यहुदि 9 - Muria Far Western

जुनाल करारता आरादना

¹ ओद पहलेटा करारतिगा वने आरादना साटि नियमंग अनि दुनियातिगा पवित्र जागा वने मतांग।

² अर्थ आरादना साटि उन्दि पवित्र तम्बु बनेहकितुर, ओद तम्बुतिगा पहलेटा भागतिगा टिवरि इराना गोटांग अनि परमेस्वर साटि भेटता रोटिंग इराना टेबल मतांग अनि अदेन पवित्रजागा इन्तोरक।

³ अनि दुसरो पळदाता परके पकाय परम पवित्र जागा पोरोयता उन्दि दुसरो तम्बु मता।

⁴ अगा सोनोता धुपारना अनि नालुंगास बासा सोनोता लेप हिता सन्दुक मतांग अनि ओद सन्दुक परमेस्वरना करारता चिन्ह मता। अनि ओद सन्दुकतिगा मन्ना पोरोयता रोटि इरस मता सोनोता बरनि अनि हारुनता पुंगाह कायांग हादस मतांग बळगा इरस मतांग। अनि परमेस्वर मूसान हितोर करार कोटस मता रन्ड कलदा पाटिंग वने मतांग।

⁵ अनि ओद सन्दुकता पोरो पापता मापि पुटाना दयाता जागातिगा दळमि किस मतांग मान्जतांग रन्डास करुब पोरोयता स्वरगदूतना पुतळांग मतांग। इदेनते परमेस्वरना महिमा अगा मन्ता इन्जोर तोहान्तोर। मति इद बेरा माक इव सबोय पोल्लोता बारेते पकाय वळकिला परोम।

⁶ परमेस्वरना पवित्र तम्बुतिगा मुने वेहता ओव सबोय चिजकना तयार आतपा याजक बाहरो मुनेटा खोलितिगा दरोज हन्ज आपुना सेवाता बुतो किन्दुरक।

⁷ मति लोपाडा मन्ता सबोयता पवित्र खोलितिगा केवल हजोर याजके आपुना पाप साटि अनि लोकुरक किता गलतितुन भेट हियान साटि नतुरतासंग वरषाते केवल उन्दि बेरा हन्दुर।

^8-10 यहुदि लोकुरकुन परमेस्वरना आरादना साटि बनेकितोर पहलेटा पवित्र तम्बु अनि अगा किसोर मता सबोय पोल्लोंग इद काळ साटि उन्दि उदाहरण लेहका मन्ता। इदेना द्वारा पवित्र आत्मा इद बेराता हुचुक पोल्लोंग मावा साटि तोहान्तोर। माक यहुदि लोकुरक बनेकितोर ओद पहलेटा पवित्र तम्बुतिगा आरादना कियाना बेरा माक बाताल तिन्दिला पहाजे अनि बदाम आपुना मेन्दुलतुन नोरिला पहाजे इदाम नियम मन्ता। मति इद सबोय आपुना मेन्दुल साटिये मता। अगा माक भेट अनि बलि हिन्तोरोम मति अदेना द्वारा मावा अन्तकरणतुन शुद्धकिस परिपूर्ण कियापरोंग आतु। बाक्याकि पहलेटा तम्बु नितिन्ता इन्जोर स्वरगता परम पवित्र मन्दिरता हरि दिसो। मति अव सबोय नियमता बुतो परमेस्वरना पुनाल करार वायानवनाह मन्ता।

मसिना नतुरता लाव

¹¹ मति मसि वायवाल मन्ता इदेनताल सोबाय पोल्लोता हजोर याजक आस वातुर। ओर असा वने हजोर अनि परिपूर्ण अनि बोरे मानेय आपुना कयदे बनेकेवोर अनि परमेस्वर बने कितोर इद सृष्टिता भाग आयो इदाम उन्दि जागातिगा मन्जे स्वरगतिगा परमेस्वरना हेरे हतुर। दुनियाता पवित्र तम्बु पवित्र तम्बु ओद स्वरगता प्रतिरुप मन्ता।

¹² ओर बोकळाहना अनि टालाल पयाता नतुरता द्वारा आयो मति आपुनाय नतुरते केवल उन्दिय बेरा स्वरगता पवित्र जागातिगा हन्जुन अनन्त काळ साटि लेहचियाना पुटिहतुर।

¹³ बाक्याकि बोकळाहना अनि कोन्दाहना नतुर अनि बोळसता टालाल पिलांगना निर यहुदि रितिता अनुसार अपवित्र मन्तोरक ओर लोकुरकनिगा हिदिक्स ओरा मेन्दुलतुन शुद्ध कियान साटि मता।

¹⁴ ते दरोज मनवाल पवित्र आत्माता द्वारा आपुनतुन बोदे दोष हिले आस परमेस्वरतुन बलि हितुर मसिना नतुर जिवित परमेस्वरना सेवा साटि मावा अन्तकरणतुन अनन्त काळता हायानाता दन्डताल मापि किस बचोन शुद्ध कियानुर?

