इफिसुस 3 - Muria Far Western

परमेस्वरना रह्स्य योजना सबोय लोकुर साटि प्रगट किन्तोर

¹ इदे कारणते नना पोलुस निमाट यहुदि आयोर लोकुरक साटि येसु मसिना सोबाता पोल्लो वेहानाता कारणते जेहलतिगा मन्तोना।

² मिया साटि परमेस्वर दयातासंग विशेषाल बुतो नाकुन सोपे कितोर इन्जोर अदेना बारेते निमाट जरुर केन्ज मनकिट।

³ ओद रहस्य योजना नावागा दिव्यदर्शनता द्वारा प्रगट आत इन्जोर नना मुनेय हुडुन्सा कोटतोना।

⁴ अदेन निमाट वाचेकियाकिट ते मसिना बारेता ओद रहस्यता योजनाता बारेते नाकुन समजेमायाना बचोन मन्ता इन्जोर निमाट पुन्द परान्तोरिट।

⁵ बदाम पवित्र आत्माता द्वारा इदेक ओनोर पवित्र येसुना खास चेला अनि परमेस्वरना पोल्लो वेहवालोरकनिगा प्रगट कितोर अदामे इद रहस्य योजना परकेडा पिळितुन इदाम प्रगट केवोर आस मतोर।

⁶ यहुदिलोकुरक आयोर मसिना संगतिगा परमेस्वरना सोबाता पोल्लोतुन विस्वास किस यहुदि लोकुरासंग परमेस्वरना सबोय भलायिता वारिसदार आयिला पहाजे। यहुदि आयोर अनि यहुदिलोकुरक उन्दि मेन्दुलता अलग अलग भाग मन्ता अनि इद रन्ड दल येसु मसिना वाचाता आशिषतुन सहभागि आयिला पहाजे इन्जोर ओद रहस्य योजना मन्ता।

दुसरो जातितिगा पोलुसना सेवा

⁷ अनि परमेस्वरना ओद सोबाता पोल्लोतुन ओना लावता प्रभावता अनुसार नाकुन पुटता परमेस्वरना दया दानते नना सेवक बनेमातान।

⁸ अनि सबोय पवित्र लोकुरकनिगा नना हुडलोरताल हुडलोर मन्तोना मति यहुदि आयोर लोकुरकनिगा नाकुन मसिना अनन्त दनरुपि सोबाता पोल्लोतुन प्रचार कियाना,

⁹ सबोयतुन बेनहकेवाल परमेस्वरना मन्दिगा पकाय काळताल मकस मता ओद रहस्य योजनाता अर्थ बाताल मन्ता इन्जोर सबोय लोकुरकुन वेहान साटि इद दया नाकुन हितोर।

¹⁰ इदाम इदेक स्वरगतिगा राज अनि अदिकारतुन परमेस्वरना अलग अलग प्रकारता ग्यान,

¹¹ ओर मावोर प्रबु येसु मसिनिगा पुराकिता अनन्त योजना अनुसार मसिलोकुरा सभाता द्वारा तोहिला परिर।

¹² मसिनिगा विस्वासता कारण माक हिमतते अनि भरोसाते परमेस्वरना हेरे वायाना अदिकार मन्ता।

¹³ इद कारणते नना मिया साटि सहनकिता ओद पकाय तकलिप मिया हजोर महिमा मन्ता। इन्जोर अदेना कारण निमाट हिमत सोळेकेमाट इन्जोर नना विनन्ति किन्तोना।

येसु मसिना मया

¹⁴ परमेस्वरना इद पकाय हजोर योजनाता बारेते विचार किन्तोना इन्जोर नना स्वरगतिगा अनि दरतितिगा सबोयतुन बनेहकितोर,

¹⁵ ओर बाबोना मुने मिन्डांग टेकेकिस प्रार्थना किन्तोना।

¹⁶ ओर आपुना महिमाता पकाय हजोर धनता अनुसार आपुना पवित्र आत्माता द्वारा मिया मन्दा लावतुन मजबुत केविर इन्जोर,

¹⁷ मसिनिगा निमाट विस्वास किन्तोरिट इन्जोर ओर मिया मन्दिगा दरोज मन्दिला पहाजे। अनि उन्दि मराता हिरक बदाम ओद मरातुन मजबुत किन्तांग या उन्दि लोता पायवा बदाम ओद लोतुन मजबुत किन्ता अदामे परमेस्वरना मया मिकुन मजबुत किसोर मनि।

¹⁸ मसिना मया बचोन रून्दि, बचोन लाम्बि, बचोन ऊचो अनि बचोन खोल मन्ता इन्जोर परमेस्वरना सबोय पवित्र लोकुरासंग समजेमायाना लाव पुटि।

¹⁹ अनि बोरे बसकेय पुरा समजेमाय परोर परमेस्वरना ओद मायातुन समजेमाम्ट अनि निमाट परमेस्वरना सबोय गुणते निन्दाट इन्जोर नना प्रार्थना किन्तोना।

²⁰ इदेक माक बचोन तल्क परान्तोराट या बगावनाह माक विचार किया परान्तोराट अदेनताल वने पकाय कियान साटि पकाय हजोर लावदे मावागा बुतो कियापरान्तोर ओर परमेस्वरिन,

²¹ मसिलोकुरा सभातिगा अनि येसु मसिनिगा ओना महिमा पिळि-पिळिवनाह हमेशा आसोर मनि। आमिन।