याकुब 3 - Muria Far Western

आपुना वन्जेरतुन काबु इरस निमाट वळकिला पहाजे

¹ हे नावोर बायि-दादालोरक, परमेस्वरना पोल्लोंग करिहवालोरकुन परमेस्वर पकाय कटिनते न्याय कियानुर इन्जोर निमाट समजेमास पकाय लोकुरक परमेस्वरना पोल्लोंग करिहवाल आयान साटि विचार केमाट।

² बाक्याकि माक सबोय लोकुरा बगाना-बगा गलति आन्ता। अनि बोरायि मानेय परमेस्वर इच्चा किन्तोर ओद पोल्लो वळकिकिट ते ओर मानेय आपुना सबोय बुतोतिगा अनि आपुना मन्दुन काबु इरस पकाय सोबाय गुण संपन्न मानेय मन्तोर।

³ माक कोडातुन काबुते कियान साटि अदेना टोडितिगा लगाम लावे किस अदेना सबोय मेन्दुलतुन माक काबु इर परान्तोरोम।

⁴ अनि हुळाट डोंगा वने बचोन हजोर मन्ता अनि पकाय जोरदा वळियते ताकिला लागान्ता मति अचोन बेहरा डोंगा, डोंगा ताकिहवाल मानेय उन्दि हुडिला बळगाते आपुना इच्चाता अनुसार बगाय ओय परान्तोर।

⁵ इदाम लेहका वन्जेर वने आपुना मेन्दुलता हुडिला भाग मन्ता। मति हुडिला वन्जेर बचोक हजोह-हजोह गमन्डता पोल्लो वळकिन्ता। हुळाट बदाम हुचुन्सा किसते केळातिगा वनवा लागान्ता।

⁶ इदाम लेहका माक गलति पोल्लोंग वळकानपा दुसरो लोकुरकुन माक नाश किन्तोरोम। माक बाताल वळकिन्तरोम अदेनते पुन्तरोम, पकाय गलति मावा जिवाते मन्ता इन्जोर। माक बाताल विचार किन्तोरोम अनि बाताल वळकान्तरोम ओद सबोय पोल्लो वळकनाते बाहरो पसियिन्ता। अनि मावा वळकनाता द्वारा दुसरो लोकुरक वने गलति कियानुर। अनि बाताल गलति मन्ता ओद पोल्लो लोकुरक वळकान्तोर ओद पोल्लो दुष्टात्माता कारणते आन्ता।

⁷ बाक्याकि सबोय प्रकारतांग केळातांग जानवर, पिटेंग अनि नेलदीगा मन्तांग अव जिवाह अनि एरतिगा मन्तांग अव जिवाहकुन मानेय आपुना काबुते किया परान्तोर अनि अवेहकुन मानेय आपुना काबुते कितोर वने।

⁸ मति वन्जेरतुन बोरायि मानेय आपुना काबुते किया परोर। अनि ओद पकाय दुष्ट पोल्लो वळकिन्ता अनि ओद जहरता लेहका पकाय कदरनाक मन्ता।

⁹ अनि माक वन्जेरतेय आपुना प्रबु अनि परमेस्वरना स्तुति किन्तोरोम अनि परमेस्वर मावा लेहका बनेकिता दुसरो लोकुरकुन ओदे वन्जेरतेय सराप हिन्तोरोम।

¹⁰ अनि उन्दिय टोडिताल स्तुति अनि सराप रन्डास पसिन्तांग। हे नावोर हेलाळ-दादालोरक इदाम आयमाकि।

¹¹ बाताल उन्दिय झराताल मिंगता अनि खारो एर पसिय परांता बहे?

¹² हे नावोर बायि-दादालोरक, बाताल अन्जीरता मराताल जेयतुन मराता कायांग अनि अंगुरता टोन्डातिगा बसकेय अन्जीर मराता कायांग हादान्तांग बहे? बसकेय आयो अनि खारो झराताल मिंगता एर बसकेय पसियो।

स्वरगता ग्यान

¹³ अनि मियागाडाल ग्यानि अनि समजदार मानेय बोर मन्तोर? ओर ग्यानि अनि समजदार मन्तोर ओर ओना ग्यानता चिन्ह मन्ता ओद नम्रतातासंग सोबाय चाल-चलन किस आपुना बुतोतुन प्रगट केविर।

¹⁴ मति निमाट आपुना आपुना मन्दे दुसरो लोकुरा बारेते हेवा अनि स्वार्थ किन्तोरिट ते खरोयता विरुद घमेन्ड केमाट अनि खोटाल वळकमाट।

¹⁵ अनि इदाम ग्यान ते स्वरगताल वायो मति इदाम ग्यान दुनियाता लोकुरकनिकेडाल, बोनागा परमेस्वरना आत्मा हिले ओर लोकुरकनिकेडाल, अनि सयतानिकेडाल इदाम ग्यान वान्तांग।

¹⁶ इन्जोर बगा हेवा अनि विरोद मन्ता अगा वाहचना अनि सबोय प्रकारता खराब बुतो मन्तांग।

¹⁷ मति स्वरगताल वायवाल ग्यान पहले पवित्र मन्ता पजा शान्ति प्रिय, नम्रता, आग्याकारि, दया अनि सबोय प्रकारता सोबाय बुतो इदाम पोल्लोतुन कियान साटि इद ग्यान माकुन लाव हिन्ता। अनि ओद बोनाय पक्षपात केवो अनि कपटि हिले।

¹⁸ अनि लोकुरा शान्ति साटि बुतो केवालोर लोकुरक शान्तिता विजा लोकुरा नडुम वीतान्तोर अनि लोकुराताल दारमिकता कायांग लेहका कोयान्तोर।