¹⁵ अनि इद कारणते परमेस्वर मूसानासंग किता जुनाल करारता काळते ओद नियमतुन पालन किया परोर आतोरक सबोय पापि लोकुरकुन आपुना हायानाता द्वारा अनन्त काळता वारिस आयाना वाचाते केयतोर सबोय लोकुरकुन लेहचियान पुटान साटि मसि पुनाल करारता मध्यस्थि मन्तोर।

¹⁶ बाक्याकि वरोर मानेय हातुर असके ओन बने किता वसियत कागत बाकि मन्ता ते ओर हातुर इदाम लोकुरकुन सबुत हियाना जरुरि मन्ता।

¹⁷ बाक्याकि इदाम वसियत कागत ओद करार बनेकितोर मानेय हान्तोर असके अदेना फायदा पक्को आन्ता। अनि करार केवाल मानेय जिवित मन्तोर अचोनवनाह ओद वसियत कागतुन बोदे फायदा हिले।

¹⁸ इन्जोर पहले करार वने नतुर हिस पका कितुरे।

¹⁹ बाक्याकि मूसाल सबोय लोकुरकुन नियमता उन्दि उन्दि आग्या वेहतुर अनि पजा ओर बोकळाहना अनि टालाहना नतुर एरतिगा मिसरेकिस रेंगाल कल्क अनि जुफा मराता कोहकते ओद गुन्डे किता पवित्रपुस्तक पोरो अनि सबोय लोकुरकनिगा हिदिक्सितुर।

²⁰ अनि “इद परमेस्वर मिया साटि आग्या हिता करारता नतुर आन्दु” इन्जोर इतुर।

²¹ अनि इदे रितिते ओर पवित्र तम्बु अनि पवित्र सेवा साटि मन्ता सबोय चिजतिगा नतुर हिदिक्तुर।

²² अनि मूसाना नियमता अनुसार सबोय चिजक नतुरता द्वारा शुद्ध आन्ता; अनि नतुरता बलि हेवाय पापतुन मापि पुटो।

मसिना बलिदानता द्वारा पापतुन मापि पुटान्ता

²³ इन्जोर स्वरगता चिजता रुप लेहका मन्ता यहुदि लोकुरक आरादना कियान साटि इद दरतितिगा बनेकितोर तम्बुता इव चिजतुन इदाम नतुरता द्वारा शुद्ध कियाना जरुरि मता। मति स्वरगता चिजक साटि इदेनताल सोबाय बलिदान कियाना जरुरि मन्ता।

²⁴ बाक्याकि मानेय कयदे बनेहकितोर अनि खरोय पोल्लोता प्रतिरुप मन्ता पवित्र जागातिगा आयो मसि हतुर, मति माकुन मदत कियान साटि इदेक परमेस्वरना मुने दिसिर इन्जोर स्वरगतिगाय मसि हतुर।

²⁵ अनि हजोर याजक दरवरसा जानवरता नतुर पयस परमेस्वरना तम्बुता पकाय परम पवित्र जागातिगा दान्तोर लेहका मसिन आपुनतुन असा असा बलि हियाना जरुरि हिले।

²⁶ ते दुनियाता उत्पतिताल मसि असा असा पकाय तकलिप सहन किया लागस मनेर। मति ओर इद दुनियाता अन्ततिगा आपुना बलिदानता द्वारा पापतुन मापि केविर इन्जोर ओर उन्दि बेरा दिसतुर।

²⁷ अनि सबोय मानेयक उन्दि बेरा हायानुर असके पजा परमेस्वर न्याय कियाना पहाजे इदाम परमेस्वर निवळे किता मन्ता।

²⁸ अदामे मसि वने पकाय लोकुरकुन पापता मापि साटि उन्दि बेरा बलिदान आतुर अनि ओर दुसरो बेरा असा दिसानुर-लोकुरा पापता मापि हियान साटि आयो मति आपुना साटि हर हुळिला आतोरक लोकुरकुन पिसान साटि मन्ता।