युहनाल 4 - Muria Far Western

येसु अनि सामरि आळ

¹ असके येसु बपतिस्मा हेवाल युहन्नालताल वने पकाय चेला लोकुरकुन बनेकियाला आतोर अनि ओरकुन बपतिस्मा हिन्तोर इन्जोर परीसि लोकुरक केन्जतोरक इन्जोर येसुन पुतुर असके,

² (येसु आपुने आयो मति ओनोर चेलालोरक बपतिस्मा हिन्दुरक।)

³ इन्जोर ओर यहुदिया प्रदेशतुन तासुन असा गलील जिल्लाते हतुर।

⁴ अनि येसुन सामरिया प्रदेशताल हन्दाना जरुरि मता।

⁵ इन्जोर ओर सामरिया प्रदेशता सुकार सहेरतिगा वातुर, याकुब आपुनोर मरि यूसुफिन हिस मतोर ओद जागा हेरे इद नार मता।

⁶ अनि याकुबना चुवा वने अगाय मता, येसु हनेक हनेक अवकेमातुर अनि चुवा हेरे उदितुर असके दुपारता बारा नेकस मतांग।

⁷ अचोय बेरा उन्दि सामरि आळ एर निहान साटि चुवा हेरे वातु अनि “नाकुन एर उन्दिला हिम?” इन्जोर येसु अदेन इतुर।

⁸ (बाक्याकि येसुनोर चेलालोरक नाटेनिगा गाटो असान साटि हन्ज मतोरक।)

⁹ “निमा यहुदि मन्तोन ते वने सामरि आळदुन बाक्या येर तलकान्तोन?” इन्जोर ओद सामरि आळ येसुन इतु (बाक्याकि येहुदि लोकुरक सामरि लोकुरा संग बोदे प्रकारता व्यवहार केवोर।)

¹⁰ येसु अदेन उत्तर हितुर, “परमेस्वरना वरदान बाताल मन्ता अनि निकुन एर तलकवाल नाकुन वने बोर आन्दुर इन्जोर निमा पुन्ज मनेन ते निमा ओन तलकस मनेन अनि ओर निकुन जिवन हेवाल एर हिस मनेर।”

¹¹ अनि ओद आळ येसुन इतु, “हे मालकाल, निया हेरे एर निहान साटि बारायि हिले अनि चुवा ते पकाय खोल मन्ता ते पजा ओद जिवन हेवाल एर निया हेरे बगडाल पुटार?

¹² बाताल निमा मावोर दादि याकुबताल वने हजोर मन्तोन बहे? इद चुवा माकुन याकुब हितोर अनि आपुना बालक, जानवर अनि ओर वने इद चुवाताल एर उतोरक।”

¹³ येसु अदेन उत्तर हितुर: “इद एर उन्डानुर ओन असा एर उन्डावसार,

¹⁴ मति नना हिता एर उन्डानुर ओन बसकेय एर उन्डावसो आयार। बोद येर नना हियाका ओद उन्दि जेरा लेहका ओना जिवनते आयार, ओद बसकेय बन्द आयो, ओद जेरा दरोज पोंगसोर मन्दार अनि ओद एर ओन अनन्त जिवन हियार।”

¹⁵ अनि ओद आळ येसुन इतु, “हे मालकाल, नाकुन एर उन्दिला वसमाकि अनि एर निहान साटि इचोन लक वायोन आयका इन्जोर ओद एर नाकुन हिम।”

¹⁶ अनि येसु अदेन इतुर, “हन, आपुना मुजोन इगा केयस ताय।”

¹⁷ अनि ओद आळ येसुन उत्तर हितु, “नाकुन मुजो हिलेर।” येसु अदेन इतुर, “नाकुन मुजो हिलेर इन्जोर निमा इतोना ओद बराबर मन्ता

¹⁸ बाक्याकि निकुन सयुंग मुजोह आस मतोरक अनि बोना हेरे निमा इदेक मन्तोन ओर वने नियोर मुजो आयोर।”

¹⁹ अनि ओद आळ येसुन इतु, “हे मालकाल, निमा परमेस्वरना पोल्लो वेहवाल आन्दि इन्जोर नाकुन लागान्ता।

