गलाति 4 - Muria Far Western

¹ वारिस सबोयता मालकाल मन्तोर मति बचोनवनाह वारिस बालक मन्तोर अचोवनाह ओर अनि दासनिगा बोदे फरक हिले इन्जोर नना इद पोल्लो इन्तोना।

² मति बाबोना निश्चित किता ओद बेरावनाह ओर केपवालोर अनि कारबारि लोकुरा कयदे मन्तोर इन्जोर नना वेहान्तोना।

³ अदामे माक वने, मसिना विस्वासते वायाना पहले ओर वारिस मनवाल नोनाल लेहका इद दुनियाता बेकार दरम नियमता अदिकारते आस अदेना दास बनेमास मतोरोम।

⁴ मति आकरिते बाबो परमेस्वर निर्णय किता खरोय बेरा पुरा आत, असके ओर आपुनोर मरि मसिन लोहतुर, ओर मानेय आस आळदाल जन्मेमातुर अनि मूसाना नियमतुन पालन किसोर मतोर।

⁵ अदाम मूसाना नियमता अदिकारते मनवालोर लोकुरकुन स्वतन्त्र किस परमेस्वरना बालक लेहका ओर माकुन दत्तक येतपरानुर इन्जोर।

⁶ बाक्याकि निमाट परमेस्वरना बालक मन्तोरिट इन्जोर “हे बाबो, हे बाबो” इदाम इन्ज केयान्तोरिट आपुनोर मरि मसिना आत्मातुन परमेस्वर मिया मन्दिगा लोहतोर।

⁷ इन्जोर निमाट इदेक इद दुनियाता बेकार दरम नियमता दासक आयो मति परमेस्वरना बालक आतिट, अनि बालक आतिट ते परमेस्वरना द्वारा परमेस्वरना वारिस वने आतिट।

गलातियालोरा बारेते पोलुसना चिन्ता

⁸ पहले निमाट लोकुरक परमेस्वरतुन पुनविट आन्दिट अनि परमेस्वरना स्वभाव हिलेर इदाम खोटाल परमेस्वरतोरक दास मन्दिट।

⁹ मति इदेक निमाट परमेस्वरतुन पुतोरिट अनि परमेस्वर मिकुन पुतोर ते इद दुनियाता कमजोर अनि बेकार दरम नियम करहानाता पोल्लोंगना अनि रितिरिवाजता परके वलियस बाक्या दुसरो बेरा अदेना दास आयाना इच्चा किन्तोरिट?

¹⁰ निमाट विशेषाल दियांग अनि महिनांग अनि रुतु अनि वरसांग इदाम रितरिवाजतुन बाक्या मानेमान्तोरिट।

¹¹ नना मिया साटि किता मेहनत बेकार आत इन्जोर नना मिया बारेते वरयान्तोना।

¹² हे बायि-दादालोरक, नना वने यहुदि नियमतुन तासिस मिया लेहका आतोना इन्जोर निमाट यहुदि नियमतुन तासिस नावा लेहका आम्ट इन्जोर नना मिकुन विनन्ति किन्तोना।

¹³ नना पहले बेरा मिकुन सुसमाचार वेहतान ओद बेरा नावा मेन्दुलतिगा कमजोरि मता इन्जोर निमाट ते पुन्तोरिट बहे।

¹⁴ अनि निमाट वने नावा मेन्दुलता कमजोरिता कारणते नाकुन स्विकारे केवि आयकिट इदाम मिया परिक्षा येतस मतोर ते वने अदेनते नाकुन हुडलोर समजेमास नावा विरोद केविट अनि नाकुन सोळे केविट; मति निमाट परमेस्वरना स्वरगदूतना लेहका अनि येसु मसिना लेहका नाकुन स्वागत कितिट।

¹⁵ ते मिया ओद गिरदा कियाना बगा हतु? इदाम आय परवार ते निमाट आपुनांग कोन्डांग वने टन्डस नाकुन हिस मनेरिट इन्जोर नना मिया बारेता गवाह मन्तोना।

¹⁶ नना मिया इदाम पकाय सोबाय संबन्दते मन्तोना ते मियासंग खरोय वळकानाता कारण बाताल नना मिवोर दुश्मन बनेमातोनान बहे?

