यहुदि 12 - Muria Far Western

बाबो परमेस्वर माकुन दन्ड किस सुदरे किन्तोर

¹ विस्वासि लोकुरा इचोन पकाय दल मावा नालुंग बासा मन्ता। विस्वासता अर्थ बाताल मन्ता इन्जोर ओरा जिवनता गवाहि माकुन वेहान्तोरक। इन्जोर मावा मुने मन्ता ओद लक्षतिके माक वरोरे वितिला साटि मावा विस्वासते मुने हन्दाना साटि माकुन परके पिळंगिन्ता सबोय पोल्लोंग अनि माकुन मुने हन्दानातुन अळेहकेवाल सबोय पापतुन हरचिस मावा मुने मन्ता ओद लक्षतिके पोसोरिंग सहेनकिस वितकाट।

² अनि मावा विस्वासता कारण अनि मावा विस्वासतुन परिपूर्ण केवाल येसुये मन्तोर। इन्जोर माक ओर येसुनिके हुळसोर मुने वितिला पहाजे। ओर येसु ते भविष्य काळते ओन पुटार ओद पकाय हजोर गिरिदाता बारेते विचार किस कुरुस पोरो हायाना ओद लज्जातुन ध्यान केवोर आस हिमते ओद पकाय तकलिप सहेन किस हातुर। ओर इदाम हातुर इन्जोर ओर स्वरगतिगा परमेस्वरना सिंहासनता तिन्दान कयबासा हन्जुन पकाय हजोर आदरतिगा उदितुर।

³ इन्जोर मिया मन्दिगा निराश आस विस्वासता हिमत तासिमाट इन्जोर पापि लोकुरा कारण पकाय विरोदतुन सहन कितुर ओर येसुन आल्हाट।

⁴ पापता विरोदते मिया लळायिते इदेकवनाह निमाट हायानवनाह विरोद किस मन्विट।

⁵ “नावोर मरि, प्रबु निकुन दन्ड कियाना बेरा अदेन तिरस्कार केमा अनि मिया गलतितुन परमेस्वर सुदरे कियाना बेरा निया हिमत तासिमा।

⁶ बाक्याकि प्रबु मया किन्तोर लोकुरा गलतितुन दन्ड हिन्तोर; अनि ओर आपुना बालक बनेहकिन्तोर ओर लोकुरकुन दन्ड हिन्तोर।” इदाम आपुना बालक लेहका मिकुन परमेस्वर हिता उपदेशतुन निमाट मरंगतिट बहे?

⁷ इन्जोर ओद सबोय पकाय तकलिपतुन वरोर बाबो आपुना बालकुन दन्ड किस सुदरे कियान लेहका समजेमास सहन कियाकिट ते परमेस्वर मिकुन बालक समजेमास मियासंग व्यवहार किन्तोर। बाबो दन्ड हेवोर इदाम बालक बगा मन्तोर?

⁸ अदामे परमेस्वर मिकुन दन्ड किस सुदरे केवोर ते खरोय निमाट ओना बालक आयविट मति बाबाल बोर मन्तोर इदाम पुनोर ओर बालक लेहका मन्तोरिट।

⁹ दुनियातिगा माकुन जनमा हेवाल बाबो वने दन्ड हिन्तोर असके माक ओन मानेमास ओना आग्या पालन किसोर मतोम; ते स्वरगतिगा मन्तोर मावोर आत्मिक बाबो परमेस्वर माकुन दन्ड हियाना बेरा ओन मानेमास ओना अधिनते अनन्तकाळ साटि बचोन पकाय जिवित मन्दिला पहाजे बहे?

¹⁰ दुनियाता आपुना बाबोलोरक हुचुक दियांग साटि माकुन दन्ड किस माकुन सुदरे कितुर। ओरा विचारते माकुन सबोयताल सोबाय पोल्लो किन्तोर इन्जोर समजेमास अदाम कितोर। मति परमेस्वर माकुन दन्ड किन्तोर ओद मावा फायदा साटि अनि माक वने ओना पवित्रतातिगा सहभागि आयान साटि मन्ता।

¹¹ अनि बोरे माकुन दन्ड किस सुदरे कियाना ओद बेरा ओद गिरदाता पोल्लो आयो मति दुःखताय पोल्लो आस लागान्ता, ते वने अदेन सहन किसोर किसोर पका आतोरक सबोय लोकुरकुन शान्तितासंग परमेस्वरना मुने येताना योग्य बुतो किया परान्तोरक।

माक विस्वासते बदाम जिवेमायिला पहाजे

¹² इन्जोर ढीलो कयक अनि कमजोर मिन्डांग लेहका कमजोरिते मन्ता मिया मसि विस्वासतुन पका किम्ट।

¹³ अनि बोरे मानेय विस्वासते नाश आयो आयका इन्जोर विस्वासता खरोय हरितेय येसुन हुळस मुने हन्ट निमाट इदाम कियाकि ते ओरक वने मिया लेहका खरोय हरिते हन्दाना साटि पका विस्वासि बनेमायनुरक।

