लूका 12 - Muria Far Western

कपटि लोकुराताल चोवकोस मन्ट

¹ अनि अचोन बेरा येसुन हुळान साटि हजार हजार लोकुरा पकाय भीळ दुरस-दुरसुन एकमेका पोरोडाल वायिला लाकतुरक असके येसु सबोयताल मुने आपुनोरक चेलालोरकुन इन्दा लाकतुर: “परीसिलोकुरा कपटि पोल्लोंगताल चोवकोस मन्ट, बाक्याकि ओरांग पोल्लोंग होवियता पिन्डि लेहका मन्ता।

² अनि मकिहचुन इन्तोरक बोदे पोल्लोंग दिसानुंग, अनि गुपित इरतोक अव सबोय पोल्लोनुंग वने पुन्दानुरक।

³ इन्जोर निमाट बोव पोल्लोनुंग आन्दारतिगा वेहानुरक, अनि लोन लोपा पुसकिने वेहान्तोरिट अव पोल्लोनुंग सबोय लोकुरा मुने वेहानुर।”

माक बोन वरियला पहाजे

⁴ अनि येसु असा इन्तोर: “मति नावोर गोतियाह नना मिकुन इन्तोना, मेन्दुलतुन हव्कान्तोरक मति इदेना तासि असा दुसरो बाताले किया परोरक बोरे लोकुरकुन वरियमाट।

⁵ मति निमाट बोने वरयाट इन्जोर नना मिकुन चेतेकिसुन वेहका, हव्कसुन नरकतिगा वाटसियाना अदिकार मन्ता परमेस्वरिन वरियमाट, इंगो, नना निमाट परमेस्वरदुन वरयाट असा मिकुन वेहान्तोना।

⁶ अनि रन्ड पयसाने सेयुंग कोळका पिटेंग लोकुरक मोमान्तोरक बहे? मति परमेस्वर अदेना पयकि उन्दि वने मरंगोर।

⁷ अनि मिया तलातांग कल्क वने लकतांग मन्तांग। इन्जोर निमाट वरियमाट, पकाय कोळका पिटेनताल वने मिया हजोर किमत मन्ता।”

येसुना गवाहि वेहानाता जरुरि

⁸ अनि येसु लोकुरकुन इन्तोर, “नाकुन मानेयकना मुने बोर आयि मानेमायनुर ते ओन नना मानेयतोर मरि वने स्वरगदूतकना मुने मानेमायका।

⁹ मति नाकुन मानेयकना मुने बोर मानेमायोर आयनुर ते ओन परमेस्वरना स्वरगदूतकना मुने मानेमायो आयका।

¹⁰ अनि नना मानेयतोर मरिन बोर आयि होंगते बोदे पोल्लो इन्दानुर ते ओना गुना मापि कियानुर, मति पवित्र आत्माता निन्दा बोर आयि कियानुर ते ओना गुनातुन मापि पुटपरो।”

¹¹ अनि येसु इन्तोर, “मिकुन नावा कारणते मिया समाज मन्डलितिगा अनि मिया मुक्या मानेयकना मुने अनि मिया अदिकारक लोकुरा मुने ओयनुरक, नना बदाम वळकिका अनि बदाम जवाब हियाका इन्जोर अद बेरा निमाट बोदे पोल्लोता चिन्ता केमाट।

¹² बाक्याकि परमेस्वरना पवित्र आत्मा अदेबेराते बाताल वळकाना मन्ता अद पोल्लोतुन मिकुन करहानुर।”

वरोर धनि मानेयना पिटो

¹³ अनि लोकुरा भीळतिगाडाल वरोर मानेय येसुन इतुर, “हे गुरु, बाबोना संपतितुन नावासंग तुसीर इन्जोर नावोर हजोर दादान वेहा।”

¹⁴ अनि येसु ओर मानेयतुन इतुर, “हे मानेय, नना मिया न्याय केवाल अनि तुसवाल आन्दान इन्जोर निकुन बोर वेहतुर?”

