युहनाल 19 - Muria Far Western

यहुदिलोकुरक येसुन हव्काना आग्या तलकान्तोर

¹ असके पिलातुस येसुन ओसुन सोटाते हाहिहतुर।

² अनि सिपायि लोकुरक काटाता मुकुट बनेकिस ओना तला पोरो इरतुर अनि ओन जामडि रंगता सन्दरा पोन्डिहतुरक।

³ अनि ओना हेरे वासुन, “हे यहुदियातोर राजाल नमस्कार!” इन्जोर इन्दिला लाकतुर अनि ओन कोरवितिगा हितुर।

⁴ असके पिलातुस असा बाहरो पसिस लोकुरकुन इतुर, “हुळाट नाकुन ओनागा बारायि दोष दिसो इद पोल्लो निमाट समजेमायान साटि नना ओन मिया हेरे असा बाहरो ततान्तोना।”

⁵ असके येसु काटाता मुकुट अनि जामडि रंगता सन्दरा करसुन बाहरो पसियतुर। अनि पिलातुस ओरकुन इतुर, “हुळाट येर मानेयतुन।”

⁶ बसके मुक्याल याजक अनि मन्दिरतुन केपवालोरक सिपायि लोकुरक ओन हुळतुरक असके ओरक जोरदे इतुरक, “ओन कुरुस पोरो अन्जहिच हव्काट! कुरुस पोरो अन्जहिच हव्काट!”, पिलातुस ओरकुन इतुर, “निमाटे ओन ओसुन कुरुस पोरो अन्जहाट बाक्याकि नना ओनिगा बारायि दोष हुळोन।”

⁷ अनि येहुदि लोकुरक ओन उत्तर हितुरक, “मावा साटि उन्दि नियम मन्ता, अनि ओद नियमता अनुसार ओर आपुनतुन परमेस्वरनोर मरि बनेहकिन्तोर इन्जोर ओर हायान साटि योग्य मन्तोर।”

⁸ असके पिलातुस इद पोल्लो केन्जतुर ते, असा वने पकाय वरियतुर,

⁹ असा ओर किल्लाता लोपा हतुर अनि येसुन इतुर, “निमा बगाडोर आन्दि?” मति येसु ओन बारायि उत्तर हेवोर।

¹⁰ असके पिलातुस ओन इतुर, “नावासंग बाक्या वळकवि? बाताल निकुन कुरुस पोरो अन्जहिच हव्काना अनि निकुन तासियाना वने अदिकार नाकुन मन्ता इन्जोर निमा पुनवि बहे?”

¹¹ अनि येसु उत्तर हितुर, “निकुन परमेस्वरनिकेडाल अदिकार पुटो आस मनवारते नावागा निया बारायि अदिकार हिले आस मनवार। इन्जोर बोर नाकुन निया कयदे हितोर ओना पाप पकाय हजोर मन्ता।”

¹² असके पिलातुस ओन तासियाना इच्चा कियालागतुर मति यहुदिलोकुरक जोर जोरदे इतुरक, “निमा ओन सोळेकियाकि ते निमा हजोर राजालना गोतियाल आयवि। अनि बोरायि आपुनतुन राजाल बनेहकिन्तोर ओर हजोर राजाना विरोद किन्तोर।”

¹³ अनि इव पोल्लोंग केन्जुन पिलातुस येसुन बाहरो ततुर अनि अगा उन्दि उदान साटि कलदा चबुतरा मता (इब्रानि बोलिते गब्बता इन्तोर) अगा न्यायता कुरसितिगा ओर उदितुर।

¹⁴ इद पसहा हनुमता तयारि कियानाता दिया मता अनि दुपाडा बारा नेहकस मतांग असके ओर यहुदिलोकुरक इतुरक, “हुळाट मिवोर राजाल!”

