यहुदा 1 - Muria Far Western

अभिवादन

¹ येसु मसिनोर सेवक अनि याकुबनोर तमो यहुदा, बाबो परमेस्वर मया किन्तोर अनि येसु मसि साटि सुरक्षित इरान्तोर ओर सबोय केयतोर लोकुरक साटि इद पत्र कोटान्तोना।

² दया अनि शान्ति अनि मया मिकुन पकाय पुटसोर मनि।

खोटाल करिहवालोर लोकुरकुन पुटवाल दन्ड

³ हे प्रिय गोतियालोरक, माक सबोय लोकुरक सहभागि मन्ता ओद पिसानाता बारेते नना कोटान साटि योजनाकिस पकाय मेहनत कितान। ओद बेरा पवित्र लोकुरक साटि, सबोय काळ साटि, उन्दिय बेरा सोपेह किस मतोर ओद विस्वास साटि लळायिकियाना जरुरिता बारेते मिकुन प्रोत्साहन कियाना पकाय जरुरि मन्ता इन्जोर नाकुन समजेमातान।

⁴ बाक्याकि मावोर परमेस्वरना दयातुन गलति वासना साटि उपयोग किस येसु मसिन मावोर वरोरे स्वामि अनि प्रबु इन्जोर मानेमायोर अदरमि लोकुरकनिकेडाल हुचुलोर लोकुरक मसिलोकुरा मावोर सभातिगा मकस वास मिलेमातुरक। येर लोकुरा दन्डता बारेते पवित्र पुस्तक पकाय पहलेय भविष्यवाणि किस मता।

⁵ मति निमाट इद सबोय पोल्लोंग उन्दि बेरा पुतोरिट ते वने हुचुक पोल्लोनुंग मिकुन आलहिच हियाना नना इच्चा किन्तोना। प्रबु मिस्रि देशताल आपुना लोकुरकुन पिसिहचुन पसहिस मतोर पजा बोर विस्वास केवोर आतुरक ओरकुन नाश कितुर।

⁶ परमेस्वर हिता बुतो केवोर आस आपुना पथतुन स्थिर इरोरक अनि आपुना मन्ताना जागातुन तासितुरक, ओरक स्वरगदूतकुन वने ओद पकाय हजोर दियाता न्यायकियान साटि आन्दारतिगा सबोय काळ प्रबु दोहच इरतोर।

⁷ इदाम रितिते सदोम अनि अमोरा अनि येरा लेहका व्यभिचारि आस दुसरो मेन्दुलता लागेमास मतोरक अवेहना हेरेगुरेटा सहेरता लोकुरकुन अनन्त दन्डता किसते दन्ड कितुर। इद मावा साटि चेतावनि मन्ता।

⁸ अदामे मावोर लोकुरकनिगा मकस वातोरक येर लोकुरक आपुना कनिष्काना परके वितसोर आपुना मेन्दुलते अशुद्ध पाप किन्तोरक, अनि प्रबुना अदिकारतातुन तुच्च मानेमास स्वरगदूतकना निन्दा किन्तोरक।

⁹ मति मुक्याल स्वरगदूत मीखायिल सयतानतुन मूसाना मुरदा मेन्दुलता बारेते सयतानासंग वाद-विवाद कितुर ते ओना निन्दाकिस दोष लावेकियाना हिमत केवोर मति “प्रबु निकुन दन्ड हियानुर इन्जोर इतुर।”

¹⁰ येर लोकुरक बोव पोल्लोंग येरकुन समजेमायोंग अदेना निन्दा किन्तोरक। अनि बुद्धि हिले ओद जानवरक लेहका बोव पोल्लोंग येरकुन स्वाभाविक रितिते आपुना अनुभवते समजेमान्तोरक अदेना कारण येरक आपुना नाश किन्तोरक।

¹¹ बचोन पकाय तकलिप ओरा साटि वायार! बाक्याकि ओरक कायिनना हरिते ताकतुरक अनि मजदुरि साटि बिलाम लेहका गलति कितुरक अनि कोरहना लेहका विरोद किस नाश आतोरक।

