युहनाल 1 - Muria Far Western

परमेस्वरना पोल्लो मानेयना रुपते आत

¹ ब्रंमान्ड बनेमायनाता मुने केवल पोल्लोय मता। अनि ओद पोल्लो परमेस्वरनासंग मता। अनि ओद पोल्लोय परमेस्वर मता।

² अनि ओर ब्रंमान्ड बनेमायनाता मुनेटाले परमेस्वरनासंग मतोर।

³ अनि ओना द्वारा सबोय आयि तयार आता अनि बारायि आयि तयार आता अगडाल बोदायि चिज ओना सिवायि तयार आयो।

⁴ अनि ओर बनेकिता सबोयतुन ओरेय जिवन हिन्तोर अनि परमेस्वरना खरोयतुन उन्दि वेळिचि लेहका लोकुरकुन ओर प्रगट किस हितुर।

⁵ इद दुनियातोर लोकुरक आन्दारते मतोरक असके उन्दि वेळिचि ओरा पोरो मान्जतु मति ओर लोकुरक अद वेळिचितुन आपुनानिगा प्रगट आयिला हेवोरक।

⁶ अनि वरोर मानेयतुन परमेस्वर लोहतुर ओना पोरोय युहन्ना मता।

⁷ अनि ओर वेळिचिता बारेते लोकुरकुन वेहिला वातुर बाक्याकि ओनांग केन्जुन सबोय लोकुरक ओद वेळिचितिगा विस्वास केविर।

⁸ अनि ओर आपुन अद वेळिचि हिलेर आसि मति अद वेळिचिता गवाहि हियान साटि ओर वास मतोर।

⁹ असके ओद खरोय वेळिचि दुनियातिगा वायवाल मता अनि आन्दारते मनवालोर लोकुरकुन वेळिचि बदाम सबोय चिजतुन प्रगट किस हिन्ता अदामे परमेस्वरना बारेते खरोयतुन लोकुरकुन वेहान साटि ओर उन्दि वेळिचि लेहका मतोर।

परमेस्वरना पोल्लो मानेय आस जनम आतुर

¹⁰ अनि ओर इद दुनियातेय मतोर अनि ओना द्वाराय सबोय आयि इद दुनियातिगा तयार आता। ते वने दुनियातोर लोकुरक ओन पुनोर।

¹¹ ओर आपुना लोकुरिगा वातुर मति ओर लोकुरक ओन स्विकार केवोरक।

¹² मति हुचुक लोकुरक ओन स्विकार कितुर अनि ओनागा विस्वास कितुरक। ओरकुन परमेस्वरना मरि आयाना अदिकार हितुर।

¹³ अनि मानेयना पिळिताल बदाम मानेयना इच्चा ते अनि मुत्ते इवुरा संबन्दते मरि जनम आन्तोर अदाम ओर परमेस्वरनोर मरक जनम आयोरक मति ओरक परमेस्वरनिकेडाल जनम आतुरक।

परमेस्वरना पोल्लो परमेस्वरतुन प्रगट किन्ता

¹⁴ अनि अद पोल्लो मानेय आस जनम आतुर अनि मावासंगे मतोर ओर बचोन महान मन्तोर इद माक हुळतोम अनि ओरे परमेस्वरनोर वरोरे मरि आन्दुर इन्जोर परमेस्वर ओन महानता हितोर। ओर माकुन पकाय दया किस बुतो कितुर अनि परमेस्वरनोर खरोय बाताल मन्ता इद ओर माकुन प्रगट कितुर।

¹⁵ अनि “नावा पजा वायिला आतोर ओर नावाताल हजोर मन्तोर बाक्याकि ओर नावा जनम आयानाता मुनेटाले मतोर इन्जोर नना वर्णन किस मतोना येर ओरे आन्दुर” इदाम युहन्नाल ओना बारेते गवाहि हितुर।

¹⁶ बाक्याकि ओना दया दरोज मावागा पकाय मन्ता इन्जोर माकुन पकाय आशिरवाद पुटान्ता।

¹⁷ अनि परमेस्वर आपुना नियमतुन मूसाना द्वारा हिता मन्ता मति येसु मसिना द्वारा परमेस्वर आपुना बारेते खरोय बाताल मन्ता इद प्रगट किस ओना द्वारा माकुन आशिरवाद कितोर।

