यहुदि 7 - Muria Far Westernयाजक मलिकिसिदक 1 येर मलिकिसिदक शालेम सहेरता राजाल अनि परमप्रधान परमेस्वरनोर याजक मतोर। अब्रहाम राजाहकुन हारेहकिस मलस वान्दुर असके ओर अब्रहामिन मिलेमातुर अनि ओन आशिरवाद हितुर। 2 “ओर युधतिगा हारेकितुरक ओर लोकुरकनिगाडाल पयस ततुर ओव सबोय चिजता दहावो भागवने” अब्रहाम येन हितुर; ओना पोरोयता पहलेटा अर्थ “परमेस्वरना मुने येताना योग्य राजाल” अनि पजा ओर “शालेमतोर राजाल” मन्जे “शान्तिता राजाल” इन्जोर वने अर्थ मन्ता। 3 ओनोर बाबो या ओना अवहारि या ओना वारसान बारेता बोदे इतिहास माक पुटो। अनि ओना जनमा या हायानाता बारेते बोदे इतिहास माक पुटो। अनि मलिकिसिदक परमेस्वरनोर मरिना लेहका ओर दरोज साटि याजक मन्तोर। 4 ओर बचोन महान मतोर इन्जोर इदेक ध्यान किम्ट! मावोर पुरकातोर बाबो अब्रहाम वने लळायि किस हारेहकितोर ओद देशताल आपुनतुन पुटता चिजताल दहावो भाग ओन हितुर बहे। 5 इदेक हुळाट, मूसाना नियमता अनुसार लेवि वंशतोर याजक लोकुरक मन्तोर; ओरकुन लोकुरकनिकेडाल अर्थ आपुनाय तमोनिकेडाल वने दहावो भाग येताना साटि आग्या मन्ता। अब्रहामना वंशजता तमो लोकुरकनिकेडाल वने ओर इदाम येतितुरक। 6 मति मलिकिसिदक ओर लेवि वंशतोर हिलेर आसि ते वने अब्रहामनिकेडाल दहावो भाग येतितुर अनि परमेस्वरताल वाचांग येतितोर ओर अब्रहामिन आशिरवाद वने हितुर। 7 अनि वरोर हजोर मानेय आपुनाताल हुडलोर मानेयतुन आशिरवाद हिन्तोर इन्जोर इगा बाताले शंका हिले। 8 अनि मूसाना नियमता अनुसार लेवि वंशतोर याजक लोकुरक हायवाल मानेयक मतोरक; ओरक मानेयकनिकेडाल दहावो भाग येतान्तोरक। मति इदेकवनाह जितो मन्तोर इन्जोर पवित्र पुस्तक गवाहि हिन्तोर मलिकिसिदक अगा अब्रहामताल दहावो भाग येतान्तोरक। 9 ते दहावो भाग येतान्तोर लेवि वने अब्रहामना द्वारा दहावो भाग मेल्किसेदेकिन हितुर इदाम वने माक इन्दिला परान्तोरोम। 10 बाक्याकि लेविना पुरकातोर बाबो अब्रहामिन मलिकिसिदक मिलेमातुर ओदबेरा लेवि वने ओनागा विजाता रुपते मतोर। मलिकिसिदकना लेहका मसि दुसरो याजक 11 मूसाना नियमता अनुसार वरोर याजक लेवि वंशतोर पहाजे। लेवि वंशतोर याजक लोकुरा द्वारा परमेस्वर इच्चाता किन्ता सबोय रितिता परिपूर्ण आतु ते अहरोना वंशतोर याजक लोकुरकताल अलग आस मलिकिसिदकना लेहका दुसरो याजक वायानाता जरुरिय हिले आसि। 12 बाक्याकि याजकना रिति बदले किन्तोर ते अदेना बारेता नियम वने बदलेमायाना जरुरि मन्ता। 13 बाक्याकि इव सबोय पोल्लो बोना बारेते इन्तोर ओर दुसरो वंशतोर आन्दुर। ओद वंशतिगाडाल बोरे इदेकवनाह मन्डिलिता बलि वेदिता सेवा बसकेय केवोर। 