याकुब 5 - Muria Far Westernदनवान लोकुरकुन चेतावनि 1 हे दनवान लोकुरक केन्जाट, मियागा वायवाल मन्ता ओद सन्कटता कारण निमाट कनेह माम्ट अनि हजोह लेंगदे किलाट 2 अनि मिया धन सळेमाता अनि मियांग सन्दराहनुंग पुळियक तितांग। 3 अनि मिया सोना-चान्दितुन जंग तरियता अनि ओद तरियता जंग मिया विरुद गवाहि हियार अनि किस लेहका मिया हवितुन ओद तिन्ज वाटार। अनि इव आकरि दियांग निमाट धनसंपतितुन इरतोरिट ओदेना नाश आयाना बेरा वायार। 4 अनि हुळाट मिया डन्डतिगा बुतो केवालोरक ओरक लोकुरा रोजि निमाट ओरकुन हेविट अनि ओदे बुतोता येपुर मिया विरुद किलिन्ता अनि डन्डतिगा बुतो कितोरा किलानाता लेंग सबोयताल लाववाले प्रबुना कविंगवनाह अवता। 5 अनि दरतितिगा केवल मिया सबोय इच्चा पुराकियान साटि निमाट भोग-विलासते मतोरिट। मति परमेस्वर मिकुन जरुर दन्ड हियानुर इन्जोर निमाट समजेमायविट। 6 अनि बसकेय मिया विरोद केवोर इदाम दरमि लोकुरकुन निमाट दोष लावेकिस होवक्स वाटतिट। निमाट दुःखते सहेनकिस मन्ट 7 इन्जोर हे बायि-दादालोरक, प्रबुना असा मल्स वायानावनाह निमाट पकाय सहन किस मन्ट। हुळाट कास्तकार मानेय दरतिता फसल आयाना आशा इरस पिर बराबर अदेन पुटाना हुळस पकाय सहनते हर हुळस मन्तोर। 8 अनि निमाट वने सहन किस मन्ट अनि आपुना मन्दुन मजबुत किम्ट बाक्याकि प्रबुना वायाना दिया हेरेय अवता। 9 हे बायि-दादालोरक, मियागा न्याय वायमाकि इन्जोर वरोर दुसरोन दोष लावे केमाट। हुळाट हजोर न्याय केवाल प्रगट आयान साटि दरवाजादिगा तयारिते नितितोर। 10 हे बायि-दादालोरक, प्रबुना पोरोयते वळकतोरक ओरक सेवक लोकुरक पकाय तकलिप सहेमायनाता अनि शान्तिता उन्दि आदर्श समजेमाम्ट। 11 अनि हुळाट पकाय तकलिपतुन सहेमास विस्वासते मजबुतते मुने हतोरक ओर लोकुरकुन माक धन्य मन्तोर इन्जोर वळकिन्तोम। निमाट अयुब पोरोयतोर मानेय बदाम आपुना पकाय तकलिप सहेन कितोर इन्जोर केन्जान्तोरिट। अनि आकरि प्रबु ओन बदाम आशिष कितुर इदेन वने निमाट पुतोरिट। प्रबु बचोन करुणा अनि दयालु मन्तोर। 12 मति हे नावोर बायि-दादालोरक, विशेषाल निमाट स्वरगता या दरतिता या बोदायि चिजता शपथ येतमाट। मति मियागा परमेस्वरना न्याय वायमाकि इन्जोर मियांग पोल्लोंग “इंगो” ते “इंगो” अनि “आयो” ते “आयो” मन्दिला पहाजे। प्रार्थनाता लाव 13 मियागाडाल बोरायि तकलिपते मन्तोर ओर प्रार्थना केविर अनि बोरायि गिरदाते मन्तोर ते ओर पाटांग इनिर। 14 अनि मियागाडाल बोरायि बिमार मन्तोर ते ओर मसिलोकुरा सभाता मुक्याल लोकुरकुन केयिर अनि ओरक प्रबुना पोरोयते ओन निय लावेकिस ओना साटि प्रार्थना केविर। 15 अनि विस्वासते किता प्रार्थनाते बिमार मानेय सुदरे किन्तोर अनि प्रबु ओन बिमारिताल तेहच नितहानुर। अनि ओर बिमार मानेय पाप वने किस मन्दानुर ते ओद पाप वने मापि आयार। 16 इन्जोर निमाट बिमारिताल सुदरेमायान साटि आपसते वरोर दुसरोना मुने आप-आपुना पापतुन मानेमास वरोर दुसरोन साटि प्रार्थना किम्ट। अनि परमेस्वरना मुने येताना योग्य मानेयना प्रार्थना पकाय लावते बुतो किन्ता। 17 एलियाल वने ते मावोर लेहका मानेय मतोर, अनि पिर अरमाकि इन्जोर ओर पकाय जोरदे विस्वास किस प्रार्थना कितुर अनि साळेमून्ड वरसावनाह दरतितिगा पिर अरो आत। 18 पजा (ओर साळेमून्ड वरसाना पजा) ओर प्रार्थना कितुर असके आबारताल पिर वात अनि दरतितिगा कायांग हादितुंग। 19 हे नावोर बायि-दादालोरक, मियागाडाल बोरायि मानेय खरोयता हरिते लेस्किर अनि ओन बोरायि असा खरोयता हरिते वापस तरीर ते, 20 बोरायि पापि मानेयतुन वापस ततान्तोर ते ओर उन्दि जिवातुन हायानाताल पिसहान्तोर अनि ओना पकाय पापतिगा मापि पुटार इन्जोर निमाट पुन्ट। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.