लूका 19 - Muria Far Western

येसु अनि जकेय

¹ अनि येसु यरिहो सेहेरतिगा होळीयतुर अनि ओर अद सेहेर लोपाडाल हन्दिला आस मन्दुर।

² अनि अद सेहेरतिगा जकेय पोरोयतोर वरोर मानेय मन्दुर; अनि ओर रोम राज्य साटि टाक्स येतवालोरकला मुक्याल अनि वरोर सावकार यहुदि मानेय मतोर।

³ अनि जकेय येसु बोर आन्दुर इन्जोर हुळाना इच्चा कितुर। मति ओर टुबराल मतोर इन्जोर लोकुरा भीळता मारे हूळ परोर आन्दुर।

⁴ इन्जोर ओर येसुन हुळान साटि येसु हन्दिला आस मन्दुर अद हरिता मुने विचोरिंग हतुर अनि उन्दि तोया मरातिगा अन्जतुर।

⁵ अनि येसु अद तोया मरा हेरे अवतुर असके मरा पोरो हुळसुन, “हे जकेय सान्डे अडिय रेया; बाक्याकि नेन्ड नाकुन निया लोतिगा मन्दाना मन्ता” इन्जोर जकेयीन इतुर।

⁶ अनि जकेय सान्डे मराताल रयसुन गिरदा आसोरिंग येसुन आपुना लोतिगा ओतुर।

⁷ मति येसु जकेयना लोतिगा दान्तोर इन्जोर “येसु ते पापिना लोतिगा हन्दिला आतोर इदाम लोकुरक कुळकुळ किया लाकतुरक।”

⁸ जकेय नितितुर अनि येसुन इतुर, “हे प्रबु केन्जा! नना नावा अरदो धनसंपति गरिब लोकुरकुन हिसिन्तोना अनि नना बोनायसंग अन्याय किसुन येच मनका ते ओन नालुंग गुनांग अचोन हिसिन्तोना।”

⁹ असके येसु ओन इतुर, “येर वने खरोय अब्रहामना मरि आन्दुर इन्जोर नेन्ड जकेयीन अनि जकेयना परिवारतुन मुक्ति पुटता।

¹⁰ परमेस्वरना मयाताल लक आतोरक लोकुरकुन पळकसोरिंग परमेस्वरना हेरे मलस ततान साटि अनि ओरा मुक्ति कियान साटि नना मानेयतोर मरि वातोना।”

दहा सोनातांग डब्बुना पिटो

¹¹ अनि ओर लोकुरक येसुनांग पोल्लोनुंग केन्जिला आस मन्दुरक असके येसु अनि चेलालोरक येरुसलेमता हेरे मन्तोरक, परमेस्वरना राज्य सान्डे दिसान्ता इदाम हुचुलोर लोकुरक समजेमायिला लाकतुरक इन्जोर येसु ओरकुन असा उन्दि पिटो वेहतुर।

¹² “वरोर हजोर धनि मानेय मन्तोर ओर राजाल बनेमासुन असा मलसवायान साटि लक देशतिके हतुर।

¹³ अनि ओर धनिमानेय लक देशतिगा हन्दानाता मुने आपुनोर दास्कनिगडाल दहा लोकुरकुन केयसुन दहा सोनातांग डबुंग हितुर अनि ओरकुन इतुर, ‘नाना वायानावनाह निमाट आपुना व्यापार कियाकिट।’ ”

¹⁴ “मति अद सहेरते मनवालोरक ओर धनि मानेयसंग वेयरि मतोरक, अनि ओर धनि मानेय लक देशतिगा हता पजा ओरक आपुनोर लोकुरकुन अद देशतिगा लोहतुर। अनि ‘येर मावागा राजाल बनेमासुन राज्य केविर इदाम मावा इच्चा हिले’ इदाम उन्दि सन्देश ओरक अद देशतिगा हन्जुन वेहतुर।”

¹⁵ “अनि पजा ओर राजाल आस वातुर असके ओर सोनातांग डबुंग हिस मतोर ओर लोकुरक अवेन बदाम लेन देन किसुन बचोन असा कमेय कितोरक इन्जोर पुन्दाना साटि आपुनोर दहा दासकुन केयान साटि ओर आग्या हितुर।

