युहनाल 17 - Muria Far Western

येसु आपुन साटि प्रार्थना किन्तोर

¹ येसु इद पोल्लोंग इतुर अनि पजा आबारतिके हुळस इदाम प्रार्थना कितुर, “हे बाबो निया आचता बेरा हेरे अवता। नियोर मरि निया महिमा कियान साटि निमा मरिना महिमा किम।

² बाक्याकि बोन निमा नाकुन हितोन ओरक सबोय लोकुरकुन नना अनन्त जिवन हियाका इन्जोर निमा सबोय लोकुरकनिगा नाकुन अदिकार हितोन।

³ अनि निमाय उन्दिय खरोय परमेस्वर मन्तोन अनि निमाय नाकुन लोहतोन अनि नना येसु मसिहा आन्दान इदाम नाकुन पुन्तोरक ओरकुनेय अनन्त जिवा पुटार।

⁴ इद दुनियातिगा निमा बचोन महान मन्तोन इन्जोर नना दुनियाता लोकुरकुन तोहचुन निमा बोद बुतो नाकुन कियान साटि हिस मतोन अदेन पुरा कितान।

⁵ हे बाबो, इद दरतितुन बनेकियानाता मुने नना नियासंग मतोना असके नाकुन बचोन हजोर मान पुटिन्ता। इदेक बसके नना नियासंग मतोना अदे मान नाकुन असा हिम।”

अनि येसु आपुनोर चेला लोकुरक साटि प्रार्थना किन्तोर।

⁶ अनि येसु असा प्रार्थना कितुर, “बोरकुन निमा इद दरतिताल नाकुन हितोन ओरकुन नना निया पोरोय तोहतान। ओरक नियोर मतोरक; अनि निमा ओरकुन नाकुन हिति अनि ओरक निया पोल्लोतुन मानेमातोरक।

⁷ अनि बाराय आयि निमा नाकुन हितोन अद सबोय नियाकेडाल आन्दु इन्जोर इदेक ओरक पुतोरक।

⁸ बाक्याकि निमा नाकुन हितोन अद पोल्लो नना ओरकुन अविहतोना। अनि ओरक अदेन स्विकार कितुरक अनि नना नियाकेडाल वातोनान इन्जोर खरोय पुतोर अनि निमाय नाकुन लोहतोन इन्जोर विस्वास कितोरक।

⁹ अनि इदेक नना ओरक चेला लोकुरकुन साटि विनन्ति किन्तोना। दुनिया साटि विनन्ति केवोन मति बोरकुन निमा नाकुन हितोन ओरक नियोर आन्दुरक इन्जोर ओरा साटि विनन्ति किन्तोना।

¹⁰ अनि बाराय आयि नावा आन्दु अद सबोय निया आन्दु। अनि बोद निया आन्दु अद नावा आन्दु। अनि इदेनते नावा महानता प्रगट आता।

¹¹ इदेना पजा नना दुनियातिगा मनोन आयका बाक्याकि इदेक नना निया हेरे वायिला आतोना। मति येरक इद दुनियातिगा मन्दानुरक इन्जोर हे नावोर पवित्र बाबो, बदाम निमा अनि नना उन्दिय मन्तोम, अदाम लेहका ओरक वने उन्दि आयिरक इन्जोर बोद लाव निमा नाकुन हितोन अदेय लावते ओरा रक्षण किम।

¹² अनि नना ओरासंग मतोना अचोवना निया हिता लावते नना ओरा रक्षण किस सुरक्षित इरतान। इन्जोर पवित्र पुस्तकता पोल्लो पुरा आयान साटि नाशता हरिताल हतोर ओन तासिस बोरायि नाश आयोर।

¹³ मति हे बाबो, इदेक नना निया हेरे वायिला आतोना, इन्जोर नना पकाय गिरदा मन्तोना। अनि नना दुनियातिगा मन्दानपा इव पोल्लो साटि प्रार्थना किन्दान बाक्याकि बदाम नना गिरदाते मन्तोना अदामे नावोर चेलालोरक वने गिरदाते मन्दिला पहाजे।

¹⁴ अनि नना निया पोल्लो ओरकुन अविहच हितोना, अनि नना दुनियातोर आयोन अदामे ओरक वने इद दुनियातोरक लोकुरक लेहका आयोरक इन्जोर दुनिया ओरकुन दुश्मनि कितुरक।

¹⁵ अनि निमा ओरकुन दुनियाताल ताहचुन ओम इदाम नना विनन्ति केवोन मति निमा ओरकुन सयताना कयदाल पिसिहला पहाजे इन्जोरे नना विनन्ति किन्तोना।

¹⁶ बदाम नना दुनियातोर आयोन अदामे ओर वने दुनियातोर लोकुरक लेहका आयोरक।

¹⁷ अनि निया पोल्लो खरोय मन्ता इन्जोर निया बुतो कियान साटि ओद खरोय पोल्लोता द्वारा ओरकुन निमा तयार किम।

¹⁸ निमा नाकुन दुनियातिगा लोहति, अदामे नना वने ओरकुन दुनियातिगा लोहतान।

¹⁹ अनि ओर वने नावा वेहता खरोय पोल्लोता द्वारा निया साटि सोपेहकियाला पहाजे इन्जोर ओरा साटि नना आपुनतुन सोपेहकिन्तोना।”

येसु सबोय विस्वासि लोकुरक साटि प्रार्थना किन्तोर

²⁰ अनि येसु असा प्रार्थना कितुर, “नना केवल येरे लोकुरक साटि विनन्ति केवोन मति ओरा पोल्लोता द्वारा नावागा विस्वास कियानुरक सबोय लोकुरा साटि नना विनन्ति किन्तोना।

²¹ अनि ओरक सबोय लोकुरक उन्दि आयान साटि, हे बाबो, बदाम निमा नावागा मन्तोन अनि नना नियागा मन्तोना अदामे ओरक वने मावागा मनिर इदेनते निमा नाकुन लोहतोन इन्जोर दुनिया विस्वास कियान साटि नना विनन्ति किन्तोना।

²² अनि माक बदाम उन्दिय मन्तोरोम अदामे ओरक वने उन्दि आयिरक इन्जोर निमा नाकुन हितोन ओद मान नना ओरकुन हितोना।

²³ ओरक सबोय रितिते उन्दि आयान साटि नना ओरिगा अनि निमा नावागा मन्तोन। अदाम, निमा नाकुन लोहतोर अनि निमा नाकुन मया किन्तोन अदाम लेहका ओरकुन वने निमा मया किन्तोन इन्जोर दुनियाता लोकुरक पुनिर।

²⁴ हे बाबो, दुनिया बनेमायानाता मुने निमा नावागा मया किस ओद महिमा नाकुन हितोन। इन्जोर निमा नाकुन हितोन ओर लोकुरक वने ओद महिमा हुळिर इन्जोर नना बगा मन्तोना अगा ओरक वने नावासंग मनिर इदाम नावा इच्चा मन्ता।

²⁵ हे बाबो, निमा दारमिक मन्तोन, दुनियातोर लोकुरक निकुन पुनोर मति नना निकुन पुतोना अनि निमाय नाकुन लोहतोन इन्जोर येर चेलालोरक वने पुतुरक।

²⁶ अनि निया नावागा मता ओद मया ओरागा मनि अनि नना ओरागा मनका इन्जोर निमा बोर आन्दि इद ओरकुन वेहतान अनि वेहचोर मनका।”