यहुदि 6 - Muria Far Western

पिसानाता सोबाय गुण आपुना जिवाते तोहाट

¹ इन्जोर खराब बुतोताल पस्तेमास परमेस्वरनिगा विस्वास कियाना,

² अनि बपतिस्मांग अनि लोकुरा तलातिगा कय इराना कार्यक्रम अनि हातोर लोकुरा असा जिवेमायाना अनि लोकुरकुन अनन्त काळ साटि मन्ता न्याय कियाना इदाम पोल्लो वरोर मसि विस्वासिना विस्वासता सुरुवातिगा करियला पहाजे उपदेश मन्ता। ओद उपदेश निमाट असा असा करियमाकिर। मति मसि विस्वासता पकाय गहरायता दुसरो पोल्लोंग करिस विस्वासतिगा पका आयाना कोसिस किस मुने दाकाट।

³ अनि परमेस्वर परवांगि हियाकि ते माक अदामे मुने दाकाट।

^4-6 उन्दि बेरा परमेस्वरना पोल्लोता वेळिचि पुटिहच परमेस्वरना वरदानता बारेते अनुभव किस पवित्र आत्मातासंग संगत आस परमेस्वरना सोबाय पोल्लोता भलायि अनि वायवाल काळदा पुनाल दुनिया लावक अनुभव कितोरक ओर लोकुरक मसिना विस्वास तासिस मलस दान्तोरक ते ओरकुन पस्तेमायान साटि असा मलस तता परोम। बाक्याकि ओरा बुतोंग परमेस्वरना मरिन असा कुरुस पोरो अन्जहिच हव्काना लेहकाय मन्ता अनि सबोय लोकुरक ओन निन्दा कियाना कारण आतोरक।

⁷ बाक्याकि ओर लोकुरक जागा पोरो पकाय पिर अरान्ता जागा लेहका मन्तोरक। पकाय पिर अरान्ता ओद जागा येर उन्ड उन्ड लोकुरक अगा बुतो किस विजा वीतान्तोरक अनि ओरक बुतो किता मालकान साटि फसल उपजे किन्ता ओद जागा परमेस्वरताल आशिष पुटहान्ता।

⁸ मति ओद जागा काटापोदेलांग उपजे किन्ता ते ओद जागा बेकार मन्ता। अनि परमेस्वरताल अदेन सराप पुटाना सन्दि मन्ता अनि आकरि किसते अदेना नाश आयार।

⁹ मति हे प्रिय लोकुरक, माक इदाम इन्तोरोम ते वने मसिना विस्वासता द्वारा पिसता लोकुरा सोबाय गुण मियागा मन्ता इन्जोर खरोय विस्वास किन्तोरोम।

¹⁰ बाक्याकि परमेस्वर मिया बुतो अनि निमाट पवित्र लोकुरा साटि किता अनि इदेक वने कियाला आतोरिट सेवाते परमेस्वर साटि निमाट तोहता मया मरंगान साटि परमेस्वर अचोन अन्यायि हिलेर।

¹¹ मति मियागडाल वरोर वरोर मानेय मिकुन खरोय पुटानुर इदाम विस्वास किन्ता ओद पोल्लो पुरा आयानावनाह इदामे पकाय कोसिस किसोर मनिर इदाम माक इच्चा किन्तोरोम।

¹² इदाम निमाट आळसि आयोर आस विस्वास अनि पोसोरिंग सहेन किस मन्दानाते परमेस्वरना वाचाता वारिस मन्तोरक ओर लोकुरा लेहका आम्ट इन्जोर माक विचार किन्तोरोम।

परमेस्वरना बसकेय नाश आयो ओद प्रतिज्ञा

^13-14 अनि परमेस्वर अब्रहामिन वाचा हियाना बेरा शपथ येतान साटि बोरे आपुनताल हजोर हिलेर इन्जोर “नना खरोय निकुन पकाय आशिष हियाका, अनि निया सन्तानतुन विळिहका” इदाम ओर आपुनाय पोरोयते शपथ येतस इतुर।

¹⁵ अनि इदे रितिते अब्रहाम पोसोरिंग सहेनकिस परमेस्वर प्रतिज्ञा किता पोल्लो येतितुर।

¹⁶ मानेय ते आपुनताल हजोना पोरोयते शपथ येतान्तोर अनि ओरा उन्दि उन्दि विवाद शपथते पका किन्तोर। इदाम विवाद बन्द किन्तोर।

¹⁷ इन्जोर परमेस्वर शपथ येतितोर। ओद सपता द्वारा परमेस्वर आपुना योजनातुन बसकेय बदले केवोर आयनुर अनि ओर अदेन कियानुर इन्जोर परमेस्वरना वाचा पुटतोर लोकुरक साटि पका किस वेहाना इच्चा किन्दुर।

¹⁸ ते इगा रन्ड पोल्लोंग मन्तांग मन्जे ओना वाचा अनि ओना शपथ ओव बसकेय बदले मायपरोंग अनि अवेहना बारेते परमेस्वर बसकेय खोटाल वळक परोर। इन्जोर परमेस्वरना हेरे भरोसा पुटहान साटि वातोरोम माकुन येसु मसिना द्वारा जरुर पुटान्ता इदाम विस्वास किन्ता पिसहानातुन हर हुळसोर मजबुतते मन्दाना कोसिस किन्तोर माकुन ओद रन्डास पोल्लोंग अर्थ परमेस्वरना वाचा अनि शपथ पकाय प्रोत्साहन हिन्ता।

^19-20 उन्दि जहाज समुद्रतिगा हन्दानपा कचिता वजन समुद्रतिगा वाटस जहाजतुन स्थिर किन्तोरक अदाम येसु मसिनिगा मन्ता ओद आशाता द्वारा मावा जिवाता सबोय पकाय तकलिपतिगा मावा जिवा विस्वासते स्थिर मन्दाना मदत किन्ता। येसु मसिनिगा मन्ता मावा आशा स्थिर अनि दृढ मन्ता। येसु मावाकेडाल मलिकिसिदकना लेहका दरोज साटि हजोर याजक बनेमास मावा मुने मावा साटि स्वरगतिगा हतुर। ओर परमेस्वरना हेरे हतुर। माक विस्वासता कारण पिसिहतोर इन्जोर स्वरगता ओद जागातिगा हन्दिला परान्तोरोम इदाम पका विस्वास मन्ता।