लूका 14 - Muria Far Western

येसु परीसिना लोतिगा

¹ असके येसु परीसि लोकुरा वरोर मुक्याना लोतिगा जेवन तिन्दिलाय यहुदि लोकुरा पवित्र दिया हतुर असके परीसिलोकुरक येसुनिगा दोष लावे कियान साटि टेके मास मन्दुरक।

² अनि जलन्दर इन्दाना उन्दि बिमारि मता वरोर मानेय ओना मुने मतोर।

³ अनि येसु मूसाना नियमतुन करिहवालोरकुन अनि परीसि लोकुरकुन इतुर, “बांग पवित्र दिया सुदरे कियाना बेस मन्ता या हिले?”

⁴ मति ओरक कमेक मन्तोरक। असके येसु बिमार मानेयतुन इटसुन सुदरे किस ओन हन्दिला हितुर।

⁵ अनि येसु परीसि लोकुरकुन इतुर, “मियागाडाल बोर मानेयना मरि आयो ते ओना बोदे बुळगाल पवित्र दिया चुवातिगा अरि ते सान्डे हन्जुन चुवा लोपाडाल टन्डोर आयनुर बहे?”

⁶ मति येसु वेहतुर अव पोल्लोता बारेते मूसाना नियमतुन करिहवालोरक अनि परीसि लोकुरकुन बाताले उत्तर हिया परोरक आतुरक।

आप आपुनतुन हजोर बनेकेमाट

⁷ अनि वरताह लोकुरक हजो-हजोर जागानुंग आचांतोरक इन्जोर येसु हुळसुन येसु ओरकुन उन्दि पिटो वेहतुर:

⁸ “अनि बोरे मिकुन मरमिंगनिगा केयानुरक ते हजो जागातिगा हन्जुन उदमाट, बाक्याकि नियाताल वने बोरे हजोर मानेयतुन ओर केयस मन्दानुर।

⁹ अनि निकुन अनि हजोर मानेयतुन आपुनांग मरमिंगनिगा केयस मतोर ओर मरमिंगवाले वासुन निकुन, ‘हे दादा, येन उदिला जागा हिम’ इन्जोर इनिर ते निकुन लज्जा आसुन सबोयताल आकरि जागा हन्जुन उदिला लागर।

¹⁰ अनि निकुन मरमिंगनिगा केयानुर ते निमा सबोयता आकरि जागातिगा हन्जुन उदकि, अदाम कियाकि ते निकुन मरमिंगनिगा केयवाल मानेय निया हेरे वासुन, ‘हे गोतिया मुने हन्जुन उदा’ इदाम इन्दानुर असके नियासंग उदितोरक लोकुरा मुने निया मानमरयादा मन्दार।

¹¹ अनि आपुनतुन हजोर बनेकियानुर ओन हुडलोर बनेहकियानुर; अनि आपुनतुन हुडलोर बनेकियानुर ओन हजोर बनेहकियानुर।”

¹² अनि येसु ओर केयवालिन इदाम वेहतुर, “निमा जेवेकियान साटि दुपार आयो ते नरका केयकि ते निवोरक गोतियाह, वायिरक अनि संगालोरक अनि हेरेगुरेटोर दनवान लोकुरकुन केयमा। अनि ओरकुन केयकि ते ओरक वने निकुन केयानुरक, असके निया बदला आयार।

¹³ अनि निमा जेवेकियान साटि लोकुरकुन केयकि ते गरिब लोकुरकुन, विकलांग, लंगळाह अनि अन्दळाहकुन केया।

¹⁴ अदाम कियाकि ते निमा धन्य मानेय आयकि, बाक्याकि ओरिगा निकुन बदला हियान साटि बाराय हिलेंग अनि परमेस्वरना मुने येताना योग्य लोकुरा असा जिवे मायाना दिया निमा गरिब, विकलांग, लंगळाह, आन्दळाह लोकुरकुन तिहतोन ताना बदला परमेस्वर हियानुर” इन्जोर इतुर।

हजोर पंगता पिटो

¹⁵ अनि येसुनासंग जेवेकियान साटि उच मन्तोरक, ओरागडाल वरोर मानेय येसुनांग पोल्लोनुंग केन्जुन, “परमेस्वरना राज्यतिगा ओळीय ओळीय उचुन जेवेकियानुर ओर धन्य मानेय मन्तोर” इदाम येसुन इतुर।

¹⁶ अनि येसु ओर मानेयतुन इतुर, “बोरे मानेय हजोर जेवन हितुर, अनि पकाय लोकुरकुन केयतुर।

¹⁷ अनि जेवन बनेमात असके जेवेकियान साटि केयतोरक मानेयकुन केयान साटि आपुना सेवक लोकुरकुन लोहचुन, ‘वाट इदेक जेवन बनेमाता’ इदाम केयिहितुर।