¹⁸ अनि बोरे परमेस्वरतुन बसकेय हुळोर मति ओनोर वरोरे मरि ओर बाबोनासंग पकाय संबन्द मन्ता ओरे लोकुरा नडुम परमेस्वरतुन प्रगट कितुर।

बपतिस्मा हेवाल युहन्नाना गवाहि

¹⁹ यहुदियातोर अदिकारि लोकुरक येरुसलेमताल याचक अनि लेवि लोकुरकुन “निमा बोर आन्दि?” इदाम पुच्चेमायिला साटि युहन्नाना हेरे लोहतुर।

²⁰ असके “परमेस्वरनोर लोहतोर मसिहा नना आयोने” इन्जोर युहन्नाल ओरकुन सिदो उत्तर हितुर।

²¹ असके “निमा मसिहा आयवि ते निमा बोर आन्दि? बाताल निमा परमेस्वरना पोल्लो वेहवाल एलियाल आन्दि?” इन्जोर ओरक युहन्नान पुच्चेमातुर, असके ओर इतुर “नना आयोन।” असके “बाताल निमा परमेस्वरना पोल्लो वेहवाल आन्दि बहे?” इन्जोर ओरक असा पुच्चेमातुरक अनि “नना ओर वने आयोन इन्जोर ओर उत्तर हितुर।”

²² असके ओरक युहन्नानिन इदाम पुच्चेमातुरक, “पजा निमा बोर आन्दि? बाक्याकि माकुन लोहवालोरकुन उत्तर हियाला साटि निमा आपुना बारते बाताल वेहिन्तोन?”

²³ युहन्नान इतुर: “परमेस्वरना पोल्लो वेहवाल यशायाह इतोर लेहका ‘प्रबुन साटि हरि बनेहकिम्ट इन्जोर वारु पल्लातिगा केयिवाल ओद लेंग नना आन्दान’ ” इन्जोर ओर इतुर।

²⁴ ओरकुन परीसि लोकुरक लोहच मतोरक।

²⁵ ओरक युहन्नान इदाम प्रश्न पुच्चेमातुरक “निमा मसिहा आयवि अनि एलियाल आयवि अनि ओर परमेस्वरना पोल्लो वेहवाल वने आयवि ते पजा निमा बपतिस्मा बाक्या हिन्तोन?”

²⁶ “नना एते बपतिस्मा हिन्तोनान मति मिया नडुम दुसरो वरोर मानेय नितितोर ओर बोर आन्दुर इद निमाट पुनविट।

²⁷ खरोय नावा परके वायवाले मन्तोर ओना हरपुहना डोरिंग लेहाना नावा लायकि हिले” इन्जोर युहन्नाल ओरकुन उत्तर हितुर।

²⁸ इव पोल्लोंग यरदन नदिता ओद पाकाळ युहन्नाल बपतिस्मा हिन्दुर ओद बेथानिया सहेरतिगा आतु।

परमेस्वरना बेळा पिला

²⁹ दुसरो दिया येसु आपुनिके वायानपा हुळसुन बपतिस्मा हेवाल हुन्नाल इदाम इतुर “हुळाट, येर दुनियातोर लोकुरा पापताल मुक्ति हियान्तोर परमेस्वरनोर बेळा पिला आन्दुर।।

³⁰ ‘वरोर मानेय नावा परके वान्तोर ओर नाकुनता वने हजोर मन्तोर बाक्याकि ओर नाकुनताल वने मुनेटोर मतोर’ इदाम नना इन्ज मतोना येर ओरेय आन्दुर।

³¹ नना ते ओन पुनोन। मति इस्रयेलतोर सबोय लोकुरक ओर बोर आन्दुर इन्जोर पुन्दान साटि एते बपतिस्मा हियान साटि नना वातान।”

³² अनि युहन्नाल असा वने इदाम गवाहि हितुर: “नना पवित्र आत्मातुन परेवा लेहका स्वरगताल रेयानपा हुळतान अनि ओद ओनिगा रोमतु।

³³ नना ते ओन पुनोन आन्दान मति एरते बपतिस्मा हियान साटि नाकुन लोहतुर ओरे नाकुन इदाम इतुर, ‘बोनागा निमा पवित्र आत्मातुन रेयाना अनि रोमाना हुळति ओरे पवित्र आत्माते बपतिस्मा हेवाल आन्दुर।’

