यहुदि 8 - Muria Far Western

येसु उन्दि पुनाल करारता हजोर याजक मन्तोर

¹ माक वळकिला आतोरिट अगडाल सबोयताल हजोर पोल्लो इद मन्ता: स्वरगतिगा हजोर महिमावान परमेस्वरना सिंहासनता तिन्दान कय हेरे हन्ज उदितोर वरोर हजोर याजक मावा साटि मन्तोर।

² अनि ओर पकाय पवित्र जागा अनि बोरे मानेय आपुना कयते बनेकेवोर मति प्रबु बनेहकितोर ओद खरोय तम्बुतिगा सेवा किन्तोर।

³ बाक्याकि वरोर हजोर याजक भेट, अनि बलि हियान साटि निवळे कितोर इन्जोर येना वने हेरे भेट हियान साटि बाताले पहाजे इन्जोर जरुरि मता।

⁴ ओर दरतितिगा मन्ज मनेर ते याजक आयोर आस मनेर बाक्याकि दरतितिगा पहलेटाले मूसाना नियमता अनुसार दान हेवालोर याजक लोकुरक मन्तोरक।

⁵ ओर लोकुरक स्वरगता खरोय पोल्लोता प्रतिरुप अनि जंगोता सेवा किन्तोरक। मूसाल तम्बु बनेहकियाना तयारि किन्तोर असके परमेस्वर ओन “हुळा बदाम निकुन मटा पोरो तोहच मतोना ओद तम्बुता लेहका सबोय बनेहकियाकि” इन्जोर परमेस्वर ओन चेतावनि हितुर।

⁶ मति इदेक ते मसि ओराताल पकाय हजोर वाचाते आधारित मन्ता उन्दि करारता मध्यस्थि सेवा किन्तोर इन्जोर ओरा जुनाल करारताल पकाय सोबाय मन्ता उन्दि सेवा ओन पुटतु।

⁷ बाक्याकि पहले करारतिगा बोदे गलति हिले आस मन्वार ते दुसरो करार पळकाना सन्दि वायो आस मन्वार।

⁸ मति प्रबु ओरा कमितुन हुळस इदाम इन्तोर, “हुळाट नना इस्रायेलना लोतोरासंग अनि यहुदाना लोतोरासंग पुनाल करार कियाना दियांग वायिला आतांग।

⁹ नना ओरा बाबो-दादिलोरा कय पयस ओरकुन मिस्रि देशताल बाहरो ततान ओद दिया नना ओरासंग किता करार लेहका मनो आयार इद पुनाल करार। बाक्याकि नावा करारता अनुसार ओरक मनोर आतुरक इन्जोर नना ओराके ध्यान हेवोन आतान इदाम प्रबु इन्तोर।”

¹⁰ असा प्रबु इन्तोर: “ओव दियाता पजा इस्रायेलना लोतोरासंग कियाका पुनाल करार इदाम मन्ता: नना आपुना नियमतुन ओरा मन्दिगा इरस अदेन ओरा मन्दिगा कोटका, अनि नना ओरा परमेस्वर आयका अनि ओरक नावोर लोकुरक आयनुरक।

¹¹ अनि बोरे मानेय आपुना देशतिगा मन्वालोरकुन अनि आपुना तमोलोरकुन प्रबुन पुन्ट इदाम करिहस हियाना जरुरि हिले आयार। बाक्याकि ओरागडाल हुडलोरताल हजोहवनाह सबोय लोकुरक नाकुन पुन्दानुरक।

¹² नना ओरा पापतुन मापि कियाका अनि ओरा पापतुन असा आल्हिवोन आयका इन्जोर प्रबु इन्तोर।”

¹³ इद करारतुन पुनाल मन्ता इदाम परमेस्वर इतुर इन्जोर मूसानासंग कितोर ओद पहलेटा करारतुन व्यवहारतिगा बेकार ठहरे कितुर; अनि जुनाल आयिला आता अनि कळियला आता सबोय चिज बदले कियाना जरुरि मन्ता।