¹⁵ मति ओरक पकाय जोरदे केयतुरक, “ओम ओन ओम! ओन कुरुस पोरो अन्जहिच हव्काट!” अनि पिलातुस ओरकुन इतुर, “बाताल नना मिवोर राजान कुरुस पोरो अन्जहिच हव्का?” अनि मुक्या याजक उत्तर हितुर, “हजोर राजान तासिस मावोर बोरे राजाल हिलेर।”

¹⁶ असके ओन कुरुस पोरो अन्जहिर इन्जोर पिलातुस येसुन ओरा कयदे सोपे कितुर।

येसुन कुरुस पोरो अन्जहाना

¹⁷ असके सयनिक लोकुरक येसुन ओतुरक अनि ओर आपुना कुरुस ताहचुन खोपळिता स्थान पोरोयता जागावनाह बाहरो हतुरक। अनि इद जागातुन इब्रानि बोलिते गुलगुता इन्तोर।

¹⁸ अनि अगा ओरक येसुन अनि ओनासंग इवुर मानेयकुन वरोर हिके अनि वरोर होके अनि नडुम येसुन इदाम कुरुस पोरो अन्जिहतुरक।

¹⁹ अनि पिलातुस उन्दि दोसता पाटि कोटसुन कुरुस पोरो लावे कितुर। अनि अगा इदाम कोटस मता: “येसु नासरि, यहुदियातोर राजाल।”

²⁰ येसुन कुरुस पोरो अन्जहिस मतोर ओद जागा येरुसलेम सहेरता हेरे मता इन्जोर इद दोसता पाटितुन पकाय यहुदिलोकुरक वाचेकितुरक अनि अद पाटि इब्रानि, लतिनि अनि युनानि बोलिते कोटस मतोर।

²¹ असके यहुदियानोर मुक्याल याजक पिलातुसिन इतुर, “‘यहुदियानोर राजाल’ कोटमा मति नना यहुदियातोर राजाल आन्दान इन्जोर ओर इतुर इदाम कोटा।”

²² अनि पिलातुस ओन उत्तर हितुर, “नना बोद कोटतोना ओद बदलेमायो।”

²³ बसके सयनिक लोकुरक येसुन कुरुस पोरो अन्जिहतुरक असके ओनांग सन्दरानुंग वरोर सयनिक साटि उन्दि उन्दि भाग आस नालुंग भाग कितुरक। अनि ओना कुरता वने डन्डतुरक मति ओना कुरता पोरोडाल अडियवनाह बिना सिलायिते बनेकिता उन्दि लाटि कुरता मता।

²⁴ इन्जोर ओरक आपसते इतुरक, “माट इदेन हरिहवाट मति इद बोना आयार इन्जोर इदेना पोरो चिटिंग वाटकाट।”, “ओरक नावांग सन्दरांग आपसते तुसतुरक अनि नावा सन्दरांग साटि चिटिंग वाटतुरक” इन्जोर पवित्र पुस्तकतिगा कोटस मता ओद पोल्लोंग पुरा आयान साटि सयनिक लोकुरक इदाम कितुरक।

²⁵ आकरिते सयनिक लोकुरक अदामे कितुरक येसुना कुरुसता हेरे ओना अवहारि अनि ओना मावसिहारि, क्लेपासना मुत्ते मरियम अनि मगदलनि नाटेना मरियम वने अगा निच मतांग

²⁶ अनि येसु पकाय मया किन्दुर ओर चेला वने अगा निच मतोर असके येसु आपुना अवहारिनिके हुळसुन अदेन इतुर, “हे बायि हुळा नेटाल येर नियोर मरि आन्दुर।”

²⁷ असके येसु ओर चेलान इतुर, “इद निया अवहारि आन्दु।” अनि पजा ओर चेलाल अदेन संभाले कियान साटि आपुना लोन ओतुर।

येसुना हायाना

²⁸ इदेना पजा, सबोय पुरा आतु इद येसु पुन्जुन पवित्र पुस्तकतिगा कोटता पुरा आयान साटि, “नाकुन एर उन्दिला वसता” इदाम इतुर।

²⁹ अनि अगा हवता अंगुरता जोमा निहता उन्दि दडिया इरस मतोर, ओरक कापुसतुन नाहचुन उन्दि जुफे पोरोयता मराता बळगातिगा दोहचुन हवता अंगुरता जोमा ओना टोडितिगा लावेकितुरक।

