युहनाल 12 - Muria Far Western

येसुना काल्क पोरो दयमुर निय दोसाना

¹ पजा पसहा हनुमता सारुंग दियाना मुने येसु ओनोर चेलासंग बेतनियाह सहेरतिगा वातुरक। येसु हातोरिगाडाल असा जितो किस मतोर लाजर ओद नाटेनोर मतोर।

² अनि अगा येसुना मान कियान साटि नरका जेवन बनेकिस मतोरक, अनि लाजरना हेलाळ मारता जेवन वाडे कियाला आस मता अनि लाजर वने ओरासंग जेवेकियाला उदस मतोरक निकेडाल वरोर मतोर।

³ असके मरियम जटामांसिते बनेमाता पकाय किमतिता अरदो लिटर दयमुर निय पयस अगा वातु। पजा अदु ओद नियतुन येसुना काल्कपोरो दोसतु अनि आपुना कल्कते ओना काल्क उमसतु। असके ओद नियता दयमुर पुरा लोनमेन्ड फयलेमातु।

⁴ असके ओनोर चेलानिगाडाल यहुदा इस्करियोति पोरोयतोर वरोर चेलाल मतोर। ओरे येसु दुसरोना कयदे पयपिहवाल मतोर, ओर विरोद किस इन्दिला लागतुर,

⁵ “इद दयमुर नियता किमत उन्दि वरसाता रोजि इचोन मन्ता, इदेन मोमसुन अव डबुंग गरिब लोकुरकुन बाक्या हेवो” इन्जोर इतुर।

⁶ अनि ओन गरिब लोकुरा बारेता चिन्ता मता इन्जोर ओर इद पोल्लो इनोर मति ओना हेरे डबुंग इराना जोरिया मता अनि ओर वरोर कलेर मतोर। अनि ओद जोरियातिगा बोद पयसांग निहिन्दुर ओर आपुना साटि टन्डिन्दुर इन्जोर इदाम इतुर।

⁷ अनि येसु इतुर, “अदेन तकलिप केमाट बाक्याकि ओद इद दयमुर निय नना हातपा नाकुन मिसना दिया साटि इरिला हिम्ट।

⁸ बाक्याकि गरिब ते मियासंग दरोज मन्तोर मति नना मियासंग दरोज मनोन आयका” इन्जोर इतुर।

लाजरना विरुद योजना

⁹ येसु बेथानिया सहेरतिगाय मन्तोर इन्जोर पसहाता हनुम कियान साटि वातोर यहुदि लोकुरा भीळ पुन्जुन ओन हुळान साटि ओरक अगा वातुरक। अनि केवल येसुने हुळिला आयो मति ओर जितो किस मतोर लाजरिन वने हुळिला वातुरक।

¹⁰ असके मुक्याल याचक लोकुरक लाजरतुन वने हव्काना साटि योजना कितुरक,

¹¹ बाक्याकि ओना कारणते पकाय यहुदिलोकुरक आपुना अदिकारिलोकुरकुन तासिस येसुना परके हतुरक अनि ओनागा विस्वास कियाला लागतुरक।

येसु येरुसलेमतिगा राजाल लेहका दान्तोर

¹² दुसरो दिया पसहा हनुम कियान साटि वातोर लोकुरा भीळ येसु येरुसलेम सहेरतिगा वायिला आतोर इन्जोर केन्जतुरक।

¹³ इन्जोर ओरक कजुर मराता कोहक पयसुन ओन मिलेमायान साटि पसियतुरक अनि “होशाना! इस्रयेलोरा राजाल आस प्रबुना अदिकारते वान्तोर ओर धन्य मन्तोर” इदाम जोरदे इन्दिला लागतुरक।

¹⁴ असके येसु उन्दि गदिता पिलान दिसतुर अनि ओर अदेना पोरो उदचुन हन्दिला लागतुर,

¹⁵ अनि “हे येरुसलेमतोर लोकुरक वरियमाट; मति हुळाट, मिवोर राजाल गदिता पिला पोरो उदचुन मियाके वायिला आतोर” इन्जोर परमेस्वरना पवित्र पुस्तकतिगा कोटता मन्ता ओद पोल्लो इदाम पुरा आत।

¹⁶ ओनोर चेला लोकुरकुन इव पोल्लोंग पहले समजेमायोंग आसि मति येसु असा जिवेमास बाबोना हेरे स्वरगतिगा हतुर असके इव पोल्लोंग ओना बारेते कोटस मतोर अनि ओना साटि इव सबोय पोल्लो माक कितोम इन्जोर ओरकुन आटवन वातु।

