इफिसुस 5 - Muria Far Westernनिमाट वेळिचिता बालक बनेमाम्ट 1 इन्जोर परमेस्वरना प्रिय बालक लेहका निमाट परमेस्वरना अनुकरण किम्ट। 2 अनि मावा पिसाना साटि मसि आपुनतुन मधुर दयमुरता रुपते परमेस्वरतुन भेटता अनि बलिदान किस अर्पण कितुर। इन्जोर मसिहाल मिकुन बदाम मया कितुर अदामे निमाट वने वरोन दुसरोन मया किस जिवेमाम्ट। 3 मियागा व्यभिचार अनि बोदायि प्रकारतांग अशुद्ध बुतो या लालुचता पोल्लोंग आयमाकि बाक्याकि ओव सबोय पोल्लोंग परमेस्वरना पवित्र लोकुरकुन योग्य हिले। 4 अनि अशिल पोल्लोंग अनि बेकारता जुटाह पोल्लोंग अनि बेकारता खराब मजाक केमाट मति मिया नडुम परमेस्वरना धन्यवाद हियालाय पहाजे। 5 अनि व्यभिचार केवाल, अशुद्ध बुतो केवाल या लालचि मानेय-लालचि मूरति पुजाता लेहका मन्ता-ओरक मसिना अनि परमेस्वरना राज्यतोर वारस आय परोर इन्जोर निमाट पुन्तोरिट। 6 बोरायि मिकुन खोटाल करिहनाते दोखा हेमाकिर, बाक्याकि इवे बुतोता कारण परमेस्वरना दन्ड परमेस्वरना आग्या मानेमायोर लोकुरकनिग आन्ता। 7 इन्जोर साटि निमाट ओरा सहभागि आयमाट। 8 बाक्याकि निमाट पहले परमेस्वरना खरोयता बारेते आन्दार लेहका अन्जान मतोरिट मति इदेक निमाट प्रबुनिगा वेळिचितिगा वातोरिट इन्जोर निमाट प्रबुना लोकुरा लेहका ताकाट। 9 (बाक्याकि वेळिचितिगा मन्वालोर लोकुरा बुतोता कायांग सबोय प्रकारता भलायि अनि दारमिकता अनि खरोय मन्ता।) 10 अनि प्रबुन गिरदा कियाना पोल्लो बाताल मन्ता इदेन निमाट समजेमाम्ट। 11 अन्दकारता बेकार बुतोतिगा सहभागि आयमाट मति अदेन लोकुरा मुने प्रगट किस तोहाट। 12 बाक्याकि परमेस्वरिन मानेमायोर लोकुरा गुपित बुतोता पोल्लोंग वळकान साटि वने लज्जाता पोल्लोंग मन्तांग। 13 अनि सबोय गुपित बुतो वेळिचिनिकेडाल प्रगट आन्तांग बाक्याकि वेळिचिते आन्दारतिगा सबोय गुपित मन्ता अदेन हूळ परान्तोरोम। 14 इन्जोर ओर इदाम इन्तोर, “हे हुन्जवाल, हातोर निगाडाल जिवे माम; ते मसिना वेळिचि नियागा चमकेमायार।” निमाट परमेस्वरना मुने भजन अनि स्तुतिता पाटांग ओम्ट 15 इन्जोर मिया जिवनता बारेते हुशयारिते मन्ट, निरबुद्धि लेहका जिवे मायमाट मति बुद्धिमान लेहका ताकाट। 16 अनि इव खराब दियांग मन्तांग इन्जोर मिकुन पुटता सन्दितुन बराबर उपयोग किम्ट। 17 इद कारण निमाट निरबुद्धि आयमाट, मति प्रबुना इच्चा बाताल मन्ता इन्जोर ध्यानते समजेमाम्ट। 18 दाळंगो उन्जुन बिगडेमायमाट, बाक्याकि इदेनते व्यभिचार आन्ता। 19 मति पवित्र आत्माते पुरा आसोर निमाट आपसतिगा भजन अनि स्तुतिता पाटांग अनि आत्मिक पाटांग ओसोर मन्ट अनि आप-आपुना मन्दिगा प्रबुना मुने पाटांग अनि कीर्तन किसोर मन्ट। 20 अनि दरोज सबोय पोल्लोंग साटि मावोर प्रबु येसु मसिना पोरोयते परमेस्वर बाबोना धन्यवाद किसोर मन्ट। 21 मसिना आदरते वरोर दुसरोना अदिकारते मन्ट। आळिवुर साटि उपदेश 22 हे मुत्तेहनिटा, बदाम निमाट प्रबुन अधिन आन्तोरिट अदामे आप-आपुना मुजोहाना अधिन मन्ट। 23 बाक्याकि बदाम मसि आपुना मेन्दुल मन्ता ओद मसिलोकुरा सभाता पिसियवाल आस मसिलोकुरा सभाता तला मन्तोर अदामे मुजो वने मुत्तेना तला आन्दुर। 24 इन्जोर बदाम मसिलोकुरा सभा मसिना अदिकारते मन्ता, अदामे मुत्तेंग वने सबोय पोल्लोंगतिगा आप-आपुना मुजोहाराना अधिनते मन्दिला पहाजे। 25 हे मुजोहनिटा, मसिहाल वने मसिलोकुरा सभातुन मया किस आपुनतुन ओरा साटि बलिदान हिसितुर अदामे आप-आपुना मुत्तेहनासंग मया इराट। 26 एरते साप किस शुद्ध किन्तोर अदाम लेहका मसि आपुना पोल्लोते विस्वासि लोकुरकुन शुद्धि किस पवित्र बनेहकिन्तोर। 27 बाक्याकि अदेन बोदायि डाग, कोमजेमाता अनि इदाम बोदायि प्रकारता दोष मनमाकि। मति पवित्र अनि निरदोष आस आपुना साटि उन्दि मसिलोकुरा उन्दि मान्जता सभा बनेहकिस आपुना हेरे मन्दान साटि अदेन आपुनतुन सोपे कितुर। 28 इदामे मुजोहाराल आप-आपुना मुत्तेन आपुना मेन्दुल लेहका मया इरिर। आपुना मुत्तेन मया इरान्तोर ओर आपुनतुन मया इरान्तोर। 29 बाक्याकि बोरायि बसकेय आपुना मेन्दुलतुन वेयरि केवोर मति बदाम मसिहाल मसिलोकुरा सभातुन किन्तोर अदामे अदेना पालन-पोषण किन्तोर। 30 बाक्याकि माक ओना मेन्दुलता भाग मन्तोम। 31 “इद कारण मानेय आपुनोर अवाल-बाबोन तासिस आपुना मुतेनसंग मिलेमास मन्दानुर अनि ओरक इवुरास उन्दि मेन्दुल आयनुर” इन्जोर पवित्र पुस्तक इन्ता। 32 इद रहस्य पकाय महत्वता मन्ता, मति नना इद मसिहा अनि मसिलोकुरा सभाता बारेते इन्तोना। 33 मति मियागाडाल सबोय लोकुरक आपुना मुत्तेन आपुनाय लेहका मया इरिर अनि मुत्ते वने आपुना मुजोहाराना आदर कियाला पहाजे। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.