यहुदि 10 - Muria Far Western

मूसाना नियमता अनुसार बलिदान अनि मसिना बलिदान

¹ बाक्याकि मूसाना नियम वायवाल सोबाय पोल्लोता प्रतिबिंब मन्ता। मति ओद खरोय पोल्लो आयो आसि। इन्जोर दरवरसांग उन्दिय रितिता बलिदान हिन्तोर ते वने ओदे बलिदानता द्वारा परमेस्वरना हेरे वायवाल लोकुरकुन परमेस्वरना इच्चाता अनुसार पुरा कियाना बसकेय आय परो आत।

² इदाम आयपरवार ते बाताल ओरा बलि हियाना वने बन्द आयो आस मन्वार बहे? बाक्याकि आरादना केवालोरक उन्दिय बेराते सबोय काळ साटि शुद्ध आस मनेरक ते आपुना पापता बारेते पजा बसकेय ओरक आपुनतुन गुन्हेगार समजेमायोर आस मनेर।

³ मति इदेक ते ओद बलिदानता द्वारा दरवरसा लोकुरकुन आपुना पापता बारेते आल्हान्तोर।

⁴ बाक्याकि कोन्दांग अनि बोकळाहना नतुर पापतुन लक किया परो।

⁵ इन्जोर मसि दुनियातिगा वायाना बेरा इदाम इतुर: “लोकुरा बलिदान अनि भेटता निमा इच्चा केवि मति नावा साटि उन्दि मेन्दुल तयार किति;

⁶ जानवरतुन बोळस पापता मापि साटि लोकुरक कितोरक ओरा होम-बलिते निमा गिरदा आयवि।

⁷ असके नना इतान, ‘हुळा, नना वातोना, पवित्र पुस्तकतिगा नावा बारेते कोटता मन्ता, बाक्याकि हे परमेस्वर निया इच्चा पुरा कियाका इन्जोर नना वान्तोना’ ” इन्जोर इन्तोर।

⁸ मूसाना नियमता अनुसार हिसोर मता मिया बलिदान अनि भेट अनि बोळसता जानवरता होम-बलि अनि पापता मापि साटि किता लोकुरा बलिता इच्चा केवि अनि अदेनते निमा गिरदा आयवि इन्जोर ओर इतोर

⁹ अनि पजा “हुळा, नना निया इच्चा पुरा कियाला वातोना” इन्जोर वेहिच ओर दुसरो पुनाल करारतुन निवळे कियान साटि पहलेटा मूसाना नियमता अनुसार बलितुन बदले कितुर।

¹⁰ परमेस्वर आपुना इच्चाता अनुसार येसु मसिना मेन्दुल दरोज साटि उन्दिय बेरा बलिदान हियानाता द्वारा परमेस्वर माकुन पवित्र कितोर।

¹¹ अनि लोकुरा पापतुन मापि बसकेय किया परो ओदे बलि असा असा हिसोर वरोर वरोर याजक दरोज सेवा किन्तोर।

¹² मति येर याजक मन्जे मसि ते पापता मापितुन सबोय काळ साटि आपुनतुन उन्दिय बलिदान हितुर अनि पजा ओर परमेस्वरना तिन्दान कयबासा हन्ज उदितुर।

¹³ अनि ओनोरक सबोय दुश्मनकुन सबोय नाश कियानावनाह ओर हर हुळिला आतोर।

¹⁴ बाक्याकि ओर आपुनतुन उन्दिय बेरा किता बलिदानता द्वारा परमेस्वर साटि लोकुरकुन पवित्र कितोर अनि ओरकुन सबोय काळ साटि परमेस्वरना मुने परिपूर्ण कितोर।

¹⁵ अनि इदेना बारेते पवित्र आत्मा वने माकुन इदे गवाहि हिन्तोर।

¹⁶ “ओव दियाना पजा नना ओरासंग कियाका ओद करार इदाम मन्ता: नना आपुना नियमतुन ओरा मन्दिगा हियाका अनि नना अदेन ओरा मन्दिगा कोटका इन्जोर प्रबु इन्तोर”

¹⁷ पजा ओर “नना ओरा पापतुन अनि ओरा खराब बुतोतुन नना बोदे कारणते आल्होन आयका” इन्जोर ओर इन्तोर।

¹⁸ अनि लोकुरा पापतुन मापि पुटता ते असा पापता मापि साटि बोदे बलिदानता जरुरि हिले आतु।

परमेस्वरना हेरे हन्ट

¹⁹ इन्जोर हे बायि-दादालोरक, मावा साटि येसु बलि आतुर इन्जोर ओना नतुरते स्वरगता सबोयताल पवित्र जागातिगा हन्दाना हिमत आता।

²⁰ बाक्याकि ओर मावा साटि तरियता पुनाल अनि जितो हरिते माक स्वरगतिगा हन्दिला परान्तोरोम। बदाम हजोर याजक सबोयताल पवित्र जागातिगा उन्दि पळदाताल हतुर अदामे स्वरगतिगा हन्दान साटि उन्दि पवित्र पळदा लेहका मन्ता जितो अनि पुनाल हरि येसुना मेन्दुलेय मन्ता।

²¹ बाक्याकि परमेस्वरना लोकुर साटि वरोर अदिकारि आस वरोर हजोर याजक मावा हेरे मन्तोर।