¹⁷ येसु लाजरतुन बिजगुडिताल केयस हातोरिगाडाल जितो किस मतोर असके ओनासंग अगा मतोरक लोकुरा भीळ ओन किता चमत्कारता बारेते गवाहि हितुरक।

¹⁸ अनि ओर इद चमत्कारतुन तोहतोर इदाम ओरक केन्ज मतोरक इन्जोर लोकुरा भीळ ओन मिलेमायिला वास मतोरक।

¹⁹ असके परीसि लोकुरक आपसते, “निमाट बारायि कियाला परविट, हुळाट, पकाय लोकुरक ओना परके हन्दिला आतोरक” इन्जोर इन्दिला लागतुरक।

युनानि लोकुरक येसुन पळकान्तोरक।

²⁰ अनि ओद हनुमते आरादना कियान साटि येरुसलेमतिगा वास मतोरकनिकेडाल हुचुक लोकुरक युनानि मतोरक।

²¹ अनि ओरक गलील प्रदेशताल बेतसयदा सहेरते मनवाल फिलिप्पुसना हेरे वास, “दादा येसुन मिलेमायाना मावा इच्चा मन्ता” इन्जोर ओन विनन्ति कितुरक।

²² अनि फिलिपुस वासुन अन्दरियासिन इतुर असके अन्दरियास अनि फिलिपुस हन्जुन येसुन इतुर।

²³ असके येसु ओरकुन उत्तर इतुर, “इदेक नना मानेयतोर मरि बचोन महान मन्तोना इद परमेस्वर प्रगट कियाना बेरा वाता।

²⁴ गोहकना पळे जागातिगा अरसुन हायो अचोवनाह ओद उन्दिय मन्ता इन्जोर नना मिकुन खरोय खरोय इन्तोना, मति बसके अद हान्ता असके पकाय कायांग ततिन्ता।

²⁵ अनि बोरायि आपुना जिवनतिगा पकाय मया इरान्तोर ओन अनन्त जिवन पुटो आयार मति बोर इद दुनियाते आपुना जिवाताल पकाय मया नावागा इरान्तोर ओन अनन्त जिवन पुटार।

²⁶ अनि बोरायि नावा सेवा कियानुर ते ओर नावा परके वायिर अनि बगा नना मन्तोना अगा नावोर दास वने मन्दानुर अनि बोरायि नावा सेवाकियानुर ते बाबो ओना आदर कियानुर।”

येसु आपुना हायानाता बारेते वळकान्तोर

²⁷ येसु असा इतुर, “इदेक नावा मन दुःखि आयिला आता इन्जोर इदेक नना बाताल इनका इद नाकुन समजेमायो। अनि हे बाबो, इद दुःखता वायवाल बेराताल नाकुन पिसहा इदाम इन्दिला परोन बाक्याकि इद दुःख सहन कियान साटि नना इद दुनियाते वातोना।

²⁸ हे बाबो निमा बचोन महान मन्तोन इद सबोय लोकुरा मुने तोहा।” असके स्वरगताल इदाम वळकाना उन्दि लेंग वातु, “नना नावा पोरोयता महिमा कितोना अनि असा कियाका।”

²⁹ असके अद लेंग केन्जुन हेरे नितस मतोर लोकुरा भीळ, “आबारताल गरजेमातु” इन्जोर इतुर अनि दुसरो हुचुलोरक, “बोरे स्वरगदूत ओनासंग वळकतुर” इन्जोर इतुर।

³⁰ असके येसु इतुर, “इद पोल्लो नावा साटि आयो मति मिया साटि आतु।

³¹ इदेक इद दुनियाता लोकुरा न्यायकियानाता बेरा अवता; अनि दुनियाता लोकुरकनिगा राज्य केवाल सयतानतुन परमेस्वर हारे कियानुर।

³² नाकुन हव्काना साटि बसके जागाताल कुरुस पोरो अन्जाहनुरक, असके नावागा विस्वास कियान साटि सबोय लोकुरकुन नावा हेरे ततका” इन्जोर इतुर।

³³ अनि ओर बोद प्रकारते हायनुर इन्जोर इदाम इन्जुन ओर प्रगट कितुर।

³⁴ असके लोकुरक ओन इतुर, “मसिहा बसकेय हायोर आयनुर इन्जोर माक पवित्र पुस्तकतिगाडाल वाचे किस केन्जतोम, पजा निमा मानेयतोर मरिन हव्काना साटि कुरुस पोरो अन्जहाना जरुरि मन्ता इदाम बाक्या इन्तोन? ते पजा येर मानेयतोर मरि बोर आन्दुर?”

