कुलुसि 4 - Muria Far Western

¹ हे मालक लोकुरक, स्वरगतिगा मिया वने वरोर स्वामि मन्तोर इदाम आटवन इरस आप-आपुना दासनासंग न्याय अनि बराबर व्यवहार किम्ट।

प्रार्थना साटि प्रोत्साहन

² प्रार्थनाते ध्यान किसोर मन्ट, अनि धन्यवादता संग प्रार्थनाते केपसोर मन्ट।

³ अनि मसिना बारेता ओद रहस्य योजनाता वर्णन लोकुरकुन वेहान साटि परमेस्वर सन्दि हेविर इन्जोर मावा साटि वने प्रार्थना किम्ट। नना इद सोबाता पोल्लो वेहतान इन्जोर इगा जहेलतिगा मन्तोना।

⁴ ओद पोल्लो नना बदाम वळकिला पहाजे अदाम स्पष्ट रितिते वळकान साटि प्रार्थना किम्ट।

⁵ निमाट मसिनिगा विस्वास केवोर ओरक लोकुरासंग मन्दाना बेरा पकाय कमि सन्दि मन्ता इन्जोर समजेमास ओरासंग बुद्धिते व्यवहार किम्ट। बाक्याकि मिया द्वारा ओरक वने मसिन पुन्दिला पहाजे।

⁶ निमाट येसु मसिन पुनोर ओर लोकुरकुन सन्देश हियाना बेरा पकाय सोबाय अनि दयाते वळकिकिट। असके लोकुरक मिया सन्देशतुन सोबाय मन लावेकिस केन्जानुरक। अनि बोरे बाताले प्रश्न पुच्चेमायनुर ते अदेन बराबर उत्तर हियाना साटि निमाट तयार मन्ट।

अभिवादन

⁷ नावा बारेता पोल्लोंग तुखिकुस मिकुन वेहानुर। ओर मसि विस्वासतिगा नावा प्रिय तमो मन्तोर अनि ओर इमान्दारिते विस्वासयोग्य प्रबुना सेवा नावासंग किन्तोर।

⁸ निमाट मावा दसा पुन्दिला पहाजे अनि ओर मिया मन्दुन हिमत हेविर इन्जोर ओन नना मिया हेरे लोहतोना।

⁹ ओनासंग नना उनेसिमुसिन वने लोहतोना ओर विस्वासयोग्य अनि प्रिय तमो अनि मियागाडाले वरोर मन्तोर येरक मिकुन इगाडांग सबोय पोल्लोंग वेहानुर।

¹⁰ नावासंग जेहलदिगा मतोर ओर अरिस्तरखुस अनि बरनबासनोर तमो मरकुस ओरक मिकुन नमसकार किन्तोरक (मरकुसना बारेते मिकुन आग्या पुटस मता इन्जोर ओर मिया हेरे वायिर ते ओनासंग सोबाय व्यवहार कियाकिट।)

¹¹ युस्तुस इन्तोर ओर येसुना वने मिकुन नमस्कार किन्तोर। यहुदिलोकुरक निगाडाल केवल येरे परमेस्वरना राज्य साटि नावासंग बुतो कियाला आतोर। ओरक नाकुन प्रोत्साहनता कारण आस मतोर।

¹² अनि मियागाडाल वरोर येसु मसिहानोर दास मन्तोर ओर इपफ्रास मिकुन नमस्कार इन्तोर। निमाट परिपूर्ण आस पुरा विस्वासतासंग परमेस्वरना इच्चातिगा स्थिर मन्ट इन्जोर ओर दरोज मिया साटि मनलावेकिस प्रार्थनातिगा पकाय मेहनत किसोर मन्तोर।

¹³ ओर मिया साटि अनि लेवुदिकिया अनि हियरापुलिसतिगा मन्तोरक साटि पकाय मेहनत किसोर मन्तोर इन्जोर नना ओना गवाह मन्तोना।

¹⁴ प्रिय डाक्टर लूका अनि देमासना मिकुन नमस्कार किन्तोरक।

¹⁵ लेवुदिकियातिगा मन्वालोर तमोलोरकुन अनि नुमफास अनि अदेना लोता मसिलोकुरा सभातुन नमस्कार वेहाट।

¹⁶ इद पत्र मिया मुने वाचेकिस आतपा लेवुदिकियाता मसिलोकुरा सभातिगा वने वाचे केविर। अनि लेवुदिकियाताल वायार ओद पत्र निमाट वने वाचेकियाकिट।

¹⁷ अनि अरखिपुसतुन प्रबुनिगा निकुन सोपे कितोर ओद सेवा हुशयारिते पुरा कियाकि इन्जोर इन्किट।

¹⁸ नना पोलुस आपुना कयदे इद नमस्कार कोटिला आतोना। नना जेहलदिगा मन्तोना इन्जोर आटवन इराट। मियागा दया आसोर मनि।