गलाति 2 - Muria Far Western

येसुना मसिना दुसरो खास चेला लोकुरक पोलुसिन स्विकार किन्तोरक

¹ चवदा वरसाना पजा नना बरनबासनासंग असा येरुसलेमतिगा हतान अनि तितुसिन वने संगे ओतान।

² नना परमेस्वरना दरशनता अनुसार अगा हन्ज मतोना। नना किन्तोना ओद बुतो बेकार हन्माकि इन्जोर नना यहुदि आयोर लोकुरा नडुम प्रचार कियालाता ओदे सुसमाचारतुन नना अगा उन्दि सभातिगा, मसिलोकुरा सभाता केवल मुक्याह लोकुरकुने वेहतान।

³ मति नावासंग मतोर ओर तितुस युनानि मानेय मतोर ते वने ओन कतना कियाला पहाजे इदाम बोरे जबरदस्ति वेहोर।

⁴ इद प्रश्न ओरक जुटाह करहिवाल यहुदि विस्वासि लोकुरा कारणते आत; माकुन यहुदि नियमता दास असा बनेहकियान साटि येसु मसिनिगा मावा स्वतन्त्रताता बारेते दोष लावे कियान साटि ओर जुटाह करिहवालोरक मकस वास मतोरक।

⁵ सुसमाचारता खरोय मियागा दरोज मन्दाना इन्जोर उन्दि घटकामेन्ड वने ओरा अदिकारते आयाना साटि माक मानेमायोम।

⁶ मति मसिलोकुरा सभाता हजोर लोकुरक लेहका विस्वासि लोकुरक समजेमातोरक ओरक मुक्या लोकुरकनिकेडाल नना प्रचार कियानाता सुसमाचारतुन बाराय फायदा पुटो (बाक्याकि बिना भेदभावते सबोय मानेय परमेस्वरना मुने उन्दि लेहकाय मन्तोर)

⁷ मति पतरसतुन परमेस्वर यहुदिलोकुरकुन सुसमाचार वेहाना बुतो हिस मतोर अदामे परमेस्वर यहुदि आयोर लोकुरकुन सुसमाचार वेहाना बुतो नाकुन हितोर। इदाम परमेस्वर नाकुन उन्दि खास बुतो सोपे कितोर इन्जोर इदेना बारेते येरक मुक्यालोरक समजेमातुरक।

⁸ परमेस्वर पतरसतुन वरोर येसुना खास चेलाना रुपते यहुदि लोकुर साटि बुतो कियाना लाव हिस मतोर। अदामे परमेस्वर नाकुन वने लोकुरक यहुदि आयोर ओर लोकुरा हेरे वरोर येसुना खास चेलाना रुपते बुतो कियाना लाव हितोर।

⁹ अनि मसिलोकुरा सभाता मुक्याल आस लोकुरक समजेमास मतोरक ओरक याकुब, पतरस अनि युहन्नाल परमेस्वरना दया नाकुन वने पुटत इन्जोर समजेमास नाकुन अनि बरनबासतुन ओरा संगे बुतो केवाल इदाम स्विकार कितुर। अनि ओरक यहुदि लोकुरा नडुम परमेस्वरना सोबाता पोल्लो वेहतुरक अदामे माकुन यहुदिलोकुरक आयोरिगा सोबाता पोल्लो वेहान साटि ओरक माकुन प्रोत्साहन कितुरक।

¹⁰ माक गरिब लोकुरा ध्यान इरिला पहाजे इन्जोर केवल ओरक माकुन इतुर, अनि गरिब लोकुरकुन मदत कियाना नना आपुनास पकाय कोसिस किन्दान।

पोलुस पतरसना गलतितुन समजेकिहिन्तोर

¹¹ मति उन्दि दिया पतरस अन्ताकियातिगा वातुर असके नना ओनागा गलति हुळतान इन्जोर सबोय विस्वासि लोकुरा मुने ओद गलतितुन नना ओन समजेहकिस हितान।