¹⁷ ओरक खोटाल शिक्षण करिहवालोर लोकुरक मिकुन गोतियाह बनेहकियानाता इच्चा मन्ता, मति ओरा इच्चा सोबाय उदेशते आयो। निमाट ओरकुने गोतियाह बनेहकिस मावाताल मिकुन अलग कियाना इच्चाते ओरक इदाम किन्तोरक।

¹⁸ बोरे मिया साटि सोबाय बुतो कियाला इच्चा किन्तोरक ते ओरा इच्चा बराबर मन्ता, ओरक इदाम सोबाता बुतो केवल नना मियासंग मन्दाना बेरा आयो मति दरोज कियाला पहाजे।

¹⁹ हे नावोर प्रिय बालक, निमाट मसिना लेहका बनेमायाना वानाह नना मिया साटि असा प्रसव आयानाता नोमुर लेहका आपुना मन्दे नोमुर सहे मान्तोना।

²⁰ इदेक मिया हेरे वास अवका अनि मिया परिस्तिथिता उचित रितिता पोल्लोंग वळकिका इन्जोर नना इच्चा किन्तोना, मति इदेक नना पकाय लक मन्तोना इन्जोर मिया साटि बदाम मदत किया परका इन्जोर नना पुनोन।

सारा अनि हाजिराना उदाहरण

²¹ मूसाना नियमता अदिकारते मन्दाना इच्चा केवालोर लोकुरक निमाट नाकुन वेहाट, खरोय ओद नियम बाताल इन्ता इन्जोर निमाट पुनविट बहे?

²² अब्रहामिन इवुर मरक मतोरक इन्जोर पवित्र पुस्तकतिगा कोटता मन्ता। वरोर मरि अब्राहिमना दासि हाजिरताल अनि दुसरो अब्राहिमना आपुना मुत्ते साराताल जन्मेमातुर।

²³ मति दासिताल जनम आतुर ओर मानेयना विचारते जनम आतुर। अनि बोर अब्राहिमना मुतेताल जन्मे मातुर ओर वाचाता अनुसार जन्मे मातुर।

²⁴ इव पोल्लो उन्दि उदाहरण मन्ता। इव रन्ड आसक परमेस्वर आपुना लोकुरासंग बेनेकितोर रन्ड करार लेहका मन्तांग; उन्दि करार परमेस्वर सिनाय मटा पोरो मूसान कयदे हितुर अनि ओद नियमता पालन किन्तोरक ओर लोकुरक ओद नियमता दास लोकुरक लेहका मन्तोरक। अनि इद हाजिरा पोरोयता दासि मन्ता।

²⁵ इगा हाजिरा पोरोयता दासि अरब देशता सिनाय मटा लेहका आन्दु, अनि इदेकता येरुसलेम अदेना बराबर मन्ता बाक्याकि येरुसलेम आपुना लोकुरासंग मूसाना नियमता दासक मन्तोरक।

²⁶ अनि सारा पोरोयता दुसरो आळ स्वरगता येरुसलेम लेहका मन्ता। ओद अब्राहिमना मुत्ते आन्द दासि आयो इन्जोर ओद मावा याल आन्दु।

²⁷ बाक्याकि पवित्र पुस्तकतिगा कोटता मन्ता, “हे जनम हिया परवि वान्जिलि निमा गिरदा किम, निकुन बालक आयानाता नोमुर आयो इन्जोर निमाट गिरदाते जयजयकार किम, बाक्याकि बोन मुदयाल मन्तोर अदेनाताल निया जनम हिया परवि वान्जिलिना बालक पकाय मन्तोरक।”

²⁸ हे तमोलोरक, माक इसहाकना लेहका वाचाता द्वारा जनम आता बालक आन्दोम।

²⁹ अनि बदाम ओद बेरा मेन्दुलता अनुसार जनम आतोर ओर इशमायिल ओर परमेस्वरना आत्माता अनुसार जनम आतोर इसहाकिन सतेह किन्दुर। अदामे मूसाना नियमता अदिकारते मन्तोर ओरक यहुदि लोकुरा द्वारा इदेक माकुन वने पकाय तकलिप आन्ता।

³⁰ मति पवित्र पुस्तक बाताल इन्ता? “दासि अनि अदेनोर मरिन बाहरो पसिहचिम। बाक्याकि दासिनोर मरि अब्राहिमना मुत्तेना मरिनसंग वारिस आयोर आयनुर।”

³¹ इन्जोर हे बायि-दादालोरक, माक दासि आळता बालक आयो मति माक अब्राहिमना मुत्तेना बालक आन्दोम।