कुलुसि 3 - Muria Far Westernमसि विस्वासते मिकुन पुनाल जिवन मन्ता 1 ते इदेक निमाट मसिनासंग असा जिवेमातोरिट इन्जोर मसिहा परमेस्वरना तिन्दान कयबासा लावतासंग हजोर मानते उदितोर ओद स्वरगतिगा बाताल मन्ता अदेन पळकसोरिंग मन्ट। 2 दरतितांग चिजकनिगा आयो मति स्वरगता चिजकतिगा पकाय ध्यान लावेकिम्ट। 3 बाक्याकि निमाट हातोरिट मन्जे मिया जुनाल पापताल स्वभाव हाता अनि मिया पुनाल जिवन मसिनासंग परमेस्वरना मुने सुरक्षित किस मकिहिस इरता मन्ता। 4 मसिहा मिकुन पुनाल जिवन हेवाल आन्दुर। ओर असा प्रगट आयनुर असके निमाट वने ओनासंग हजोर महिमाते प्रगट आयकिट। 5 इन्जोर व्यभिचार, अपवित्रता, वासना, खराब इच्चा अनि मूरति पुजाता बराबर मन्ता लालुच इदाम मियागा बारायि सन्सारिक मन्ता अदेन होवक्स वाटाट। 6 (इद कारणते परमेस्वरना पकाय होंग आग्या मानेमायोर ओर लोकुरकनिगा अरान्ता।) 7 अनि मसिना विस्वासते वायाना पहले निमाट वने इव सबोय गलतिता अनुसार आपुना जिवनते ताकसोर मन्दिट। 8 मति इदेक निमाट वने इव सबोयकुन होंग, सन्ताप, वेयरभाव, चाहळिंग अनि खराब खराब वळकाना इव सबोय पोल्लोंग तासिम्ट। 9 वरोर दुसरोन खोटाल वळकमाट, बाक्याकि निमाट आपुना जुनाल पापता स्वभाव अनि अदेना सबोय बुतोतुन टन्डस हरचितोरिट। 10 अनि निमाट आपुना बनेहकेवाल परमेस्वरिन बराबर समजेमास ओना लेहका आयान साटि निमाट सबोय लोकुरक इदेक पुनाल स्वभावतुन स्विकार कितोरिट। 11 अगा यहुदि अनि यहुदि आयोर लोकुरकनिगा बाराय फरक मनो आत, कतना अनि कतना आयोर इदाम, हेन्दडाल अनि अळानि, दास अनि स्वतन्त्र इद भेदे हिले। मति मसि दुनियाता सबोयताल हजोर मन्तोर अनि ओर सबोय लोकुराताल हजोर आस सबोय लोकुरासंग मन्तोर। 12 परमेस्वर मिकुन आचकुन मिकुन पवित्र बनेहकितुर। अनि परमेस्वर मिकुन पकाय मया किन्तोर। इन्जोर सहानुभुति, दया, नम्रता, कोमलता, अनि सहनशिलतातुन दुसरो लोकुरासंग दरोज प्रगट किसोर मन्ट। 13 अनि बोरे बोनाय दोष हियानाता बोदायि कारण मनि ते वरोर दुसरोन सहन किस गलतितुन मापि किम्ट। प्रबु मिया गलतितुन मापि कितुर अदामे निमाट वने किम्ट। 14 इव सबोय पोल्लोंग किम्ट, मति इदेनते सबोयताल हजोर मया मन्ता इन्जोर निमाट आपसते मया किम्ट अनि मयाते उन्दि आस पुरा जोळेमासोर मन्ट। 15 निमाट सबोय लोकुरक मसिना मेन्दुलता भाग मन्तोरिट। अनि शान्तिते मन्दान साटि परमेस्वर मिकुन आचतुर इन्जोर मसिना शान्ति मिया विचारतुन नियत्रण केवि। अनि दरोज धन्यवाद किसोर मन्ट। 16 अनि सिद्ध ग्यानतासंग वरोर दुसरोन करहाट अनि चेतावनि हिम्ट, अनि आपुना आपुना मन्दिगा धन्यवादतासंग परमेस्वर साटि भजन अनि परमेस्वरना स्तुतितापाटांग अनि आत्मिक पाटांग ओम्ट। इदाम मसिना पोल्लो मिया मन्दिगा सोबाय मन्दिला हिम्ट, 17 पोल्लोतिगा या बुतोतिगा बारायि किम्ट ओद सबोय प्रबु येसुना आग्यातुन पालन कियाना लेहका किम्ट। अनि ओना द्वारा बाबो परमेस्वरना धन्यवाद किम्ट। मसि परिवारता बारेता उपदेश 18 हे मुत्तेहनिटा, प्रबुनिगा उचित मन्ता अदामे आप-आपुना मुजोहाराना अधिन मन्ट। 19 हे मुजोहाराल, आप-आपुना मुत्तेतुन मया किम्ट, अनि अवेहनासंग कटोरता केमाट। 20 हे बालक, सबोय पोल्लोतिगा आप-आपुना अवाल-बाबोना आग्याता पालन किम्ट, बाक्याकि निमाट इदाम कियानपा प्रबु गिरदा आन्तोर। 21 हे बाबोलोरक, मिया बालकनुंग पकाय होंग वायार इदाम पोल्लोंग केमाट। दासक लोकुरा बुतोता बारेते नियम 22 हे दासक लोकुरक, आपुना सन्सारिक मालक लोकुरकना सबोय पोल्लोता पालन किम्ट, मानेयकुन गिरदा केवाल लेहका मालक लोकुरक मिकुन हुळानपा ओरकुन तोहान साटि आयो मति प्रबुना वरेते मन्दा खरोयते मालक लोकुरा सबोय पोल्लोता पालन किम्ट। 23 बारायि निमाट किन्तोरिट ओद सबोय बचोन सोबाय निमाट कियापरान्तोरिट अचोन सोबाय अनि इमान्दारिते किम्ट। अनि ओद मानेयक साटि आयो मति प्रबुना साटि कियाना लेहका किम्ट। 24 मिकुन इदेना बदला प्रबुनिकेडाल बकसिसता रुपते वारिसदार आयाना प्रतिफळ पुटार इन्जोर पुन्ज निमाट प्रबु मसिना सेवा किसोर मन्ट। 25 बाक्याकि बोर खराब बुतो कियानुर ओन अदेना अनुसार दन्ड पुटार अनि परमेस्वरिन बोनायसंग बोदायि पक्षपात हिले। |
© (Active) Wycliffe Bible Translators, Inc. All rights reserved.
Wycliffe Bible Translators, Inc.