युहनाल 2 - Muria Far Western

काना नाटेना मरमिंगतिगा येसुना पहलेटा चमत्कार

¹ तिसरो दिया गलील जिल्लाता काना पोरोयता नाटेनिगा उन्दि मरमिंग मता। अनि येसुना अवहारि वने अगा मता।

² येसुन अनि ओनोर चेलालोरकुन वने ओद मरमिंग केयस मतोर।

³ अगा अंगुरता जोमा मारत असके “ओरा हेरेटा अंगुरता जोमा मारतु” इन्जोर येसुना अवहारि ओन इतु।

⁴ येसु अदेन इतुर, “हे बायि इद निमा नाकुन बाक्या इन्दिला आतोन? नावा बुतो सुरु कियाना बेरा इदेकवनाह वायोय।”

⁵ “बातालायि ओर मिकुन इनिर अदामे कियाकिट” इन्जोर ओना अवहारि दास लोरकुन इतु।

⁶ अगा यहुदि लोकुरा रिवाज अनुसार सापसफायिता उपयोग कियान साटि कलदांग सारुंग हजोर अळकांग निहच मतोरक, ओव उन्दि हजोर अळकातिगा सारुंग सात गोबांग एर निंद परिन्ता।

⁷ येसु ओरकुन इतुर, “अळकातिगा एर निहाट।” ओरक अळकातुन एरते पुरा निहचितुरक।

⁸ असके ओर ओरकुन इतुर, “इदेन टन्स इदेक मरमिंग गाटो मन्डाता मुक्यानिके ओम्ट”, अनि ओरक ओतुरक।

⁹ ओद बगडाल वातु इन्जोर एर टन्स मतोर ओरक दास लोकुरकुन तासि बोरे पुनोर आतुरक। मति अंगुरता जोमा आस मता ओद एर मुक्याल मानेय नाकस हुळतुर असके ओर दुलान केयसि ओन इतुर,

¹⁰ “सबोय लोकुरक मुने सोबाय अंगुरता जोमा हिन्तोरक अनि बसके लोकुरक उन्जि अवकेमान्तोर असके पजा अंगुरता पिको जोमा हिन्तोरक मति निमा ते इदेकवनाह सोबाता अंगुरता जोमा इरतोन।”

¹¹ येसु गलील जिल्लाता काना नाटेनिगा आपुना पहले चमत्कार तोहच आपुना लाव प्रगट कितुर अनि ओनोर चेलालोरक ओनागा विस्वास कितुरक।

¹² इदेना पजा ओर, ओना अवहारि अनि ओनोर तमोलोर अनि ओनोर चेलालोरक कफरनाहुमतिगा हतुरक अनि ओर हुचुक दियांग अगा मतोरक।

येसु मन्दिरतिगाडाल मोमवालोरकुन बाहरो पचिहच हिन्तोर

¹³ यहुदि लोकुरा पसहा हारिता हनुम हेरे वास मता इन्जोर येसु येरुसलेम हतुर।

¹⁴ ओर मन्दिरता डुवारतिगा कोन्दांग, बोकडाह, परेवांग मोमवालोरक अनि डबुंग अदला बदला केवालोर उदितोर हुळतुर

¹⁵ असके ओर मोरोसता सोटा बनेकिस सबोय कोन्दांग बोकडाहकुन मन्दिरता डुवारतिगाडाल बाहरो पुळसितुर अनि डबुंग अदला बदला केवालोरा डबुनुंग हरचितुर अनि टेबलनुंग मिळिचितुर।

¹⁶ अनि परेवा मोमवालोरकुन इतुर, “परेवाहकुन इगाडाल ओम्ट! नावोर बाबोना मन्दिरतुन मोमवालोरा लोन बनेहकेमाट।”

¹⁷ असके “निया प्रार्थना लोन साटि नना हायिला वने तयार मन्तोना” इन्जोर पवित्र पुस्तकतिगा कोटता ओद पोल्लो चेला लोकुरकुन आटवन वातु।

¹⁸ येहुदि अदिकारि लोकुरक ओन इतुरक “निकुन इद बुतो कियाना अदिकार मन्ता इदाम वेहान साटि निमा माकुन परमेस्वरनिकेडाल बोद चिन्हातुन तोहकि।”

¹⁹ “इद प्रार्थना लोतुन मुटिहचिम्ट अनि नना इदेन मून्ड दियाने निपिहचिका” इदाम येसु ओरकुन उत्तर हितुर।

²⁰ “इद प्रार्थना लोतुन बनेहकियाला चेचाळिस वरसांग लाकतुंग, अनि बाताल निमा अदेन मून्ड दियाते असा बदाम तयार किसिकि?” इदाम येहुदि अदिकारि लोकुरक इतुर।

²¹ मति ओर मन्दिरता बारेते वळकस मतोर ओद पोल्लो ओना आपुना मेन्दुलता बारेते मता।

²² ओर इदाम इन्ज मतोर इन्जोर ओर हातोरिगाडाल जिवेमातुर असके ओनोर चेलालोरकुन आटवन वात अनि ओरक पवित्र पुस्तकतिगा कोटता पोल्लो अनि येसु इन्ज मतोर ओद पोल्लोता बारेते ओर विस्वास कितुरक।

येसु मानेयना मन्दुन पुन्तोर

²³ पसहा हनुमता बेरा येसु येरुसलेमतिगा मतोर असके पकाय लोकुरक ओर कितोर चमत्कारकुन हुळस ओनागा विस्वास किन्दुरक।

²⁴ मति येसु ते ओर सबोय लोकुरकुन पुन्दुर इन्जोर ओरागा विस्वास केवोर आन्दुर।

²⁵ मानेयना मन्दे बाताल मन्ता ओद पोल्लोतुन ओर आपुनाय पुन्दुर इन्जोर मानेयना बारेते बोदायि गवाहि बोने हेविर इदाम ओन जरुरि हिले आस मता।