इफिसुस 6 - Muria Far Westernबालक अनि अवाल-बाबोना बारेता उपदेश 1 हे बालक, निमाट प्रबुनोर आन्दिट इन्जोर आपुनोर अवाल-बाबोना आग्याता पालन किम्ट, इद उचित मन्ता। 2 “निया भला आयि अनि निमा दरतितिगा पकाय दियांग जिवित मन 3 इन्जोर निमा आपुनोर अवाल-बाबोना आदर किम।” इद परमेस्वरना प्रतिज्ञातासंग हितोर पहले आग्या वने मन्ता। 4 हे बाबोलोरक, आपुनोर बालक पकाय होंग वायार इदाम अन्याय या कटोर मन्दे व्यवहार केमाट, मति प्रबुना पोल्लो अनुसार शिक्षण अनि उपदेश हिसोर ओरा पालन-पोषण किम्ट। स्वामि अनि सेवक साटि उपदेश 5 हे दास लोकुरक, बदाम निमाट मसिना आग्या पालन किन्तोरिट अदामे निषकपट मन्दे आदर अनि वरेते मिया सन्सारता स्वामि लोकुरा आग्यातुन पालन किम्ट। 6 मिया स्वामिन गिरदा कियान साटि केवल ओना कोन्डांगना मुने आयो मति पुरा मन्दे परमेस्वरना इच्चा किस मसिना सेवक बनेमास मिया स्वामिन दरोज गिरदा किम्ट। 7 अनि ओद सेवातुन मानेय साटि आयो मति प्रबुन साटि समजेमास गिरदाते खरोय मनदे किम्ट। 8 बाक्याकि बोरायि सोबाय बुतो कियानुर ते ओर दास या स्वतन्त्र मनिर ओर प्रबुनिकेडाल अदेना प्रतिफळ पुटहानुर इन्जोर निमाट पुन्तोरिट। 9 हे स्वामिलोरक, ओरा अनि मिया इवुरासला स्वामि स्वरगतिगा मन्तोर अनि ओर बोनाय भेदभाव केवोर इन्जोर समजेमास निमाट वने धमकि हियाना तासिस ओरासंग व्यवहार किम्ट। आत्मिक लळायिता हत्यार 10 आकरिते प्रबुनिगा अनि ओना पकाय हजोर लावता प्रभावते लाववाले बनेमाम्ट। 11 निमाट सयताना युक्तिता विरुद पकाय लावदे नितस मन्दान साटि परमेस्वरना सबोय हत्यारतुन दोहाट। 12 बाक्याकि मावा युद्ध बोरे मानेयतासंग आयो, मति इद अदृश्य सन्सारता राज्य ताकिहवालोरक अनि अदिकारि लोकुरकताल मन्ता अनि इद सन्सारता अन्दकारतोर हजोर राजाल सयतान अनि ओव आबारतिगा मनवालोरक दुष्टा आत्माता सयनिक लोकुरकताल मन्ता। 13 इन्जोर साटि निमाट खराब दियांगतिगा सयताना युक्तिता विरुद पकाय लावदे नितस परकिट अनि सबोय युद्ध पुरा किस स्थिर मन परकिट इन्जोर परमेस्वरना सबोय हत्यारतुन दोहाट। 14 परमेस्वरना सच्चायितुन आपुना नळितिगा पट्टा लेहका आरेकिस अनि परमेस्वरना मुने दारमिक पोल्लो कियाना चिलकत लेहका पोन्डस, 15 अनि शान्तिता सोबाता पोल्लो साटि मन्ता तयारि जोळांग लेहका काल्कनिगा करस; 16 इव सबोयतासंग निमाट सयताना सबोय पतियतांग बाणकुन पिहिला परकिट इन्जोर परमेस्वरना पोरोयता विस्वासतुन ढालता लेहका येताट। 17 अनि परमेस्वर हिन्तोर ओद पिसानातुन सेयनिकना टोपि लेहका अनि पवित्र आत्माता तलवार मन्ता परमेस्वरना पोल्लोतुन येतस वाटाट। 18 सबोय बेरा अनि सबोय परिस्थितिते आत्माता लावदे प्रार्थना किसोर मन्ट। अनि सबोय पवित्र लोकुरक साटि सावदानते दरोज प्रार्थना किसोर मन्ट। 19 अनि नना मसिना राजदूत आस परमेस्वरना सोबाता पोल्लो वेहान्तोना इन्जोर जेहलतिगा मन्तोना। नना परमेस्वरना सोबाता पोल्लो वेहाना बेरा सोबाता पोल्लोता रहस्य हिमतासंग वेहान साटि नाकुन पोल्लो पुटि, 20 ओरा साटि बदाम वळकिला पहाजे अदाम हिमतते सोबाता पोल्लोतुन वळकिलाय नावा साटि प्रार्थना किम्ट। आकरि अभिवादन 21 नना बदाम मन्तोना अनि बाताल कियाला आतोना इदेन निमाट वने पुन्ट इन्जोर मावोर प्रिय तमो अनि प्रबुनिगा वरोर विस्वासयोग्य सेवक मन्तोर ओर तुखिकुस मिकुन सबोय वेहानुर। 22 निमाट नावा पोल्लो पुन्दान अनि ओर मिया मन्दुन शान्ति हेविर इन्जोर नना ओन मिया हेरे लोहिला आतोना। 23 परमेस्वर बाबो अनि प्रबु येसु मसिनिकेडाल तमोलोरकुन शान्ति अनि विस्वासतासंग मया पुटि। 24 बोर मावोर प्रबु येसु मसिनिगा बसके अन्त आयो आयार इदाम मया इरान्तोर ओरक सबोय लोकुरासंग दया आसोर मनि। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.