लूका 11 - Muria Far Western

येसु चेलालोरकुन प्रार्थना करहान्तोर

¹ अनि येसु उन्दि जागातिगा हन्जुन प्रार्थना कियाला आस मन्दुर। अनि येसुना प्रार्थना मारत असके ओना चेलालोरकनिगाडाल वरोर चेलाल येसुना हेरे हन्जुन इतुर, “हे प्रबु, युहन्नाल आपुनोर चेलालोरकुन प्रार्थना कियान साटि करिहतोर अदामे माकुन वने निमा करहा।”

² येसु आपुनोरक चेलालोरकुन इतुर, “निमाट प्रार्थना कियाकिट असके इदाम प्रार्थना किम्ट: ‘हे स्वरगतोर बाबा, निया पोरोयदुन पवित्र इनिरक, अनि निया राज्य वायि।

³ मावा दियामेटा जेवन रोजदिया माकुन हिसोरिंग हन,

⁴ अनि माक वने मावा सबोय गुना केवालोरकुन मापि किन्तोरोम अदाम लेहका मावा पापतुन वने मापि किम, अनि माकुन परिक्षाते अरिहमा, सयतानताल पिसहा।’ ”

प्रार्थनाता लाव

⁵ असके येसु आपुनोरक चेलालोरकुन इतुर, “मियागा बोरे मानेयतुन बोरे वरोर गोतियाल मन्तोर इदाम विचारकिम, अनि अरदो नरका निमा ओना हेरे हन्जुन, ‘हे गोतिया, नाकुन मून्ड रोटिंग हिम,

⁶ बाक्याकि नावोर वरोर गोतियाल नावा लोतिगा वातोर, अनि ओन तिन्दिला हियान साटि नावा लोतिगा बाराय हिलेंग’ इदाम इन्कि ते,

⁷ ‘हे गोतिया निमा नाकुन तरास हेमा, इदेक मारिकेहताल मन्ता, अनि नावा बालक कटुलतिगा हुन्चतोर इन्जोर नना तेचुन निकुन हिया परोन?’ इदाम नियोर गोतियाल लोपाडाल इतुर,

⁸ ओर नियोर गोतियाल मन्तोर इन्जोर तेचुन निकुन रोटिंग हिया परोर आतुर, मति ओनोर गोतियाल लज्जा हरचुन तलकसोर ते ओन बोचोक रोटिंग पहाजे अचोक ओर ताहच हियानुर इन्जोर नना मिकुन वेहान्तोना।”

⁹ येसु इतुर, “अनि नना मिकुन वेहान्तोना: निमाट तलकिकिट ते मिकुन हियानुर; पळकिकिट ते निमाट कलियकिट; मारितुन कोहकिकिट ते मिया साटि तरयानुर।

¹⁰ बाक्याकि तलकसोर मन्तोर ओर मानेयतुन पुटान्ता; अनि पळकसोर मन्तोर ओर मानेयतुन कल्यान्तोर; अनि मारितुन कोहकचोर मन्तोर ओर मानेय साटि तरयानुर इन्जोर नना इन्तोना।

¹¹ मियागा बोरे बाबालिन ओनोर मरि रोटि तलकान्तोर ओर आपुनोर मरिन कल हियानुर बहे? अनि मीन तलकिर ते ओन मीनता बदला तरास हियानुर बहे?

¹² अनि ओर कोर मेन्ज तलकिर ते, ओन मिचो हियानुर बहे?

¹³ इदाम निमाट खराब मन्ज वने आपुनांग बालकुन सोबातांग चिजक हियाना पुन्तोरिट ते मिवोर स्वरगतोर बाबाल आपुनोर तलकवालोरकुन पवित्र आत्मा बचोक अधिक हियानुर!”