¹⁵ अनि येसु लोकुरकुन इतुर, “निमाट चोवकोस मन्ट! सबोय प्रकारतांग लालच कियानाताल आपुनतुन पिसहाट; बाक्याकि बोनाय जिवनता आदार संपति कमेहकियाना हिले।”

¹⁶ अनि येसु लोकुरकुन उन्दि पिटो वेहतुर: “बोरे धनि मानेयता डन्डतिगा पकाय वन्जिंग पन्डतुंग।

¹⁷ असके ओर ‘इदेक नना बदाम कियाका? बाक्याकि इदेक नावांग वन्जिनुंग इरान साटि जागा हिले’ इन्जोर धनि मानेय आपुना मन्दे आल्हिला लाकतुर।

¹⁸ असके ओर इतुर, ‘नना इदाम कियाका, नावांग वन्जिंग इराना लोहकुन अरिचुन अदेन हजोर बनेकियाकान अनि अगा नना सबोय पन्डतांग वन्जिनुंग अनि बाकि चिजकुन इरका।

¹⁹ अनि नना आपुनतुन इदाम इन्का, “नियागा पकाय वरसांग साटि पकाय धनसंपति इरतोना; मजा किम तिन-उन अनि सोबाय मन।” ’

²⁰ मति परमेस्वर धनिमानेयतुन इतु, ‘हे मूरखाल मानेय! इदे नरका निया जिवातुन नना ओयका; असके इद निमा धनसंपतितुन डगि कितोन अद बोना आयार?’

²¹ परमेस्वरना मुने धन बनेकेवोर आस आपुना साटि धनसंपति डगि किन्तोर ओर मानेय इदाम आन्दुर।”

परमेस्वरनिगा भरोसा इराट

²² अनि येसु आपुनोर चेलालोरकुन इतुर, “निमाट आपुना जिवाता बारेते माक बातांग तिनकोम; अनि आपुना मेन्दुल साटि माक बातांग करकोम इदाम आल्हिमाट इन्जोर मिकुन नना वेहान्तोना।

²³ बाक्याकि तिन्दानाताल वने जिवा हजोर मन्ता, अनि कपळांगताल वने हजोर मेन्दुल मन्ता।

²⁴ अनि कवरानिके हुळाट: अव बसकेन वीतोंग अनि बसकेय कोयोंग, अनि अवेकुन वन्जिंग इरान साटि टोलिवने हिले, मति परमेस्वर कावराकुन पालेकिन्तोर, अनि कावरांगताल निमाट हजोर मन्तोरिट।

²⁵ आलहिचुन आपुना वरसानुंग हुडुक गेला बरसिला परान्तोर मिया पयकि बोर मानेय किया परान्तोर?

²⁶ अनि निमाट सबोयताल हुडला बुतोतुन वने कियापरविट ते असा दुसरो पोल्लोंग साटि बाक्या आल्हान्तोरिट?”

²⁷ अनि येसु ओरकुन असा इतुर, “अनि केळातांग पुंगाह बदाम बरसतांग इन्जोर हुळाट; अव बाताले बुतो केवोंग अनि आपुन साटि सन्दरांग वने बनेहकेवोंग; मति सुलेयमान राजानिगा सबोय प्रकारता पकाय धनसंपति मता, मति ओर वने बसकेय केळातांग पुंगाह लेहका सिंगार केवोर आस मन्दुर इन्जोर नना मिकुन वेहान्तोना।

²⁸ अनि नेन्ड मन्ता मति नाळि किस्तिगा अचियानुर दिपा पल्लातिगा रोन्डातुन परमेस्वर इदाम लेहका मोळिहतुर ते हे अरदो विस्वास केवालोरक लोकुरक मिकुन परमेस्वर अदेनताल वने बचोन सोबातांग कपळांग करहोर आयनुर?

