युहनाल 8 - Muria Far Western

येसु व्यभिचारि आळदुन मापि किन्तोर

¹ मति येसु जेयतुन मराकना मटा पोरो हतुर।

² अनि जुन्जुरकायि ओर असा मन्दिरतिगा वातुर। अनि सबोय लोकुरक ओना हेरे वातुरक असके ओर ओरकुन करिहला लागतुर।

³ असके मूसाना नियमतुन करिहवालोरक अनि परीसि लोकुरक उन्दि आळदुन ततुरक अनि ओद आळदुन व्यभिचार कियानपा पयस मतोरक। अनि अदेन लोकुरा नडुम नितस येसुन इतुरक,

⁴ “हे गुरु इद आळदुन व्यभिचार कियानपा पयतोम।

⁵ इदाम आळदुन कल्कने हेविर इन्जोर नियमतिगा मूसाल माकुन आग्या हितोर; इन्जोर निमा इद आळदा बारेते बाताल इन्तोन?”

⁶ अनि ओरक येसुन फसेकियान साटि इदाम पोल्लोंग इतुरक बाक्याकि ओनिगा दोष लावेकियान साटि पोल्लो हुळन्दुरक मति येसु अडिय वकसुन वळिन्जते जागातिगा कोटिला लागतुर।

⁷ बसके ओरक ओन पुच्चेमास मतोरक असके ओर सिदो आस ओरकुन इतुर, “मियागडाल बोर पाप केवोर, ओरे पहले अदेन कलदे हेविर।”

⁸ अनि असा अडिय वकसुन येसु जागातिगा वळिन्जते कोटिला लाकतुर।

⁹ असके ओरक इद केन्जुन हजोरताल हुडलोरवनाह वरोर वरोर जन पसियस हतुरक अनि येसु वरोरे मतोर अनि अद आळ वने अगाय नडुम नितस मता।

¹⁰ अनि येसु सिदो आस अद आळदुन पुच्चेमातुर, “हे बायि, ओरक बेके हतुरक? बाताल बोरे निकुन दन्ड हियाना आग्या हेवोर बहे?”

¹¹ अनि अद आळ इतु, “हे प्रबु बोरे दन्डता आग्या हेवोर।” अनि येसु अदेन इतुर, “नना वने निकुन दन्डता आग्या हेवोन, निमा हन अनि असा पाप केमा।”)

येसु दुनियातोर वेळिचि

¹² अनि येसु असा लोकुरकुन इतुर, “नना दुनियाता वेळिचि आन्दान; बोराय नावा परके वायनुर ओर आन्दारते ताकोर आयनुर मति जिवन हेवाल वेळिचि पुटहानुर।”

¹³ परीसि लोकुरक येसुन इतुर: “निमा आपुना गवाहि आपुने हिन्तोन इन्जोर निया इद गवाहि खरोय हिले।”

¹⁴ अनि येसु ओरकुन इतुर, “नना आपुना गवाहि आपुने हिन्तोना ते वने नावा गवाहि खरोय मन्ता बाक्याकि नना बगाडाल वातोना अनि बगा दान्तोना इन्जोर नना पुन्तोना मति नना बगडाल वान्तोना अनि बगा दान्तोना इन्जोर निमाट पुनविट।

¹⁵ अनि निमाट दुनिया बदाम न्याय किन्ता अदाम न्याय किन्तोरिट मति नना बोनाय न्याय केवोन।

¹⁶ अनि नना न्याय कियाका ते वने, नावा न्याय खरोय मन्ता बाक्याकि नना वरोरे आयो। मति नना नाकुन लोहतोर नावोर बाबोनासंग मन्तोना।

¹⁷ अनि इवुर लोकुरक मिलेमास हिता गवाहि खरोय मन्ता इन्जोर मिया नियमतिगा वने कोटता मन्ता।