³⁴ अदामे नना हुळतान अनि येरे परमेस्वरनोर मरि आन्दुर इन्जोर गवाहि वने हितान।”

येसुना पहले चेलाल

³⁵ दुसरो दिया बपतिस्मा हेवाल युहन्नाल ओना इवुर चेलालोकुरासंग असा निच मतोर,

³⁶ असके ओर येसु हन्दाना हुळसुन “हुळाट येर परमेस्वरनोर बेळा पिला आन्दुर” इदाम इतुर।

³⁷ असके येरक इवुर चेलालोरक ओना केन्जुन येसुना परके हतुरक।

³⁸ अनि येसु परके मिळिन्च परके वायवालोरकुन हुळस इतुर, “निमाट बाताल पळकिला आतोरिट?” ओरक येसुन इतुर “हे गुरु निमा बगा मन्तोन?”

³⁹ येसु ओरकुन इतुर, “देट ते हुळकिट।” असके ओरक हन्जुन ओना मन्दाना डेरा हुळतुरक। अद दिया नुलपेहबेरा नालुंग नेकस मतांग। अनि ओरक ओना संगे मतोरक।

⁴⁰ ओरक इवुरागडाल युहन्नाना पोल्लो केन्जुन येसुना परके आस मतोरक वरोर शमोन पतरसना तमो अन्दरियास मतोर।

⁴¹ ओर पहले आपुनोर संगो तमो शिमोनिन मिलेमास ओन इतुर, “माकुन क्रिस्त अर्थ मसिन पुटतोम।”

⁴² ओरक शिमोनिन येसुना हेरे ततुर, येसु ओन हुळतुर अनि “निमा युहन्नानोर मरि शमोन आन्दि। नेटा दियाताल नना निया पोरोय कयफा इरतोना” (अदेना अर्थ पतरस आन्ता) इदाम येसु ओन इतुर।

फिलिप्पुस अनि नदनयेलतुन येसुना केयाना

⁴³ दुसरो दिया येसु गलीला जिल्लाते हन्दाना इच्चा कितुर असके फिलिप्पुसिन मिलेमातुर अनि इतुर, “नावा परके वाय।”

⁴⁴ फिलिप्पुस, अन्दरियास अनि पतरसना बेथसयिदा सहेरतोर मन्वाल मतोर।

⁴⁵ फिलिप्पुस नतन्येलतुन मिलेमास ओन इतुर, “मूसाल आपुना नियमतिगा अनि परमेस्वरना पोल्लो वेहवालोर आपुना पवित्र पुस्तकतिगा वर्णन कितोर ओनाय माकुन पुटतोर ओर यूसुफनोर मरि येसु नासरि आन्दुर।”

⁴⁶ नतन्येल ओन इतुर, “बाताल बोदायि सोबाय चिज वने नसरत सहेरताल पसिय परिन्ता?” फिलिप्पुस ओन इतुर “देय हुळकि।”

⁴⁷ येसु नतन्येलतुन आपुनिके वायाना हुळसि ओना बारेते इतुर, “हुळा येर खरोय इस्रयेलि आन्दुर: येनागा बोदे कपट हिले।”

⁴⁸ नतन्येल ओन इतुर, “निमा नाकुन बगाडाल पुन्तोन?” येसु ओन उत्तर हितुर, “इदेना मुने फिलिप्पुस निकुन केयतुर बसके निमा अन्जीर मरा अडिय मतोन, असके नना निकुन हुळतान।”

⁴⁹ नतन्येल ओन उत्तर हितुर, “हे गुरु निमा परमेस्वरनोर मरि आन्दि। निमा इस्रयेलतोर हजोर राजाल आन्दि।”

⁵⁰ येसु ओन उत्तर हितुर, “नना निकुन अन्जीर मरा अडिय हुळतान इन्जोर साटि निमा विस्वास किन्तोन इदेनताल वने हजोर हजोर बुतोंग कियानपा निमा नाकुन हुळकि” इन्जोर नना निकुन इतान।

⁵¹ नना मिक सबोय लोकुरकुन खरोय खरोय इन्तोना: “उन्दि दिया निमाट हुळकिट स्वरग तरियस वायार अनि नना मानेयतोर मरिना हेरेटाल परमेस्वरनोर दूतक दायनुरक अनि अगडाल अडिय रेयनुरक इदाम निमाट हुळकिट।”