²⁹ अनि माक बातांग तिनकोम अनि बातांग उन्कोम इन्जोर मिया मन्दे इदाम चिन्ता केमाट।

³⁰ बाक्याकि दुनियातोरक सबोय लोकुरक इव पोल्लोनांग चिजकुन पळकसोरिंग मन्तोर, मति इव सबोय चिजक मिकुन जरुरत मन्ता इन्जोर मिवोर स्वरगतोर बाबाल पुन्तोर।

³¹ इन्जोर पहले निमाट परमेस्वरना राज्यतुन पळकाट अनि अदेनासंग इव सबोय चिजक वने मिकुन पुटानुंग।”

स्वरगता धनसंपति

³² येसु असा इतुर, “हे परमेस्वर साटि अलगो कितोरक विस्वासि लोकुरक, निमाट हुचुलोरे मन्तोरिट मति वरियमाट, बाक्याकि मिवोर स्वरगतोर बाबाल स्वरग राज्य मिकुन हियान साटि मिया पोरो गिरदा मन्तोर।

³³ अनि निमाट आपुना धनसंपतितुन मोमसुन दान हिसिम्ट। बोरे कलेरक ओयोर या पुळियक वने तिन्ज नाश केवोंग ओद स्वरगतिगा, बसकेन जुनाल आयो आयार पिसविंग अनि बसकेय मारो आयार धनसंपतिहकुन स्वरगतिगा डगि किम्ट।

³⁴ बाक्याकि बगा मिया धनसंपति मन्ता अगा मिया मन वने लागस मन्दार।”

चेता मन्ट

³⁵ येसु ओरकुन असा इतुर, “परमेस्वरना सेवाकियान साटि तयार आस दिवा पयटे किस केपसोरिन मन्ट,

³⁶ ओनोर मालकाल मरमिंग साटि हन्जुन मलस वासुन मारितुन कोहकानुर ते सान्डे हन्जुन आपुना मालकान साटि मारितुन तरया साटि ओर बसकेय मरमिंगताल मलस वायनुर इदाम आपुना मालकान साटि हरहुळस मन्तोर ओर मानेयता लेहका बनेमाम्ट।

³⁷ अनि मालकाल वायनुर असके सबोय तयारि किस मालकाल साटि हर हुळसोर मन्तोरक ओरक दास धन्य मन्तोरक। मालकाल आपुना तयारि किसुन ओरकुन तिन्दान साटि उपहानुर अनि ओरा सेवा कियानुर इन्जोर नना मिकुन चेतेकिसुन वेहान्तोना।

³⁸ अनि मालकाल अरदो नरका या कोरक कुसाना पहाराते वायानपा, आपुनोर दासतुन चेता कल्यान्तोर ओर दास धन्य मन्तोर।

³⁹ नेन्ड बचोन बेरा कलेर वायनुर इन्जोर लोतोर मालकाल पुन्ज मनेर ते ओर चेता मन्जुन केपेर अनि आपुना लोतिगा कलिला हेवोर आयेर।

⁴⁰ अनि निमाट आल्हिविट आयकिट ओद बेरा नना मानेयतोर मरि वायका इन्जोर निमाट वने चोवकोस मन्ट।”

विस्वासि अनि अविस्वासि दासक

⁴¹ असके पतरास, “हे प्रबु, इव पिटेंग माकुन वेहान्तोन या सबोय लोकुरकुन वेहान्तोन?” इन्जोर येसुन पुच्चेमातुर।

⁴² अनि प्रबु पतरासिन इतुर, “बरोबर बेराते तिन्दा-उन्दा हेविर इन्जोर मालकाल सबोय नोवकरकनिगा मुक्याल बनेकितोर विस्वासयोग्य अनि बुद्धिमान भणडारि, बोर मन्तोर?

⁴³ अनि ओरा मालकाल वायानपा आपुना बुतोतिगा पकाय सोबाय काम किसोरिंग कलियतोर ओर दास धन्य मन्तोर।

⁴⁴ अनि ओर मालकाल ओना सबोय धनसंपतितिगा आपुना विस्वासयोग्य दासतुन अदिकारि बनेहकियानुर इन्जोर नना मिकुन खरोय वेहान्तोना।

⁴⁵ मति निमाट असा दुसरो उन्दि पोल्लोता बारेते विचार किम्ट: ‘नावोर मालकान वायान साटि बेरा आयार’ इदाम विचार किस ओर दास आपुनोर मालकाना नोवकोरकुन अनि दासक दासिकुन हहाना-पिटहाना कितुर, अनि ओर दास तिन्वाल-उन्वाल अनि वाहचवाल वने आतुर।