³⁵ अनि येसु ओरकुन इतुर, “इदेक हुडुक बेरायि वेळिचि मिया नडुम मनका। आन्दारतिगा भटके मायमाट इन्जोर बचोवनाह वेळिचि मियासंग मन्ता अचोवनाह निमाट ताकसोर मन्ट।

³⁶ बोदवनाह वेळिचि मियासंग मन्ता वेळिचितिगा विस्वास किम्ट बाक्याकि निमाट वेळिचिता सन्तान आयकिट।”

यहुदिलोकुरक येसुनिगा विस्वास केवोरक

³⁷ अनि इव पोल्लोंग इन्जुन येसु ओराताल मकस हतुर। अनि येसु ओरा मुने इचोन हजोर चमत्कार तोहतुर ते वने ओरक ओनागा विस्वास केवोरक।

³⁸ “हे प्रबु मावा पोल्लोता बोर विस्वास कितोर? अनि प्रबुना लाव बोनागा प्रगट आता” इदाम परमेस्वरना पोल्लो वेहवाल यशायाहना पुस्तकतिगा इन्ज मतोर अद पोल्लो पुरा आयि।

³⁹ अनि इद कारणते ओर विस्वास किया परोरक बाक्याकि परमेस्वरना पोल्लो वेहवाल यशायाहना पुस्तकतिगा दुसरो जागातिगा इदाम वने असा इतुर:

⁴⁰ “ओरक आपुना कोन्डाते हुळिला या मन्दे समजेमायिला या सुदरेमायान साटि बसकेय परमेस्वरना परके असा वायिला परमाकिर इन्जोर परमेस्वर ओरा कोन्डानुंग आन्दराल अनि ओरा मन्दुन कटोर कितुर।”

⁴¹ अनि येशायाह येसुना महिमातुन हुळसुन ओर ओना बारेते परमेस्वरना पोल्लो वेहतुर इन्जोर ओर इव पोल्लोंग इतुर।

⁴² ते वने अदिकारि लोकुरकनिगाडाल पकाय लोकुरक ओनागा विस्वास कितुरक। मति येहुदि समाज मन्डिलितिगाडाल ओरकुन पसियिस वाटानुर इन्जोर परीसि लोकुरा कारणते ओर अदेना बारेते दुसरो लोकुरकुन प्रगट किस वेहोरक।

⁴³ बाक्याकि ओरकुन परमेस्वरना वाहवाताल मानेयना वाहवा पकाय सोबाय लागिन्दु।

येसु सबोयलोरकुन पिसान साटि वातुर

⁴⁴ अनि येसु जोरदे इतुर, “बोरायि नावागा विस्वास किन्तोर ओरक नावागाय आयो मति नाकुन लोहवालिनिगाय विस्वास किन्तोरक।

⁴⁵ अनि नाकुन हुळान्तोर ओरक नाकुन लोहवालतुन हुळान्तोरक।

⁴⁶ अनि बदाम वेळिचि लोकुरकुन आपुना नालुंगास बासा बाताल मन्ता इन्जोर तोहान्ता अदाम लेहका नना इद दुनियातिगा वेळिचि आस वातोना बाक्याकि बोर आयि नावागा विस्वास कियानुर ओर आन्दारते मनोर आयनुरक।

⁴⁷ बोरायि नावांग पोल्लोंग केन्जुन मानेमायोर ते नना ओना न्याय केवोन, बाक्याकि नना इद दुनियातुन न्याय कियान साटि आयो मति दुनियातुन पिसान साटि वातोना।

⁴⁸ अनि बोर नाकुन मानेमायोर अनि नावांग पोल्लोंग स्विकार केवोर ओरा न्याय केवाल वरोर मन्तोर; नना इतोना अदे पोल्लो आकरि न्यायता दिया ओना न्याय कियानुर।

⁴⁹ बाक्याकि नना आपुनेकेडाल पोल्लोंग वळकोन मति बाताल इन्दाना अनि बाताल वळकाना इन्जोर नाकुन लोहतोर ओर बाबो नाकुन आग्या हितोर।

⁵⁰ अनि ओना आग्या अनन्त जिवन आन्दु इन्जोर नना पुन्तोना, इन्जोर नना बाताल आयि वळकान्तोना अदु बदाम नावा बाबो नाकुन वेहतोर अदामे वळकान्तोना।”