याकुब 2 - Muria Far Western

निमाट पक्षपात केमाट

¹ हे नावोर बायि-दादालोरक, मिकुन मावोर महिमावान प्रबु येसु मसिनिगा विस्वास कियाकिट ते निमाट बोदायि पक्षपातते केमाट।

² बाक्याकि वरोर मानेय सोनोता अंगठी अनि किमतिवाले सोबाता सन्दरांग करस मिया प्रार्थना सभातिगा वायनुर अनि वरोर गरिब वने हरतांग, निदितांग सन्दरांग करस मिया प्रार्थना सभातिगा वायीर।

³ अनि निमाट बोर महागोवाले सोबाय सन्दरांग करतोर ओर मानेयना चेहरा हुळस, “निमा अगा सोबाय जागादिगा उदा” अनि ओर गरिब मानेयतुन, “निमा इगा नितस मन आयो ते नावा काल्कहेरे उदा” इदाम इन्दाकिट ते,

⁴ बाताल निमाट वरोन दुसरोनासंग भेदभाव किस गलति रितिते न्याय केवाल ठहरे मायविट बहे?

⁵ हे नावोर प्रिय बायि-दादालोरक केन्जाट: बाताल परमेस्वर गरिब लोकुरकुन विस्वासते दनवान बने कियान साटि अनि आपुनिगा मया केवालोरकुन वाचा किस मता परमेस्वरना ओद राज्यता वारिस आयान साटि ओरकुन आचतोर बहे? मति निमाट ओरक गरिब लोकुरकुन अपमान कितिट।

⁶ बाताल दनवान लोकुरक मिकुन पकाय तकलिप किन्तोर बहे? अनि बाताल ओर मिकुन कोरटतिगा पिळिंगसोर-पीळिंगसोर ओन्तोर बहे?

⁷ अनि मिवोर मालकाल येसु मसिना सोबाय पोरोयतुन ओरे नीन्दा किन्तोर बहे?

⁸ मति “बदाम निमाट आपुनिगा मया अनि काळजि किन्तोरिट अदामे मया अनि काळजि मिया हेरेटोरकुन वने किम्ट” इन्जोर पवित्र पुस्तकता पोल्लोता अनुसार इद हजोर आग्या निमाट खरोय मन्दे पालन किन्तोरिट ते ओद मिकुन सोबाय मन्ता।

⁹ मति निमाट पक्षपात किन्तोरिट ते पाप किन्तोरिट अनि निमाट गुन्हेगार इन्जोर परमेस्वरना नियम मिकुन प्रगट किस हिन्ता।

¹⁰ बाक्याकि बोरायि परमेस्वरना सबोय नियम पालन किसोर मन्तोर मति ओर उन्दि पोल्लोतिगा गलति केविर ते ओर सबोय पोल्लोतिगा दोषि ठहरे मान्तोर।

¹¹ अनि “निमा व्यभिचार केमा” इन्जोर आग्या हितोर इद वने इन्तोर “निमा बोने हव्कमा” इन्जोर। अनि निमा व्यभिचार केवि मति बोने हव्कान्तोरिट ते निमाट परमेस्वरना नियमतुन तोडेकेवाल आतिट।

¹² उन्दि दिया परमेस्वर माकुन आपुना नियमता अनुसार न्याय कियानुर अनि ओना ओद नियम माकुन पापताल स्वतन्त्र किन्ता। अनि निमा न्याय आयार इदाम लोकुरा लेहका वळका अनि बुतो किम।

¹³ बाक्याकि बोर दया केवोर ओना बिना दयाते न्याय आयार; अनि दया केवाल मानेय न्यायता बेरा बिना वरेते मन्दा परान्तोर।

विस्वास अनि कर्म

¹⁴ हे बायि-दादालोरक, वरोर मानेय नाकुन येसु मसिनिगा विस्वास किन्तोरोम इन्जोर इन्तोर मति ओद विस्वासता बाताले बुतोतोर हिलविट ते बाताल फायदा? बाताल इदाम विस्वास बसकेय ओना पिसाना किया परार बहे?

¹⁵ अनि बोरायि तमोन या हेलान करान साटि सन्दरांग हिलेंग अनि ओरकुन दरोज पोटामेन्ड तिन्दिला वने हिले इदाम मन्दानपा,

¹⁶ मियागाडाल बोरायि ओरकुन, “शान्तिते निमा हन; निमा किस आरा अनि सोबाय सोबाय जेवन किस गिरदाते मन्ट” इन्जोर इनिर मति ओना चिजना जरुरि मन्ता अव चिजक ओन हेवि आयकिट ते इदाम इन्दानाताल बाताल फायदा मन्ता?

¹⁷ इदाम लेहका निया परमेस्वरना विस्वास ओद विस्वासता अनुसार बाताले बुतो केवि आयकिट ते ओद विस्वास हाताप लेहका मन्ता।

¹⁸ बोरायि मानेय इदाम इन्तोर, “हुचुलोर लोकुरक येसु मसिनिगा सोबाय विस्वास किन्तोर इन्जोर अनि हुचुलोर लोकुरक सोबाय बुतोकिन्तोर” इदाम इन्तोर। मति नना इन्तोना “इदेक निमाट बिना बुतोते आपुना विस्वास बदाम तोहकिट? अनि नना आपुना विस्वास आपुना बुतोकिस मिकुन तोहका।”

¹⁹ बाताल परमेस्वर उन्दिय मन्तोर इन्जोर निमाट विस्वास किन्तोरिट। मिया विस्वास पकाय सोबाय मन्ता! अनि दुष्ट आत्मा वने परमेस्वर उन्दिय मन्तोर इन्जोर विस्वास किन्तोर इचोने आयोते ओव वरेते वने कसिंगसोरिंग मन्तांग।

²⁰ मति हे मुर्ख मानेय, बाताल बिना बुतोते विस्वास व्यर्थ मन्ता इन्जोर निमा इद वने पुनवि?

²¹ मावोर बाबो अब्रहाम आपुनोर मरि इसहाकिन बलि हियान साटि वेदि पोरो इरतुर असके ओना इद बुतोता कारणते परमेस्वर ओन परमेस्वरना मुने येताना योग्य ठहरे कितुर बहे?

²² अनि परमेस्वरनिगा ओन बचोन विस्वास मता इन्जोर निमाट हुळतिट। परमेस्वर वेहता पोल्लो कियान साटि ओर तयार मतोर ओना बुतोते ओना विस्वास पुरा आता।

²³ अनि अब्रहाम परमेस्वरनिगा विस्वास कितुर अनि परमेस्वर ओन परमेस्वरना मुने येताना योगय ठहरे कितुर इन्जोर पवित्र पुस्तकता ओद पोल्लो पुरा आत, अनि ओन परमेस्वरनोर गोतियाल इन्जोर इदाम पोरोय पुटतु।

²⁴ इन्जोर मानेय केवल विस्वासतेय दरमि ठहरे मायोर मति बुतोते वने दरमि ठहरे मान्तोर इन्जोर निमाट हुळतिट।

²⁵ इदाम लेहका राहब पोरोयता वेश्या वने दूततुन आपुना लोन मन्दिला हितु अनि पजा दुसरो हरिते ओरकुन बाहरो लोहतु ते ओद वने इद बुतोता कारणतेय परमेस्वर अदेन परमेस्वरना मुने येताना योग्य ठहरे कितुर?

²⁶ इदाम लेहका बदाम बिना आत्मा मेन्दुल हाताप मन्ता इदामे विस्वास वने बिना बुतोते हाताप मन्ता।