इफिसुस 4 - Muria Far Western

निमाट मसिना मेन्दुलतिगा उन्दि आस मन्ट

¹ प्रबुना सोबाता पोल्लो वेहानाता कारण नना जेहलतिगा मन्तोना। परमेस्वर मिकुन केयतुर ओद केयानाता अनुसार जिवन जिवेमायिला पहाजे इन्जोर नना मिकुन विनन्ति किन्तोना,

² सबोय नम्रताते कोमलताते अनि धिरजतासंग दरोज व्यवहार किम्ट अनि मयाते वरोर दुसरोन सहन किम्ट।

³ मिया सबोय सोबाय बुतोतुन शान्तितासंग पवित्र आत्माता एकजुटताते कियान साटि सबोय प्रकारता कोसिस किम्ट।

⁴ बसके मिकुन केयस मतोर ते उन्दिय आशासाटि केयस मतोर इदामे उन्दिय मेन्दुल अनि उन्दिय आत्मा मन्ता।

⁵ वरोरे प्रबु मन्तोर, उन्दिय विस्वास अनि उन्दिय बपतिस्मा मन्ता,

⁶ सबोय लोकुरिगा बुतो किन्तोर अनि सबोय लोकुरासंग मन्तोर अनि सबोय लोकुरा बाबो परमेस्वर वरोरे मन्तोर।

मसिलोकुरा सभाता अलग अलग सेवा

⁷ मति मावानिगाडाल सबोय लोकुरकुन मसिना दानता परिमाणता अनुसार दया पुटता।

⁸ “ओर बन्दिहकुन दोहच पोरो अन्जतुर अनि मानेयकुन सोबाता दान हितुर” इन्जोर पवित्र पुस्तकतिगा इन्तोर।

⁹ “ओर पोरो अन्जतुर” मन्जे मसि दरतिता अडियता जागातिगा वने रयस मतोर इन्जोर स्पष्ट अर्थ हिता मन्ता।

¹⁰ अनि दरतिता अडियता जागातिगा वने रयतुर ओर सबोय लोकुरकुन परमेस्वरना सबोय गुणते पुरा केविर इन्जोर सबोय आबारता पोरो अन्जतोर वने मन्तोर।

¹¹ ओर हुचुक लोकुरकुन येसुना खास चेला इन्जोर आचतुर अनि हुचुक लोकुरकुन परमेस्वरना पोल्लो वेहवालोरक इन्जोर आचतुर अनि हुचुक लोकुरकुन सोबाता पोल्लो वेहवालोरक इन्जोर आचतुर अनि हुचुक लोकुरकुन मसिलोकुरा सभाता विस्वासि लोकुरकुन मेहवालोरक इन्जोर आचतुर अनि हुचुक लोकुरकुन परमेस्वरना पोल्लो करिहवालोरक इन्जोर निवळेकितुर।

¹² अनि ओर लोकुरा सेवाता द्वारा मसिना मेन्दुल मन्ता ओद मसिलोकुरा सभातुन मसिना संबन्दते मजबुत बनेहकियाना साटि परमेस्वरना सबोय लोकुरकुन तयार कियाना मन्ता।

¹³ अनि बचोनवनाह विस्वासतिगा अनि परमेस्वरना मरिना अग्यानतिगा उन्दि आस मसि बदाम संपुर्ण मन्तोर अदाम माक वने ओना लेहकाय उन्दि संपुर्ण मानेय बनेहमायनावनाह मन्ता।

¹⁴ इन्जोर माक हुडलोर बालक लेहका असा मनोम आयकोम। बाक्याकि बदाम समुद्रतिगा डोंगातुन वळिय वास नालुंग बासाडाल अदेन डेयहान्ता अदामे ओद खोटाल करहाना मावा विस्वासतुन डेयहार इन्जोर माकुन दोखा हिन्ता ओद खोटाल करहानातुन स्विकार केवाट। दोखा हेवालोरक इद खोटाल करहाना फयले किन्तोर।

¹⁵ मति मयातिगा दुसरो लोकुरकुन खरोय करिहिनातुन वळकस सबोय पोल्लोतिगा येसु मसिना लेहका बरसोरिंग हन्ट ओर येसु मसि आपुना विस्वासि लोकुरकुन नियन्त्रन किन्ता तला लेहका मन्तोर। विस्वासि लोकुरक ओना मेन्दुल लेहका मन्तोरक।