¹⁶ असके पहलेटोर मानेय हेरे वासुन, ‘हे मालिक नियांग हिताल सोनातांग डबुंगताल नना असा दहा डबुंग कमेय कितोना।’

¹⁷ असके ओर मालकाल ओन इतुर, ‘निमा सोबाय बुतो कितोन, निमा बेस दास मन्तोन! निमा हुडुक्साते वने पकाय विस्वास योग्य आति, इन्जोर इदेक दहा सेहेरतिगा अदिकार किम।’

¹⁸ असा दुसरो वासुन, ‘हे मालिक, नियांग सोनातांग डबुंगते नना असा सेयुंग डबुंग कमेयह कितोना’ इन्जोर इतुर।

¹⁹ असके ओर मालकाल ओन वने इतुर, ‘निमा वने सेयुंग सेहेरतिगा अदिकार आम।’ ”

²⁰ “असा तिसरो मानेय वासुन, ‘हे मालिक, हुळा निया सोनातांग डबुंग इगा मन्तांग, इदेन नना नावा रुमालते दोहच इरतोना।

²¹ बाक्याकि निमा इरवितान वने, ताहान्तोन अनि निमा वीतवि, अदेन वने कोयान्तोन इदाम कटोर मन्तोन इन्जोर नना निकुन वरियिन्दान’ इदाम इतुर।

²² अनि ओर मालकाल ओन इतुर, ‘हे कपटि दास! नना नियांग पोल्लोते निकुने न्याय किन्तोना। नना बगा इरोन अदेन वने ताहान्तोना, अनि नना वीतोन अदेन वने कोयान्तोना कटोर मन्दोर मानेय मन्तोना इदाम निमा नाकुन पुन्तोन बहे।

²³ ते निमा नावांग पयसांग बान्कतिगा बाक्या इरवि आति, अदाम कियाकि ते नना वासुन व्याज साकेट ओनाताल येच मनेना बहे?’ ”

²⁴ “अनि बोर लोकुरक ओना हेरे निचमन्दुरक ओरकुन इतुर, ‘अव सोनातांग डबुंग ओनाताल तलक्सुन दहा डबुंग मन्तांग ओन हिसिम्ट।’

²⁵ अनि ओरक लोकुर मालकान इतुरक, ‘हे मालिक, ओनिगा इदेकेय दहा सोनातांग डबुंग मन्तांग!’

²⁶ असके मालकाल इतुर, ‘बोनिगा मन्तांग ओन असा हियाका अनि बोनिगा हिलेंग, ओनाताल वने येतका।

²⁷ मति नना ओरागा राज्य केवोन इदाम इच्चा किन्तोरक नावोर वेयरि लोकुरकुन इगा तचुन नावा मुने हव्काट’ इन्जोर ओर आग्या हितुर।”

येसु येरुसलेमतिगा राजाना लेहका दान्दोर

²⁸ इद पिटो वेहतुर पजा येसु चेलालोरासंगे मुने मुने हन्जुन येरुसलेमतिके हन्दिला आस मन्दुरक।

²⁹ अनि येसु अनि चेलालोरक जयतुन मटाना हेरेटाल मता बेतपगे अनि बेयतनिय्याह पोरोयता हुडलांग सेहेरता हेरे अवतुरक, असके येसु आपुनोर इवुर चेलालोरकुन इदाम इन्तोर लोहतुर:

³⁰ “निमाट मुनेटा नाटेनिगा हन्टु; अनि अगा निमाट अवकिट असके बोरे बसकेय सवार केवो उन्दि गदहिता पिला दोहता निमाट हुळिकिट, अदेन लेहचुन ततकिट।

³¹ अनि बोरे मिकुन इद गदहिता पिलातुन बाक्या लेहान्तोरिट इदाम पुच्चेमायनुर ते प्रबुन इदेना जरुरि मन्ता” इदाम ओरकुन इन्किट।

³² अनि येसु लोहतोरक चेलालोरक हतुरक अनि येसु बदाम ओरकुन वेहन्दुर अदामे कलियतुरक।

³³ अनि ओर चेलालोरक गदहिता पिलातुन लेहिला आस मन्दुरक, असके गदहिनोर मालकाल, “इद गदहिता पिलातुन बाक्या लेहान्तोरिट?” इन्जोर ओरकुन पुच्चेमातुर।