¹⁸ अनि नना आपुना आपुने गवाहि हिन्तोना अनि नाकुन लोहतोर ओर बाबो वने नावा गवाहि हिन्तोर।”

¹⁹ अनि ओरक येसुन पुच्चेमातुरक, “नियोर बाबो बगाडुर?” अनि येसु ओरकुन इतुर, “निमाट नाकुन पुनविट अनि नावोर बाबोन वने पुनविट, नाकुन पुन्ज मनेरिट ते नावोर बाबोन वने निमाट पुन्ज मनेरिट।”

²⁰ अनि इव पोल्लोंग ओर मन्दिरतिगा उपदेश हियानपा भेट पुटता चिजतुन इराना खोलिता हेरे इतुर। अनि परमेस्वरना योजना पुरा कियाना बेरा वायो आसि इन्जोर बोरे ओन पयोरक।

येहुदि लोकुरक येसुना बारेते बाराय पुनोरक

²¹ अनि येसु ओरकुन इतुर, “नना दान्तोना, निमाट नाकुन पळकिकिट, अनि आप आपुना पापते निमाट हायकिट। अनि बगा नना दान्तोना अगा निमाट वाय परविट।”

²² असके येहुदि अदिकारि लोकुरक इतुरक, “ ‘बगा नना दान्तोना अगा निमाट वाय परविट’ इदाम ओर इन्तोर, बाताल ओर आपुनतुन हव्कस वाटनुर बहे?”

²³ असके येसु ओरकुन इतुर, “निमाट दरतितिगा जनम आतोरिट ते दरतितोर आतोरिट, नना स्वरगतिगाडाल वातोना इन्जोर दरतितोर आयोन।

²⁴ पवित्र पुस्तकतिगा बोन ‘नना आन्दान’ इन्जोर कोटता मन्ता ओर ननाय आन्दान इन्जोर नना दावा कितान। ओद पोल्लो निमाट विस्वास केवि आयकिट ते निमाट आपुना पापते हायकिट इन्जोर नना मिकुन इन्ज मतोना।”

²⁵ अनि ओरक येसुन इतुरक, “निमा बोर आन्दि?” येसु ओरकुन इतुर, “बोद पहलेटाल नना मिकुन वळकसोर वातोना। नना ओरे आन्दान।

²⁶ मिया बारेते नाकुन पकाय इन्दाना मन्ता अनि न्याय कियाना मन्ता मति नाकुन लोहवाल खरोय मन्तोर अनि बोद नना ओनाकेडाल केन्जान्तोना अदे दुनियाता लोकुरकुन इन्तोना” इदाम इतुर।

²⁷ अनि ओर आपुना बाबोना बारेते वळकिला आतोर इन्जोर ओरकुन समजेमायो।

²⁸ असके येसु इतुर, “निमाट नना मानेयतोर मरिन कुरुस पोरो अन्जिहच हव्किट असके बोन ‘नना आन्दान’ इन्जोर पवित्र पुस्तकतिगा कोटता मन्ता ओर ननाय आन्दान इदाम नना दावा किस मतोना अद पोल्लो बराबर मन्ता अनि नना आपुना मन्दे बाराय केवोन मति बदाम नावोर बाबो नाकुन करिहतोर अदामे नना इव पोल्लोंग इन्तोना इन्जोर वने निमाट पुन्किट।

²⁹ नाकुन लोहवाल नावासंग मन्तोर; नना दरोज ओन गिरदाकियाना बुतो किन्तोना इन्जोर ओर नाकुन वरोरे इरोर” इन्जोर इतुर।

³⁰ अनि ओर इव पोल्लोंग वेहानपा पकाय लोकुरक ओनागा विस्वास कितुरक।

खरोय मिकुन स्वतन्त्र कियार

³¹ असके येसुनिगा विस्वास कितोर येहुदि लोकुरकुन येसु इतुरक, “निमाट नावा करहानातिगा दरोज मान किसोर मनकिट ते निमाट खरोय नावोर विस्वासि आयकिट।