¹² बाक्याकि याकुब लोहतोर हुचुक लोकुरक इगा अवानाता मुने यहुदिलोरक आयोर लोकुरासंग ओर तिन्जोर-उन्जोर मतोर। मति याकुबना हेरेटाल हुचुक लोकुरक इगा वातुरक। ओर लोकुरक कतना कियाना जरुरि मन्ता इन्जोर करिहवालोरक मतोर। ओरकुन वरियस पतरस परके आतुरक अनि अलग मन्दिला लागतुर।

¹³ ओनासंग दुसरो यहुदि मसि विस्वासि लोकुरक वने इदाम पतरसना लेहका कपट रितिते यहुदि आयोर विस्वासि लोकुरासंग व्यवहार कितुर। इद कारणते बरनबास वने ओरा कपटते अरतुर।

¹⁴ मति ओरक सोबाता पोल्लोता खरोयते ताकोर इन्जोर नना हुळतान असके नना सबोय लोकुरा मुने पतरसतुन इतान, “निमा यहुदि मानेय मन्तोन मति निमा यहुदि लोकुरा रितिरिवाज अनुसार आयो मति यहुदि आयोर लोकुरा लेहका ताकान्तोन। निमा यहुदि लेहका ताकवि ते निमा दुसरो यहुदि आयोर लोकुरकुन यहुदि रितिरिवाज अनुसार ताकिला पहाजे इन्जोर जबरदस्तिते बाक्या इन्तोन?”

विस्वासता द्वारा परमेस्वरना मुने येताना योग्य ठहरे मायाना

¹⁵ माक ते जन्माताल यहुदि मन्तोरोम अनि ओरक यहुदि आयो लोकुरक लेहका माक पापि लोकुरक आयो।

¹⁶ ते वने मानेय मूसाना नियमता अनुसारता बुतोते आयो, मति केवल येसु मसिनिगा विस्वास कियानाता द्वारा परमेस्वरना मुने येताना योग्य ठहरे मान्तोर इन्जोर माक पुन्तोम। केवल मूसाना नियमतुन पालन किस परमेस्वरना मुने येताना योग्य आय परोर। मसिनिगा विस्वास कितोम इन्जोर विस्वासता द्वारा परमेस्वर माकुन परमेस्वरना मुने येताना योग्य आस स्विकार कितोर।

¹⁷ माक यहुदिलोकुरक मसिना विस्वासता द्वारा परमेस्वरना मुने येताना योगय ठहरे मायिला इच्चा कियाकोम ते मूसाना नियमतुन हरचितोम इन्जोर माकुन पापि ठहरे कियानुर ते मसि पाप कियाना साटि माकुन प्रोत्साहन किन्तोर बहे? बसकेय आयो।

¹⁸ नना मुटिहचितान ओद चिजतुन असा बनेहकियाका ते नना आपुनतुन दोषि ठहरे कियाका।

¹⁹ बाक्याकि नना ओद मूसाना नियमता अनुसार असा ताकाना कोसिस कितान ते ओद नियम नाकुन दोषि ठहरे कियार इन्जोर नना ओद नियमता अनुसार ताकाना बन्द कितान। इन्जोर इदेक नाकुन परमेस्वर साटि जिवित किया परान्तोना।

²⁰ नना मसिनासंग कुरुस पोरो मन्तोना; इन्जोर नावा जुनाल मानेयना पापता स्वभाव बन्द आत मति मसिहा नावागा जिवित मन्तोर। अनि नना मेन्दुलतिगा इदेक जिवित मन्तोना ते केवल नाकुन मया किस नावा साटि आपुनतुन हितुर ओर परमेस्वरनोर मरिना विस्वासते जिवित मन्तोना।

²¹ नना परमेस्वरना दया व्यर्थ ठहरे केवोन बाक्याकि मूसाना नियमता द्वारा दारमिकता मन्वार ते मसिना हायाना व्यर्थ मन्वार।