गलाति 3 - Muria Far Western

परमेस्वरना आशिष विस्वासता द्वारा पुटता

¹ हे निरबुद्धि गलातियातोर विस्वासि लोकुरक! मिकुन ते सबोय लोकुरा मुने येसु मसि कुरुस पोरो मिया साटि हातुर इन्जोर पकाय स्पष्ट रितिते तोहतान ते वने मिकुन बोर जादु किस मोहनिंग कितोर?

² इन्जोर नना मियाकेडाल बस इचोन पुन्दाना इच्चा किन्तोना: मिकुन पवित्र आत्मातुन मूसाना नियमते पालन कियाला पुटत बहे? बसकेय आयो। मति निमाट येसु मसिनिगा विस्वास कितिट इन्जोर पुटतिट।

³ अनि पवित्र आत्माता आग्यातुन पालन किस मिया आत्मिक जिवन सुरु कितिट ते मिया लक्षतिके अवान साटि इदेक आपुना लावते कोसिस कियाना साटि निमाट इचोन मुर्ख मन्तोरिट बहे?

⁴ अनि निमाट इचोन कष्ट बाताल बेकारे ताहतिट? आयो! अव बेकार हिलेंग आसि।

⁵ अनि परमेस्वर मिकुन आपुना आत्मा दान किन्तोर अनि मियागा लावता बुतो किन्तोर, बाताल निमाट मूसाना नियमतुन पालन किन्तोर इन्जोर ओर मियागा बुतोते किन्तोर बहे? बसकेय आयो! मति निमाट मसिना बारेता सोबाता पोल्लो केन्जुन अदेनिगा विस्वास कितोरिट इन्जोर इदाम किन्तोर।

⁶ इद अदामे मन्ता “अब्रहाम परमेस्वरनिगा विस्वास कितुर अनि इद ओना साटि परमेस्वरना मुने येताना योग्य आस ठहरे मात।”

⁷ अनि बोर विस्वास केवाल मन्तोर ओरे अब्रहामनोर खरोय पेकाल आन्दुर इन्जोर पुन्ट।

⁸ अनि परमेस्वर विस्वाता द्वारा यहुदि आयो लोकुरकुन परमेस्वरना मुने बोदे दोष हिलेर आस ठहरे कियानुर इन्जोर पवित्र पुस्तकतिगा मुनेय वेहता मन्ता “निया द्वारा सबोय जातितोर लोकुरक आशिष पुटहानुर” इन्जोर अब्रहामिन इद सोबाता पोल्लो मुनेय वेहतुर।

⁹ इन्जोर अब्रहाम विस्वासता द्वारा स्विकार किता ओदे आशिष बोर मसिनिगा विस्वास किन्तोर ओरक वने पुटहान्तोर।

¹⁰ इन्जोर साटि मूसाना नियमता अनुसार परमेस्वरना मुने येताना योग्य ठहरे मायुनर इन्जोर भरोसा इरान्तोर ओरक सबोय लोकुरक सरापता अदिकारते मन्तोर। बाक्याकि पवित्र कोटता मन्ता, “बोरायि मूसाना नियमता पुस्तकतिगा कोटता सबोय पोल्लोंग कियानातिगा स्थिर मनोर, ओर सरापित मन्तोर”।

¹¹ मति मूसाना नियमता द्वारा परमेस्वरना मुने बोरे येताना योग्य ठहरे मायोर इन्जोर प्रगट मन्ता बाक्याकि “परमेस्वरना मुने येताना योग्य लोकुरक विस्वासते जिवित मन्दानुरक।”

¹² मूसाना नियम विस्वासतिगा आधारित हिले, मति “बोरक ओद नियमता सबोय कानुनतुन दरोज पुरा मानेमायनुर, ओरक ओद बुतोता कारणते जिवित मन्दानुर।”

¹³ “मरा पोरो वळहान्तोर ओर सरापते मन्तोर” इन्जोर पवित्र पुस्तकतिगा कोटता लेहका मसिहाल मावा सरापतुन आपुनानिगा येतस मूसाना नियमतिगा कोटता सरापताल माकुन लेहचितुर।

¹⁴ अब्राहामतुन हिता आशिष येसु मसिना द्वारा यहुदि आयोर लोकुरकुन वने पुटि अनि परमेस्वरना ओद वाचा पवित्र आत्मातुन विस्वासता द्वारा माक पुटि इन्जोर इदाम आत।

