोरोयदा मटातिगा मन्दुरक,

³⁸ अनि येसु बिरबरिंगे समाज मन्डलितिगा वान्दुर, सबोय लोकुरक येसुना पोल्लोंग केन्जान साटि बिरबरिंगे येरुसलेम मन्दिरता दुवारतिगा ओना हेरे हतुरक।