यहुदि 2 - Muria Far Western

परमेस्वरना पिसानाता पोल्लो तासमा इदाम चेतावनि

¹ इन्जोर माक केन्जतोम ओव खरोय पोल्लोताल हुस्तोय हुस्तोय भटकेमायो आयकोम इन्जोर माक केन्जता ओव पोल्लोतिगा पकाय ध्यान हियाला पहाजे।

² बाक्याकि स्वरगदूतकना द्वारा मावोर आजि-दादि लोकुरकुन परमेस्वर वेहच मतोर अव पोल्लो पालन कियाना जरुर मन्तांग, अनि ओद नियमतुन पालन केवोर आस मतोरक लोकुरकुन ओरा गलतिता अनुसार दन्ड पुटतु।

³ ते हुळाट, परमेस्वर लोकुरकुन पिसहान्तोर इदाम पकाय हजोर पोल्लोतुन माक ध्यान हेवोम आतोम ते परमेस्वरना वायवाल मन्ता ओद दन्डताल माक बसकेय पिसोम आयकोम। इद पिसहानाता पोल्लो मुने प्रबुये वेहतुर। अनि प्रबुनिकेडाल केन्जतुरक ओर लोकुरक इद पोल्लो खरोय मन्ता इन्जोर तोहच हितोरक।

⁴ अनि परमेस्वर वने चिन्हांग, अनि अत्भुत बुतोंग अनि अलग अलग प्रकारता लावता बुतोते अनि आपुना इच्चाता अनुसार पवित्र आत्माता वरदानकुन तुसानाता द्वारा पिसानाता पोल्लो वेहवालोरा ओव पोल्लोतुन परमेस्वर पका कितुर।

माकुन पिसहान साटि येसु माने आस वातुर

⁵ माक वळकिला आतोरोम ओद वायवाल दुनियातुन परमेस्वर स्वरगदूतकना अधिन केवोर आतुर।

⁶ मति पवित्र पुस्तकतिगा इदाम कोटता मन्ता: “हे प्रबु, निमा मानेयना बारेते इचोन पकाय चिन्ता किन्तोन इन्जोर नना आश्चरय किन्तोना। या मानेयतोर मरिना बारेते निमा चिन्ता कियान साटि ओरक अचोन हजोर मन्तोरक बहे?

⁷ निमा हुडुक बेरा साटि ओन स्वरगदूतकना अदिकारताल हुडुक कमि किति, निमा ओन उन्दि राजाल लेहका आदर अनि अदिकार हिति।

⁸ निमा सबोय ओना काल्क अडिय किति, परमेस्वर सबोय ओना अदिकारतिगा इरतुर”, पवित्र पुस्तकतिगा इदाम कोटता मन्ता अनि बोदे पोल्लो ओना अदिकारतिगा इरान साटि परमेस्वर मरंगोर आतुर। मति इदेक सबोय चिजतुन ओना अदिकारते माक हुळोम।

⁹ माक येसुना बारेते पुन्तोरोम, ओर येसु दरतितिगा मन्दानपा परमेस्वर ओन स्वरगदूतकताल वने हुडुन्सा हुडलोर बनेहकितुर। ओर सबोय लोकुरक साटि सहेनकिस हातुर इन्जोर ओन राजाल लेहका हजोरपण अनि आदर हितुर। परमेस्वर मावा साटि पकाय दयालु मतोर इन्जोर इदाम येसुना बारेते आतु।

¹⁰ बाक्याकि परमेस्वर सबोय चिजतुन आपुना लावते बनेहकितुर अनि सबोय चिजक ओना साटि मन्जोर मन्तांग। मावा साटि सहेनकिस हायानाता द्वारा येसुन सबोय पोल्लोतिगा परिपूर्ण बनेकियाना ओर परमेस्वर साटि उचित मतोर। इन्जोर पकाय बालकुन आपुना महिमाता सहभागि आस परमेस्वर ततुर। अनि येसुये पिसानाता उन्दि हरि बनेहकितुर।

¹¹ येसु लोकुरकुन पवित्र बनेकिन्तोर अनि ओर अनि ओना द्वारा पवित्र आतोर सबोय लोकुरक उन्दिय लोतोर मन्तोर इन्जोर पवित्र आतोर ओर लोकुरकुन हेलाळ-दादा इन्दिलाय येसु गिरिदा किन्तोर।

¹² “नना निया पोरोय नावोर बायि-दादालोरकुन वेहका, ओरा सभातिगा नना निया स्तुतिता पाटांग ओयिका” इन्जोर ओर इन्तोर।

¹³ अनि “नना नावा भरोसा परमेस्वरनिगा इरका” अनि “इगा नना अनि परमेस्वर नाकुन हिता बालक मन्तोरोम” इन्जोर वने ओर असा पवित्र पुस्तकता दुसरो भागतिगा इन्तोर।

¹⁴ परमेस्वरना बालक मानेयक मन्तोरक इन्जोर परमेस्वरनोर मरि वने आपुनतुन अदामे कितुर। येसु मानेय आस वातुर इन्जोर हायानाता कारण मन्ता ओर सयतानतुन येसु आपुना हायानाता द्वारा हारे कितुर।

¹⁵ अनि जिवित मेन्ड हायानाता वरेता कारण गुलाम लेहका मन्ज मतोर सबोय लोकुरकुन लेहचितुर।

¹⁶ बाक्याकि खरोय ओर ते स्वरगदूतकुन मदत कियान साटि आयो मति अब्रहामना वारिसतुन मदत कियान साटि ओर वातुर।

¹⁷ इन्जोर लोकुरकुन ओरा पापताल मापि पुटहान साटि परमेस्वरना सेवातिगा दया केवाल अनि विस्वासयोग्य मन्तोर हजोर याजक आस पापता मापि साटि बलि हिया परिर इन्जोर मावा लेहका येसु सबोय रितिते खरोय मानेय बनेहकियाना जरुरि मता।

¹⁸ ओर वने सयताना कारण पकाय तकलिपतुन सहेन कितुर अनि खराब बुतोंग कियान साटि परिक्षा येतिहतुर इन्जोर परिक्षा वान्ता ओनोर बायि-दादालोरकुन ओर मदत किया परान्तोर।