येसु अनि बालजबुल

¹⁴ अनि वरोर मानेयतुन बोदे दुष्टात्मा मुकाल बनेकिस मन्दा, अद दुष्टात्मातुन येसु ओनिगाडाल टन्डतुर। दुष्टात्मा ओनाकेडाल पसियस हतु असके ओर मुकाल मानेय वळकिला लाकतुर, अनि सबोय लोकुरक इद हुळसुन दंगे मातुरक।

¹⁵ मति लोकुरकला गोहडिताल हुचुलोरक लोकुरक, “येसु ते बालजबुल पोरोयदा दुष्टात्मातांग मुक्यालना मदतते दुष्टात्मातुन पसिहान्तोर” इन्जोर इतुरक।

¹⁶ दुसरो लोकुरक येसुना परिक्षा किसुन स्वरगताल उन्दि चिना तलकिला लाकतुरक।

¹⁷ मति येसु लोकुरा मन्दुन पुतुर अनि लोकुरकुन इतुर: “उन्दि राज्यता लोकुरक आप आपुना विरोद किस फुट आयकिट ते अद राज्य नाश आन्ता, अनि उन्दि लोता लोकुरक आप आपुनासंग वाहचान्तोरक ते अद लोन वने नाश आन्ता।

^18-19 अनि सयतान आपुनाय होंग कियार ते सयताना राज्य बदाम मन्दार? बाक्याकि नना बालजबुलना मदतते दुष्टात्मातुन पसिस हिन्तोना इदाम निमाट नावा बारेते इन्तोरीट, ते मिवोरक चेलालोरक बोना मदतते टन्डान्तोरक?

²⁰ मति येसु इन्तोर, नना परमेस्वरना लावदे दुष्टात्मातुन पसियस हिन्तोना ते परमेस्वरना राज्य खरोय मिया हेरे वाता।”

²¹ येसु असा ओरकुन इतुर, “लाववाले पेहेलवान मानेय हत्यार पयसुन आपुना लोतुन केपान्तोर असके ओना संपति पिस मन्दार।

²² मति ओर लाववाले पेहेलवान मानेयताल वने हजोर लाववाले पेहेलवान ओन हारेहकिसुन जिकान्तोर ते ओना भरोसा मन्ता ओद हत्यारकुन उन्चुन ओना संपतितुन लुटे किसुन लोकुरिगा तुसिन्तोर।”

²³ अनि येसु इतुर, “नावासंग हिलेर ओर नावा होंगते मन्तोर, अनि नावासंग सेवाते लोकुरकुन परमेस्वरना हेरे तरोर ओर परमेस्वरना हेरेटाल लोकुरकुन लक किन्तोर।”

दुष्टात्मा मलस वान्ता

²⁴ अनि येसु ओरकुन इतुर, “अनि उन्दि दुष्टात्मा मानेयतिगाडाल पसियान्ता ते वतिताल जागातिगा रोमान साटि पळकसोरिंग वल्यान्ता अनि बगाय कल्यो आन्ता असके, ‘बगाडाल नना पसियान्तोना अदेय लोतिगा मलस दाका’ इदाम इन्ता।

²⁵ अद लोतिगा दुष्टात्मा मलस वासुन अद लोतिगा बोरे साप किसुन क्रमानुसार तयारि किस इरता हुळान्ता।

²⁶ असके अद दुष्टात्मा अदेनताल वना पकाय दुष्ट बुतोंग किन्ता सात दुष्टात्मांगतुन असा वने आपुनसंग ततान्ता अनि अव अद लोतिगा हन्जुन उदान्तांग। अदाम ओर मानेयता तकलिप मुनेटाल तकलिपताल वने पकाय आन्ता।”

खरोय धन्य बोर मन्तोर

²⁷ अनि येसु लोकुरकुन दुष्टात्माता बारेते वेहिला आस मन्दुर, असके लोकुरा भीळतिगाडाल उन्दि आळ हजोर लेंगदे इतु, “निकुन जनम हिता अनि निकुन पालन पोषन किता अद याल धन्य मन्ता।”

²⁸ अनि येसु अद आळदुन इतुर, “इंगो, मति परमेस्वरना पोल्लोतुन केन्जुन मानेमान्तोरक ओरक अदेनताल वने धन्य मन्तोरक।”

स्वरगता चिन्हातुन तलकान्तोर

²⁹ अनि लोकुरा भीळ पकाय डगि आयिला लाकतु, असके येसु इन्तोर, “इद पिळितोरक लोकुरक पकाय खराब लोकुरक मन्तोरक। ओरक चिनांग पळकान्तोरक, मति योनान चिन्हातुन हरचुन दुसरो बोदे चिना असा ओरकुन हेवोर।