³² निमाट परमेस्वरना खरोय बाताल इन्जोर पुन्किट ते ओद खरोय मिकुन दासता बन्दनताल स्वतन्त्र कियानुर।”

³³ असके ओरक ओन इतुर, “माक ते अब्रहामना पिळिते जनम आतोम, अनि बसकेय बोनाय दास आयोम। ते ‘निमाट दासताल स्वतन्त्र आयकिट’?” इदाम निमा बाक्या इन्तोन।

³⁴ येसु ओरकुन उत्तर हितुर, “बोरायि पाप किन्तोर ओर पापता अदिकारते मन्तोर इन्जोर नना मिकुन खरोय खरोय इन्तोना।

³⁵ दास दरोज लोन मनोर, मति मरि दरोज लोन मन्तोर।

³⁶ इन्जोर मरि मिकुन स्वतन्त्र कियानुर ते खरोय निमाट पापता अदिकारताल स्वतन्त्र आयकिट।

³⁷ निमाट अब्रहामना वंशतोर आन्दिट इन्जोर नना पुन्तोना ते वने निमाट नाकुन हव्काना इच्चा किन्तोरिट बाक्याकि नना बोद पोल्लोंग मिकुन करहान्तोना ओद पोल्लोतुन निमाट स्विकार केविट।

³⁸ अनि नावोर बाबो बोद नाकुन तोहतोर अदे मिकुन इन्तोना, मति मिवोर बाबो बोद मिकुन इतोर अदेन निमाट किन्तोरिट।”

³⁹ ओरक येसुन उत्तर हितुर, “माक अब्रहामना वंशते जनम आतोम।” अनि येसु ओरकुन इतुर, “निमाट खरोय अब्रहामना वंशतोर लोकुरक मनेरिट ते अब्रहाम बोद बुतोंग कितोर ओदेय बुतोंग निमाट वने किस मनेरिट।

⁴⁰ परमेस्वरनिकेडाल केन्जतोना ओद खरोय पोल्लो नना मिकुन वेहान्तोना। मति इदेक निमाट नाकुन हव्काना इच्चा किन्तोरिट। इदाम अब्रहाम ते बसकेय केवोर आसि।

⁴¹ मति मिवोर असलि बाबो बोद बुतो कितुर अदे निमाट वने किन्तोरिट।” ओरक ओन इतुर, “माक व्यभिचारते जनम आयोम। अनि मावोर वरोरे बाबो मन्तोर ओर परमेस्वरेय आन्दुर।”

⁴² येसु ओरकुन इतुर, “खरोय परमेस्वर मिवोर बाबो मनेर ते निमाट नाकुन मया किस मनेरिट, बाक्याकि नना आपुना अदिकारते वायोन मति ओरे परमेस्वर नाकुन लोहतोर इन्जोर नना इगा मन्तोना। नना आपुना अदिकारते इगा वायोन; मति ओरे परमेस्वर नाकुन लोहतोर।

⁴³ निमाट नावा पोल्लोंग बाक्या समजेमायविट? बाक्याकि नावांग पोल्लोंग स्विकार कियान साटि निमाट तयार हिलविट।

⁴⁴ मिवोर बाबो सयतान आन्दुर अनि निमाट ओनोरे मरि आन्दिट। बोद इच्चा येर किन्तोर अदे निमाट कियाना इच्चा किन्तोरिट। ओर ते मुनेटाले हव्कवाल मन्तोर, अनि दरोज परमेस्वरना खरोय पोल्लोता विरोदि मन्तोर, बाक्याकि ओनागा बाराय खरोय हिले, ओर खोटाल मन्तोर अनि जुटाह वळकवालोरा बाबो आन्दुर। इन्जोर आपुना स्वभावते ओर खोटाल वळकान्तोर।

⁴⁵ नना खरोय पोल्लोंगे वळकान्तोना इन्जोर निमाट नावा विस्वास केविट!