नियम अनि वाचा

¹⁵ हे बायि-दादालोरक, नना मानेयना रितिता अनुसार उन्दि उदाहरण इन्तोना: इवुर मानेय उन्दि करार किन्तोरक अनि ओद करार बनेकिस इवुर मानेय अदेन स्विकार किन्तोरक। अदेना पजा ओद करारतुन ओरागडाल बोरे वरोर मानेय अदेन बदले कियाला परोर या असा बाताले जोळेकिया वने परोर।

¹⁶ इन्जोर परमेस्वर आपुना वाचा अब्राहामतुन अनि ओना सन्तानतुन हितुर। “सन्तानक” इन्जोर पकाय लोकुरा बारेते आयो मति “निया सन्तानतुन” इन्जोर वरोना बारेते इतुर ओर येसु मसिये आन्दुर।

¹⁷ नना इन्तोना इद मन्ता: परमेस्वर अब्रहामनासंग किता करारताल नालुंग नुहक तिस वरसांगना पजा मूसाना नियमतुन बनेकितुर। मूसाना ओद करार परमेस्वर मुनेटाले अब्रहामनासंग वाचातासंग पका किस मतोर ओद करारतुन इन्कार किया परोर।

¹⁸ बाक्याकि वारिस मूसाना नियमताल पुटता ते परमेस्वरना वाचाता जरुरि हिले आसि, मति परमेस्वर अब्रहामनासंग बनेकिता वाचाता द्वारा वारस हितुर।

¹⁹ असके पजा मूसाना नियम बाक्या हितोर? अब्रहामिन वाचा हिस मतोर ओर मरि मसि वायानवनाह मानेयना पापता स्वभावतुन नियत्रण कियाना साटि मूसाना नियम हिस मतोर। अनि परमेस्वर स्वरगदूतकना द्वारा वरोर मध्यस्थिता लेहका मूसाना कयदे ओद नियम हिस मतोर।

²⁰ इवुर मानेयना नडुम करार साटि मध्यस्थि बुतो किन्तोर। मति परमेस्वर अब्रहामिन वाचा हियाना बेरा बारायि मध्यस्थि हिले आसि परमेस्वर अब्रहामिन आपुन आस वाचा हितुर।

मूसाना नियमता उदेश

²¹ ते बाताल मूसाना नियम परमेस्वरना वाचाता विरोदते मन्ता? बसकेय आयो! बाक्याकि इदाम मूसाना नियमतुन माकुन पुनाल जिवन हिस मनेर ते खरोय दारमिकता मूसाना नियमताल मन्वार।

²² मति विस्वास किन्तोर लोकुरकुन परमेस्वर वाचा हिता पुनाल जिवन येसु मसिना पोरोयता विस्वासता द्वारा पुटहि इन्जोर मूसाना नियम सबोय लोकुरकुन पापता अदिकारता बन्दनते कितु।

²³ मति येसु मसिना दुनियातिगा वास मावा पापता पिसाना साटि कुरुस पोरो हायाना पहले माक सबोय लोकुरक मूसाना नियमता अदिकारते बन्दनते मतोरोम।

²⁴ मसिना द्वारा माक विस्वासते दरमि ठहरे मायकाट इन्जोर मूसाना नियम मसिना अवहिला वने मावा करिहवाल मता।

²⁵ मति येसु मसि मावा पापताल पिसान साटि कुरुस पोरो हातुर इन्जोर माक विस्वास कोन्तोरोम इन्जोर इदेक माक ओद नियमता अदिकारते मनवाट।

²⁶ बाक्याकि येसु मसिनिगा विस्वासता द्वारा निमाट सबोय लोकुरक परमेस्वरना बालक आयकिट।

²⁷ अनि बपतिस्माता द्वारा येसु मसिनिगा संगते आतोरिट ते मिया सबोय लोकुरा स्वभाव येसु मसिना स्वभाव लेहका बदलेमात।

²⁸ इदेक यहुदि अनि युनानि इदाम हिलेर, दास अनि स्वतन्त्र इदाम हिलेर, मानेय अनि आळ इदाम हिले, बाक्याकि निमाट सबोय लोकुरक येसु मसिनिगा उन्दि मन्तोरिट।

²⁹ अनि निमाट मसिहनोर आन्दिट ते अब्रहामनोर बालक अनि परमेस्वरना वाचाता अनुसार अब्राहिमना वारिस वने आन्दिट।