14 बाक्याकि मावोर प्रबु यहुदाना वंशताल जनम आतुर इन्जोर स्पष्ट मन्ता अनि ओद वंशता याजक लोकुरा बारेते मूसाल बाराय इनोर। 15-16 ओर आपुना वंशता नियमता अनुसार आयो, मति नाश आयो ओद जिवनता लावता अनुसार याजक आतोर वरोर दुसरो याजक ओर मलिकिसिदक लेहका उत्पन्न आयवाल मन्तोर ते इदेना सबुत असा वने पकाय स्पष्ट रुपते प्रगट आन्ता। 17 बाक्याकि “निमा मलिकिसिदकना लेहका सबोय काळदे याजक मन्तोन” इन्जोर ओना बारेते पवित्र पुस्तकतिगा गवाहि हिस मतोर। 18 पहलेटा नियम कमजोर अनि व्यर्थ मता इन्जोर इदेक अदेन रद्द कितुर। 19 बाक्याकि मूसाना नियमता द्वारा बोरे मानेय परमेस्वरना मुने परिपूर्ण आय परो आतुर। इन्जोर अदेनताल पकाय हजोर अनि माक परमेस्वरना हेरे हन्दिला परान्तोरोम उन्दि आशा मन्जे येसु मसिना विस्वासता द्वारा पुटता मुक्ति अदेना जागाते सुरुवात कितुर। 20 अनि सबोयताल खास पोल्लो मसिन याजक आस निवळे कियाना बेरा परमेस्वर शपथ येतितुर इन्जोर मन्ता। मति लेविना याजक लोकुरकुन बिना शपथते आपुना पद येतितुर। 21 मति येसु उन्दि शपथते याजक बनेमास मतोर, परमेस्वर ओन इतुर: “प्रबु शपथ येतितोर ओर आपुना मन्दुन बसकेय बदले केवोर आयनुर, ‘निमा सबोय काळतोर याजक मन्तोन’ ” 22 इद शपथता कारण परमेस्वरताल आपुना लोकुरक साटि किता सबोयता हजोर करारता हमि येसु मन्तोर इन्जोर तोहान्तोर। 23 इदाम याजक बनेमातोर मतोरक मानेय मतोर इन्जोर ओरक हास मतोरक। इन्जोर ओरकुन ओरा पदतिगा दरोज मन्दिला परो आतुरक। इदाम पकाय याजक लोकुरक वातुरक। 24 मति येसु सबोय काळदे जिवित मन्तोर इद कारणते बसकेय नाश आयो आयार इदाम याजक पद ओर येतितुर। 25 इन्जोर येसुना द्वारा परमेस्वरना हेरे वान्तोर लोकुरक साटि विनन्ति कियान ओर सबोय काळदे जिवित मन्तोर इन्जोर येसु ओरकुन परिपूर्ण आस पिसिला परान्तोर। 26 इदामे ओर हजोर याजक मन्जे येसु मसि मावा जरुरितुन पुरा किया परान्तोर। ओर पवित्र मन्तोर, ओर बोदे दोष या पाप केवोर, अनि पापि लोकुराल अलग मतोर अनि ओर स्वरगताल वने पोरो ताहतोर मन्तोर। 27 अनि लेवि वंशता हजोर याजक लोकुरक मुने आपुना पापतुन अनि पजा लोकुरा पाप साटि दरोज बलि हियाना लेहका ओन जरुरि हिले। बाक्याकि ओर ओरा पाप साटि आपुनतुन बलि हिस सबोय काळ साटि उन्दिय बेराते बलि आतुर। 28 खरोय, मूसाना नियम पापता अधिन मतोरक लोकुरकुन हजोर याजक आस आचान्तोर। ओरक आपुना जिवनते परिपूर्ण हिले आस मतोरक। मति मूसाना नियमता पजा परमेस्वर शपथतासंग उन्दि वाचा हितुर। अनि ओद वाचा ते हजोर याजकना रुपते परमेस्वर आपुना मरिन निवळे कितुर। ओर मरि सबोय काळ साटि परिपूर्ण बनेमातुर। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.