⁴⁶ अनि ओर दास आपुनोर मालकान साटि केपोर आसोरिंग मन्दानुर अद दिया अनि बेराते ओनोर मालकाल वासुन ओर दासतुन पकाय दन्ड हिसुन ओन विस्वासघाति लोकुरासंग किसियानुर।

⁴⁷ अनि आपुनोर मालकाना इच्चातुन पुन्जुन ओना इच्चाता अनुसार तयारि आस ताकोर ओर दास पकाय मार तिन्दानुर।

⁴⁸ मति मालकाना इच्चा पुनोर आस दन्डता योग्य गलति किन्तोर ओर कमि मारतिन्दानुर। बोन पकाय हितोर ओनाताल पकाय तलकानुर, अनि बोन पकाय सोपेकिसितोर ओनाताल पकाय तलकानुर।”

येसुनिगा विस्वास कियानाता मारे होंग

⁴⁹ अनि येसु इतुर, “नना दरतितिगा किस लावेकियाला वातोन, ओद इदेक पोतिसोर मनवार इदाम नावा इच्चा मन्ता।

⁵⁰ नाकुन ते उन्दि बपतिस्मा येताना मन्ता अनि अद बपतिस्मा पुरा आयानावनाह नना पकाय तकलिपते मन्तोना!

⁵¹ अनि नना दरतितिगा मिले कियान साटि वातोना इदाम निमाट बाताल समजेमायिला आतोरिट बहे? आयो, मति अलगो कियान साटि वातोना इन्जोर नना मिकुन वेहान्तोना।

⁵² बाक्याकि इदेकवनाह उन्दि लोतिगा सेयुंग लोकुरक मन्तोरक, मति इदेक वरोन दुसरोनसंग होंगते मन्दानुरक, मुवुरक इवुर लोकुरासंग अनि इवुर मुवुर लोकुरासंग होंग मन्दानुरक।

⁵³ अनि बाबो मरिनासंग होंग मन्दानुर, अनि मरि बाबोनसंग होंग मन्दानुरक; अवहारि मियहारिसंग होंग मन्दार, अनि मियहारि अवहारिनसंग होंग मन्दार, अनि कोळयाहारि पोयहारिनसंग होंग मन्दार, अनि पोयहारि कोळयाहारिनसंग होंग मन्दार।”

इद पिळिता रुप-रंगता भेदतुन बराबर पुन्दाना

⁵⁴ अनि येसु लोकुरा भीळतुन इतुर: “निमाट आबारतुन पश्चिम दिशातिकेडाल तेदान्ता तान हुळसुन, ‘इदेक पिर वायार’ इन्जोर सान्डे इन्तोरीट। अदामे आन्ता।

⁵⁵ अनि दक्षिण दिशातिकेडाल वाळिय वायानातुन हुळसुन ‘इदेक पकाय गरमि आयार’ इन्जोर निमाट इन्तोरीट। अनि अदामे आन्ता।

⁵⁶ हे कपटि लोकुरक! निमाट ते दरति अनि आबारतांग रुप-रंगता भेदतुन पुन्दा परान्तोरिट। मति इद पिळिता रुप-रंगता भेदतुन बाक्या पुन्दा परविट?”

मिया विरोद केवालनासंग सान्डे मेलमिलाप किम्ट

⁵⁷ अनि येसु असा इतुर, “बोद पोल्लो बरोबर आन्द इन्जोर निमाट आपुहे बाक्या निर्णय केविट?

⁵⁸ अनि निमा आपुना विरोदिनासंग खरोय पोल्लोता निर्णय कियान साटि मुक्याह मानेयना हेरे हन्दिला आतोरिट ते निमाट हरतिगाय अद पोल्लोतुन अगाय मिटे कियाना किम्ट। अनि इदाम केवोर ते ओर निकुन न्याय केवाल मुक्याह मानेयना हेरे पिळिंगसोरिंग ओयिर अनि मुक्याह न्यायि निकुन पुलिसकना कयदे सोपे केविर अनि पुलिस लोकुरक निकुन जेहलतिगा केहचिविर।

⁵⁹ अनि बचोन-वनाह ओना सबोय गुनातुन निहचिवि आयकि अचोनवनाह निमा जेहलताल चुटेमायवि आयकि इन्जोर नना मिकुन चेतेकिसुन इन्तोना।”