²⁰ मावोर बाबो दादि लोकुरक इद मटा पोरो परमेस्वरना आरादना कितुर मति आरादना येरुसलेमतिगा कियाला पहाजे इन्जोर निमा इन्तोन।”

²¹ अनि येसु अदेन उत्तर हितुर, “हे बायि नावा पोल्लोता विस्वास किम। निमा बाबोना आरादना इद मटा पोरो या येरुसलेमतिगा वने केवि आयकि इदाम बेरा वायार।

²² निमाट सामरि लोकुरक बोन पुनविट ओन आरादना किन्तोरिट, मति माक यहुदिलोरक बोन पुन्तोरोम ओना आरादना किन्तोरोम बाक्याकि पिसिहवाल यहुदिलोकुरक निगाडाल वायनुर।

²³ अगा खरोय आरादना केवालोरक बाबोना आरादना आत्माते अनि परमेस्वर प्रगट किता खरोयते कियाना ओद बेरा वायार अनि इदेक वाता, बाक्याकि बाबो आपुन साटि इदाम आरादना केवालोरकुन पळकान्तोर।

²⁴ परमेस्वर आत्मा आन्दु इन्जोर साटि ओना प्रार्थना केवाल आत्माते अनि परमेस्वर प्रगट किता खरोयते आरादना केविर इन्जोर जरुरि मन्ता।”

²⁵ अनि ओद आळ येसुन इतु, “बोर मसिहा मन्जे क्रिस्त वायवाल मन्तोर इन्जोर नना पुन्तोना। बसके ओर वायनुर असके सबोय पोल्लोंग माकुन वेहानुर।”

²⁶ अनि येसु अदेन इतुर, “नियासंग वळकिला आतोना नना ओरेय आन्दान।”

चेलालोरा मल्स वायाना

²⁷ अचोय बेरा ओनोर चेलालोरक मलस वातुरक। अनि येसु आळदासंग पोल्लोंग वेहिला आतोर इन्जोर आश्चरय आतुरक ते वने “निया बाताल इच्चा मन्ता?” अनि “निमा अदेनासंग बाक्या वळकिला आतोन?” इदाम बोरे पुच्चेमायोरक।

²⁸ असके आळ आपुना चरवितुन अगाय विळिचुन सहेरतिगा हतु अनि लोकुरकुन वेहिला लाकतु।

²⁹ “वाट वरोर मानेयतुन हुळाट नावा जिवन्ते बाताल बाताल आतु अदेन सबोयतुन वेहतुर अनि बाक्या ओर मसिहाल आन्दुर बहे?”

³⁰ असके लोकुरक सहेरतिगाडाल पसियस ओना हेरे हन्दिला लाकतुरक।

³¹ असके “हे गुरुजि, निमा बातालकेला तिन” इन्जोर ओनोर चेलालोकुरक येसुन विनन्ति कितुरक।

³² “नावाके तिन्दान साटि गाटो मन्ता मति अदेन निमाट पुनविट” इन्जोर येसु ओरकुन इतुर।

³³ असके “बाताल बोरे ओना साटि तिन्दिला ततोर बहे?” इन्जोर चेलालोरक आप आपुने इतुरक।

³⁴ अनि येसु ओरकुन इतुर, “आपुन लोहवालना इच्चाते ताकिर अनि ओना बुतो पुरा केविर इन्जोर नावा गाटो इद मन्ता।

³⁵ वन्जिंग कोयान साटि असा नालुंग महिनांग पिसतांग इन्जोर निमाट ते इन्दिला आतोरिट मति वायिला आतोरक ओरकुन हुळा, ओरक कोयान साटि तयार आन्ता पन्डतांग वन्जिंगताल डन्ड लेहका मन्तोरक इन्जोर नना निकुन इन्तोना।

³⁶ वीतवाल अनि कोयवाल इवुरास मिलेमास गिरदा केविर इन्जोर कोयवाल आपुना रोजि येतिला आतोरक। अनि लोकुरकुन अनन्त काळता जिवाते ततानाय ओना फसल आन्दु अवेहकुन ओर कोयिला आतोर।

³⁷ बाक्याकि वीतवाल वरोर मन्तोर अनि कोयवाल दुसरो वरोर मन्तोर इन्जोर पोल्लो खरोय मन्ता।