²² इन्जोर माक खरोय मन अनि पुरा विस्वासतासंग ओना हेरे दाकाट। अनि मसि परमेस्वरना मुने आपुनतुन बलि हितुर इन्जोर पापता मापि मन्ता। इन्जोर अन्तकरणता दोष लक किस मसिना नतुर मावा मन्दिगा हिदिक्स अनि मेन्दुलतुन शुद्ध एते नोरस परमेस्वरना हेरे दाकाट।

²³ अनि माकुन प्रतिज्ञा कितोर ओर खरोय मन्तोर ओर अदेन पुरा कियानुर इन्जोर माक जरुर पुटार इदाम वाचा पुटता पोल्लोता बारेते दुसरो लोकुरकुन वेहिलाय हिमतते मनिर।

²⁴ अनि वरोर दुसरोन मया कियाना अनि सोबाय बुतो कियाना अनि वरोन दुसरोन बदाम प्रोत्साहन किया परकिट इन्जोर चिन्ता किम्ट।

²⁵ हुचुलोर लोकुरक मसिलोकुरा सभातिगा मन्ता प्रार्थना कार्यक्रमतुन दरोज तासिस दान्तोर मति माक ओरा लेहका मावा प्रार्थना कार्यक्रमतुन बसकेय तासिमाट। इचोने आयो प्रबु येसुना असा मलस वायान दिया पकाय हेरे वातु इन्जोर वरोन दुसरोन मया कियाना अनि विस्वासते मजबुत मन्दाना साटि वरोन दुसरोन असा पकाय प्रोत्साहन किसोर मन्ट।

²⁶ बाक्याकि येसुना बारेता खरोय पोल्लोतुन पुन्जुन अनि पजा माक सबोय पुन्जुन ते वने असा पाप किसोर मनकाट ते मिया पापता मापि साटि असा बोदे बलिदान पिसता हिले।

²⁷ इंगो, अदाम माक असा पाप किसोर मनकाट ते अनन्तकाळ साटि मन्ता हायानाता दन्ड हर हुळस मन्दाना ओद पकाय वरे अनि परमेस्वरना विरोद पाप किसोर मन्वालोरक सबोय विरोदि लोकुरकुन पयटे किस नाश कियान साटि परमेस्वर तयारि किता पकाय हजोर होंगता तेज किस मावा साटि पिसता मन्ता।

²⁸ बोरायि मूसाना नियमतुन पालन केवोर ते ओन इवुर या मुवुर लोकुरा गवाहिते, दया केवाय होवक्स वाटिन्तोर।

²⁹ ते परमेस्वरना मरिन मजाकिस मानेमायोर अनि आपुनतुन पवित्र किन्ता ओद करारता नतुरतुन अपवित्र चिज इदाम मानेमास परमेस्वरना दयाता आत्मातुन अपमान कितुर ओर मानेय बचोन पकाय दन्ड पुटार इन्जोर निमाट विचार कितिट बहे?

³⁰ बाक्याकि “बदला येताना नावा बुतो मन्ता, ननाय बदला हियाका।” अनि पजा, “प्रबु आपुना लोकुरा न्याय कियानुर” इन्जोर वेहतोर ओर परमेस्वरिन माक पुन्तोरोम।

³¹ जिवित परमेस्वरना कयदिगा अराना पापि मानेय साटि पकाय भयानक पोल्लो मन्ता।

³² मति निमाट मसिना बारेता खरोय पोल्लो समजेमास मसि विस्वासि बनेमातिट असके मिया पकाय तकलिपतिगा हिमतासंग विस्वासते स्थिर मतोरिट ओव पहलेटा दियानुंग निमाट आल्हाट।

³³ ओदबेरा बसकेय बसकेय सबोय लोकुरा मुने मिया अपमान कितुर अनि मिकुन पकाय तकलिप कितुरक अनि बसकेय बसकेय दुसरो बेरा इदाम पकाय तकलिप सहेन केवालोरासंग व्यवहार कितुर अनि ओरासंग संगत आतिट।

³⁴ निमाट कयदि लोकुरा पकाय तकलिपतिगा वने मदत किस ओरासंग संगत कितिट। अनि निमाट मिया हेरे असा वने उन्दि सोबाय अनि सबोय काळदे मन्वाल संपति मन्ता इदाम पुन्दिट आपुना संपति वने गिरदाते विरोदि लोकुरकुन ओयिला हितिट।

³⁵ इन्जोर पकाय हजोर प्रतिफळ पुटान्ता परमेस्वरनिगा मन्ता मिया पका विस्वासतुन तासिमाट।

³⁶ बाक्याकि परमेस्वरना इच्चातुन पुराकिस ओर प्रतिज्ञा किता पोल्लोंग पुटिहकिट इन्जोर मिकुन पोसोरिंग सहेन किस मुने हन्दाना जरुरि मन्ता।

³⁷ बाक्याकि “इदेक पकाय हुडुन्साय बेरा पिसता मन्ता वायवाल वायनुर अनि असा बेरा केवोर आयनुर।”

³⁸ मति, “परमेस्वरना मुने येताना योग्य नावोर मानेय विस्वासते जिवित मन्दानुर, अनि ओर विस्वासते परके गुचानुरते नना ओनिगा गिरदा मनो आयार।”

³⁹ माक ते विस्वासताल परके आस नाश आयवाल लोकुरासंग आयो मति विस्वासते पिसहान्तोरक ओर लोकुरासंग मन्तोरोम।