यहुदि 3 - Muria Far Western

येसु मूसाताल वने हजोर मन्तोर

¹ ओद कारणते, परमेस्वर संगे केयतोर पवित्र लोकुरक हे बायि-दादालोरक, ओर परमेस्वरना खास राजदूत अनि माक वेहान्तोरोम मावा विस्वासता हजोर याजक मन्तोर ओर येसुनाय बारेते निमाट पकाय ध्यान किम्ट।

² मूसा परमेस्वरना मुने परमेस्वरना लोन इदाम माक केयान्तरोम ओद सबोय यहुदि लोकुरकुन सेवा कियानातिगा विस्वासयोग्य मतोर, अदामे येसुन खास राजदूत अनि हजोर याजक आस निवळे कितुर ओर परमेस्वरना मुने येसु विस्वासयोग्य मतोर।

³ लोताल लोन बनेह केवालिन पकाय मान मन्ता अदामे येसुन मूसाताल पकाय मानता योग्य ठहरे मातुर।

⁴ बाक्याकि बोदे लोतुन बनेह केवाल वरोर पहाजे, मति सबोयतुन बनेहकेवाल परमेस्वरेय आन्दुर।

⁵ भविष्यते परमेस्वर इन्तोर ओव पोल्लोता बारेते ओर लोकुरकुन वेहचुन मूसाल परमेस्वरना लोन इदाम माक केयान्तरोम ओरक सबोय यहुदि लोकुरकुन सेवाकियानाते विस्वास योग्य मतोर।

⁶ मति मसि ते परमेस्वरना लोन इदाम माक केयान्तरोम ओद सबोय परमेस्वरनोर लोकुरा पोरो ओर वरोर मरिना रुपते विस्वास योग्य मन्तोर। माक परमेस्वरना वाचाता पका आशातिगा स्थिर मन्दाना अनि येसुना विस्वासतिगा मजबुते मनकाट ते माकेय परमेस्वरना लोन इदाम माक केयान्तरोम ओर परमेस्वरनोर लोकुरक मन्तोरोम।

विस्वास केवोर ओरा बारेते चेतावनि

⁷ इन्जोर पवित्र पुस्तकतिगा पवित्र आत्मा इदाम इन्तोर: “नेन्ड निमाट ओना पोल्लो ध्यानकिस केन्जकिट।

⁸ वारु पल्लातिगा इस्रायेल लोकुरकुन परिक्षा बेरातिगा परमेस्वरिन विरोदते होंग कितुरक अदाम लेहका मिया मन परमेस्वरना विरुद कटोर केमाट।

⁹ अगा मियोर बाबो-दादिलोरक नावा विरुद बाताल बाताल कियाकि इदाम नाकुन पकाय परिक्षा किसोर मतोरक। अनि च्याळिस वरसांगवनाह ओरा साटि नावा बुतोंग हुळतुरक ते वने नावा परिक्षा कितुरक।

¹⁰ इन्जोर नना ओद बेराता लोकुरकताल होंग मतोना, अनि ‘ओरक नावा हरितुन पुनोरक अनि येरक लोकुरा मन दरोज भटकेमासोर मन्तांग’ इन्जोर नना इतान।

¹¹ ‘नना ओरा साटि तयारि किता आराम ओरकुन पुटो आयनुरक’ इन्जोर नना नावा होंगदे शपथ तितान।” इदाम पवित्र पुस्तकतिगा पवित्र आत्मा इन्तोर।

¹² हे बायि-दादालोरक, जिवित परमेस्वरताल मियागा बोरे परमेस्वरनिगा विस्वास केवो इदाम दुष्ट मन्दा कारण परमेस्वरताल बोरे लक आयमाकिर इन्जोर निमाट सावदान मन्ट।

¹³ मति मियागडाल बोरे लोकुरकुन पापताल मोहनिकिस मिया मन कटोर केमाकिर इन्जोर “नेन्ड” इदाम बोद दियावनाह इन्तोर अचोवनाह सबोय दियांग वरोन दुसरोन सहारेह किसोर मन्ट।

¹⁴ बाक्याकि माक येसुनिगा विस्वास किता केवल ओद पहलेटा दियातांग विस्वासतिगा आपुना जिवाता आकरिवनाह मजबुते मनकाट ते माक मसिना सहभागि आसोर मनकाट।

¹⁵ “नेन्ड निमाट ओना पोल्लो ध्यान किस केन्जकिट। इस्रायेल लोकुरक परमेस्वरिन विरोदते होंग कितुरक अदाम लेहका मिया मन परमेस्वरना विरुद कटोर केमाट” इदाम पवित्र पुस्तकतिगा कोटतोर मन्ता।

¹⁶ बोरक लोकुरक परमेस्वरना पोल्लो केन्जुन पकाय विरोद कितुरक? मूसाना द्वारा मिस्रि देशताल पसिहस मतोरक ओरक सबोय लोकुरक ओरे मन्तोरक।

¹⁷ अनि चाळिस वरसांगवनाह बोर परमेस्वरतुन होंग किहितोरक बहे? पाप किन्दुर ओरक सबोय लोकुरक मन्तोरक। पाप कितुरक ओर लोकुरक वारु पल्लातिगा हातुरक।

¹⁸ अनि “नना निया साटि तयारि किता आराम ओरकुन पुटो आयार” इदाम परमेस्वर शपथ येतितुर। ओद पोल्लो परमेस्वरतुन मानेमायोर ओर लोकुरा बारेते मन्ता।

¹⁹ इदाम ओर लोकुरकुन परमेस्वर हिता आराम ओरा अविस्वासता कारणते ओरकुन पुटो आतु इदाम माक हुळान्तोरोम।