³⁸ निमाट मेहनत केविट ओद फसल कोयान साटि नना मिकुन लोहतान। अगा दुसरो लोकुरक मेहनत कितुरक अनि निमाट ओरा मेहनत किता फसलतांग हिसा येतवाल आतिट।”

सामरि लोकुरक येसुनिगा विस्वास किन्तोर

³⁹ “नना आपुना जिवनते बाताल बाताल कितान अदेन सबोय ओर नाकुन वेहतुर” इदाम ओद आळ वेहता गवाहिता कारण अद सहेरतोर पकाय सामरि लोकुरक येसुनिगा विस्वास कितुरक।

⁴⁰ अदाम सामरि लोकुरक ओना हेरे वासुन ओर मावा लोतिगा मन इन्जोर विनन्ति कियाला लाकतुरक। इन्जोर रन्ड दियानवनाह ओर अगा मतोर।

⁴¹ अनि ओना पोल्लो केन्जुन पकाय लोकुरक विस्वास कितुरक।

⁴² अनि “इदेकताल माक येनिगा विस्वास किन्तोरोम ओद निमा वेहति इन्जोर आयो मति माक आपुने केन्जतोम अनि येरेय खरोयते इद दरतिता लोकुरकुन पापताल पिसिहवाल आन्दुर इन्जोर माक पुतोम” इन्जोर ओद आळदुन इतुरक।

⁴³ अनि रन्ड दियाना पजा ओर सामरि लोकुरकनिगाडाल पसियस गलील प्रदेशते हतुर।

⁴⁴ (परमेस्वरना पोल्लो वेहवाल आपुना देशते मान पुटहोर इन्जोर येसु आपुने गवाहि हितुर।)

⁴⁵ बसके येसु गलील प्रदेशते वातुर, असके गलीलितोरक ओन गिरदाते मिलेमातुरक बाक्याकि ओर येरुसलेमतिगा हनुमता बेरा किस मतोर ओद सबोय बुतोंग ओरक वने हुळस मतोरक बाक्याकि ओरक वने ओद हनुमते हन्ज मतोरक।

येसु वरोर अदिकारिना मरिन सुदेरे किन्तोर

⁴⁶ येसु एरतुन अंगुरता जोमा बनेहकिस मतोर गलील प्रदेशता काना नाटेनिगा असा वातुर। असके हेरेटोर कफरनहुम सहेरतिगा राजालना वरोर नोवकरि केवाल मतोर अनि ओनोर मरिन पकाय परवा पुटस मता।

⁴⁷ येसु यहुदियाता गलीलतिगा वातोर इन्जोर ओर अदिकारि केन्जुन ओर ओना हेरे हतुर अनि निमा वास नावोर मरिन सुदरे किसिम बाक्याकि ओर हायिला आतोर इदाम विनन्ति कियाला आतुर।

⁴⁸ असके येसु ओन इतुर, “निमाट उन्दि हजोर चमत्कारता बुतो हुळविट आयकिट ते बसकेय विस्वास केवि आयकिट।”

⁴⁹ अनि राजानोर अदिकारि ओन इतुर, “हे प्रबु नावोर मरि हायानाता मुने निमा वाय।”

⁵⁰ येसु ओन इतुर, “हन, नियोर मरि जितो मन्तोर” अनि ओर अदिकारि मानेय येसुना वेहता पोल्लोतिगा विस्वास किस हतुर।

⁵¹ अनि ओर अदिकारि लोन हन्दुर असके ओनोर दासक वास ओन हरितिगा मिलेमास नियोर मरि जितो मन्तोर इन्जोर इतुर।

⁵² अनि बोद बेरा ओर सुदरेमातुर, इन्जोर अदिकारि ओरकुन पुच्चेमातुर अनि ओरक अदिकारिन इतुरक, “निने दुपाडा उन्दि वास्ता ओना पिनि रेयतु।”

⁵³ असके “नियोर मरि जितो मन्तोर” इदाम येसु इन्ज मतोर अदेय बेरा इन्जोर ओर बाबो पुतुर। अनि ओनोर सबोय परिवार अनि ओनोर लोतोर दास लोकुरक वने येसुनिगा विस्वास कितुरक।

⁵⁴ अनि येसु येहुदियाताल गलील प्रदेशतिगा अवतुर असके इद ओर कितोर दुसरो चमत्कारता बुतो मता।