गलाति 5 - Muria Far Western

येसु मसि मिकुन हिता ओद स्वतन्त्रतातुन सुरक्षित इराट

¹ मसि माकुन स्वतन्त्र कितुर इन्जोर ओद स्वतन्त्रतिगा स्थिर मन्ट अनि मूसाना नियमता दासत्वतिगा असा हिरकमाट।

² केन्जाट! निमाट कतना कियाकिट ते मसिनिकेडाल मिकुन बाराय फायदा आयो आयार इन्जोर नना पोलुस मिकुन इन्तोना।

³ कतना कियाकिट ते निमाट मूसाना सबोय नियम मानेमायिला पहाजे इन्जोर नना सबोय कतना केवालोरकुन सुचित किन्तोना।

⁴ निमाट ओद नियमता द्वारा परमेस्वरना येताना योग्य बनेमायाना इच्चा किन्तोरिट ते निमाट मसिहाताल अलग अनि ओना दयाताल अरतोरिट।

⁵ पवित्र आत्माता द्वारा विस्वासता कारण परमेस्वर माकुन स्विकार कियानुर इन्जोर माक आशा किन्तोरोम।

⁶ बाक्याकि मसि येसुनिगा कतना कियाना अनि कतना कियाना आयो ओदेन बाराय बुतोता हिले। मुक्याल पोल्लो मयाते उत्पन्न आयवाल विस्वास मन्ता।

⁷ निमाट वरोर वितवाल लेहका येसु मसिना विस्वासते सोबाय रितिते वितसोर मतोरिट। मति इदेक खरोय पोल्लोतुन पालन कियाना बोर मिकुन बन्द किहितुर?

⁸ मिया खरोय पोल्लोतुन पालन कियाना बन्द कितोर ओर मिकुन केयतोर खरोय परमेस्वरनिकेडाल आयोर।

⁹ हुचुन्सा होवियता पिन्डि सबोय नाहता पिन्डितुन बोगलेह किन्ता अदामे गलति करिहना सबोय विस्वासि लोकुरा खरोय विस्वासतुन खराब किन्ता।

¹⁰ मियागा बोदायि दुसरो गलति करहाना आयो आयार इन्जोर नना प्रबुनिगा मिया बारेते भरोसा इरान्तोना। मति मिकुन बोर इदाम गलति करहाना किस मिकुन भळकेह किन्तोर ओर बोरायि मानेय मनिर ओन दन्ड पुटार।

¹¹ मति हे बायि-दादालोरक, नना इदेकवनाह कतनाता प्रचार किन्तोना ते नाकुन बाक्या पकाय तकलिप हियाला आतोरक? येसु मसि कुरुस पोरो मावा पापताल पिसान साटि हातोर इन्जोर प्रचार कियानुर ते बोरे नाकुन विरुद केवोर आयनुर।

¹² मिकुन कतनाता बारेते गलति शिक्षण करहिस बिगळे किन्तोर ओरक आपुना मेन्दुलता भाग पुरा कदियस वाटिर ते सोबाय आयार।

¹³ हे बायि-दादालोरक, मिकुन परमेस्वर स्वतन्त्र मन्दान साटि आचतोर, मति इद स्वतन्त्रतुन केवल शारिरिक वासनाता बुतो साटि सन्दि हेमाकिर मति मयाते वरोर दुसरोना सेवा किम्ट।

¹⁴ बाक्याकि “निमाट आपुनोर हेरेटोरकुन आपुना लेहका मया इराट” इन्जोर इद उन्दिय आग्याते मूसाना सबोय नियम पुरा आन्ता।

¹⁵ मति बदाम जानवर आपसते पल्क कसकुन वाहचानतांग अदामे निमाट वने वरोन दुसरोनसंग वाहचान्तोरिट ते निमाट आपसते वरोन दुसरोना नाश केवि आयकिट इन्जोर हुशयार मन्ट।

पवित्र आत्माता नियन्त्रते जिवेमायाना

¹⁶ मति पवित्र आत्माता अनुसार ताकाट ते निमाट मेन्दुलता वासना बोदे रितिते पुरा केविट आयकिट इन्जोर नना इन्तोना।

¹⁷ बाक्याकि मेन्दुलता पाप स्वभाव पवित्र आत्माता विरोद मन्ता, अनि पवित्र आत्मा पाप स्वभावता वने विरोद मन्तोर। निमाट सोबाय इच्चा केमाट इन्जोर आपुना मेन्दुलता पाप स्वभाव इच्चा किन्ता इदाम इव रन्ड पोल्लोंग मन्जे पवित्र आत्मा अनि मेन्दुलता पाप स्वभाव वरोर दुसरोना विरोद मन्तांग।

¹⁸ मति निमाट पवित्र आत्माता मार्गदर्शनते ताकान्तोरिट ते मूसाना नियमता अदिकारते मनमाट।

¹⁹ इदेक मावा मेन्दुलता पापता बुतोतुन ते सबोय लोकुरक पुन्तोरक; अव व्यभिचार, अशुद्धता, आपुना मेन्दुलता सुखविलासता इच्चा,

²⁰ मूरति पुजा, जादुटोना, वेयरि, वाहचाना, हेवा, होंग, स्वार्थपन, मसिलोकुरा सभातुन फुट कियाना अनि विस्वासि लोकुरा नडुम विभाजन बनेकियाना,

²¹ हेवा, दाळुंगो उन्ज होच्चाना, लिलाक्रिडा अनि इदाम लेहका पापता सबोय रितिता दुसरो बुतोंग कियाना। इदाम बुतो केवाल ओर लोकुरक परमेस्वरना राज्यता वारिस आयोर आयनुरक इन्जोर नना मुने चेतावनि हिस मतोना अदाम इदेक वने मिकुन असा चेतावनि किन्तोना।

²² मति पवित्र आत्माता बुतो इव मन्तांग: आपसते मया कियाना, गिरदाते मन्दाना, शान्तिते मन्दाना, दिरजते प्रगटकियाना, दया कियाना, भलायि कियाना, इम्मानदारिते मन्दाना,

²³ नम्रताते मन्दाना अनि आत्मसंयमते मन्दाना; इदाम बुतोता विरोदते बोदे नियम हिले।

²⁴ अनि बोर येसु मसिनोर मन्तोर ओरक आपुना मेन्दुलता खराब स्वभाव अनि अदेना इच्चातुन कुरुस पोरो अन्जिहतोरक मन्जे आपुना मेन्दुलता खराब स्वभावतुन पुरा तासितोरक।

²⁵ बाक्याकि पवित्र आत्माता द्वारा माक पुनाल जिवन्ते मन्तोरोम ते पवित्र आत्माता अनुसार ताकिला वने पहाजे।

²⁶ माक वरोन दुसरोन छेळे किस, हेवा किस बेकारता घमेन्ड केवाट।