याकुब 1 - Muria Far Westernअभिवादन 1 परमेस्वर अनि प्रबु येसु मसिहनोर दास याकुब पुरा दुनियाते हिके-होके आस मन्तोरक ओर बारा गोत्रतोर लोकुरकुन साटि कोटिन्तोना अनि मिकुन नमस्कार। 2 हे नावोर बायि-दादालोरक, निमाट पकाय अलग अलग तकलिपते अरान्तोरिट असके, 3 मिया जिवनते पकाय तकलिप वायानपा निमाट विस्वासते मन्जुन मजबुतते सहेन किस मुने हन्दान साटि अदेनते मदत पुटान्ता इदाम पुन्जुन अदेन पकाय गिरदाता पोल्लो इदाम निमाट समजेमाम्ट। 4 मति मियागा बोदे पोल्लोता कमि हिलेर आस परिपूर्ण आयान साटि मजबुतते सहेन किस पुरो बुतो किम्ट। 5 मति मियागाडाल बोने बुद्धि कमजोर मन्दारते ते निमाट परमेस्वरदुन तलकाट परमेस्वर गिरदाते सबोय लोकुरकुन उदारताते हिन्तोर अनि इदामे ओन वने हियानुर। 6 मति ओर विस्वासते तलकिर अनि बोदे संकोच केमाकिर बाक्याकि समुद्रता पळवाह बदाम वळियते परके मुने दान्ता अदाम लेहका संकोच केवाल मानेय मन्तोर। 7 इदाम नाकुन प्रबुनिकेडाल बाताले पुटार इन्जोर संकोच केवाल मानेय आशा केमाकिर। 8 अनि रन्ड मन्कनोर मानेय आपुना सबोय पोल्लोतिगा चन्चल मन्तोर। गरिब अनि सावकार लोकुरक 9-10 अनि बोर मानेय लोकुरा मुने हुडलोर मन्तोर ओर मानेय गिरदा आम बाक्याकि ओर परमेस्वरना मुने हजोर मन्तोर। मति सावकार मानेयतुन परमेस्वर ओन नम्र बनेकियानपा ओर गिरदा केविर बाक्याकि धनि मानेय रोन्डाता पुंगार लेहका कुससोर मन्दार। 11 बाक्याकि पोळद पसियतपा पकाय अदि अरस रोन्डातुन वतिहिस वाटान्ता। अनि रोन्डा वतितपा अदेना पुंगार कुसानता अनि ओद जाळीता शोबा दान्ता इदाम लेहका दनवान मानेय वने आपुना मेहनत किसोर किसोर नाश आयनुर। पकाय तकलिप अनि प्रलोभन 12 अनि बोर मानेय पकाय तकलिपतुन विस्वासते मन्जुन मजबुतते अदेन सहेनकिस विजय आन्तोर ओर मानेय आशिरवादते मन्तोर, बाक्याकि ओर पकाय तकलिपतुन सहेन किस विजय आसुन पजा प्रबु आपुनिगा मया केवालोरकुन अनन्त जिवनता सम्मान हियानुर इन्जोर वाचा हितोर ओद अनन्त जिवन ओन पुटार। 13 अनि पापकियान साटि मन्दे विचार वायानपा परमेस्वर नाकुन ओद विचार हितुर इन्जोर बोरे इन्माट। बाक्याकि परमेस्वर पाप कियान साटि बोरायि मानेयना मन्दे विचार हेवोर अनि बोरायि मानेय ओन पापकियान साटि विचार हियाला परोर। 14 मति पाप कियाना साटि सबोय मानेयना मन्दे विचार मन्ता अनि ओद विचार ओरा मन्दुन नियन्त्रन किस पाप किहान्तोर। 15 अनि पजा ओर पापकियान इच्चा किस पाप किन्तोर अनि दरोज पाप कियाना ओरा आदत बनेमास ओर परमेस्वरना मुनेटाल दरोज साटि लक आन्तोर। 16 हे नावोर बायि-दादालोरक, निमाट दोखा तिनमाट। 17 बाक्याकि सबोय सोबाय वरदान अनि सबोय उत्तम दान आबाळतिगा सबोय वेळिचितुन बनेकितोर परमेस्वरनिकेडाल पुटान्ता अनि ओर जागा बदले कियाना जंगो लेहका परमेस्वर बदले मायोर। 18 अनि माक परमेस्वरना सुष्टितीगा हादितांग पहले कायांग आस मन्दान साटि परमेस्वर आपुना इच्चाते माकुन खरोय पोल्लोते जनम हितुर। परमेस्वरना पोल्लो केन्जुन अदेन पालन किम्ट 19 हे नावोर बायि-दादालोरक, सबोय लोकुरक ध्यान किस केन्जाना अनि विचार किस वळकाना अनि सान्डे होंग केमाकिर इन्जोर निमाट पुन्तोरिट। 20 बाक्याकि वरोर मानेय होंगते मन्दानपा परमेस्वरना मुने ओना इच्चा अनुसार खरोय बुतोतुन कियाला परोर। 21 इन्जोर आपुना जिवाताल सबोय प्रकारता गलतितुन लक किस मिया जिवाता पिसाना किया परान्ता इदाम पोल्लोतुन परमेस्वर मिया ह्रुदयतिगा उरसता मन्ता ओद पोल्लोतुन नम्रताते स्विकार किम्ट। 22 अनि निमाट परमेस्वरना पोल्लोतुन केवल केन्जवाल आस आपुनतुन दोखा केमाट मति परमेस्वरना पोल्लोतुन मानेमायवाल बनेमाम्ट। 23 बाक्याकि बोरायि मानेय पोल्लोतुन केन्जवाल मन्तोर मति ओद पोल्लोता अनुसार ताकोर आन्तोर ते ओर आपुना चेहरा आरसातिगा हुळान्तोर मानेय लेहका मन्तोर। 24 इन्जोर ओर मानेय आपुनतुन हुळस दान्तोर अनि नना बदाम मन्दान इन्जोर सान्डेय मरंगान्तोर। 25 मति बोर मानेय परमेस्वरना पुरा नियमतुन ध्यान किसोर पालन किन्तोर अनि ओर केन्जचुन मरंगोर मति ओर अदेन सोबाय पालन किन्तोर ते परमेस्वर ओन जरुर आशिष हियानुर। 26 अनि बोरायि मानेय आपुना वन्जेर पोरो काबु इरोर आयनुर अनि ओर आपुनतुन दोखा हिस आपुनतुन भक्ति केवाल लेहका समजेमायिर ते ओना भक्ति व्यर्थ आयार। 27 अनि अनाथ अनि रान्डिह आसकना गरिब परिस्थितिते मदत कियाना अनि दुनियाता गलतिताल आपुनतुन पिसहाना ओद मावोर बाबो परमेस्वरना हेरे शुद्ध अनि सोबाय भक्ति मन्ता। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.