गलाति 1 - Muria Far Westernअभिवादन 1 मानेयनिकेडाल आयो अनि मानेयना मदतते आयो मति येसु मसिन हातोरिगाडाल जिवेहकितोर ओर बाबो परमेस्वरना द्वारा अनि येसु मसिना द्वारा येसुना खास चेला बनेमातोर नना पोलुस, 2 अनि नावासंग मन्तोरक सबोय विस्वासि हेलाळ तमो लोकुरकनिकेडाल गलातिया सहेरतिगा मनवालोरक सबोय मसिलोकुरा सभा साटि इद पत्र कोटान्तोरोम। 3 बाबो परमेस्वरनिकेडाल अनि ओना इच्चाता अनुसार इद पापता सन्सारतिगाडाल माकुन पिसान साटि मावोर पापता कारण आपुनतुन बलिदान हितोर ओर मावोर, 4 प्रबु येसु मसिनिकेडाल मिकुन दया अनि शान्ति पुटसोर मनि, 5 ओना स्तुति अनि महानता पिळि-पिळिते आसोर मनि। आमिन। मसिना बारेते खोटाल सोबाता पोल्लोतुन बोरे प्रचार कियानुर ते निमाट अदेन विस्वास केमाट 6 मसिना दयाते मिकुन केयतोर ओर परमेस्वरिन तासिस निमाट इचोन सान्डे आपुना विस्वासताल परके मल्स अनि दुसरोय प्रकारता येसु मसिना सोबाता पोल्लोतिके हन्दिला आतोरिट इन्जोर नाकुन पकाय आश्चरय आन्ता। 7 मति खरोय ओद सोबाता पोल्लोये हिले। मति हुचुक लोकुरक येसु मसिना सोबाता पोल्लोतुन बिगळे किस मिकुन भळके कियाना इच्चा किन्तोर। 8 मति माक मिकुन वेहतोम येसु मसिना ओद खरोय सोबाता पोल्लोता विरुद माक या स्वरगताल बोदे दूत वने बोदायि दुसरो गलति सोबाता पोल्लो मिकुन केन्जिहिर ते ओन नरकता किसितिगा अनन्तकाळता दन्ड पुटि। 9 माक मुनेय इतोरोम अदामे ओद नना इदेक असा वने इन्तोना: निमाट येतितोरिट येसु मसिना ओद खरोय सोबाता पोल्लोतुन तासिस बोरायि दुसरो गलति सोबाता पोल्लो वेहान्तोर ते ओन नरकता किसितिगा अनन्तकाळ दन्ड पुटि। 10 इदेक नना बाताल मानेयना या परमेस्वरना स्विकार कियाना कोसिस किन्तोना? बाताल नना मानेयकुने गिरदा कियाना साटि कोसिस किन्तोना इदाम निमाट विचार किन्तोरिट बहे? आयो! नना परमेस्वरना स्विकार साटि कोसिस किन्तोना। नना इदेकवनाह मानेयकुने गिरदा किसोर मनका ते येसु मसिहनोर दास आयोन आस मनेना। पोलुस बदाम येसुना खास चेलाल बनेमातुर 11 हे हेलाळ अनि तमोलोरक, नना मिकुन वेहतोना इद सुसमाचार मानेयना बुद्धिते बनेहकिता पोल्लो आयो इन्जोर नना मिकुन समजेह किन्तोना। 12 बाक्याकि ओद पोल्लो नना मानेयनिकेडाल स्विकार केवोन अनि नाकुन बोरे मानेय करहोर मति येसु मसिना प्रकाशनताल पुटता मन्ता। 13 यहुदि दरमदिगा नना पहले बदाम जिवे मान्दान अदेना बारेते निमाट केन्जतोरिट अनि नना परमेस्वरना मसिलोकुरा सभातुन पकाय तकलिप अनि नाश किन्दान इन्जोर वने निमाट पुन्तोरिट। 14 आपुनोर बाबो-दादिलोरा परम्परा साटि पकाय उत्तेजित आस आपुना यहुदा जातितिगा नावोर वयतोर पकाय मानेय मतोर ओराताल नना विळसोर मतोना। 15 मति नावा जनम आयानाता मुनेय नाकुन आचकुन आपुना दयातिगा केयस मतोर ओर परमेस्वर 16 आपुनोर मरि मसिना बारेता सोबाता पोल्लो यहुदि आयोर लोकुरकुन प्रचार कियान साटि मसिन नावागा तोहाना निर्णय किस नाकुन केयतुर ओद बेरा नना बोरे मानेयनिकेडाल बोदे सल्ला येतोन, 17 अनि नना मुने मन्तोर येसुना खास चेला लोकुरा हेरे येरुसलेमतिके हनोन, मति सान्डे अरब पोरोयता प्रेदेशतिगा हतान, अनि पजा अगडाल दमासकसतिगा मल्स वातान। 18 असके मून्ड वरसाना पजा नना पतरस मिलेमायिला येरुसलेमतिके हतान अनि ओना हेरे नना पन्दरा दियांग मतान। 19 मति प्रबुनोर तमो याकुबिन तासिस असा मसिना खास चेलानिगाडाल बोने मिलेमायोन। 20 नना मिकुन कोटिला आतोना ओद बाताले खोटाल हिले इन्जोर परमेस्वर गवाहि मन्तोर। 21 अदेना पजा नना सिरिया अनि किलिकियाता प्रदेशतिके हतान। 22 मति यहुदियाता मसिलोकुरा सभातिगा विस्वासि लोकुरक नाकुन बसकेय हुळोर आसि। 23 मति माकुन “मुने पकाय तकलिप हिस ओद विस्वासतुन नाश कितोर इदेक ओदे विस्वासता सोबाता पोल्लो वेहान्तोर” इन्जोर केन्जुन। 24 ओर लोकुरक नावा बारेते परमेस्वरना महिमा किन्तोरक। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.