लूका 17 - Muria Far Western

परिक्षाते अराना विरोद चेतावनि

¹ उन्दि दिया येसु आपुनोर चेलालोरकुन इतुर: “इद दुनियातिगा लोकुरकुन पापतिगा अरहान साटि जरुर परिक्षा आसोरिंग मन्दार, मति दुसरो मानेयक पापकियान साटि बोर मानेय कारण बनेकिन्तोर ओन परमेस्वर पकाय हजोर दन्ड हियानुर।

² नावागा विस्वास किन्तोर येर हुडलोरक निगडाल बोरे वरोन पाप किहान साटि बोरे कारण आयनुर ते ओना गुळंगातिगा जतातुन दोहचुन ओन समुद्रतिगा दुरसानाताल पकाय हजोर दन्ड ओन पुटार।”

³ “इन्जोर निमाट सावदान मन्ट। निवोर बायि-दादालोरक गलति कियानुर ते ओरकुन धमकि किम, अनि पस्तेमायनुर ते ओरकुन मापि किम।

⁴ अनि दियामेटे सात बेरांग निया गलति किस मन्दानुर अनि ओर सातो बेरांग निया हेरे वासुन ‘नना पस्तेमन्तोना’ इदाम इन्दानुर ते निमा ओन जरुर मापि किम।”

पका विस्वास

⁵ असके येसुना खास चेला लोकुरक प्रबुन इतुरक, “मावा विस्वासतुन बरसान साटि निमा मदत किम!”

⁶ असके प्रबु ओरकुन इतुर, “सरसोता हुडिला पळेता लेहका वने मिकुन विस्वास मन्वार ते, निमाट इद तोया पोरोयता हजोर मरातुन ‘हिरकनाल पसियसुन समुद्रतिगा हन’ इनेरिट ते अद मरा मिया केन्ज मन्वार।”

आपुना बुतो खरोय केवाल दासना लेहका आम्ट

⁷ येसु असा इतुर, “मियागा बोरे मानेयकुन नांगेल पुहचोरिंग मन्तोर या बेळांग मेहचोरिंग मन्तोर वरोर दास मन्तोर इन्जोर विचार किम्ट, अनि ओर दास डन्डतिगाडाल लोतिगा वायनुर असके ‘निमा सान्डे वासुन जेवेकियान साटि उदा इन्जोर मियागा बोरे ओन इन्दानुर बहे’?

⁸ मति ‘सान्डे नाकुन जेवेकियान साटि तयार किम अनि जेवेकियानावाह नळितुन दोहच नावा सेवाकिम अनि नावा जेवेकिता पजा निमा तिन्दा उन्दा’ इदाम ओर मालकाल आपुना दासतुन इन्दानुर बहे?

⁹ मति मालकाना आग्या केन्जतुर इन्जोर मालकाल ओन बसकेय धन्यवाद वेहोर आयनुर।

¹⁰ इदामे निमाट वने अद सबोय बुतोतुन किसुन मारिहतिट पजा, ‘माक विशेषाल धन्यवाद साटि लायेक दास हिलेम; माकुन बोद बुतो कियाना मता अदे बुतो कितोरोम’ ” इदाम मिक वने मालकानसंग इन्ट।

परमेस्वरतुन धन्यवाद केवाल आम्ट

¹¹ अनि उन्दि दिया येसु येरुसलेम हन्दुर असके सामरिया अनि गलील प्रदेशकता नडुमतिगाडाल आसुन हन्दिला आस मन्दुर।

¹² अगा उन्दि नारलोपाटक हन्दिला आस मन्दुर, असके येसुन दहा कोळि बिमारिलोकुरक पुटतुरक।

¹³ अनि ओरक लक निचुन, “हे येसु, हे गुरु, माकुन दया किसुन माकुन सुदरे किम!” इन्जोर हजोर लेंगदे केयसुन इतुरक।

¹⁴ येसु ओरकुन हुळसुन, “हन्ट, अदेन मन्दिरता याजक लोकुरकुन तोहाट” इन्जोर इतुर। अनि ओर हन्जोरिंग हन्जोर शुद्ध आतुरक।

¹⁵ असके ओरिगाडाल वरोर नना सुदरेमातान इदाम हुळतुर, हजोर लेंगदे परमेस्वरना स्तुति किसोरिंग परके मलस वातुर

¹⁶ अनि येसुनांग काल्क अडिय अरसुन ओना धन्यवाद किया लाकतुर, अनि ओर सामरि जातितोर मतोर।

¹⁷ अनि ओन हुळसुन येसु इतुर, “दहाय लोकुरक कोळि बिमारिताल सुदरेमातुरक मति नोव लोकुरक बगा हतुरक?