³⁰ अनि योनान निनवे देशतोरक लोकुरक साटि चिना आतुर, अदाम लेहका नना मानेयतोर मरि वने इद पिळितोरक लोकुरक साटि चिना आयका।

³¹ अनि इस्रयेल देशता दक्षिण भागता शेबा देशता रानि न्यायता दियाते असा जिवे मासुन, इद बेरातोरक लोकुरकुन न्यायता दियाते दन्ड हियान साटि ओरा विरुद गवाहि हियार; बाक्याकि अद रानि सुलेयमानना ग्यान केन्जान साटि दरतिता पकाय लकताल वासि; मति हुळाट, सुलेयमानताल वने पकाय हजोर मानेय इगा मन्तोर, मति ओना पोल्लोतुन निमाट केन्जविट। ओर मानेय नना आन्दान।

³² अनि निनवे देशतोरक लोकुरक न्यायता दिया इद पिळितोरक लोकुरासंग निचुन ओरकुन दोष लावेकियानुरक; बाक्याकि निनवे देशतोरक लोकुरकुन योनाल परमेस्वरना पोल्लोतुन वेहतुर, अनि ओरक केन्जुन आपुना पापताल पस्तेमातुरक, मति हुळाट, योनाताल वने पकाय हजोर मानेय इगा मन्तोर, मति ओना पोल्लोतुन निमाट केन्जविट। ओर मानेय नना आन्दान।”

मेन्दुलता वेळिचि

³³ अनि येसु असा इतुर, “टिवरि पयटे किसुन बोरे कटुल अडिय या अळका अडिय इरोरक, मति लोपा वायवालोरकुन वेळिचि आयि इन्जोर कोपेलातिगा इरान्तोर।

³⁴ निया मेन्दुलता टिवरि निया कोन्डांग आन्दुंग। इन्जोर नियांग कोन्डांग सोबाय मन्तांग ते निया सबोय मेन्दुल वेळिचि मन्ता। मति नियांग कोन्डांग खराब मन्तांग ते निया सबोय मेन्दुल आन्दार मन्ता।

³⁵ इन्जोर इदेक मियागा मन्ता ओद वेळिचि आन्दार आयिला हेमाट इदाम निमाट सावदान मन्ट।

³⁶ अनि निया सबोय मेन्दुलतिगा वेळिचि मन्ता अनि मेन्दुलता बोद वने कोन्टाते आन्दार हिले ते उन्दि टिवरिता बदाम वेळिचि हिन्ता अदामे निया सबोय मेन्दुल वेळिचिते निन्दार।”

येसु मूसाना नियमतुन करिहवालोर अनि परीसिलोकुरा विरोद वळकान्तोर

³⁷ अनि येसु वळकिला आस मन्दुर, असके वरोर परीसि मानेय ओना लोतिगा जेवेकिम इन्जोर विनन्ति कितुर। असके येसु ओर परीसिना लोतिगा हन्जुन लोपा जेवेकियान साटि उदितुर।

³⁸ अनि येसु यहुदि रिवाचता अनुसार कय नोरवाय जेवेकियान साटि उदितुर इन्जोर परीसि मानेय येसुन हुळसुन दंगे मातुर।

³⁹ अनि येसु परीसि मानेयतुन इतुर, “निमाट परीसि लोकुरक वाटिनुंग अनि दळियानुंग पोरोह-पोरोह साप किस मान्जे किन्तोरिट, मति मिया मन्दा लोपा पकाय लालच अनि खराब पोल्लोंगते निन्दितांग।

⁴⁰ हे निरबुद्धि लोकुरक! परमेस्वर ते लोपाडा भागतुन बनेकितोर, ओर बाहरोटा भागतुन वने बने कितोर।

⁴¹ मति इंगो, निमाट आपुनांग कयदे बाताल बाताल मन्ता अदेन दान कियाकिट ते मियांग सबोय चिजक मिया साटि शुद्ध आयनुंग।

⁴² हे परीसि लोकुरक मिकुन हाय! निमाट सबोय चिजकनांग दाहवो भाग परमेस्वरदुन हिंतोरिट, मति न्यायतुन अनि परमेस्वरना मयातुन हरचिन्तोरिट। अनि दाहवो हिम्ट अनि परमेस्वरतुन मया किस दुसरो लोकुरकुन न्यायते व्यवहार किम्ट।

