यहुदि 11 - Muria Far Western

परमेस्वरना लोकुरा पकाय हजोर विस्वासता नमुना

¹ विस्वासता अर्थ बाताल मन्ता? माक आशा किन्तोरोम ओद पोल्लो माकुन पुटार इन्जोर अदेना बारेता संपुर्ण निश्चय अनि माक बसकेय हुळो ओद पोल्लो खरोय मन्ता इन्जोर अदेना बारेते पका हिमतुन विस्वास इदाम इन्तोर।

² बाक्याकि इदे कारणते मावोर पुरकातोर लोकुरकनिगा परमेस्वर गिरिदा आतुर।

³ बाताले दिसान्ता ओव सबोय पोल्लो बसकेय दिसो पोल्लोताल बनेमाता इन्जोर परमेस्वर आपुना आग्याते इद सबोय ब्रंमान्डतुन बनेकितुर इदाम माक विस्वासतेय समजेमान्तोरिट।

⁴ केयिन अनि हाबेल परमेस्वरना मुने बलि हितुरक। विस्वासते हाबिल केयनताल सोबाय बलि परमेस्वर साटि हितुर। विस्वासता कारण हाबिल परमेस्वरना मुने येताना योग्य बनेमातुर। अनि परमेस्वर ओना भेटतिगा परमेस्वर गिरिदा कितुर, अनि ओर पकाय वरसांग मुने हातुर ते वने नेन्डवानाह ओनाय विस्वासताल माक वने करियलातोरोम।

⁵ विस्वासता कारण हनोकिन परमेस्वर इद दुनियाताल पोरो ताहच ओतुर। ओर बसकेय हायोर आतुर। परमेस्वर ओन ताहानाता मुने ओर परमेस्वरतुन गिरदा कितोर इन्जोर ओना बारेते गवाहि हितुर। परमेस्वर ओन ताहच मतोर इन्जोर ओर कल्योर आतुर।

⁶ विस्वास केवाय परमेस्वरना गिरदा किया परोर, बाक्याकि परमेस्वरना हेरे वायवाल परमेस्वर मन्तोर अनि ओन सबोय मन्दे समजेमायिला इच्चा किन्तोर ओर लोकुरकुन ओर प्रतिफळ हिन्तोर इन्जोर विस्वास कियालाय पहाजे।

⁷ विस्वासता कारणतेय नुहिन बसकेय हुळोर आसि ओव पोल्लोता बारेता परमेस्वर चेतावनि हिस मतोर असके परमेस्वरना आदरते आपुना लोतोरकुन पिसहान साटि उन्दि बेहरा जहाज बनेहकितुर। इन्जोर ओर आपुना विस्वासतेय इद दुनियातुन दोषि ठहरे कितुर अनि विस्वासता द्वारा परमेस्वरना मुने येताना योग्य आयाना वारिस आतुर।

⁸ विस्वासता कारणतेय अब्रहामिन मिरास पुटवाल मता ओद देशतिके हन्दान साटि परमेस्वर केयतुर असके परमेस्वरना आग्या मानेमास नना बेके हन्दिला आतोना इन्जोर ओर पुनोर आन्दुर ते वने ओद जागातिके पसियस हतुर।

⁹ विस्वासता कारणतेय ओन वाचा हिस मतोर ओद अन्जान देशतिगा अब्रहाम हन्जुन वरोर परदेशि लेहका परमेस्वर ओन हिता ओदे वाचाता वारिस मतोर इसहाक अनि याकुबनासंग तम्बुहतिगा मन्जोर मतोर।

¹⁰ अनि परमेस्वर योजना किस बनेकितोर अनि स्थिर पायवा इरस दोहता अनन्तकाळता सहेर साटि आशाते ओर हर हुळिन्दुर।

¹¹ अब्रहाम अनि सारा बालकुन पयिदे कियानाताल वने पकाय वयसतोर मतोरक अनि सारा वान्जिलिवने आस मन्दु, ते वने विस्वासता कारण वाचा केवाल परमेस्वर ओद वाचा पुरा कियानुर इन्जोर खरोय पुन्ज ओरक बालकुन जनम कियाना लाव पुटिहतुरक।

¹² इन्जोर येर मानेयिन, ओर बालकुन उत्पन्न कियाला परोर इदाम कमजोर अनि हायाना अचोन पकाय मुदियाल आस मतोर। ओनाताल आबारता हुकोंग लेहका अनि समुद्रता टकाता वारु लेहका इचोन काहिला परोर अचोन वंश जनम आतुरक।

