गलाति 6 - Muria Far Western

वरोर दुसरोना मदत किम्ट

¹ हे बायि-दादालोरक, बोरायि मानेयतुन बोदे दोसते पयिर ते निमाट सोबाय विस्वासि लोकुरक नम्रतातासंग ओना गलतिताल बराबर किम्ट अनि निमाट वने परिक्षाते अरियवि आयकिट इन्जोर आपुना वने ध्यान इराट।

² निमाट वरोर दुसरोना वजा ताहच मदत कियान साटि मुने आम्ट अनि इद रितिते मसिना नियमतुन पालन कियाकिम्ट।

³ मति निमाट हुडलोर मन्तोरिट ते वने आपुनतुन पकाय हजोर समजेमान्तोरिट ते आपुनतुन दोखा हिन्तोर।

⁴ मति सबोय लोकुरक आप-आपुना बुतोतुन तपासे किम्ट असके आपुनाय बुतो सोबाय कितोम इन्जोर मिकुन घमेन्ड कियाना सन्दि पुटार। निमाट आपुनतुन दुसरोनासंग तुलना कियाना जरुरि हिले।

⁵ बाक्याकि आप आपुना जिम्मेदारिते मन्ता ओद बुतो आपुनास किम्ट।

⁶ परमेस्वरना पोल्लो करयान्तोरक ओर लोकुरक आपुना करिहवालतुन सबोय प्रकारता सोबाय चिजते मदत कियाला पहाजे।

⁷ आपुनतुन दोखा हेमाट, परमेस्वरतुन बोरे मजाक किया परोर; मानेय बाताल वीतान्तोर ओदे कोयानुरक।

⁸ निमाट आपुना मेन्दुलता पाप स्वभावतुन गिरदा कियाकिट ते निमाट अनन्त काळता नाशतुन कोयकिट। मति निमाट पवित्र आत्मातुन गिरदा कियाकिट ते निमाट अनन्त जिवन कोयकिट।

⁹ माक भलायि बुतो किनेक किनेक बसकेय अवकेमायोम आयकोम। बाक्याकि माक अवकेमायोम आयकोम ते परमेस्वरना बराबर बेराते भलायिता कायांग माक कोयकाट।

¹⁰ इन्जोर माक सन्दि पुटानपा सबोय लोकुरकुन विशेषाल विस्वासि लोकुरा भलायि किम्ट।

आकरि चेतावनि अनि अभिवादन

¹¹ हुळाट, बचोन हजोर-हजोर अक्षरते नना मिकुन इद पोल्लो आपुना कयदेय कोटतोना।

¹² अनि मसि कुरुस पोरो हातुर ओद कारणते माकुन पापता मुक्ति अनि अनन्त जिवन मन्ता इन्जोर विस्वास कियाकिट ते यहुदिलोकुरक पकाय तकलिप कियानुर इदाम मियागा हुचुक लोकुरक वरियान्तोरक। यहुदिलोकुरक ओरकुन स्विकार कियानुर इन्जोर ओरक मिकुन जबरदस्ति कतना कियान साटि कोसिस किन्तोरक।

¹³ बाक्याकि कतना केवालोर वने मूसाना नियमता अनुसार ताकोर, मति बचोक लोकुरा मेन्दुलतिगा माक कतना कितोम इदाम ओरकुन घमेन्ड कियाना साटि मिकुन कतना कियाना इच्चा किन्तोर।

¹⁴ मति मावोर प्रबु येसु मसि कुरुस पोरो हातुर अदेना कारण माकुन पुटता पिसानाता सोबाता पोल्लो वेहाना सिवायि दुसरो बोदे पोल्लोतिगा नना बसकेय घमन्ड केवोन आयका। अनि मसिना कुरुसता कारण संनसारिक दुनियाता पोल्लोतिगा मता नावा सबोय इच्चा नाश आतुंग अनि संनसारिक दुनियातुन नावागा मता सबोय इच्चा वने हातुंग।

¹⁵ कतना कियाना अनि कतना केवोर इदेना बाताले महत्व हिले। मति मुक्या पोल्लो माक येसु मसिनिगा पवित्र आत्माता मदतते पुनाल जिवन बनेमायाना इन्जोर मन्ता।

¹⁶ बचोलोर इद नियमता अनुसार ताकान्तोरक ओरक परमेस्वरना पुनाल इस्रायेल लोकुरक आतुरक ओर लोकुरकनिगा शान्ति अनि दया आसोर मनि।

¹⁷ नेटाल बोरायि कतना अनि मूसाना नियमतुन पालन कियाना बारेते गलति करहिस नाकुन तकलिप हेमाकिर, बाक्याकि पकाय तकलिपता द्वारा नावा मेन्दुलतिगा आता इद घावक येसु मसिना सेवक मन्तोना इन्जोर गवाह हिन्ता।

¹⁸ हे बायि-दादालोरक, मावोर प्रबु येसु मसिना दया मिया आत्मातासंग मनि। आमिन।