यहुदि 5 - Muria Far Western

परमेस्वर मसिन मावोर हजोर याजक आस निवळे किन्तोर

¹ वरोर हजोर याजक यहुदि लोकुरकनिगाडाल लोकुरक साटि परमेस्वर निवळे किन्तोर मन्तोर। अनि ओर हजोर याजक लोकुरा पापता मापि साटि परमेस्वरना मुने दान अनि बलि हियाला साटि मन्तोर।

² बाक्याकि ओर वने आपुनास कमजोरिते कारण पाप किन्तोर मन्तोर। इन्जोर गलति किन्तोर इदाम आपुनास पुनोर आस पाप केवालोरक अनि पाप किस भटकेमान्तोर सबोयि लोकुरासंग दयाते व्यवहार किया परान्तोर।

³ इन्जोर ओन आपुना पाप साटि अनि अदामे लोकुरा पाप साटि वने बलि हियाला पहाजे।

⁴ आपुना इच्चाता अनुसार बोने हजोर याजक बनेकियाला परोर। मति हारुनिन लेहका बोन परमेस्वर आचान्तोर ओरकुनेय ओद पद पुटान्ता।

⁵ अदामे मसि वने हजोर याजकना पथता हजोरपण आपुनास येतोर, मति केवल परमेस्वर मसिन महायाजक आस निवळे कितुर, “निमा नावोर मरि आन्दि, नेन्ड ननाय निया बाबाल आताल” इदाम परमेस्वर इतुर इन्जोर पवित्र पुस्तकतिगा कोटता मन्ता।

⁶ ओर पवित्र पुस्तकता दुसरो भागतिगा वने “निमा मेलिकिसिदकना लेहका अनन्त काळ साटि याजक मन्तोन” इन्जोर परमेस्वर मसिन इतोर।

⁷ येसु दरतितिगा जिवन जिवेमायाना काळदे ओन हायानाताल पिसिहला परन्दुर ओर परमेस्वरनिके पकाय जोरदे केयस अनि किलस प्रार्थना अनि विनन्ति कितुर। अनि ओना नम्रता अनि सोपे कियानाता कारण ओना प्रार्थनातुन उत्तर पुटतुर।

⁸ ओर परमेस्वरनोर मरि मतोर ते वने पकाय तकलिप सहन किस आग्या मानेमायाना करियतुर।

⁹ इदाम ओर सबोय रितिते परिपूर्ण आतुर, अदेनते ओना आग्या मानेमायवाल मन्तोर सबोय लोकुरकुन अनन्त काळ साटि पिसहानाता कारण आतुर।

¹⁰ बाक्याकि मेलिकिसिदकना रितिता अनुसार हजोर याजकना पद परमेस्वरनिकेडाल येसुन पुटतु।

मिया विस्वासतिगा पका आम्ट

¹¹ मलिकिसिदकना बारेते पकाय पोल्लोंग वेहाना मन्तांग मति निमाट समजेमायान साटि पकाय मन्द आतोरिट इन्जोर ओव पोल्लोंग मिकुन समजे किस हियाना कठिन मन्तांग।

¹² इचोन काळ निमाट विस्वासते मन्तोरिट इन्जोर परमेस्वरना पोल्लो करिहवाल आयिला पहाजे आस मता। मति मिकुन ते इदेक वने वरोर पुनाल विस्वासिना लेहका परमेस्वरना पहलेटा उपदेश असा वने मिकुन करिहलाय दुसरो वरोर मानेयना जरुरि मन्ता। मिकुन इदेक हजोर जेवन आयो मति पाले पहाजे।

¹³ केवल पाल उन्डवालोर सबोय लोकुरक खरोय अनि खराब पोल्लोतुन पुनोरक, बाक्याकि ओरक इदेकवनाह बालक मन्तोरक।

¹⁴ मति हजोर जेवन हजोर लोकुरक साटि मन्ता बाक्याकि ओरक आपुना अनुभवते खरोय अनि खराबतुन पुन्दाना करियतोरक मन्तोरक।