¹³ ओरक सबोय हजोर लोकुरक हायानावनाह विस्वासतेय मन्जोर मतोरक। परमेस्वर ओरकुन वाचा किस मतोर ओद पोल्लो ओरकुन पुटो। मति भविष्य काळतिगा वायवाल मन्ता ओद पोल्लोतुन विस्वासते हुळस मन लावेकिस ओरक गिरिदा आतुरक। माक इद दरतितिगा केवल दुसरो देशतोर अनि परदेशि लोकुरक लेहका मन्तोरोम इन्जोर मानेमातुर।

¹⁴ इदाम पोल्लोंग वळकवालोरक आपुना देशतुन पळकसोर हर हुळस मन्तोरोम इदाम तोहान्तोरक।

¹⁵ अनि ओरक तासिस वास मतोरक ओद देशता बारेते असा विचार किस मनवार ते ओरकुन मलस हन्दाना सन्दि मनेर।

¹⁶ मति ओरकुन ते ओरक तासिस वास मतोरक ओद देशताल परमेस्वर आपुना लोकुरक साटि तयारि किन्तोर पकाय सोबाय मन्ता देशतुन मन्जे स्वरगतुन इच्चा किसोर हर हुळस मतोरक। इन्जोर परमेस्वर ओरा परमेस्वर इन्जोर इन्दान साटि लज्जा केवोर। परमेस्वर ओरा साटि उन्दि सहेर मन्जे स्वरग तयार कितोर।

^17-18 परमेस्वर अब्रहामिन परिक्षा किस ओना वरोर मरिन बलि हियान साटि आज्ञा हितुर। विस्वासता कारणते ओर परमेस्वरना आग्या पालन कितुर। परमेस्वर अब्रहामिन “इसहाकना द्वारा निया वंश विळार” इन्जोर मुने उन्दि वाचा हिस मतोर ते वने परमेस्वर तलकाना बेरा अब्रहाम आपुना वरोर मरिन बलि हियाला लागतुर। अब्रहामिन विस्वास मन्ता इन्जोर ओर इदाम कितुर।

¹⁹ हातोरिगाडाल वने परमेस्वर इसहाकिन असा जिवेहकिया परान्तोर इन्जोर अब्रहाम विस्वास कितुर; अनि इसहाकिन बलि हियाना परमेस्वर अब्रहामिन हेमा इतुर असके खरोयते इसहाकिन असा जिवे मास पुटता लेहका मतोर।

²⁰ वायवाल पोल्लोता बारेते मन्ता विस्वासतेय इसहाक आपुना मरक याकुब अनि एसाविन आशिष हितुर।

²¹ विस्वासतेय याकुब मुदियाल आस हायानबेरा आपुना बळगातुन टेकेमास निच ओर परमेस्वरना आरादना किस यूसुफना इवुर मरकिन आशिष हितुर।

²² यूसुफ हायवाल मतोर असके विस्वासतेय इस्रायेल लोकुरकुन मिस्रि देशताल पसियस हन्दाना बारेते वळकतुर; अनि इस्रयेल लोकुरक पकाय वरसांग पजा दुसरो देश हन्दानपा आपुना पळेकांग वने अगा ओयिला पाहाजे इन्जोर ओर विस्वासते आग्या हितुर।

²³ विस्वासता कारणतेय मूसानोर अवाल-बाबो मूसाना जनमा आतपा पजा मून्ड महिनांगवनाह मूसान मकिहिच इरतुर बाक्याकि येर नोनाल दुसरो नोनाह लेहका आयो मति वरोर खास नोनाल मन्तोर इन्जोर ओरक हुळतुर अनि ओरक राजाना आग्यातुन वरियोर आतुरक।

^24-26 विस्वासता कारणतेय मूसाल हजोर आसोर मतोर असके हुचुक समयता पापता सुख-भोगेमायानाताल परमेस्वरना लोकुरा पकाय तकलिपतिगा संगत आयाना आचतुर। परमेस्वरताल प्रतिफळ पुटाहनुर इन्जोर हजोर राजाल फिरोना पेडिना मरि इन्दान साटि पासकसुन मिस्रि देशता संपतिताल मसिना कारण अपमान सहेकियाना पकाय हजोर धन इदाम समजेमातुर।

²⁷ विस्वासता कारणतेय मूसा बोरे बसकेय दिसोर ओर परमेस्वरिन हुळस मजबुत आस आपुना लक्ष साटि स्थिरते नितितुर इन्जोर मिस्रि देशता हजोर राजाना होंगदुन वरियोर आस ओर इस्रायेल लोकुरासंग मिस्रि देशतुन तासिस पसियतुर।