³⁴ असके येसुनोर चेलालोरक मालकान इतुरक, “इद गदहिता पिलातुन प्रबुन जरुरि पहाजे।”

³⁵ अनि मालकाल अद गदहिता पिलातुन ओयिला हितुर, असके ओरक अद गदहिता पिलातुन येसुना हेरे ततुरक, अनि ओरक आपुनांग हुचुक कपळानुंग गदहिता पिला पोरो तारतुरक अनि येसुन उदिला वेहतुरक।

³⁶ अनि येसु गदहिता पिलापोरो उचुन हन्दिला लाकतुर, अनि लोकुरक येसुना सन्मान कियान साटि आपुनांग हुचुक कपळानुंग हरतिगा तारसोरिंग हन्दुरक।

³⁷ असके येसु अनि लोकुरक हरतिगडाल हन्जोरिंग ओरक जयतुन मराकना मटाता हन्दितिगा अवतुरक, असके चेलालोरक अनि सबोय लोकुरक अव सबोय अत्भुत चमत्कारता बुतोतुन हुळसुन पकाय गिरदा आसोरिंग हजोर लेंगदे परमेस्वरना स्तुति किया लाकतुरक:

³⁸ “परमेस्वरना पोरोयदे वान्तोर ओर राजाल धन्य मन्तोर! परमेस्वर अनि मानेयकना नडुम स्वरगतिगा शान्ति आयि अनि आबारतिगा परमेस्वरना महिमा आयि” इदाम इतुरक।

³⁹ असके लोकुरा भीळतिगाडाल हुचुलोरक परीसि लोकुरक येसुन, “हे गुरु, निया चेला लोकुरकुन इदाम हन्दिला धमकि हिम!” इन्जोर इतुरक।

⁴⁰ येसु ओरकुन, “येर कमेक आतुरक ते कल्क वने नावा स्तुति कियानुंग इन्जोर नना मिकुन वेहान्तोना” इन्जोर इतुर।

येरुसलेमता नाशता बारेते येसुना दुःख

⁴¹ अनि येसु येरुसलेम सेहेरता हेरे वातुर असके येरुसलेम सहेरतोरक लोकुरकुन हुळसुन येसु किलतुर।

⁴² अनि येसु इतुर, “हे येरुसलेमतोरक लोकुरक परमेस्वरनासंग शान्तिते मन्दान साटि मिया मदत किन्ता ओद पोल्लो निमाट समजेमान्तोरिट ते बचोक सोबाय मता। मति इदेक परमेस्वर अद शान्तितुन मियागडाल मकितुर।

⁴³ बाक्याकि परमेस्वर निकुन पिसान साटि वातुर ओद बेरा निकुन समजेमायो आतुरक इन्जोर निवोरक दुश्मन लोकुरक निया हिरमुटा आयनुरक, निकुन आहचानुरक;

⁴⁴ निया सहेर अनि सहेरतोर सबोय लोकुरकुन नाश कियानुरक, अनि निया सबोयतुन वने नाश कियाना उन्दि दिया नियागा वायार।”

येसु येरुसलेम मन्दिरताल मोमवालोरकुन पचियस हिन्तोर

⁴⁵ असके येसु प्रार्थना लोतिगा हन्जुन मोमवालोरकुन प्रार्थना लोताल बाहरो पसहिला लाकतुर।

⁴⁶ अनि येसु ओरकुन, “ ‘नावा लोन प्रार्थना कियाना लोन आयार, मति निमाट अदेन कलेरकना लोन बने कितिट’ इदाम पवित्र पुस्तकतिगा कोटताल मन्ता” इन्जोर इतुर।

⁴⁷ अनि येसु अद प्रार्थना लोतिगा रोजदिया परमेस्वरना पोल्लोतुन वेहन्दुर, मति मुक्याल याजक लोकुरक, मूसाना नियमतुन करिहवालोरक अनि यहुदिलोरा मुक्याल लोकुरक येसुन हव्कान साटि डाव पळकन्दुरक।

⁴⁸ मति सबोय लोकुरक मन लावेकिसुन येसुना पोल्लो केन्जतुरक इन्जोर ओरकुन डाव पुटो आतुरक।