युहनाल 10 - Muria Far Western

बेळांग अनि मेहवाल

¹ पजा येसु इतुर “बोने कोळका लोपा हन्दाना मतेक ओर टाटरा तरियस लोपा हन्दिला पहाजे इन्जोर नना मिकुन खरोय इन्तोना मति बोरायि दुसरो हरिते लोपा दान्तोर ओर कलेर अनि ओन्डकाल आन्दुर।

² मति टाटराताल लोपा दान्तोर ओरेय बेळानांग मेहवाल मन्तोर।

³ अनि कोळकाता टाटराता केपवाल ओना साटि टाटरातुन तरियान्तोर। अनि ओर आपुना बेळानुंग पोरोय येतस येतस केयान्तोर अनि बेळांग ओना लेंग पुन्तांग अनि ओर बेळानुंग मेहान साटि बाहरो ओन्तोर।

⁴ बसके ओर आपुना बेळाना गोहडितुन बाहरो पसहान्तोर असके ओर गोहडिता मुने मुने दान्तोर अनि बेळांग ओना लेंग पुन्जुन ओना परके परके दान्तांग।

⁵ मति अव दुसरो मानेयना परके हनोंग आयनुंग, अव दुसरोना लेंगदुंग पुनोंग इन्जोर ओनाताल लक वितानुंग।”

⁶ बसके येसु ओरकुन इद उदाहरनते इतुर, मति इव पोल्लोंग ओर माकुन इन्दिला आतोर इन्जोर अदेना अर्थ ओरकुन समजेमायो।

येसु बेस मेहवाल मन्तोर

⁷ अनि अदेना अर्थ ओरकुन समजेमायो इन्जोर असके येसु असा ओरकुन इतुर, “नना मिकुन खरोय खरोय इन्तोना कोळकाता टाटरा ननाय आन्दान।

⁸ अनि नावा मुने बचोक मेहवालोर वातुर ओर सबोय कलेर अनि ओन्डकाल मतोरक इन्जोर नावांग बेळांग ओरा लेंगदुन केन्जोंग आतुंग।

⁹ अनि टाटरा ननाय आन्दान। बोरायि नावा द्वारा लोपा दायनुर ओन पिसानुर अनि ओर लोपा वाय परान्तोर अनि बाहरो हन्दिला परान्तोर। अनि बारायि ओना जरुरि मन्ता ओन ओद पुटार।

¹⁰ अनि कलेर वान्तोर ते केवल बेळानुंग कलिला अनि हव्कसुन नाश कियान साटि वान्तोर मति नना अवेकुन जिवन हियान साटि वातोना अनि नना हिन्तोना ओद जिवन पकाय अनि सोबाय मन्ता।

¹¹ बेस मेहवाल ननाय आन्दान। अनि बेस मेहवाल ओना बेळानुंग पिसहान साटि आपुना जिवा वने हिन्तोर।

¹² अनि रोजिते बेळांग मेहवाल ओर खरोय बेळांगना मेहवाल लेहका आयोर। अनि ओर बेळांगना मालकाल वने आयोर, ओर लाडंगाहकुन वायानपा हुळसुन बेळानुंग विळिचि वितान्तोर। अनि लाडंगाह अवेकुन पयान्ता अनि हिके होके किस वाटिन्ता।

¹³ बाक्याकि रोजिते बेळांग मेहवाल ओर केवल रोजिसाटि बुतो किन्तोर अनि ओर ओना बेळांगना बारेते बारायि विचार हिले।

^14-15 मति बेळांगना बेस मेहवाल ननाय आन्दान। बदाम नावोर बाबो नाकुन पुन्तोर अनि नना बाबोन पुन्तोना अदामे नना आपुना बेळानुंग पुन्तोना अनि नावा बेळांग नाकुन पुन्तांग अनि नावा बेळानुंग पिसहान साटि नना आपुना जिवा वने हिन्तोना।

¹⁶ अनि इद कोळकाता आयोंग दुसरोवने बेळांग नाकुन मन्तांग, नाकुन अवेकुन वने तताना जरुरि मन्ता, अव नावा पोल्लोंग केन्जानुंग असके उन्दिय गोहडि अनि वरोरे मेहवाल आयनुर।

¹⁷ अनि नना असा जिवेमायान साटि आपुना जिवा हिन्तोना इन्जोर नावोर बाबो नाकुन मया किन्तोर।

¹⁸ अनि बोरायि अदेन नावाताल उन्च ओयोर, नना आपुने अदेन हिन्तोना, नाकुन अदेन हियानाता अदिकार मन्ता अनि अदेन असा वापस येताना वने अदिकार मन्ता। अनि इद आग्या नाकुन नावोर बाबोनिकेडाल पुटता।”

¹⁹ अनि इव पोल्लोंगना कारणते यहुदि अदिकारि लोकुरकनिगा फुट आतुरक।

²⁰ अनि “ओनागा दुष्टात्मा मन्ता अनि ओर बयहाल मन्तोर इन्जोर ओनांग केन्जमाट?” इन्जोर हुचुक लोकुरक इन्दिला लागतुरक।