⁴³ हे परीसि लोकुरक मिकुन हाय, निमाट समाज मन्डलितिगा मुक्या मुक्या गदिंगनिगा अनि हाटुमतिगा नमस्कार पुटाना हुळान्तोरिट।

⁴⁴ हाय मिकुन, बाक्याकि निमाट अव चुना उसतांग पान्डरिह बिजगुडिता लेहका मन्तोरिट, अवेना पोरो ताकान्तोरक ओर पुनोरक अवेना लोपा बचोक दोयिंगता इन्जोर।”

⁴⁵ असके मूसाना नियमतुन करिवाल वरोर मानेय येसुन इतुर, “हे गुरु, इदाम पोल्लोंग वेहचुन निमा मावा निन्दा किन्तोन।”

⁴⁶ अनि येसु इतुर, “मूसाना नियमतुन करिहवाल लोकुरकुन हाय, निमाट कटिन पोल्लोंग अनि आग्यानुंग मानेयकुन वेहान्तोरिट मति अदेन कियाना पकाय कटिन मन्ता। मति निमाट अव आग्यानुंग अनि पोल्लोनुंग आपुन मानेमायान साटि ओरकुन बाताले मदत केविट।

⁴⁷ मिकुन हाय, मुनेटोर परमेस्वरना पोल्लो वेहवालोरकुन मिवोरक दादि बाबोलोरक हव्कतुरक। अनि निमाट इद बविस्या वेहवालोरकुन साटि बिजगुडिंग बनेहकितुरक।

⁴⁸ इन्जोर निमाट आपुनोरक बाबो दादिलोरा ओद बुतोंगतांग गवाहि मन्तोरिट अनि अदेन सम्मत किन्तोरिट; बाक्याकि मिवोरक बाबो दादिलोरक ओरकुन हव्कतुरक अनि निमाट ओरांग बिजगुडिंग बनेकिन्तोरिट।

⁴⁹ इन्जोर परमेस्वर आपुना ग्यानते मुनेटाले वेहतोर, ‘नना परमेस्वरना पोल्लो वेहवालोरकुन अनि परमेस्वरना पोल्लोतुन वेहान साटि आचतोर येसुना खास चेलालोरकुन ओरा हेरे लोहका अनि ओरक हुचुलोरकुन सत्तेकियानुरक अनि हुचुलोरकुन हव्कानुरक।’

^50-51 हाबिलना हव्कानाताल येरुसलेम मन्दिरता वेदि अनि पवित्र जागाता नडुम ओरक हव्कस नतुर तुहतोरक जकरयाना हव्कनावनाह, इद दुनियाता सुरुवाताले बचोलोरक परमेस्वरना पोल्लो वेहवालोरकुन होवक्स नतुर तुहतोरक ओर सबोय लोकुरा नतुरतुन इद पिळितोरक लोकुरक उत्तर हियाला पहाजे। इंगो, इद पिळितोरक लोकुराताल नना हिसाब येतानुर इन्जोर नना मिकुन चेतेकिसुन वेहान्तोना।”

⁵² येसु असा इतुर, “मूसाना नियमतुन करिहवालोर मिकुन हाय, मिकुन पकाय हजोर डन्ड पुटार बाक्याकि निमाट आपुना परमेस्वरिन पुनविट अनि दुसरो लोकुरकुन परमेस्वरिन समजेमायान साटि परवांगि हेविट, इद उन्दि लोता कुन्जि निमाट हरचताप लेहका मन्ता। निमाट आपुना ओद लोतिगा हनविट, अनि निमाट दुसरोन वने ओद लोतिगा होळियला हेविट।”

⁵³ अनि येसु अगडाल पसियतुर असके मूसाना नियमतुन करिहवालोरक अनि परीसिलोकुरक,

⁵⁴ येसुना विरोदते ओनासंग वाद-विवाद किसुन ओना परके हतुरक। येसुना टोडिताल बोदे गलति पोल्लोंग पसियानपा ओन फसेकिस पयान साटि ओरक असा वने पकाय प्रश्न पुच्चेमास ओन चेळेकियाला लाकतुरक।