³⁰ असके येसु ओद हवता अंगुरता जोमा उतुर, अनि इतुर, “पुरा आतु।” अनि तला अडिय वकसुन आपुना जिवा तासितुर।

येसुन बरशिते हियाना

³¹ अनि ओद दिया यहुदि लोकुरा पवित्र दियाता तयारिता दिया मता अनि ओद पवित्र दिया खास पवित्र दिया मता बाक्याकि ओद दिया पसहा हनुम वने मता। यहुदि लोकुरा पवित्र दिया हातोर मानेय कुरुस पोरो मनमाकिर इन्जोर ओर लोकुरक सान्डे हायान साटि ओरा कालकुन उरहिला पहाजे अनि ओरकुन अडिय रेहिला पहाजे इन्जोर यहुदि अदिकारि लोकुरक पिलातुसतुन विनन्ति कितुरक।

³² असके सयनिक लोकुरक वासुन येसुनसंग कुरुस पोरो मतोरक इवुरास मानेयकना कालकुन उरिहतुरक।

³³ मति ओरक बसके येसुना हेरे वासुन हुळतुरक असके येसु हास मतोर इन्जोर ओनांग कालकुन उरिहवोर।

³⁴ मति सयनिक लोकुरकनिगाडाल वरोर सयनिक बरशिते येसुना चाति हेरे गुहचतुर अनि ओनागडाल सान्डे नतुर अनि एर पसियतु।

³⁵ अनि बोर इद हुळतुर ओर गवाहि हितुर, अनि ओना गवाहि खरोय मन्ता। अनि निमाट वने विस्वास कियान साटि ओर खरोय वेहान्तोर इन्जोर ओर पुन्तोर।

³⁶ अनि “ओना पळेकातुन उरिहवोर आयनुर” इन्जोर पवित्र पुस्तकतिगा कोटता मन्ता अद पोल्लो पुरा आयान साटि इदाम आतु।

³⁷ अनि पवित्र पुस्तकता दुसरो जागातिगा, “बोरक ओन बरशिते गुचतोरक ओर लोकुरक ओन हुळानुरक” इन्जोर वने असा कोटता मन्तोर।

येसुना मिसना

³⁸ असके यूसुफ पोरोयतोर वरोर मानेय मतोर, ओर अरमितियाहा सहेरते मनवाल मतोर, ओर वने येसुनिगा विस्वास किन्दुर, मति ओर यहुदि अदिकारिलोकुरकुन वरियन्दुर इन्जोर येसुनिगा विस्वास किन्तोर इद पोल्लोतुन मकहिस इरिन्दुर। असके ओर पिलातुसना हेरे हन्जुन ओन येसुना मुरदातुन अगडाल ओयिला परवांगि हेविर इन्जोर ओन विनन्ति कितुर। अनि पिलातुस ओना विनन्तितुन केन्जतुर अनि ओर हन्जुन येसुना मुरदातुन ओतुर।

³⁹ अनि निकुदेमोस उन्दि बेरा येसुना हेरे हन्जुन ओन मिलेमास मतोर, ओर वने अरिमतयाहता यूसुफना संग मतोर। ओर तेतिस किलोता हेरे गन्दरस अनि एलवा पोरोयता सुगन्द चिज ततुरक

⁴⁰ असके ओरक येसुना मुरदातुन ओतुरक अनि यहुदि लोकुरा मिसाना रितिता अनुसार ओन दयमुर नियतासंग सन्दरातिगा हुरिहतुरक।

⁴¹ अनि येसुन कुरुस पोरो अन्जिहच मतोर ओद जागातिगा उन्दि बगिचा मता, अनि ओद बगिचातिगा उन्दि पुनाल मुरदातुन इरान साटि कलदा पान्जा मता, अगा इदेक वने बोदे मुरदा इरोर आस मतोरक।

⁴² ओद पान्जा हेरे मता इन्जोर यहुदिलोकुरक पवित्र दियाता तयारिता कारण ओरक येसुन अगा इरतुरक।