²¹ अनि दुसरो हुचुलोरक, “इव पोल्लोंग दुष्टात्मा मन्वाल मानेय किया परोर बाक्याकि दुष्टात्मा आन्दराल लोकुरा कोन्डांग सुदरे किया परोर” इदाम इतुरक।

यहुदि अदिकारि लोकुरक येसुन विरोद किन्तोरक

²² अनि येरुसलेमतिगा स्थापनता हनुम किन्दुरक। अनि ओद पिनिता बेरा मता,

²³ अनि येसु मन्दिरता डुवारतिगा सुलेयमान पोरोयता टाटरा हेरे वलियन्दुर।

²⁴ असके यहुदि अदिकारि लोकुरक वास ओन नोवच्तुर अनि “निमा माकुन बचोक दियांग मकिहच इरकि। बाताल निमा मसिहा आन्दि ते माकुन खरोय वेहा इन्जोर पुच्चेमातुरक।”

²⁵ अनि येसु ओरकुन उत्तर हितुर, “नना ओरे आन्दान इन्जोर नना मुनेय मिकुन इतोना मति निमाट नावा इन्दानातुन विस्वासेय केविट। अनि नावोर बाबो हिता अदिकारते बोद चमत्कारता बुतो नना किन्तोना अद वने नना ओरेय आन्दान इन्जोर गवाहि हिन्तांग।

²⁶ मति निमाट नावा बेळांगनिगडाल आयविट इन्जोर विस्वास केविट।

²⁷ अनि नावा बेळांग नावा पोल्लोंग मानेमातांग। अनि नना अवेहकुन पुन्तोना अनि अव नावा परके परके ताकान्तांग।

²⁸ अनि नना अवेहकुन अनन्त जिवन हिन्तोना, अनि अव बसकेय नाश आयो आयनुंग। अनि बोरायि अवेहकुन मेहान साटि नावाताल उन्दोर आयनुर।

²⁹ अनि अवेहकुन नाकुन हितोर नावोर बाबो सबोयताल हजोर मन्तोर अनि बोरायि बाबोना कयदाल उन्च परोर।

³⁰ नना अनि नावोर बाबो उन्दिय मन्तोम।”

³¹ असके यहुदि अदिकारि लोकुरक येसुन हियान साटि कल्क ताहतुरक।

³² येसु ओरकुन पुच्चेमातुर, “बाबोना लावदे नना पकाय सोबाय सोबाय बुतो कितोना। अनि निमाट हुळतोरिट ते पजा अगडाल बोद बुतो साटि नाकुन कल्क ताहतोरिट?”

³³ अनि यहुदि अदिकारि लोकुरक ओन इतुर, “बोदायि सोबाय बुतो साटि माक निकुन कलदे हेवोम, मति निमा बोद इन्तोन अदेनते निमा परमेस्वरना अपमान किन्तोन! निमा केवल वरोर मानेय मन्ज आपुनतुन परमेस्वर बनेहकिन्तोन इन्जोर माक निकुन कल्क हिस हव्कस वाटकोम।”

³⁴ अनि येसु ओरकुन उत्तर हितुर “‘नना मिकुन परमेस्वरक इन्तोना’ इदाम मिया नियमता पुस्तकतिगा कोटता मन्ता।

³⁵ अनि परमेस्वरना पोल्लो बोना हेरे वाता ओरकुन परमेस्वरक इन्जोर ओर इतुर ते परमेस्वरना पोल्लो बसकेय नाश आय परोंग।

³⁶ ते बाबो अलग किसुन दुनियातिगा लोहतोर नाकुन ‘नना परमेस्वरनोर मरि आन्दान’ इदाम नना इतोना इन्जोर नना परमेस्वरना अपमान किन्तोन इदाम निमाट बाक्या वळकान्तोरिट?

³⁷ अनि नना आपुना बाबोना बुतोंग केवोन ते नावा विस्वास केमाट।

³⁸ मति नना नावा बाबोना बुतोंग किन्तोना ते निमाट नावागा विस्वास केविट ते वने नना बोद चमत्कारता बुतो किन्तोना अदेनिगा निमाट विस्वास किम्ट, असके बाबो नावागा मन्तोर अनि नना बाबोनिगा मन्तोना इन्जोर निमाट पुन्किट अनि ओद समजेमायनातिगा निमाट मनकिट।”

³⁹ असके ओर लोकुरक येसुन असा पयान साटि कोसिस कितुरक, मति ओन पय परोर आतुरक अनि ओर ओरा कयदाल पसिस हतुर।

⁴⁰ अनि पजा ओर यरदन नदिता ओद पकाड बगा बपतिस्मा हेवाल युहन्नाल पहले बपतिस्मा हिन्दुर ओद जागातिगा हतुर अनि अगाय मतोर।

⁴¹ अनि पकाय लोकुरक येसुना हेरे वास आपसते इदाम वळकिन्दुरक, “बपतिस्मा हेवाल युहन्नाल बसकेय चमत्कारता बुतोंग किस तोहोर मति येर मानेयना बारेते युहन्नाल बोदायि इन्ज मतोर ओद सबोय खरोय मता।”

⁴² अनि अगा पकाय लोकुरक येसुनिगा विस्वास कितुरक।