याकुब 4 - Muria Far Western

निमाट दुनियातुन गोतियाह बनेकेमाट

¹ मिया नडुम हाहाना-पिटाहाना अनि वाहचाना बाक्या आन्ता? बाताल मिया लोपा गलति कियाना अनि ओद गलतितिगा पकाय गिरदा आयाना इदाम इच्चाताल मन्ता बहे?

² अनि निमाट लालुच किन्तोरिट मति मिया मन्दा इच्चाते बारायि पुटिह परविट इन्जोर निमाट हव्कान्तोरिट अनि हेवा किन्तोरिट। निमाट वाहचाना अनि हाहाना-पिटहाना किन्तोरिट मति मिकुन बाताले पुटो बाक्याकि निमाट परमेस्वरिन बाताले तलकविट।

³ निमाट आपुना भोग-विलासते उळेह कियान साटि गलति इच्चाते पकाय तलकान्तोरिट इन्जोर निमाट तलकान्तोरिट मति पुटो।

⁴ हे व्यभिचारि लोकुरक, बाताल दुनियातुन मया कियाना परमेस्वरतुन वयिर कियाना मन्ता इन्जोर निमाट पुनविट बहे? इन्जोर बोरायि मानेयतुन दुनियाता गोतियाह आयाना इच्चा मन्ता ओर मानेय आपुनतुन परमेस्वरना वयर बनेहकिन्तोर।

⁵ अनि बाताल निमाट पवित्र पुस्तक वेहान्ता ओदेन व्यर्थ समजेमान्तोरिट? बाताल परमेस्वर मावा लोपा उदिहता ओद आत्मा माक परमेस्वरनाय पोरो मयाकियाला पहाजे इन्जोर पकाय मन्दे इच्चा किन्ता?

⁶ मति परमेस्वर मावागा पकाय दया किन्तोर इन्जोर, “परमेस्वर घमन्ड लोकुरा विरोद किन्तोर अनि गरिब लोकुरकनिगा पकाय दया किन्तोर” इन्जोर पवित्र पुस्तकतिगा कोटता मन्ता।

⁷ इन्जोर आपुनतुन परमेस्वरनिगा सोपेह किस सयताना विरोद किम्ट ते ओद सयतान वरियस मिया हेरेटाल वितसोर दायार।

⁸ अनि निमाट परमेस्वरना हेरे हन्ट ते परमेस्वर वने मिया हेरे वायनुर। हे पापि लोकुरक, निमाट गलति कियाना बन्द किम्ट अनि हे रन्ड मन्कनोर लोकुरक आपुना मन्दुन पवित्र किम्ट।

⁹ अनि निमाट दुःखि आस शोकते किलाट मिया कवाना दुःखते अनि मिया गिरदा उदास आयि।

¹⁰ अनि प्रबुना मुने नम्र स्वभावतोर आम्ट ते प्रबु मिकुन आदर हियानुर।

निया तमोनिगा दोष लावेकेमाट

¹¹ हे बायि-दादालोरक, निमाट वरोर दुसरोन बदनामि केमाट। अनि बोर आपुना तमोना बदनामि किन्तोर अनि न्याय किन्तोर ओर परमेस्वरना नियमता बदनामि किन्तोर, अनि ओन नियमता पोरो दोष लावे किन्तोर। अनि निमाट नियमतिगा दोष लावे किन्तोरिट ते निमाट ओद नियमता अनुसार ताकवाल आयो मति ओद नियमता पोरो न्याय केवाल आन्दिट।

¹² अनि नियम हेवाल अनि न्याय केवाल उन्दिय आन्दुर। ओना कयदे माकुन पिसहाना अनि नाश कियानाता अदिकार मन्ता, मति आपुना गोतियालतुन दोष लावे केवाल निमा बोर आन्दि?

घमेन्डता विरुद चेतावनि

¹³ “नेन्ड या नाळ माक बोदायि दुसरो सहेरतिगा हन्ज अगा उन्दि वरसा मनकाट अनि व्यापार किस पकाय डबुंग कमेह कियाकाट” इन्जोर इन्वालोरक केन्जाट।

¹⁴ मति निमाट अदाम वळकमाट बाक्याकि नाळ बाताल आयार इन्जोर निमाट पुनविट बहे? मिया जिवन बदाम मन्ता? निमाट ते एता वाफ लेहका मन्तोरिट, ओद हुडुकबेरा दिसानता अनि पजा बाराय दिसो।

¹⁵ अनि “प्रबुना इच्चा मन्दार ते माक जिवोत मनकोम अनि इद आयोते ओद बुतो वने कियाकोम” इन्जोर इदामे मिक इन्दिला पहाजे।

¹⁶ मति इदेक निमाट पकाय घमेन्ड किस वळकिन्तोरिट अनि अदेना बारेते पकाय हजो-हजो पोल्लो किन्तोरिट, इदाम सबोय घमेन्ड गलति मन्ता।

¹⁷ इन्जोर बोरायि मानेय भला कियाना पुन्तोर मति भला केवोर ते इद पापेय मन्ता।