¹⁸ मति सबोय लोकुरक ओर केयवान मापि तलकिला लाकतुरक। मुनेटोर मानेय इतुर, ‘नना डन्ड असतोना अनि जरुर नाकुन अद डन्डतुन हुळान साटि हन्दाना मन्ता; नाकुन मापि किसिम इदाम नना निकुन विनन्ति किन्तोना।’

¹⁹ अनि असा दुसरो मानेय इतुर, ‘नना सेयुंग जोळिंग कोन्दांग असतोना अनि अवेह सोबाय बुतो कियाकिंग या केवोंग इदाम हुळान साटि दान्तोना; नाकुन मापि किसिम इदाम नना निकुन कय जोळे किस वेहान्तोना।’

²⁰ अनि असा तिसरो मानेय वने, ‘नना मरमिंग कितोना इन्जोर नना वायपरोन’ इदाम इतुर।”

²¹ “अनि केयिला हन्वाल मानेय मलस वासुन आपुनोर मालकान इव सबोय पोल्लोनुंग वेहतुर। असके अद लोतोर मालकान पकाय होंगवासुन आपुनोरक दासकुन, ‘हन्ट अनि हाटुम अनि गलिनिगा मन्वालोरक गरिब लोकुरकुन अनि आन्दळाह, लंगळाह लोकुरकुन जेवेकियान साटि इगा ताट’ इदाम आग्या हितुर।

²² अनि केयिला हन्वालोर दासक आपुनोर मालकान इतुर, ‘निमा वेहति अदामे माक लोकुरकुन तचुन उपिहतोरोम, मति असा जागा पिस्ता’ इदाम इतुर।

²³ अनि असा वने मालकाल आपुनोर दासकुन इतुर, ‘सळेकनिगा अनि अवाह हेरे हन्ट अनि अवाह परके मन्वालोरकुन वेहचुन नावा लोन लोकुराते निन्दिरक इन्जोर जबरदस्ति किम्ट।

²⁴ बाक्याकि बोचोक लोकुरकुन इद जेवान साटि पहले केयस मतोना ओरा पयकि बोरे वने नावा जेवनतिगा जेवेकिया परोर आयनुरक इन्जोर नना मिकुन चेतेकिसुन वेहान्तोना।’ ”

चेला बनेमायाना किमत

²⁵ अनि येसुना परके-परके हजोर लोकुरा भीळ हन्दिला आस मन्द, असके येसु परके मिळिंचुन भीळतोर लोकुरकुन इतुर:

²⁶ “अनि नावा परके वासुन बोरे नावोर चेला बनेमायाना मन्दानुर ते, ओर आपुना अवाल-बाबोन अनि आपुना मुत्तेन, बालकिन अनि आपुना तमोन हेला अनि आपुना जिवातुन वने नावाताल वले मया केवोर आयिला पहाजे। आयोते ओरक नावोर चेला आय परोर आयनुर;

²⁷ अनि आपुना कुरुस ताहोर आस नावा परके वायोर आयनुर ओर वने नावोर चेला आय परोर।”

²⁸ येसु असा इतुर, “अनि मिया पयकि बोर मानेय उन्दि हजोर लोन बनेकियाना मन्ता ते ओद लोन बनेहकियाना खरचा नावा कयदे मन्ता या हिले इदाम ओर मुने हन्जुन अदेना बारेते योजना कियाकि बहे?

²⁹ आयोते ओर लोन बनेकियान साटि पायवा कातिर, मति लोन बनेकियाला परमाकिर आयनुर।

³⁰ ‘अनि येर ते मानेय लोन बनेकियाला लाकतुर, मति लोन बनेहकियाला परोर आतुर’ इदाम कावनुरक।

³¹ आयो ते बोरे राजाल बोरे दुसरो राजानासंग युद्ध कियाना साटि हन्दाना मुने उचुन विस हजार सेय्निक लोकुरासंग वायवाल मन्तोरक ओरा विरोद नावा केवल दहा हजार सेय्निक लोकुरासंग युद्ध किया परका या परोन, इदाम बाक्या युद्ध कियानाता बारेते मुने आल्हानुर बहे?

³² आयो ते येर राजाल लकताले हुळसुन, ओर राजाना हेरे आपुना सेय्निक दूततुन लोहचुन, ओनासंग मिलेमायाना कियानुर।

³³ इन्जोर मिया पयकि बोर-आयि आपुना जिवाताल सबोयतुन हरचिवोर आयनुर ते ओर नावोर चेलाल बनेमाय परोर आयनुर।”

मिटास्ता होवोर

³⁴ येसु असा ओरकुन इतुर, “होवोर ते सोबाय मन्ता, मति अद होवोरता मिटास बिगळे मात ते अद होवोरतुन असा बदाम मिटास किया परकाट बहे?

³⁵ अनि अद होवोर बोदे जागा साटि अनि बोदे खादता बुतोते वायो। अद होवोरतुन लोकुरक बाहरो वाटसिन्तोरक। निमाट बाताल केन्जान्तोरिट अदेन पकाय ध्यानते केन्जुन सम्जेकिम्ट।”