¹⁶ अनि मेन्दुलता अलग अलग भागता बुतो अलग मन्ता। अनि ओद अलग अलग भाग आपुना आपुना बुतो मयाते बराबर किसुन सबोय मेन्दुलतुन बरसाना अनि मजबुत कियान साटि मदत किन्ता। इदाम ओनिगा सबोय विस्वासि लोकुरक मेन्दुल लेहका उन्दि आस सबोय परिस्थितिते जोळेमास मयाते बरसोरिंग मन्तोरक।

मसिनिगा माकुन पुनाल जिवन मन्ता

¹⁷ इन्जोर परमेस्वरनिगा विस्वास केवोर यहुदि ओयोर लोकुरक आपुना मन्दा गलति विचारते ताकान्तोरक अदाम निमाट ओरा लेहका असा ताकमाट इन्जोर नना प्रबु नाकुन हितोर ओद अदिकारते मिकुन वेहान्तोना।

¹⁸ ओरक परमेस्वरना बारेते बराबर पुनोर अनि परमेस्वरना बारेते समजेमायान साटि ओरकुन इच्चा हिले इन्जोर ओर अदेन पकाय विरोद किस परमेस्वर आपुना लोकुरकुन हिन्तोर ओद पुनाल जिवनताल ओरक लक हतुरक।

¹⁹ अनि ओरकुन बाताले खराब बुतो कियान साटि बोदे लज्जा हिले। अनि ओर लोकुरक पकाय लालुचते सबोय प्रकारता व्यभिचारता खराब बुतोतुन पकाय लालुचते कियान साटि आपुनतुन समरपित किन्तोरक।

²⁰ मति मसिना बारेते निमाट बोद करिहतोरिट ओद पोल्लो ते इदाम हिले।

²¹ अनि बाताल खरोय निमाट ओनायि केन्जतिट अनि करिहितिट ओद सबोय पोल्लो येसुना खरोय करहाना मता।

²² निमाट आपुना पहलेटा चालचनता बारेते मिकुन दोखा हिन्द ओद जुनाल स्वभावतुन टन्डस हरचिम्ट इन्जोर करहितोरिट।

²³ अनि आपुना मन्दा आत्मिक स्वभावते पुनाल बनेमासोर हन्ट।

²⁴ अनि परमेस्वरना अनुरुप दारमिकता अनि पवित्रताता खरोयते बनेहकिता मन्ता ओद पुनाल स्वभावतुन निमाट येताट।

पुनाल जिवन साटि नियम

²⁵ इन्जोर खोटाल वळकाना हरचुन सबोय लोकुरक आपुनोर हेरेटोरासंग खरोय वळकाट बाक्याकि माक सबोय उन्दिय मेन्दुलता अलग अलग भाग मन्तोरोम।

²⁶ पाप आयार इदाम होंग वायिला हेमाट, बेरा मुळन्दान वनाह मिया होंग मनमाकि।

²⁷ अनि सयतानतुन सन्दि हेमाट।

²⁸ बोर कलेर बुतो किसोर वातोर, ओर मुने कलेता बुतो केमाकिर मति बोन जरुरि मन्ता ओनासंग तुसिला बाताले पहाजे इन्जोर ओन आपुना कयदे सोबाय मेहनत कियाला पहाजे।

²⁹ बोर केन्जनुर अदेनते ओरा भला आयि इन्जोर लोकुरकला मदत साटि जरुरि मन्ता सोबाय पोल्लो वळकिला पहाजे मति बोदायि खराब पोल्लो मिया टोडिताल पसियमाकि।

³⁰ परमेस्वरना पवित्र आत्मातुन दुःखि केमाट, ओर मिकुन लेहचियानाता दिया साटि मियागा शिक्का हितोर।

³¹ सबोय प्रकारतांग नफरत, प्रकोप, होंग अनि वाहचाना, निन्दा अनि सबोय प्रकारता खराब स्वभावतुन बाहरो टन्डस हरचिम्ट।

³² अनि मसिना द्वारा परमेस्वर मिया गलतितुन मापि कितुर अदामे निमाट वने वरोर दुसरोना गलति मापि किस वरोर दुसरोरकुन दयालु अनि मयालु आम्ट।