यहुदि 1 - Muria Far Western

परमेस्वर आपुना मरिना द्वारा वळकान्तोर

¹ परमेस्वर सिरान काळदे पकाय बेरा अलग अलग रितिते परमेस्वरना पोल्लो वेहवालोरा द्वारा बाबो-दादिलोरासंग वळकस मतोर।

² मति माक मन्दाना दुनिया इद आकरि दियांगते परमेस्वर मावासंग आपुना मरिना द्वारा वळकतुर; परमेस्वर ओन सबोय पोल्लोता वारिस आस निवळे कितुर अनि ओनाय द्वारा परमेस्वर सबोय ब्रंमान्डतुन बनेहकितोर।

³ ओर परमेस्वर बचोन हजोर मन्तोर अदेन तोहान्तोर अनि ओर परमेस्वरना खरोय स्वभावतुन ओनिगा माक खरोय हूळ परान्तोरोम, अनि ओर दुनियाता सबोय चिजतुन आपुना लावता आग्याते पालन-पोषन किन्तोर। ओर माक सबोय लोकुरकुन पापताल शुद्ध कियाना हरि बेनेहकिस स्वरगतिगा मन्दाना हजोर महिमावाले परमेस्वरना तिन्दान कयबासा हन्जुन उदितुर।

परमेस्वरना मरि स्वरगदूतकताल वने पकाय हजोर मन्तोर

⁴ अनि ओन परमेस्वरताल पुटता पोरोय स्वरगदूतकताल वने हजोर आतु अदामे ओर वने स्वरगदूतकताल वने हजोर मन्तोर।

⁵ बाक्याकि परमेस्वर “निमा नावोर मरि आन्दि, नेन्ड नना निकुन जनम हितान। अनि नना ओनोर बाबो आयका अनि ओर नावोर मरि आयनुर” इदाम स्वरगदूतक निकेडाल बोनायसंग परमेस्वर बसकेय इतोर बहे?

⁶ अनि सबोयताल हजोर आपुना मरिन इद दुनियातिगा ततान्तोर असके “परमेस्वरनोर सबोय स्वरगदूतक ओन नमस्कार केविरक” इन्जोर परमेस्वर इन्तोर।

⁷ अनि “ओर आपुना स्वरगदूतकुन आत्मा अनि पयटेमाता किसतुन सेवक लोकुरक बनेहकिन्तोर” इन्जोर स्वरगदूतकना बारेते पवित्र पुस्तकतिगा इन्तोर।

⁸ मति पवित्र पुस्तक आपुना मरिना बारेते इदाम इन्तोर, “हे परमेस्वर निया राज सबोय काळदे मन्दार, निमा निया लोकुरा पोरो खरोयते राज कियाकि।

⁹ निमा खरोयतुन मया किन्तोन अनि खराबतुन विरोद किन्तोन इन्जोर नना नियोर परमेस्वर निकुन आचुन अनि निवळेकिस निया गोतियालोरकताल विळस निकुन पकाय गिरदा कितोर।”

¹⁰ अनि पवित्र पुस्तकतिगा असा परमेस्वरना मरिना बारेते इदाम इन्तोर, “हे प्रबु, निमा सिरान काळते दरतिता पायवा बनेहकिति अनि आबारतिगा मन्ता असा दुसरो सबोय पोल्लोंग निया कयदे बनेहकिता मन्तांग।

¹¹ ओव ते नाश आयनुंग, मति निमा नाश आयवि आयकि अनि ओव सबोय जुनाह सन्दरांग लेहका नाश आयनुंग।

¹² अनि निमा अवेहकुन चादर लेहका हुरिहकि, अनि अव सन्दरा लेहका बदलेह मायनुंग मति निमा दरोज मन्तोन अनि निया वरसांग मारोंग आयनुंग” इन्जोर इन्तोर।

¹³ परमेस्वर बसकेय वने बोरे स्वरगदूतकुन इदाम इनोर, “नना नियोर दुश्मनिन निया काल्क अडिय कियानवनाह निमा नावा तिन्दान कयबासा उदा”

¹⁴ असके स्वरगदूतक बोर मन्तोरक? ओर सबोय स्वरगदूत परमेस्वरना सेवा केवांग आत्मांग मन्तांग अनि पिसाना प्रापत कियान साटि हर हुळस मन्तोरकुन मदत कियान साटि परमेस्वर लोहान्तोर मन्तोरक।