यहुदि 4 - Muria Far Western

परमेस्वरना लोकुरक साटि आराम

¹ इन्जोर परमेस्वरना आराम माकुन पुटाना वाचा इदेकवनाह मन्ता ते मियागडाल बोरे मानेय ओद वाचा पुटहोर आतुर इदाम आयमाकि इन्जोर माक हुशयार मन्ट।

² पहलेटा लोकुरक सोबाता पोल्लो केन्जिहतोरक ओदेय सोबाता पोल्लो माकुन वने केन्जिहतोरोम। मति सोबाता पोल्लो ओरक केन्जतुरक असके ओद सोबाता पोल्लोतुन विस्वासते केन्जोरक आतुरक इन्जोर ओरकुन बाताले फायदा आयो आतु।

³ मति परमेस्वर वेहता पोल्लो विस्वास कितोम माकेय परमेस्वरना ओद आराम पुटार। दुनिया बनेकितोर असकेय परमेस्वरना इद आराम वने तयारि कितोर मति ओर इतोर: “ ‘नना ओरा साटि तयारि किता आराम ओरकुन पुटो आयनुरक’ इन्जोर नना नावा होंगदे सपथ तितान”

⁴ “परमेस्वर सातवो दिया आपुना सबोय बेनेकियानाता बुतोंग मारिहच आराम कितुर” इदाम सातवो दियाता बारेते पवित्र पुस्तकतिगा कोटता मन्ता इन्जोर परमेस्वरना आराम पहलेटाले तयारि कितोर मन्तोर इदाम माक इदेना द्वारा पुन्तोरोम।

⁵ “नना ओरा साटि तयारि किता आराम ओरकुन पुटो आयनुरक” इन्जोर परमेस्वर मुनेटालेय इतोर।

⁶ मुने सोबाता पोल्लो केन्जतोरक अदेन मानेमायोर आतुरक इन्जोर ओर लोकुरक परमेस्वरना आराम पुटो आतुरक। मति दुसरो हुचुलोर लोकुरक असा वने परमेस्वरना आराम पुटाना सन्दि पका मन्ता।

⁷ इन्जोर परमेस्वर उन्दि दुसरो बेरांग ठहरे कितुर अनि ओद दुसरो बेरा मन्जे “नेन्ड” मन्ता। नना पहले इतोना लेहका, परमेस्वर दावुद राजाना द्वारा पकाय वरसांग पजा इदाम चेतावनि हिन्तोर “नेन्ड निमाट ओना पोल्लो ध्यान किस केन्जकिट ते बचोन सोबाय मता! मिया मन परमेस्वरना विरुद कटोर केमाट।”

⁸ अनि जोशुवा पकाय वरसांग मुने यहुदि लोकुरकुन आरामता जागातिगा ओतुर मति अगा ओरकुन खरोय आराम पुटस मनेर ते परमेस्वर पजा बोदे दुसरो दिया पुटाना आरामता बारेते वेहोर आस मनेर।

^9-10 परमेस्वर सबोय बेनेहकियानाता आपुना बुतोंग पुरा किस आराम कितुर अदामे लेहका आपुना बुतोंग पुराकितोर ओर परमेस्वरना लोकुरकुन साटि उन्दि खास आरामता अनुभव पिसता मन्ता।

¹¹ परमेस्वरना आग्या मानेमायोर ओद कारणते परमेस्वरना आरामतिगा हन्दिला परोर आतुरक इन्जोर माक परमेस्वरना आरामतिगा हन्दान साटि सबोय रितिते कोसिस केविट।

¹² परमेस्वरना पोल्लो जिवित अनि लाववाले मन्ता। ओद बोदायि रन्ड धारवाले तलवारताल वने पकाय होळता मन्ता। ओद मावा आत्मा अनि जिवा, अनि पळेकाना जोळक अनि पळेकाना लोपा मन्ता मज्जाताल वने आरपार पसियस दान्ता। अनि ओद मन्दा इच्चा अनि विचारतुन समजेमान्तोर।

¹³ अनि ओना मुने बोदे सृष्टिंग मकस मनो। सबोय चिज ओनांग कोन्डांग मुने खुलो अनि स्पष्ट मन्तांग। माक इद दुनियातिगा बदाम जिवेमातोम इन्जोर ओना मुने माक वेहिला पहाजे।

येसु महान हजोर याजक

¹⁴ स्वरगतिगा हतोर ओर वरोर महान हजोर याजक मन्जे परमेस्वरनोर मरि येसु स्वरगतिगा परमेस्वरना मुने मावा साटि मन्तोर इन्जोर माक विस्वास किन्तोरोम इदाम वेहान्ता ओद विस्वास बसकेय तासिमाट।

¹⁵ मावासंग मन्तोर हजोर याजक मावोर कमजोरितिगांग पका मावासंगे मन्जुन माकुन मदत किन्तोर। ओर मावा लेहकाय पाप कियान साटि सबोय रितिते परिक्षा आतोर मन्तोर ते वने ओर बसकेय पाप केवोर।

¹⁶ इन्जोर जरुरिता बेरा मावागा दया अनि मदत पुटि इन्जोर हिमते माक दयाकेवाल परमेस्वरना सिंहासनता हेरे दाकाट।