¹⁸ येर यहुदि आयोर येन हरचुन परमेस्वरना स्तुति कियान साटि असा दुसरो लोकुरक मलस वायोर बहे?” इदाम येसु इतुर।

¹⁹ अनि पजा येसु ओर मानेयतुन, “तेदा अनि हन; निमा नावागा विस्वास किति इन्जोर सुदरेमातोन” इन्जोर इतुर।

येसु मसिना असा मलस वायानाता बारेता पोल्लो

²⁰ परमेस्वर लोकुरकनिगा बसके राज्य कियानुर इन्जोर परीसि लोकुरक येसुन पुच्चेमातुर, असके येसु ओरकुन इतुर, “परमेस्वरना राज्य वायान बाहरो हुळाना बोदे चिनातांग संग आयो।

²¹ ‘हुळाट, इगा मन्ता आयो ते अगा मन्ता’ इदाम इनोरक आयनुर। परमेस्वरना राज्य मियाय नडुम मन्ता” इन्जोर ओर उत्तर इतोर।

²² असा येसु चेलालोरकुन इतुर, “निमाट नना मानेयतोर मरिना उन्दि दिया हुळाना इच्चा कियाना बेरा वायार मति निमाट हुळिला परविट आयकिट।

²³ लोकुरक मिकुन इन्दानुरक, ‘हुळाट, मसि अगा मन्तोर!’ आयोते ‘हुळिट, मसि इगा मन्तोर!’ इदाम इन्दानुरक मति निमाट हुळिला हन्माट अनि ओरा परके वने आयमाट।

²⁴ अनि बदाम आबारता उन्दि कोन्टाताल दुसरो कोन्टावनाह बिजलि चमके मास सबोय लोकुरक अदेन हुळान्तोरक अदामे नना मानेयतोर मरिना वायाना बेरा आयार असके सबोय लोकुरक नाकुन हुळानुरक।

²⁵ मति मुने नना मानेयतोर मरि पकाय पकाय तकलिपतुन सहेन किस इद पिळितोरक लोकुरक नाकुन तुच्च समजेमायाना जरुरि मन्ता।

²⁶ बदाम नुहाना काळते लोकुरक कितुरक अदामे नना मानेयतोर मरिना दियांग वने कियानुरक।

²⁷ अनि नुनाल अनि नुहाना परिवार जहाजतिगा अन्जोर आतुरक अद दियांगवनाह लोकुरक तिन्दुरक-उन्दुरक अनि ओरा पेकालक मरमिंग कितुरक अनि ओरा पेकिहकुन मरमिंग किस हितुरक। मति नुहाल अनि नुहाना परिवार जहाजतिगा अन्जतुरक असके पकाय हजोर उसा वासुन सबोय लोकुरकुन नाश कितु।”

²⁸ येसु असा इतुर, “लूतना दियाते वने आस मता लेहका लोकुरक तिन्दुरक उन्दुरक अनि लेनदेन किन्दुरक, अनि मराक उरसन्दुरक लोहक वने किन्दुरक।

²⁹ मति लूत सदोम सहेरताल पसियतुर अदेदिया आबारताल किस अनि गन्धक पिर लेहका अरतुंग अनि सबोयतुन नाश कितुंग।

³⁰ नना मानेयतोर मरि असा मलस वायाना दिया वने इदामे आयार।

³¹ नना मानेयतोर मरि असा मलस वायाना दिया लोन पोरो मन्दानुर ओर लोतिगा सामान मन्दानुंग ते अद बेरा अवेकुन ततिला अडिय रेयमाकिर। अदामे डन्डतिगा मन्दानुरक ओरक अद बेरा परके लोतिके हन्माकिरक।

³² लूत पोरोयतोर मानेयना मुतेहारिन बहातु इन्जोर अलहा!

³³ अनि आपुना जिवातुन पिसहाना कोसिस कियानुर ओर अनन्त काळदा जिवातुन नाश किहिनुर अनि परमेस्वरना साटि आपुना जिवातुन हियानुर ओन अनन्त काळदा जिवातुन केपनुर।

³⁴ नना मिकुन चेतेकिसुन वेहान्तोना, अद नरका इवुर मानेयक उन्दि कटुलतिगा मन्दानुरक; वरोन ओयनुर अनि दुसरोन हरचियानुर।

³⁵ रन्ड आसक संगेय जता नोरसोरिंग मन्दानुंग; उन्दितुन ओयनुर अनि दुसरातुन हरचियानुर।

³⁶ इवुर मानेय डन्डतिगा मन्दानुरक, वरोन ओयनुर अनि दुसरोन हरचियानुर।”

³⁷ इव पोल्लोनुंग केन्जुन ओरक येसुन पुच्चेमातुर, “हे प्रबु येसु इव पोल्लोंग बोद जागातिगा आयार?” येसु ओरकुन इतुर “मुरदांग बगा मन्ता अगा रवनांग डगि आन्तांग।”