²⁸ पहले जनमा आतोर सन्तानता नाश केवाल स्वरगदूत मिस्रि देशतिगा वायानपा विस्वासता कारणतेय ओर इस्रायेलना पहले सन्तानतुन कय इटमाकिर इन्जोर पसहा हनुम अनि नतुर हिदकाना रिवाजतुन मानेमातुर।

²⁹ विस्वासता कारणतेय मूसा अनि इस्रयेल लोकुरक वतिता जागाताल रयान्तोर अदाम रेंगाल समुद्र पोरोयता समुद्रता होदपाकाळ ताकसोर हतुर। अनि मिस्रि देशतोर लोकुरक अदामे कियाना कोसिस कितुर असके ओरक सबोय लोकुरक समुद्रतिगा मुळन्दस हातुरक।

³⁰ विस्वासता कारणतेय यरिहो सहेरता दिवालतुन इस्रयेल लोकुरक सात दियांगवनाह भोवताल वलियतुरक असके ओद दिवाल मुटतु।

³¹ राहब पोरोयता वेश्या आपुना सहेर मकिस हुळस अगडाल पोल्लो इस्रायेल लोकुरकुन वेहिला साटि इस्रायेल लोकुरक लोहतोर मानेयकुन आपुना लोतिगा येतितु अनि ओरकुन मदत कितु। अदाम विस्वासता कारणते परमेस्वरना आग्यातुन मानेमायोर आपुना सहेरता लोकुरासंग अद नाश आयो आतु।

³² नना इदेक विस्वासता बारेते उदाहरण इदेनताल पकाय असा हियाला पहाजे बहे? गिदोन, बाराक, शिमशोन, यिफतह, दावुद, शमुवेल इदाम लोकुरा बारेते अनि बाकि परमेस्वरना पोल्लो वेहवालोरा बारेते वेहान साटि नावा हेरे पकाय बेरा हिले।

³³ येरक विस्वासता द्वारा दुसरो राज्यतुन लळायि किस जिकतुरक, परमेस्वरना मुने येताना योग्य रितिते राज कितुरक, परमेस्वर प्रतिज्ञा किता पोल्लो पुटिहतुरक, निरालता टोडि बन्द कितुरक।

³⁴ पयटेमाता किसिता पकाय तेजतुन पिहतुरक, दुश्मन लोकुरक ओरकुन हव्कान साटि कोसिस कितुरक मति ओरक ओरा तलवारता धारताल पिसतुरक, कमजोरितिगा लाववाले आतुरक, लळायितिगा वीर आतुरक, दुसरो देशता सयनिक लोकुरकुन पुळसितुरक।

³⁵ आसक आपुनोर हातोरकुन असा जिवेमास पुटिहतुंग, अनि दुसरो हुचुलोर लोकुरक असा जिवेमास परमेस्वरनिकेडाल सोबाय प्रतिफळ पुटार इन्जोर आपुना पकाय तकलिपताल पिसाना इच्चा केवोर आतुरक, ओरक हायानवनाह पकाय तकलिप सहेन किसोर मतोरक।

³⁶ अनि दुसरो हुचुलोर लोकुरकुन ओरा विरोदि लोकुरक पकाय मजाक कितुरक, सोटाते हितुरक अनि साकरिते दोहच जेहलतिगा वाटस हितुरक इदाम परिक्षातुन ओरक सहेन किसोर मतोरक।

³⁷ दुसरो हुचुलोर लोकुरकुन विरोदि लोकुरक कलदे हितुरक, हुचुलोर लोकुरकुन आरिते रिचस रन्ड भाग कितुरक, तलवारते हव्कतुरक, अनि दुसरो हुचुलोर लोकुरक बेळा अनि हरेंगना तोलातुन मुचस हिके होके वलियसोर मतोरक। अनि ओरक गरिब लोकुरक मतोरक अनि ओरक पकाय तकलिप सहेन कितुरक अनि विरोदि लोकुरक पकाय खराब रितिते ओरासंग वेवहार कितुरक।

³⁸ अनि इद सन्सार ओरा योग्य हिले आसि। इन्जोर वारु पल्लातिगा अनि मटाकतिगा वलियतुरक। अनि पान्जालोपा अनि दरतिता गुमियातिगा मकस मतुरक।

³⁹ अनि येर सबोय लोकुरा विस्वासताय कारण परमेस्वर ओरिगा गिरिदा आतुर ते वने ओरकुन परमेस्वर प्रतिज्ञा किता पोल्लो पुटो आतु।

⁴⁰ परमेस्वर मावा साटि सबोयताल सोबाय पोल्लो हियाना साटि योजना कितुर इन्जोर ओरक सबोय लोकुरक केवल मावासंगे ओद वाचाता परिपूर्णता आय परान्तोरक।