⁴⁶ अनि मियागडाल बोरायि नना पापि मन्तोना इदेना गवाहि हिया परान्तोर बहे? अनि नना खरोय वळकान्तोना ते बाक्या निमाट नावा विस्वास केविट?

⁴⁷ अनि बोर परमेस्वरनोर लोकुरक मन्तोरक ओरक परमेस्वरना पोल्लोंग केन्जुन मानेमान्तोरक। मति निमाट परमेस्वरनोर लोकुरक आयविट इन्जोर निमाट परमेस्वरना पोल्लोंग केन्जुन मानेमायविट।”

येसु अनि अब्रहाम

⁴⁸ इद केन्जुन येहुदि लोकुरक ओन इतुरक, “निमा सामरि लोकुरक लेहका मन्तोन अनि नियागा उन्दि दुष्टात्मा मन्ता इदाम माक इन्तोरोम ओद बराबर मन्ता बहे।”

⁴⁹ येसु ओरकुन उत्तर हितुर, “नावागा दुष्टात्मा हिले, मति नना आपुनोर बाबोना आदर किन्तोना, अनि निमाट ते नावा अपमान किन्तोरिट।

⁵⁰ मति नना आपुना मान साटि इच्चा केवोन मति नावा मान साटि इच्चा किन्तोर अनि सबोय लोकुरा न्याय केवाल वरोर मन्तोर।

⁵¹ बोरायि मानेय नावा पोल्लोतुन समजेमास मानेमायनुर ते ओर मानेय बसकेय हायोर आयनुर इन्जोर नना मिकुन खरोय इन्तोना।”

⁵² असके यहुदिलोकुरक ओन इतुर, “नियागा दुष्टात्मा मन्ता इन्जोर इदेक माक सबोय रितिते पुतोम बाक्याकि अब्रहाम अनि परमेस्वरना पोल्लो वेहवालोरक वने हातोरक, मति बोरायि नावा पोल्लोतुन समजेमास मानेमायनुर ते ओर बसकेय हायोर आयनुरक इन्जोर निमा इन्तोन।

⁵³ मावोर बाबो अब्रहाम ते हातुर, बाताल निमा ओनाताल वने हजोर मन्तोन बहे? अनि परमेस्वरना पोल्लो वेहवाल वने हातुरक, निमा आपुनतुन बाताल समजेमान्तोन?”

⁵⁴ येसु उत्तर हितुर, “नना आपुने आपुना मान कियाका ते नावा मान बाराय हिले। मति नावोर बाबो नावा मान किन्तोर। ओन निमाट मियोर परमेस्वर इन्जोर मानेमान्तोरिट,

⁵⁵ अनि निमाट ते ओन पुनविट, मति नना ओन पुन्तोना। नना ओन पुनोन इन्जोर इन्का ते नना मिया लेहका खोटाल वळकवाल आयका, मति नना ओन पुन्तोना अनि ओना पोल्लोता पालन वने किन्तोना।

⁵⁶ नावा दरतितिगा वायाना दियातुन हुळाना आशा इरस मिवोर बाबो अब्रहाम पकाय गिरदाते मतोर। अनि ओर इव दियांग हुळतुर अनि गिरदा आतुर।”

⁵⁷ यहुदि अदिकारि लोकुरक ओन इतुर, “इदेकवनाह निमा पन्नास वरसानोर आयविय ते वने निमा अब्रहामिन हुळतोन बहे?”

⁵⁸ येसु ओरकुन इतुर, “अब्रहामना जनमा आयानाता मुने नना मन्तोना इन्जोर नना मिकुन खरोय खरोय इन्तोना।”

⁵⁹ असके येसु आपुनतुन परमेस्वर लेहका समजेमान्तोर इन्जोर लोकुरक ओन हियान साटि कल्क ताहतुरक मति येसु मकसुन मन्दिरता बाहरो पसियस हतुर।