यहुदि 13 - Muria Far Western

मसि जिवन जिवेमायाना निरदेश

¹ निमाट मसिना कारण बायि-दादालोरक आन्तोरिट इन्जोर वरोन दुसरोन आपुना बायि-दादालोरक लेहका मया किसोर मन्ट।

² मसि विस्वासि लोकुरकुन मिया लोतिगा स्वागत किस ओरकुन पाहुणचार कियाना मरिंगमाट। बाक्याकि इदेना द्वारा पकाय लोकुरक स्वरगदूतकुन वने पुनवाय ओरा पाहुणचार कितोरक।

³ मसि विस्वासता कारणते जेहलतिगा मन्तोर लोकुरकुन मरिंगमाट। निमाट वने ओरासंग कयदि मन्तोरिट इदाम लेहका समजेमास ओरकुन मदत किम्ट। अनि मिया जिवनते वने पकाय तकलिप आता इन्जोर पकाय तकलिपतिगा मन्तोर लोकुरकुन वने सोबाय मदत किम्ट।

⁴ सबोय लोकुरक मरमिंग आदरता पोल्लो समजेमायिला पहाजे। अनि मरमिंग आतोरक लोकुरक आपुना मुजो या मुत्तेन तासिस दुसरो आळ या मानेयतासंग हुन्जमाट। बाक्याकि परमेस्वर व्यभिचारिंग लोकुरकुन अनि मरमिंग आतेक पजा दुसरो आळ या मानेयनासंग हुन्जवालोर अनि मरमिंगना मुने इदाम गलति केवालोरकुन वने परमेस्वर न्याय कियानुर।

⁵ मिया जिवनते धनता लालुचताल लक मन्ट अनि मिया हेरे बाताल मन्ता अदेनिगाय संतुष्ट मन्ट बाक्याकि “नना निकुन बसकेय विळचिवोन अनि बसकेय तासिवोन आयका” इन्जोर परमेस्वर इतोर।

⁶ इन्जोर “प्रबु नावा मदत केवाल मन्तोर, नना वरियोन आयका, मानेय नाकुन बाताल किया परान्तोर?” इन्जोर माक हिमतते इन्तोरोम।

⁷ मिकुन परमेस्वरना पोल्लो करिहतोर मियोर मुक्याल लोकुरकुन आल्हाट। अनि ओरक बदाम आपुना जिवनता आकरिवनाह परमेस्वरना विस्वासते मन्जोर मतोरक इन्जोर ध्यान किस ओरा विस्वासता अनुकरण किम्ट।

⁸ येसु मसि निनेय अनि नेन्ड अनि सबोय काळदे वरोरे मन्तोर, ओर बसकेय बदले मायोर।

⁹ प्रबु येसुना बारेता खरोय पोल्लोताल भटकेकिन्ता अलग अलग रितिता सबोय पुनाल करहानाते बहके मायमाट। पालन केवालोर लोकुरकुन बोदे फायदाते हिले जेवनता बारेता नियमते आयो मति परमेस्वरना दयातिगा मन स्थिर कियाना उचित मन्ता।

¹⁰ मावा साटि उन्दि वेदि मन्ता; अनि यहुदि लोकुरा पवित्र तम्बुतिगा सेवा किन्तोरक यहुदि याजक लोकुरकुन मावा इद वेदिताल तिन्दाना अदिकार हिले।

¹¹ बाक्याकि हजोर याजक लोकुरा पापता मापि साटि बलि हियाना जानवरता नतुर पवित्र जागातिगा ओन्तोर ओद जानवरता मेन्दुल पवित्र जागाता बाहरो बोळसान्तोर।

¹² इदे कारणते येसु वने आपुनाय नतुरता द्वारा लोकुरकुन पवित्र कियान साटि आचुन येरुसलेम सहेरता बाहरो पकाय तकलिपतुन सहन कितुर।

¹³ ते वराट माक वने ओर सहन किस मतोर ओद अपमानतुन सहन किस यहुदि लोकुरा रिति रिवाजता बाहरो येसुना हेरे दाकाट।

¹⁴ बाक्याकि इगा मावा बोदे दरोज मन्दाना सहेर हिले मति माक वायवाल उन्दि सहेरता हर हुळिला आतोरोम।

¹⁵ इन्जोर येसुना द्वारा माक परमेस्वर बचोन हजोर मन्तोर इन्जोर दरोज स्तुति कियाकाट। इद परमेस्वर साटि बलि लेहका मन्ता।

¹⁶ मति दुसरो लोकुरक साटि सोबाय बुतो किस मिया चिजतुन दुसरोनासंग तुसाना इदाम पोल्लोंग मरिंगमाट बाक्याकि परमेस्वर इदाम बलिदानते गिरिदा आन्तोर।

¹⁷ मसिलोकुरा सभाता मुक्याल लोकुरा पोल्लोतुन मानेमास ओरा अधिनते मन्ट। ओरक परमेस्वरना मुने मिया बारेता हिसाब हियाला पहाजे इन्जोर ओरक मिया साटि केपसोर मन्तोरक। ओरा आग्यातुन मानेमायकिट ते ओरा सेवा गिरदाते किया परान्तोरक। निमाट ओरकुन मानेमायवेक ते ओरक आपुना सेवा गिरिदाते केवोर आयनुरक इन्जोर मिकुन बोदे फायदा वने पुटो।

¹⁸ मावा साटि प्रार्थना किसोर मन्ट; अनि सबोय पोल्लोतिगा परमेस्वरना मुने येताना योग्य बुतो किसोर ताकाना इच्चा किन्ता उन्दि खरोय अन्तकरण माक मन्ता इदाम माक पका आतोम।

¹⁹ अनि नना सान्डेय मिया हेरे असा वाय परका इन्जोर निमाट प्रार्थना किम्ट इदाम नना विनन्ति किन्तोना।

आकरि अभिवादन

^20-21 इदेक वरोर हजोर मेहवाल लेहका मसिलोकुरा सभाता मुक्याल मन्तोर मावोर प्रबु येसुन हातोरिगाडाल असा जिवेहकितोर शान्ति हेवाल परमेस्वर अनन्त काळदा करारता नतुरते सबोय सोबाय पोल्लो हिस मिकुन परिपूर्ण केविर! अदाम येसु मसिना द्वारा मावागा बुतो किसोर मन्ता परमेस्वरना इच्चा ओना योजना अनुसार पुरा कियान साटि मिकुन मदत केवि। सबोय काळदे ओना हजोरपण आसोर मनि। आमिन।

²² हे बायि-दादालोरक, नना मिकुन पकाय कमि पोल्लोते कोटतोना इव उपदेशता पोल्लोनुंग सहन किस येताट इन्जोर नना मिकुन विनन्ति किन्तोना।

²³ मावोर तमो तिमुथियुस दन्ड भोगेमास कयदिताल बाहरो वातोर इन्जोर निमाट पुन्ट। अनि ओर सान्डेय वायनुर ते नना ओनासंग मिकुन मिलेह कियाका।

²⁴ मिया सबोय मुक्याल अनि सबोय पवित्र लोकुरकुन नमस्कार वेहाट। इट्टलि देशताल वातोर लोकुरक मिकुन नमस्कार वेहिन्तोरक।

²⁵ परमेस्वरना दया मिया सबोय लोकुरासंग मनि। आमिन।