¹² अनि वरे केवोर आस मिया मयाता सभातिगा मियासंग तिन्तोर-उन्तोरक येरक समुद्रतिगा मकता कल डोंगातुन बचोन कतरनाक मन्ता अदामे येरक वने मन्तोरक, अनि केवल आपना बारेते विचार किस आपुनाय पोटा निहवालोर मेहवालोर आन्दुरक, येरक वळिय तुळहिच ओन्ता एर हिले ढगिंग लेहका बोदे फायदा हिलेर आन्दुरक, अनि वचुन हिरक पसियस मुटतांग सबोय नाश आता कायांगवाले रुतुता बेरा कायांग हादो ओद मरा लेहका आन्दुर।

¹³ आपुना पकाय लज्जाता बुतोता कारणते येरक फेस तोहवालोर समुद्रता पकाय भयानक पळवाह लेहका मन्तोरक। अनि येरक आपुना स्थानते मनो ओद वलियवाल हुकोंग लेहका मन्तोरक। येरा साटि परमेस्वर अनन्तकाळता अन्दकार इरतोर।

¹⁴ आदमताल सातवो पिळितोर हनोक वने येर लोकुरक साटि परमेस्वरना पोल्लो इदाम वेहच मतोर, “हुळाट, प्रबु आपुनोर हजार-हजार स्वरगदूतकनासंग वान्तोर।

¹⁵ येरक सबोय लोकुरा न्याय कियान साटि अनि सबोय परमेस्वरना वरे इरवोर दुष्ट लोकुरकुन ओरा अदारमिक अनि खराब बुतोंगता साटि, अनि परमेस्वरना विरुद मन्तोर सबोय पापि लोकुरा परमेस्वरना विरुद वेहता खराब पोल्लोता कारण येरकुन न्यायकियान साटि वान्तोर।”

¹⁶ येरक लोकुरक बळबळेमायाना अनि दोष पळकवालोर मन्तोरक, अनि आपुना इच्चा अनुसार ताकवालोर मन्तोरक, अनि येरक घमेन्डता पोल्लोंग वळकान्तोरक, अनि येरक आपुना फायदा साटि दुसरोनसंग चापलुसि पोल्लोंग वळकवाल मन्तोरक।

चेतावनि अनि उपदेश

¹⁷ मति हे प्रिय गोतियालोरक, मावोर प्रबु येसु मसिहनोर खास चेला लोकुरक मुनेटालेय मिकुन इतोरक ओव पोल्लोनुंग आलहाट।

¹⁸ “आकरि दियाते आपुना अदरमता इच्चाता अनुसार ताकस प्रबुन मजाकेवालोर लोकुरक पसियानुरक” इन्जोर ओरक मिकुन इन्दुरक।

¹⁹ येरक लोकुरक मियागा फुट अरिहवालोर आन्दुरक। अनि येरक केवल आपुनाय अनुभते इद दुनियाता अपवित्र इच्चांगता परके वितवालोर अनि पवित्र आत्मा हिले लोकुरक आन्दुरक।

²⁰ मति हे प्रिय गोतियालोरक, निमाट आपुना पकाय पवित्र विस्वासते मजबुत किस पवित्र आत्माते प्रार्थना किसोर मन्ट।

²¹ अनन्त जिवन साटि मावोर प्रबु येसु मसिना दयातुन हर हुळस आपुनतुन परमेस्वरना मयातिगा केपसोर मन्ट।

²² अनि विस्वासतिगा शंकाते मन्तोरक लोकुरकुन दया किम्ट।

²³ अनि दुसरो लोकुरकुन न्यायता किसिताल टन्डस पिसहाट, अनि मेन्दुलता खराब बुतोता द्वारा डाग आता ओरा सन्दरातुन वने तिरसकार किस वरेतासंग ओरकुन दया किम्ट।

आशिरवादता पोल्लो

²⁴ इदेक अरानाताल मिकुन पिसहिच आपुना महिमाता मुने पकाय गिरदातासंग निरदोष किस निपिहला परान्तोर,

²⁵ मावोर प्रबु येसु मसिना द्वारा मावोर पिसिहवाल केवल वरोर परमेस्वरिन, पहलेटा काळताल इदेक वने अनि सबोय काळदे महिमा, गेवरव अनि लाव अनि अदिकार मनि। आमिन।