परमेस्वरतुन हरच परके हन्दाना विरुद चेतावनि

¹⁴ सबोय लोकुरासंग शान्तिते मन्दाना अनि सबोय रितिते परमेस्वरतुन सोपेकिस पवित्रता साटि कोसिस किसोर मन्ट। पवित्रताता शिवाय बोरे मानेय प्रबुना हेरे हन्दिला परोर आयनुर।

¹⁵ अनि मियागा बोरायि मानेय परमेस्वरना दया तासिस विस्वासताल परके हन्जुन होंगता पकाय हजोर जेहेर तयार आस खराब आस दुसरो लोकुरकुन वने बिगडेमायमाकिर। अनि बोरे व्यभिचारि,

¹⁶ अनि उन्दि बेराता जेवन साटि आपुना लोता हजोर पेकालना अदिकार आपुना हुळिलोर तमोन मोमतुर ओर एशवाल लेहका मियागडाल बोरे परमेस्वरना मुने येताना योग्य हिले खराब पोल्लोंग केवालोर आयमाकिर इन्जोर सबोय लोकुरक ध्यानते मनिर।

¹⁷ ओर पजा इद आशिषतुन पुटहान साटि किलस किलस इच्चा कितुर ते वने ओर अयोग्य ठहरे मातुर अनि ओन पस्तेमायाना सन्दि असा पुटो आतु इन्जोर निमाट पुन्तोरिट।

¹⁸ इदेक निमाट उन्दि पुनाल जागातिगा वातोरिट, ओद जागा सिनाय मटा लेहका आयो। परमेस्वर इस्रयेल लोकुरकुन सिनाय पोरोयता मटातिगा मावोर आजि-दादि लोकुरक साटि मूसाना कयते नियम हितुर। ओद जागा इटिलाय अनि हुळिलाय परान्तोम। ओद मटा किसते पयटे मासोर अनि पकाय आंधारता आबारते अनि दुन्दाळ वळियते जमेमान्ता इन्जोर हुळतोरक,

¹⁹ पिपारिता जोरदा लेंग अनि परमेस्वर पकाय जोरदे वळकाना लेंग ओरक केन्जतुरक। परमेस्वरना पकाय जोरदा लेंग केन्जुन “इदेक मावासंग असा बाताले वळकमाकिर” इन्जोर ओरक पकाय वरेते परमेस्वरिन विनन्ति कितुरक।

²⁰ बाक्याकि बोदे जानवर वने मटातुन इटि ते कलदे हिस हव्किर इन्जोर आग्या हिस मतोर ओद आग्यातुन ओरक सहन किया परोर आतुरक।

²¹ अनि “नना पकाय वरेते कसंगान्तोना” इन्जोर मूसाल अदेन हुळस इन्दिलाय ओद पोल्लो अचोन वरेता पोल्लो मता।

²² मति निमाट स्वरगतिगा मन्ता सिय्योन मटाता हेरे अनि जिवित परमेस्वरना सहेर मन्ता स्वरगिय येरुसलेमतिगा अनि लाख लाख स्वरगदूतकना हेरे निमाट अवतोरिट।

²³ अनि स्वरगतिगा पोरो कोटता मन्ता परमेस्वरनोर पहलेटा बालकना सभातिगा अनि सबोय लोकुरा न्याय केवाल परमेस्वर मुने अनि परमेस्वरना मुने येताना योग्य मन्तोर परिपूर्ण बेनेहमातोर लोकुरा आत्माता हेरे,

²⁴ अनि पुनाल करारतोर मध्यस्थि येसुना अनि हाबिलना नतुरताल सोबाय पोल्लोंग वेहान्तोर येसुना हिदिक्ता नतुरता हेरे माक वातोराट।

²⁵ मियासंग वळकवाल परमेस्वरिन पासकमाट मति ओना पोल्लो ध्यानते केन्जाट। बाक्याकि इद दरतितिगा मूसाना द्वारा परमेस्वर इस्रायेल लोकुरासंग वेहतुर असके ओना चेतावनितुन मानेमायोर आतुरक ओर इस्रयेल लोकुरक पिस परोर आतुरक, ते स्वरगताल चेतावनि हेवाल परमेस्वरिन मानेमायोर आयनुर ते मावा पिसाना अदेनताल वने पकाय कठिन आयार।

²⁶ ओद बेरा ओना शब्द सबोय दरतितुन होलिहतु मति इदेक ते “नना असा उन्दि बेरा केवल दरतितुने आयो मति आबारतुन वने होलिहसिका” इन्जोर ओर वाचा कितुर।

²⁷ “असा दुसरो उन्दि बेरा” इव पोल्लोंगते ओर बनेकितोर ओव सबोय पोल्लोंग बदले मायार इन्जोर सुजना किन्तोर।, बाक्याकि बसकेय होलेहमाय परो पोल्लो दरोज मन्दाना साटि मन्ता।

²⁸ इन्जोर माक बसके होलेमायो राज्यतुन पुटार इन्जोर माक धन्यवादतासंग परमेस्वरना गिरिदा साटि आपुनतुन संपुर्ण रितिते परमेस्वरना मुने सोपे किस, परमेस्वरना आदरातासंग वरे इरस ओना आरादना किम्ट।

²⁹ बाक्याकि “मावोर परमेस्वर सबोय चिजतुन भस्म केवाल किस लेहका मन्तोर” इन्जोर पुन्ट।