इफिसुस 2 - Muria Far Western

माक हायानाताल जिवनतिके वातोम

¹ निमाट पापते अनि परमेस्वरना विरुद किता आपुना गलतिता कारणते हास मतोरिट। अगडाल येसु मिकुन जितो कितुर।

² ओदेनते निमाट पहले आबारता दुष्टात्मांगता राजान अनि बोर आग्यातुन मानेमायोरक ओरिगा बुतोकिन्तोर ओव आत्मातुन केन्जुन इद सन्सारता गलति हरिते इद दुनियाता लोकुरा लेहका निमाट ताकसोर मतोरिट।

³ ओरिगा माक सबोय लोकुरक पहले आपुना मन्दा खराब इच्चाता अनुसार ताकिन्दोम, मेन्दुलतुन अनि मन्दा इच्चातुन गिरदा किस दुसरो लोकुरा लेहका परमेस्वरना दन्ड येताना योग्य बालक मतोम।

⁴ मति परमेस्वर पकाय दयावाले मन्तोर अनि ओना हजोर मयाता कारण ओर माकुन पकाय मया कितुर।

⁵ माक आपुना गलतिता कारण आत्मिक रितिते हास मतोरोम ते परमेस्वर माकुन मसिनासंग जितो कितुर (परमेस्वरना दयातेय मिया मुक्ति आता),

⁶ बाक्याकि माक येसु मसिनासंग मन्तोरोम इन्जोर परमेस्वर माकुन मसिनासंग असा जितो कितुर अनि येसु मसिना संगेय स्वरगता सिंहासनतिगा उपहितुर।

⁷ इदेनते परमेस्वरना अतुलय रूपता पकाय हजोर दया अनि दया येसु मसिना द्वारा माकुन हितुर इन्जोर परमेस्वरिन वायाना काळता सबोय लोकुरकुन इद पोल्लो तोहपरान्तोर।

⁸ बाक्याकि विस्वासता द्वारा दयातेय मिया पिसाना आता, अनि इद मिकुन आपुना बुतोते पुटिला परो मति इद परमेस्वरना दान आन्दु।

⁹ बोरे इदेना अभिमानि केवो आयिकाट इन्जोर इद मावा किता बुतोता कारणते वने आयो।

¹⁰ बाक्याकि माक ओनोर बनेहकितोर मन्तोरोम। माक सोबाय बुतो कियाला पहाजे इन्जोर परमेस्वर येसु मसिना द्वारा माकुन पुनाल जिवन बनेहकितुर; माक पकाय सोबाय बुतो किसोर आपुना जिवन ताकिहिला पहाजे इन्जोर परमेस्वर मुनेटाले योजना तयार कितोर।

सबोय लोकुरक येसु मसिनिगा उन्दि मन्तोरक

¹¹ निमाट दुसरो जातितिगा जनम आस मतोरिट अनि आपुना मेन्दुलतिगा कयदे किता कतनाते “कतनावाले” इन्तोर ओर लोकुरक मिकुन “बिना कतनावाले” इन्जोर इन्दुर।

¹² अनि ओद बेरा निमाट मसिताल अलग अनि इस्रायेल नागरिकत्वतिगा संबन्द हिले आसि। अनि परमेस्वर इस्रायेल लोकुरासंग किता करारतिगा मन्ता ओद वाचातुन पुनविट अनि बोदे आशा हिलेर मतोरिट।

¹³ पहले निमाट परमेस्वरना हेरेटाल लक मतोरिट मति इदेक येसु मसिना संगते, मसिना नतुरता द्वारा निमाट परमेस्वरना हेरे आतोरिट।

¹⁴ यहुदि अनि यहुदि आयोर लोकुरकना नडुम दिवाल लेहका नफरताता उन्दि वेटाळ निच मता अनि ओद वेटाड ओरकुन अलगो किस मता, मति येसु मसि कुरुसतिगा आपुना बलिदानता द्वारा ओद वेटाडतुन मुटिहचितुर। येसु मसि ओरा हेरे शान्तितुन ततोर। यहुदि अनि यहुदि आयोर लोकुरकुन ओर उन्दि बनेहकितुर।

¹⁵ उन्दि वेटाड लेहका लोकुरकुन अलगो किस मता येहुदि लोकुरा सबोय नियम अनि अदेना आदेशता कानुनतुन येसु मसि आपुना बलिदानता द्वारा बन्द कितुर।

¹⁶ अनि कुरुस पोरो हासुन यहुदि अनि यहुदि आयोर लोकुरा वेयरतुन नाश किस मसि इवुरासकुन पुनाल मेन्दुल बनेकिस अदेना द्वारा ओरकुन परमेस्वरिन मिलेह केविर इन्जोर।

¹⁷ ओर वास परमेस्वरताल लक मतोरक यहुदि आयोर अनि परमेस्वरना हेरे मतोरक यहुदिलोकुरकुन परमेस्वरिन मिलेहकियानाता शान्तिता सोबाता पोल्लो केन्जिहतुर।

¹⁸ बाक्याकि ओनाय द्वारा माक इवुरास उन्दि आत्मातिगा बाबोना मुने हन्दिला परान्तोरोम।

¹⁹ इन्जोर साटि निमाट यहुदि आयोर लोकुरक इदेक दुसरो देशतोर अनि मुसाफिर हिलविट मति पवित्र लोकुरासंग अनि आपुना देशतोरक अनि परमेस्वरना लोतोर आतोरिट।

²⁰ अनि निमाट येसुना खास चेला अनि परमेस्वरना पोल्लो वेहवालना पायवाते बनेहमातोरिट अदेना विशेषाल कल लेहका येसु मसि मन्तोर।

²¹ ओनिगा निमाट विस्वासु लोकुरक सबोय रचेकिता इटांग लेहका उन्दि मिलेमास प्रबुनिगा पवित्र मन्दिर आस बरसोर दानता,

²² ओनिगा मिक यहुदि लोकुरक आयोर विस्वासि लोकुरक वने परमेस्वरना मन्दाना जागा आयान साटि पवित्र आत्माता द्वारा यहुदि लोकुरासंगे बनेहकिसोर मन्तोर।